“O Ieova o Loʻu Fesoasoani Ia”

¹ Ina ua tofia e Iesu ona uluai soo, na ia taʻu atu ia te i latou: “Faauta, ou te aau atu ia te outou e pei o mamoe i le va o luko.” (Mata. 10:16) Pe na latou fefefe ai i lena mea ma faatalatu ai mai le talaʻi atu? E leai. Sa latou talia le uiga e pei ona faamatalaina mulimuli ane e le aposetolo o Paulo ina ua ia taʻu atu i uso Kerisiano: “Ia loto tetele ma faapea atu: ‘O Ieova o loʻu fesoasoani ia; Ou te lē fefe lava. O le ā se mea e faia e tagata ia te au?’” (Epe. 13:6, NW) Ua olioli i latou ona ua tauaogaina ua faaleagaina i latou ona o le suafa o Iesu, ma sa faaauau pea e lei mapu i latou i le aʻoaʻo ma folafola atu le tala lelei.—Galu. 5:41, 42.

² I aso nei ua oo atu ai le talaʻiga i le lalolagi aoao i lona taualuga. E pei lava ona valoia e Iesu, ua avea i tatou ma taulaiga o le ʻinoʻino mai o nuu uma. (Mata. 24:9) Ua teena ma amusia la tatou galuega talaʻi, ma i nisi vaega o le lalolagi, ua oo lava ina faasaina ai. Afai ana leai so tatou faatuatua, e mafai ona tatou lagona le fefe. Ae peitai, i le iloa e faapea o Ieova o lo tatou Fesoasoani ia, e faafouina ma faamalosia ai i tatou ina ia finafinau.

³ O le lototele, o se uiga o le faamalosi, ma le loto toa. O le tuufaafeagai lea o le fefe, loto vaivai, ma le palaai. E manaomia pea e soo o Iesu le lototele ina ia tumau ai. O le mea tatau lea pe afai tatou te alofia le faalotovaivaia i uiga faaalia ma gaoioiga a se lalolagi o loo ita i le Atua. Maeu se faalaeiauga o lea mea mo i tatou pe a mafaufau i le faaaoaoga sili ona maualuga a Iesu, o lē na manumalo i le lalolagi! (Ioa. 16:33) Ia manatua foi, i le feagai ai ma sauāga matuitui, na faalauiloa atu ai ma le loto tetele e le au aposetolo e faapea: “E tusa ona sili o lo matou anaana i le Atua i lo matou anaana i tagata.”—Galu. 5:29.

⁴ E Lē o i Tatou o ni Ē Tuumuli: E tatau ona tatou tauivi ina ia tausia se uiga mautinoa agaʻi i la tatou galuega. (Epe. 10:39) Ia manatua pea, ua aauina atu i tatou e Ieova e avea o se faailoaga o lona alofa ma lona alofa mutimutivale i tagata uma lava. E lē tāitai lava ona ia talosaga atu i ana auauna ina ia faia se mea e lē maua ai se iuga lelei. O mea uma lava ua tofia mai ia i tatou e faia, o le a iu ina maua ai le lelei o i latou o ē alolofa i le Atua.—Roma 8:28.

⁵ O le vaavaai atu ma le mautinoa mo ni mea lelei, o le a fesoasoani ia i tatou ina ia sailia ai pea tagata e pei o ni mamoe i la tatou oganuu. E mafai ona tatou manatu i le lē ano mai o tagata o se faaaliga lea o lo latou lē faamalieina ma le leai o se faamoemoe. Seʻi uunaia i tatou e lo tatou alofa e faaalia le tiga alofa ma le onosai. O taimi uma lava e tatou te tuua ai se lomiga pe tau iloa atu ai se naunau fiafia, o lo tatou sini, e tatau ona toe foi vave atu e asia ma faatupu atili le naunau fiafia. E lē tatau lava ona tatou masalomia lo tatou tomai e amataina se suesuega faale-Tusi Paia pe ia uigā i le faia o lena suesuega. Nai lo o lea, e tatau ona tatou saili maumauai pea ma tatalo mo le fesoasoani ma le taitaiga a Ieova, i le mautinoa o le a ia fesoasoani mai ia i tatou.

⁶ E tatou te matuā talitonu lava o le a taitaia e Ieova le galuega seia oo lava ina faaiuina. (Faatusatusa i le Filipi 1:6.) O lo tatou faatuatua atoatoa atu ia te ia e avea ma o tatou Fesoasoani, e faamalosia ai i tatou, ina ia ‘aua neʻi o tatou faapalapala i le faia o mea lelei.’—Kala. 6:9.