Faia Suesuega Faale-Tusi Paia i Aiga e Agaigai i Luma

¹ O le ā se mea e taufai tutusa uma ai se tamaitai tausi maʻi i Tanzania, se tamaitai talavou i Anitenitina, ma se tinā i Latvia? Ua lipotia mai i le 1997 Yearbook (itu. 8, 46, ma le 56) e faapea, na vave lava ona agaigai i luma le toatolu uma nei i a latou suesuega faale-Tusi Paia i aiga, ma e faafetai i lo latou loto naunau e faia a latou lesona e sili atu i le faatasi i vaiaso taitasi i le tusi o Le Poto. Ua fautuaina e faapea, pe afai e mafai, e tatau i le au talaʻi ona taumafai e talanoa le mataupu e tasi o le tusi, i taimi e faia ai suesuega taitasi. Ae peitai, ua iloa e nisi le faigata ona faia o lena mea. E ui lava o le tele o le a faalagolago i tulaga ma le tomai tau aʻoaʻoga o tagata suesue taitoatasi, ae ua taulau manuia nisi o faiaʻoga e iai le poto masani i le faaaogaina o fautuaga nei.

² E pei ona talanoaina i le faaopoopoga o La Tatou Faiva o le Malo o Iuni 1996, o se mea tatau ona toleni au tagata suesue e sauniuni mo le suesuega. I le amataga lava, o se mea lelei ona faataʻitaʻi le auala e faia ai lenei mea. Faaali ia i latou lau kopi totino o le tusi o Le Poto lea e faia ai suesuega. Sauniuni faatasi le uluai lesona. Fesoasoani i tagata suesue e suʻe manatu autū po o fasi fuaiupu o loo tali tuusaʻo ai le fesili ona vase lea o lalo. O nisi tagata talaʻi ua oo lava ina latou tuuina atu i a latou tagata suesue se peni vali e faaaogā e faailoga ai tali. Faalaeiau i latou ina ia faitau uma mau a o latou sauniuni mo le suesuega. A o faagasolo le suesuega, o le a e aʻoaʻoina ai foi i latou e sauniuni mo le Suesuega Tautusi a le Faapotopotoga faapea ma le Suesuega o Le Olomatamata.—Luka 6:40.

³ O se faiaʻoga lelei, o le a ia mafai ona faatautala le tagata suesue ae lē o le fai uma e ia o tala. E na te alofia le tosina ese i manatu e faalētāua. Ia aua foi na te aumaia nisi manatu e ese mai i le mataupu. Nai lo o lea, e na te faamamafaina manatu autū o le lesona. O nisi ua latou avatua i tagata suesue nisi tusi e fesoasoani ai ia i latou i le sailia o tali i fesili. E lē gata i lea, o le a maua e tagata loto fiafia nisi faamatalaga atili e ala i lo latou auai i sauniga a le faapotopotoga.

⁴ Atonu e le manaomia ona suʻe uma mau o loo taʻua ai i lesona. O nisi o manatu autū atonu o loo faamatala mai ai i mau na o loo sii mai ai i le palakalafa. I le taimi o le autaluga, ia faamatilatila mau autū na sa talanoaina ma faalaeiau le tagata suesue ina ia manatua.

⁵ O le ā le Umi e Tatau Ona Faia ai Lesona Taitasi?: E lē manaomia ona faatapulaa le suesuega i le na o le tasi le itula. O nisi tagata e ona fale e lava le taimi avanoa ma atonu e manao e faaumiumi atu le suesuega. Pe atonu e manao le tagata suesue e faia le suesuega e sili atu i lo o le na o le faatasi i le vaiaso. O le a mafai ona aogā lenei faiga ia i latou e mafai ona faia faapea.

⁶ E pei ona faaatagia mai i le Isaia 60:8 e faapea, i aso nei, e faitau selau afe tagata fou o ē vivii atu ia Ieova ua ‘felelei e pei se ao, e pei o lupe foi i o latou falelupe’ i le faapotopotoga a ona tagata. Seʻi o tatou taitoatasi ma faia a tatou lava vaega i le galulue vavalalata ma Ieova a o ia faavave le aoaoina o ē pei ni mamoe.—Isa. 60:22.