“Upu Faaleagaga” mo Ē Puapuagatia i le Mafaufau

O FAAFITAULI o le mafaufau ua afaina ai e oo lava i nisi o auauna faamaoni a le Atua. Ma a o i ai nisi taimi atonu ua tatau ai ma talafeagai mo ē ua puapuagatia i le mafaufau ona saili fesoasoani mai tagata popoto faapitoa i ia tulaga, e mafai foi ona latou maua aogā mai fesoasoani ma faalaeiauga a le faapotopotoga Kerisiano. Mo se faaaʻoaʻoga, ina ua matuā faavaivaia lava le mafaufau o le Kerisiano faamaoni o Epaferoti, sa apoapoaia uso talitonu i Filipi ina ia aua le faaleamanaiaina lona puapuagatia faalemafaufau a e ia “talia ai o ia i le Alii ma le olioli uma lava, ma ia faapelepeleina . . . e ua faapea.”—Filipi 2:25-29.

E faapena foi Molimau a Ieova i aso nei ona i ai lea lava avega tauave ina ia “fefaamafanafanaai” pea ma ia “fesoasoani i e o vaivai.” (1 Tesalonia 5:11, 14) E tatau i toeaina Kerisiano ona taʻimua i lenei mea.—Isaia 32:2.

E moni, e masani lava ona lē agavaa toeaina i le avea o ni fomaʻi, pe faaaogā foi manatu ma faaupuga patino tau maʻi o le mafaufau (psychiatry). O se mea lē faamaulalo pe a faia faapea ma atonu e matautia. (Faataoto 11:2) E pei o le aposetolo o Paulo, e tatau ona latou “lē tautala atu i upu e aʻoaʻoina ai i le poto o tagata, a e ia tautala atu i upu e aʻoaʻoina mai e le agaga, a o [latou] tuufaatasia mea faaleagaga ma upu faaleagaga.” (1 Korinito 2:13, NW) O nei “upu faaleagaga” e aofia ai manatu ma mataupu silisili o loo i le Tusi Paia. Pe a saʻo ona faatatauina, o le a tele mea e mafai ona faia e nei upu ina ia faamafanafana ai ma atiina aʻe tagata ua puapuagatia.—2 Timoteo 3:16.

“Faataalise ona Faalogologo”

A e muamua lava, e tatau i toeaina ona “faataalise ona faalogologo, ia faagesegese ona tautala atu.” (Iakopo 1:19) ‘O le tali vave atu i se mataupu, a e leʻi faalogo i ai’ e faigofie ai lava ona iʻu i le avatu o se fautuaga lē talafeagai. (Faataoto 18:13) Ona o le lē taulau ona maua le auga o se faaletonu ua faavaivaia ai se tasi uso, na faaiʻua ai e se tasi vaega o toeaina e faapea, ua na ona vaivai faaleagaga o ia. “Ia toaga e tatalo,” sa latou fai atu ai ia te ia—o le faatonuga na faigata ia te ia ona faatatauina ona o le tulaga faavaivaia o lona mafaufau.

O lea, a o leʻi ofoina atu se fautuaga, e tatau i toeaina ona faalogologo i mea uma e fai mai ai lē o loo pagatia. Atonu, o le mea o ia manaomia o se tagata e faalogologo lelei. E ala i le onosai ma le tofā mamao, ia ‘utufia mai ai’ mea o i lona loto. (Faataoto 20:5) Afai e faafaigata i le tagata puapuagatia ona faaupu ona faalogona, ia manatua le mea na faia e Elekana i le fesili atu o ni fesili agalelei a e tuusaʻo e tusa ai ma le tulaga faanoanoa o lana avā. “Hana e,” sa ia fesili atu ai, “se a le mea e te tagi ai? Sea foi le mea e te le ʻai ai? Sea foi le mea e tiga ai lou loto?” (1 Samuelu 1:8) O fesili faautauta, e fai ma le agamalu, e masani ona mafai ona fesoasoani i se uso ua faalotovaivaia e faamatala saʻo le pogai “o le atuatuvale i [lona] loto.” (Faataoto 12:25) Mo se faaaʻoaʻoga, i se tasi tulaga, o faafitauli tau faaipoipoga na faamaonia o le pogai lena o le faalotovaivaia o se uso.

