Ua Iai so Tatou Tofiga
1 Na poloaiina e Iesu ona soo ina ia ‘fai tagata o nuu uma lava ma soo.’ (Mata. 28:19) I le 232 atunuu ma atu motu i le lalolagi atoa, e sili atu i le lima miliona i latou o loo vivii atu ia Ieova le Atua, ua saunia se molimau olaola i le faataunuuina o le poloaiga a Iesu. Ae faapefea i tatou taitoatasi? Po o tatou manatu mamafa i le tofiga ia talaʻi atu?
2 O se Tiute Tauave Tau Amio: O le tofiga, o “se poloaiga ia faia ni gaoioiga ua uma ona faamatala mai.” Ua faatonuina i tatou e Keriso e talaʻi. (Galu. 10:42) Sa iloa e le aposetolo o Paulo e faapea, o lenei poloaiga ua faaee atu ai ia te ia se mea e tatau ona fai, po o se tiute tauave tau amio, ia folafola atu le tala lelei. (1 Kori. 9:16) Seʻi fai se faataitaiga: Seʻi faapea o oe o se tagata o le auvaa o i luga o se vaa o le a goto. Ua faatonuina oe e le kapeteni ina ia lapataia le pasese ma faasino i latou i vaa faaola. Po o le a e faaleamanaia ea lena poloaiga ae uaʻi atu i le faasaoina tau o oe lava? E mautinoa e leai. O loo faalagolago atu isi tagata ia te oe. Ua lamatia o latou ola. O lou tiute tauave tau amio ina ia faataunuuina lou tofiga ina ia fesoasoani ia i latou.
3 Ua tofia i tatou e le Atua e faaleoina atu se lapataiga. Ua lē o toe pine ona aumaia lea e Ieova le iuga i lenei faiga amio leaga aoao o mea. E faitau miliona ola ua iai i se tulaga lē mautonu. Po o se mea saʻo mo i tatou le faaleamanaia o le tulaga lamatia ua iai ola o isi ma popole i le faasaoina tau o o tatou lava ola? O le mea moni, e leai. Ua ia i tatou tiute tauave tau amio o le fesoasoani lea ina ia faasaoina ola o isi.—1 Timo. 4:16.
4 Faaaoaoga Faamaoni ia Mulimuli Ai: Sa lagona e le perofeta o Esekielu lona nofo aitalafu i le tuuina atu o se feau lapatai i tagata Isaraelu lē faamaoni. Sa matuā lapataia o ia e Ieova e faatatau i iuga e oo i ai pe afai e lē taulau ona ia faataunuuina lona tofiga i le faapea atu: “A ou fai atu i le ua amio leaga, E oti lava oe; a ē le apoapoai atu ia te ia . . . , e oti lena tagata amio leaga i lana amioletonu, a o lona toto ou te taui atu lea ia te oe.” (Eseki. 3:18) Sa faataunuuina ma le faamaoni e Esekielu lona tofiga e ui lava i le feagai ai ma teteega matuiā. O le mea lea, sa mafai ai ona ia olioli ina ua taʻuina atu faamasinoga a Ieova.
5 I senituri mulimuli ane, na tusi ai le aposetolo o Paulo e faatatau i lona tiute tauave e talaʻi. Na ia faalauiloa mai: “Ou te mamā aʻu i le toto o tagata uma. Auā ua ou le natia se mea, ina neʻi le faailoa atu ia te outou le finagalo uma o le Atua.” Sa talaʻi Paulo i le lautele ma i lea fale ma lea fale auā sa ia iloa o le lē taulau ona faia o lenei poloaiga, sa ono mafai ona nofosala ai o ia i le toto i le silafaga a le Atua.—Galu. 20:20, 26, 27.
6 Po o ia i tatou le maelega e pei o Esekielu? Po o tatou lagonaina se uunaiga e talaʻi atu e pei ona sa faia e Paulo? E tutusa lelei lo tatou tofiga ma i laua. E tatau ona tatou faaauau pea i le faataunuuina o lo tatou tiute tauave o le lapataia o isi, e tusa lava pe latou te lē āno mai, lē popole mai, po o le tetee mai. E faitau afe isi e ono tali lelei mai i le feau o le Malo ma faalauiloa mai e faapea: “Tatou te o ma outou; auā ua matou faalogo, o loo ia te outou le Atua.” (Saka. 8:23) Tau ina ia avea lo tatou alofa mo le Atua ma o tatou uso a tagata e uunaia ai i tatou ia lē faavaivai. Ua ia i tatou se tofiga ina ia talaʻi atu!