Pe e Mafai ona La Aogā ia te Oe?

O LE mekasini o loo e uuina ua saunia ina ia avea ma puna o faalaeiauga, i le faamanatuina o taiala a le Tusi Paia mo le faamausaliina o aiga ma le faatumauina o le faamaoni totino. Ua faaalia ai e faapea, o aso faigata i aso nei, sa valoia i le Tusi Paia, ma ua faamatilatila mai ai le vaifofo—o le pulega lea a le Malo o le Atua. Pe e mafai ona aogā ia te oe Le Olomatamata ma le Awake! o lona soa?

I Filipaina na tusi mai ai se fafine e igoa ia Vilma e faapea: “Afai e iai se upu e faamatalaina ai a outou lomiga, ou te iloa e fetaui i ai le ʻofoofogia.’ Faatoʻā ou vaai ma faitau i le taimi muamua i a outou mekasini o le Awake! ma Le Olomatamata ina ua ou alu atu i se pasi mai Manila agaʻi i le fale. E masani lava ona ou malaga ma ave ni aʻu nusipepa, ae i lea aso, sa leai se nusipepa na ou aveina.

“Sa nofo i oʻu autafa i le malaga se tamaloa ua faatagatamatua sa iai ni a outou lomiga. Ina ua uma ona ia faitauina le Awake!, sa ia avaʻe se isi mekasini, o Le Olomatamata. Sa ou puea le avanoa e faitauina ai le Awake! Ma le faamaoni lava, sa ou matuā fiafia e faitau na mekasini auā o mataupu uma e faaoso naunau, e fetaui lelei ma nei taimi, ma e faagaeetia ai.”

Sa faaiu mai faapea le faamatalaga a le fafine: “Ou te manao e maua a outou mekasini. Faamolemole, taʻu mai pe e faapefea ona ou mauaina a outou mekasini.” Sa fiafia le ofisa o le lālā i Filipaina e faia faapea e ala lea i le tuuina o le igoa o lenei fafine i le latou lisi o ē e lafoina atu i ai ia mekasini.

Pe E te Talia se Asiasiga?

E oo lava i lenei lalolagi ua tumu i faalavelave, e mafai lava ona e maua ai le fiafia mai le poto saʻo o le Tusi Paia e uiga i le Atua, lona Malo, ma lana fuafuaga matagofie mo tagata. Afai e te fia iloa nisi faamatalaga atili pe manao foi e asiasi atu se tasi e faia se suesuega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Western Samoa, po o se tuatusi talafeagai o loo lisiina mai i le itulau e 2.