Avatu le Fesoasoani e ‘Aunoa ma le Toe Taʻutaʻua’

O tagata ua puapuagatia e lē mafai i taimi uma ona latou faamatalaina mai ma se mafaufau lelei uiga o o latou faalogona. Ua tusia e se tasi ua mafatia ai i se maʻi o le mafaufau: “Ina ua ou maʻi, sa ou lē malamalama i ai, ma i nisi taimi sa ou tuuaʻia Ieova.” O lea, o i latou ua mafatia ai, atonu o le a latou faia ni faitioga lē faavaea faapea ua agaleagaina i latou po ua teena foi e le faapotopotoga. E ao faapefea ona tali atu i ai toeaina?

Ua faataatia e Ieova se faaaʻoaʻoga e ala i le ‘foaiina atu ma le agalelei tele i tagata uma e aunoa ma le toe taʻutaʻua.’ (Iakopo 1:5) E lē tatau ona faia tagata o loo pagatia i se auala latou te lagona ai faapea, o i latou ua valelea po ua leai ni mafaufau ona o lagona ua ia i latou. O o latou faalogona—e ui lava ina ua lē mafaufau lelei—a e o se mea e moni lava ia i latou. Latou te manaomia le ‘alofa faaleuso,’ a e lē o le faitio. (1 Peteru 3:8) E tatau foi i toeaina ona faaeteete ina ia lē faaopoopo atu ni avega mamafa tau faalogona ootia i lē o loo pagatia, i le tuuaʻia o ia faapea ua faia se mea sese. Sa matuā puapuagatia le tagata amiotonu o Iopu o lea na ia auē ai: “Ua musu loʻu loto i loʻu ola.” (Iopu 10:1) A e sa leʻi faamafanafanaina o ia e ana aumea e toatolu. Sa oo lava ina faapea mai se tasi o i latou: “E le ua tele ea au amio leaga, e i ai foi se gataaga o au agasala?”—Iopu 22:5.

A e peitai, i nisi taimi, o le faia o se amio sese o le mafuaaga lea o le fesouaiina o faalogona ootia pe ua saosaolaumea ai foi i le oo atu ai ina sili atu ona matuiā. “Ina ua ou lē tautala atu [e uiga i le faia o le mea sese] sa pala oʻu ivi ona o loʻu ōi i le aso atoa,” na fai mai ai le faisalamo o Tavita. (Salamo 32:3, NW) Sa faapena foi, talu ai sa mafatia se tasi uso i popolega mamafa na lē mafai ai ona ia toe galue. O le mafuaaga o lona puapuagatia? O le faia faatasi o le mulilua na ia natia. O lea, afai e i ai se mafuaaga e masalomia ai faapea o loo aafia ai se mea sese, e mafai la ona suesueina e toeaina o se mea atonu ua tupu. A e e ao ona latou faia i se auala agalelei, a e lē ia tuuaʻia ma le taʻuvalea faapea ua faia e le tagata se sese.

O le Laulaufaiva Poto e Malōlō Ai

Pe a uma ona faia e toeaina le mea latou te mafaia i le filifilia o le uiga o le faafitauli o le tagata, e tatau ai ona latou gaoioi ia ōgatasi ma le Faataoto 12:18, lea ua faapea mai: “O laulaufaiva o e popoto e malolo ai.” E leai, e lē mafai e toeaina ona faamalōlō le maʻi faalemafaufau lava ia. A e i le faaaogāina o upu ua filifilia ma le faaeteete, atonu o le a mafai ai ona latou avatu se mapusaga i tagata ua puapuagatia i le mafaufau mai popolega ma omiga lē manaomia. E mafai ona amata e toeaina i le filifilia o mataupu mai Le Olomatamata ma le Awake! e feagai ma faafitauli tau i le mafaufau ma faalogona ootia. E mafai ona talanoaina nei mea ma i latou o puapuagatia ina ia fesoasoani ia i latou e malamalama atili ai i o latou tulaga. E masani ona latou maua se mapusaga i lo latou iloa faapea, o o latou faafitauli ua mafua ona o iʻuga o le tino lē lelei atoatoa, a e lē ona o le leiloa o le finagalo lelei o Ieova.

