Ua ia i Tatou Mea o loo Tatou Manaomia!
1 Ua tatou ola nei i se vaitaimi o loo matuā saili ai le toatele o le au talavou mo ni tali i a latou fesili e faatatau i le uiga moni o le olaga. O tulaga o loo ola ai, ua matuā eseese mamao lava mai tulaga na iai i le luasefulu po o le tolusefulu tausaga ua mavae, ia na ola aʻe ai ō latou mātua. E matuā eseese foi faafitauli o talavou i aso nei. I le masina o Mati, ua ia i tatou ai se avanoa e fesoasoani atu ai i talavou e ala lea i le faatomuaina atu o le tusi, Lou Talavou—Mauaina mai ai Aogā Silisili. Pe a ofoina le tusi, e tatau ona tatou manatuaina faafitauli o loo fesagai ma talavou i aso nei. O le ā e mafai ona tatou fai atu ai?
2 Atonu e aogā le faatomuaga lenei:
◼ “O le ā e te talitonu ua avea ma faafitauli aupito sili o loo fesagai ma talavou i aso nei? [Faatali mo se tali.] Pe e te silafia e mafai ona fesoasoani le Tusi Paia ia i tatou e tusa ai ma nei faafitauli?” Atonu o le a eseese ni tali, e faalagolago lava i le tulaga totino o le tagata o loo e talanoa atu i ai. Filifili se mataupu talafeagai i le tusi ma faaali puupuu i ai le auala o faasino atu ai i le Tusi Paia e avea o le puna o le fesoasoani moni. Afai e faaalia le naunau, ofo i ai le tusi.
3 Atonu o le a faaosofia e lenei fesili se talanoaga manaia:
◼ “Pe mafai faapefea e se talavou ona faia sona olaga ina ia taulau manuia? [Faatali mo se tali.] E toatele tagata e ioe mai e faapea, e tele nauā faafitauli faigata o loo fesagai ma talavou i aso nei. Ua faaalia i le Tusi Paia e faapea, e silafia e le Atua le auala e foia ai ō tatou faafitauli ma ua ia folafolaina mai lona fesoasoani ia i tatou.” Suʻe i le Salamo 1:1-3 ma pe a uma ona faitau le mau, ona suʻe lea i le tusi Talavou, i le itulau e 191 ma talanoa ai i le palakalafa e 14 ma le 15. Ona faamatala atu lea o le auala e aogā totino ai na fesoasoani.
4 Atonu e lelei ia te oe lou faapea atu:
◼ “Pe ua e iloaina ea o le ʻafa o le faitau aofai o le lalolagi i le taimi lenei, e i lalo ifo o le taʻi luasefulu tausaga le matutua? E ao ia i tatou uma lava ona tatou naunau atu i tagata talavou. O le mea moni, o le lagona lena o Lē na Foafoaina Mea, ma e finagalo o ia ina ia latou olioli i le ola. [Faitau le vaega muamua o le Failauga 11:9.] Ae po o tatou vaaia ea o fiafia moni lava tagata talavou uma? O loo fesagai i latou ma le tele o omiga i le olaga; e matuā tele faafitauli ua lē mafai ai ona latou maua le fiafia. O le tele o nei faafitauli e mafai ona alofiaina pe afai latou te iloa po o le ā o fai mai ai Lē na Foafoaina Mea. [Tagaʻi i le tusi Talavou, itulau e 144.] O le poto, o se puipuiga lea ma o le poto i le Afioga a le Atua e aogā faapitoa lava i le taimi lenei. E mafai e lea poto ona puipuia ai talavou mai lo latou oo atu i se tulaga lē fiafia ma malaia. [Faitau atu i ai le Failauga 11:10.]” Afai e tali fiafia mai, ona taʻu atu loa lea i ai e mafai ona tuuina mo ia le tusi.
5 Pe afai o le tagata lea e te talanoa atu i ai o se talavou, atonu la o le a e manao e faia sina suiga itiiti i le taulimaga lea e i luga, e faaaogā ai le vaega muamua o le Failauga 12:1.
6 Afai e pisi le tagata, pe e te lē o mautinoa foi o lava le naunau e faaalia, e mafai ona e tuua se mekasini po o se sāvali. Afai e te toe foi atu ma ua faaalia le fiafia, e mafai ona ofoina le tusi.
7 Tatou te fiafia uma lava e mauaina lenei lomiga lelei, ina ia mafai ai ona tatou faaaogaina totino i le fanua. Ua tatou mauaina le mea o loo tatou manaomia! Seʻi o tatou fesoasoani atu i isi e toatele, ina ia latou mauaina aogā mai le tusi, Talavou.