Ua ioeina, e mafai ona faigata le feagai ma i latou ua atuatuvale, o nisi ua oo lava ina matuā faavevesiina ai. Peitai, o se toeaina atamai e manatuaina faapea, “o le tali filemu e liliueseina ai le ita.” (Faataoto 15:1) Ina ia mautinoa o ana upu e fai atu i le alofa fua i taimi uma, e puipuia ai o ia mai le faatuputeleina atili o le leaga o le tulaga. (Kolose 4:6) Mo se faaaʻoaʻoga, o se uso o loo mafatia i lea ituaiga o maʻi o le mafaufau o le schizophrenia, atonu e tausisi mai faapea o loo ia faalogo i ni leo.a Ua matauina e Dr. E. Fuller Torrey: ‘E lemafesoasoania ona taumafai e finau atu i tagata o loo mamaʻi i le schizophrenia ina ia faasaʻo o latou talitonuga valea. O taumafaiga e faia faapea, e masani ona iʻu i feeseeseaiga ma le ita. Na i lo o le faia o se finauga, ia tau lava ina ia fai atu i ai se faamatalaga o le lē ioe i ai.’ I se isi faaupuga, e mafai e toeaina ona faamalamalama atu ma le onosai faapea, e ui lava e foliga mai e moni na leo, a e atonu o loo faapena foi ona fai e lona mafaufau ni toagfiti ia te ia.

O le faaaogāina ma le uigā o le Tusi Paia e mafai foi ona fua mai ai ni iʻuga lelei. (Eperu 4:12) Mo se faaaʻoaʻoga, afai e faamatala mai e se tagata maʻi ni ona fefe lē mafaufau lelei faapea ua tuulafoaiina o ia e le Atua, ia faaalia ma le agalelei le tiga alofa i mea o ia fefe ai. A e peitai, i le taimi lava lea, ia faamanatu atu ma le onosai ia te ia le mana o le togiola, e faaaogā ai mau na e pei o le Salamo 103:8-14 ma le 1 Ioane 2:1, 2. O le 1 Peteru 5:6, 7 ma le Roma 8:26, 27 atonu o le a fesoasoani ia te ia e talisapaia faapea ‘o loo manatu mai le Atua ia te ia,’ ma faafofoga i ana tatalo, e tusa lava pe faafaigata ia te ia ona faaupu ona faalogona. Ina ia mulimuli i le mataupu silisili i le Iakopo 5:14, ona mafai ai lea e toeaina ona tatalo faatasi ma le tagata puapuagatia.

A e faapefea pe afai e tauau ina faaosofia le loto o le tagata mafatia i mea e lē tāua? E mafai ona faamanatu atu ia te ia le fautuaga a le Tusi Paia e “aua e te amiotonu naua.” (Failauga 7:16) Atonu e maua e se isi ni aogā mai faalaeiauga i le Filipi 4:8, lea e mafai ona fesoasoani ia te ia e tau faasaga i mafaufauga lē mamā tau amio. O se isi foi, atonu e lē taulau ona talia ana tapulaa ma atonu e faalotovaivaia ona ua faatapulaaina e lona maʻi lana galuega faa-Kerisiano. O mau e pei o le Mataio 13:23 ma le Luka 21:1-4 e mafai ona faaaogā e fesoasoani ia te ia e talisapaia faapea, e ui lava ina atonu e faatapulaaina e o tatou tulaga mea e mafai ona tatou faia, a e talisapaia loloto e Ieova a tatou taumafaiga.

Ioe, i le faaauupegaina i le laulaufaiva ua aʻoaʻoina e le Tusi Paia, e mafai ai e toeaina ona faia mea e tele e fesoasoani ma faamafanafana ai i uso talitonu ua puapuagatia. Ua fai mai se tasi tuafafine o lē na pagatia i faafitauli o le mafaufau: “Ou te talisapaia moni le mea ua fai mai ai le Isaia 32:2 e uiga i toeaina i le faapotopotoga. Sa latou i ai pea i inā faatasi ma fautuaga aogā pe a ou manaomia i latou.”

Sauniga ma le Auaunaga i le Fanua

E i ai pea manaoga faaleagaga o le tagata o loo puapuagatia i le mafaufau. (Mataio 5:3) E moni, o le tumau i le malosi faaleagaga ua uiga i le eseesega i le va o le ola ma le oti mo nisi. E manatua e Irene o lē na pagatia mo le 30 tausaga ona o le maʻi o le mafaufau o le schizophrenia, e faapea: “I nisi taimi, sa ou matuā fenuminumiai. A e sa i ai pea le upu moni i loʻu mafaufau—sa matuā malō e pei o le simā. Sa ia taofia aʻu mai le pule i loʻu ola!”

O le mea lea, i le tele e aogā ai, e tatau ona faalaeiauina le tagata mafatia ina ia auai i le galuega talaʻi ma sauniga, a e lē o le ‘vavae esea o ia.’ (Faataoto 18:1) Ona o le maʻi o le mafaufau, o le lagona lenei sa i ai i se tasi tuafafine: ‘Sa ou matuā mautinoa ua ou faia se agasala e lē ma faamagaloina faasaga i lo tatou Atua, o Ieova. O le iʻuga, sa ou faauigaseseina mea uma sa ou faalogo ai i sauniga. Po o ā lava ni mea sa taʻusalaina, sa ou faatatauina ia te aʻu lava.’ A e sa faaauau pea ona ia auai i sauniga ma na mulimuli ane ia faalogo i se lauga na fesoasoani ia te ia e manumalo mai ai i lea manatu sese faapea ua teena o ia e le Atua.

A e faapefea la, pe afai ua oo ina vevesi se tasi ua maʻi tigaina ma ua faalavelaveina ai sauniga a le faapotopotoga po o le auaunaga i le fanua? Atonu, e lē ona o le taumafai o lē ua pagatia e fai se mea leaga, a e ua na ona lē fiafia ona o mafaufauga ua fenuminumiai. Peitai, e tumau pea ona avea lenei ma mea e tofotofoina ai mo ē uma e aafia ai. Afai e laitiiti pe seāseā foi ona i ai le faalavelave, atonu o le a faaalia e le faapotopotoga le onosai. (Kolose 3:12, 13) A lē o lea, atonu o le a manaomia ona fautua i le tagata pagatia e nofo i le mea o le a faaitiitia ai le tosina atu o tagata pe afai e tupu se faalavelave. E mafai foi ona faia ni fuafuaga alofa ina ia faatiotio lena tagata i le galuega talaʻi, atonu ia fuafua o loo ō faatasi i taimi uma ma se tagata talaʻi taʻumatuaina ma faautauta, po o lona i ai i suesuega faale-Tusi Paia i aiga pe afai e malamalama lelei i lona tulaga ma faapalepale i ai.

A e ui i lea, i nisi taimi, e oo ina matuā faateʻia ai i le amio a le tagata, ua taʻuvalea ai pe ua lē taofiofia ma le matautia. Atonu ua lē o toe inuina e le tagata maʻi ana fualaau sa faatonuina e le fomaʻi, ma ua manaomia ai ona matuā faamalosiau i ai ina ia toe foi e inu ana fualaau e pei ona masani ai. A e afai e lē faalogo mai pe ua faaauau pea gaoioiga e faalavelavea ai a le tagata maʻi, atonu e manaomia ona taofia loa o ia mai sauniga ma le auaunaga i le fanua ina ia tausia ai pea le sologa lelei. (1 Korinito 14:40) E tatau i toeaina ona taʻu atu i le tagata maʻi i se auala agalelei faapea e lē faapea ua faamasinoina ua lē faamaoni o ia, a e ona o lona maʻi ua na ona faatapulaaina ai mea e mafai ona ia faia. ‘E lē amioletonu le Atua, faapea o le a faagalogalo ai ana galuega,’ ma e malamalama o Ia i ona tapulaa. (Eperu 6:10) O le faia e lē aunoa o asiasiga faaleoleo mamoe o le a fesoasoani ai i lea tagata e tausia pea lona tulaga faaleagaga seia oo ina faaleleia lona tulaga.

Fesoasoani i o Latou Aiga

O maʻi o le mafaufau e mafua ai faatamaiaga tetele i totonu o aiga. “O se mea ua matuā faaumatia ai le faamoemoe,” na fai mai ai se tasi uso na matuā tigaina lona atalii ua matua i le maʻi o le mafaufau. “E te vaai atu lava i lea aso ma lea aso, e leai se mapu,” na faaopoopo mai ai lana avā. “Ua afaina ai la ma faaipoipoga, auā o nisi taimi, ma te oo atu ai i le tauaʻi upu.” Seʻi manatu foi la i le tiga, o le vaai atu i se paaga faaipoipo ua oo atu i se maʻi o le mafaufau. Ua fai mai se tasi uso: “Sa taʻua laʻu avā o le ‘paranoid schizophrenic.’ E faalogo o ia i ni leo ma e musu e fai ni togafitiga ona ua talitonu o le a ‘faaonāina’ ai o ia. E lē talitonu o ia faapea o aʻu o lana tane ma ua musu e alu i le auaunaga po o i sauniga.” E mafai faapefea ona tatou fesoasoani atu i aiga o tagata ua mafatia faapena?

Na faapea mai Paulo: “Ia faamafanafana i e loto iti.” (1 Tesalonia 5:14) O le sauā pe a teena pe lē amanaia uso a Kerisiano o ē o galulue mo le tausiga o se tasi o le aiga o maʻi i le mafaufau. “Ia outou talia ai le tasi e le tasi,” na fai mai ai Paulo. (Roma 15:7) Ua tuuina e sauniga faa-Kerisiano ia i tatou se avanoa e faia ai faapea ma le mafana ma ia faaalia le alofa ma le talisapaia ia i latou o loo faatinoina le ‘amio atua i o latou aiga.’—1 Timoteo 5:4.

I asiasiga faaleoleo mamoe, e mafai e toeaina ona faalaeiau atili i tagata faapena ina ia faia pea suesuega faaleaiga, ia auai i sauniga, ma ia tumau ona tiotio i le avea o ni ē talaʻi o le Malo. A e peitai, pe a oo mai i o latou manaoga faaletino ma aogā, e tatau i le faapotopotoga ona faia e sili atu na i lo o le na ona fai atu, “Ia mafanafana ma ia maoona.” (Iakopo 2:16) Atonu e manaomia e le aiga se fesoasoani i se auala e ō ai i sauniga. O nisi tagata atonu e i ai i se tulaga e fesoasoani atu ai ia i latou i ni a latou pili faafomaʻi ua faufaulalai. (1 Ioane 3:17, 18) Maeu le talisapaia o lena manatu mamafa alofa. Fai mai le tane a se tuafafine e maʻi i le mafaufau: “E iloa e le faapotopotoga lo ma faafitauli, ma ua latou faaalia ma le alofa lo latou manatu mai.”

Tausia le Faamaoni

Na faapea mai Paulo: “Ua oi faatasi, ma oono faatasi mea uma lava na faia, ua oo mai lava i ona po nei.” (Roma 8:22) Ma o le puapuagatia o le mafaufau o le tasi lea o mea tuufaasolo mai e sili ona tiga o le lē lelei atoatoa. Atonu o le a ofoina mai e fomaʻi na o sina mapusaga. A e o le toatele lava o ē ua saili atu i la latou fesoasoani, ua oo i se mea e pei ona oo i le fafine i aso o Iesu o lē na “tele foi mea na ia tiga ai i fomai e toatele, ua uma atu ai foi ana oloa, a e lei aoga lava ia te ia, a e peitai ua atili ai lona maʻi.”—Mareko 5:26.

E tatau lava la i le toatele ona aʻoaʻo ia ola ma o latou faafitauli, ma vaavaai atu mo le mapusaga moni i le lalolagi fou a le Atua. (Faaaliga 21:3, 4) “Ia e faamanū atu ia Ieova, . . . o lē faamaloloina ou maʻi atoa uma,” na alaga ai le faisalamo. (Salamo 103:2, 3) A e i le taimi nei, o le taulaiga autū o o tatou popolega, e lē o le maua o le soifua maloloina lelei atoatoa o le mafaufau po o le tino, a e ia faamaonia lo tatou faamaoni. (Salamo 26:11; faatusatusa le 1 Korinito 7:29-31.) O le pagatia i se faaletonu o le mafaufau atonu o le a faafaigata ai lenei mea. A e toatele lava auauna a le Atua, e pei o Paulo, ua auauna ma le faamaoni faatasi ma “le mea matuitui i le tino.” (2 Korinito 12:7) “Ua ou iloa e leai se fomaʻi, e oo lava i uso, e mafai ona faamaloloina aʻu,” ua fai mai ai se tasi ua mafatia i le maʻi o le mafaufau. “Peitai ua ou aʻoaʻoina e faalagolago ia Ieova.” E mafai foi e tagata ua mafatia i le mafaufau ona faalagolago i uso ma tuafafine alolofa o ē tautala mai ma le onosai “upu faaleagaga” mo lo latou faamafanafanaga ma le lagolagosua.

[Faaopoopoga i lalo]

[Ata i le itulau 8]

O “upu faaleagaga” mai toeaina alolofa e mafai ona faia mea e tele e fesoasoani atu ai i tagata ua puapuagatia