talaʻi. Mai lea taimi i lea taimi o le taumafanafana, e ave ai aʻu e tuafāfine Kerisiano i loʻu nofoa faataavalevale i se nofoaga e mafai ona ou faia ai sina talaʻiga. Ou te lafoina foi e lē aunoa mekasini ma polosiua i aʻoga i Kopervik, e pei o le aʻoga amata lea sa ou aʻoga ai ua toetoe lava 100 tausaga talu ai. Ou te fiafia ona o lea lava e mafai ona ou talaʻi pea.

O le mea e lelei ai ona o le potu ʻai ma le Maota o le Malo e iai faatasi i le fogafale lea e iai loʻu potu i Peteli, lea talu mai le 1983 sa iai i Ytre Enebakk i fafo atu o Oslo. O lea la e mafai ai ona ou alu atu i mau o le taeao, le taimi o meaʻai, ma i a matou sauniga e ala i le faaaogaina o tootoo (walker). Ma ou te fiafia foi auā o loo mafai lava ona ou auai i tauaofiaga ma fonotaga. Ou te olioli i le feiloai atu i uo ua ou iloaina mo le tele o tausaga, faapena foi ma uso ma tuafāfine fou ma le tele o fanau lelei.

Tumau i le Faatuatua e oo i le Iuga

O se faamanuiaga le siomia e tagata malolosi, fiafia ma faaleagaga iinei i Peteli. Ina ua amata laʻu auaunaga i Peteli, sa faia aʻe le aiga atoa ia i latou o ē e iai le faamoemoe faalelagi. (Filipi 3:14) I le taimi nei o tagata uma lava i Peteli seʻi vaganā ai aʻu o loo vaavaai atu ma le naunautai i le ola e faavavau i luga o le lalolagi.

O le mea moni, sa matou faatalitalia e gaoioi vave Ieova. Peitai, ua ou olioli i le vaaia o le faateleina pea lava pea o le motu o tagata e toatele. Maeu ni faatelega ua ou vaaia! Ina ua ou faatoʻā auai i le faiva, sa na o le 5,000 tagata talaʻi i le lalolagi aoao. I le taimi nei ua sili atu ma le 5,400,000! O le mea moni, ua ou vaaia le “toaitiiti e fai ma toaafe, ma le ua faatauvaa e fai ma nuu malosi.” (Isaia 60:22) E ao ona tatou faatalitali pea ia Ieova, e pei ona tusia e le perofeta o Sapakuka: “E ui lava ina tuai mai, a ia faatalitali pea i ai; auā e oo mai lava.”—Sapakuka 2:3.

Po o Faaonāina Oe e le Agaga o le Lalolagi?

IA Setema 12, 1990, na pa ai se fale gaosimea i Kazakstan. Na salalau atu ai ave uila malolosi matautia i le ea ma afaina ai le soifua mālōlōina o le 120,000 o tagata o lea lava nuu, ma o le toatele o i latou na savavali atu i auala tetele i ni solo tetee faasaga i lenei mea oona e oti ai.

Ae peitai, a o agaʻi ina faaalia le tele o faamatalaga, na latou iloa ai ua fia sefulu tausaga o latou nonofo ai pea i lea siomaga ua faaoonaina. I le faagasologa o tausaga, e 100,000 tone o otaota o ave uila malolosi na lafoaia i se nofoaga e lē o malupuipuia. E ui lava ina matuā lamatia ai o latou ola i le i ai o mea matautia iina, ae leai lava se tasi na manatu mamafa i ai. Aisea?

Auā o aso uma lava e faatū ai e alii ofisa se faailoilo i le malae taalo a le atunuu, e faaalia ai le malosi o ave o uila ma sa manatu ai faapea, e matuā leai lava se tulaga lamatia o iai. Na saʻo fuainumera, ae sa na ona faaalia ai le malosi o ave uila (gamma) lea e mafai ona punapuna lemu mai i ia ituaiga o mea. O ave uila o le alpha lea e lei fuaina le malosi sa iai, sa faapena foi lona matautia. E toatele tinā sa amata ona iloa le pogai na mamai ai a latou fanau.

Pe a tautala i le tulaga faaleagaga, e mafai foi ona faaonāina i tatou i mea oona e lē vaaia, ma i le pei o na tagata i Kazakstan ua lamatia o latou ola, e toatele e lē o iloa e uiga i lenei mala ua faamatauina ai ola. Ua faailoa mai e le Tusi Paia lenei ituaiga o polusione e faapea “o le agaga o le lalolagi,” lea e leai lava se isi ua ia faapogaia, a o Satani le Tiapolo. (1 Korinito 2:12) Ua faaaogā ma le faufau leaga e le Fili o le Atua lenei agaga—po o uiga taatele—o le lalolagi e faavaivaia ai lo tatou tuutoina atu i le Atua.

E mafai faapefea e le agaga o le lalolagi ona faavaivaia lo tatou malosi faaleagaga? E ala i le faagaeeina o le tuinanau o mata, ma o tatou faanaunauga manatu faapito. (Efeso 2:1-3; 1 Ioane 2:16) E ala i ni faaaoaoga, o le a tatou talanoaina ai ni vala eseese se tolu e ono mafai e mafaufauga faalelalolagi ona faaoona mālie ai lo tatou itu faaleagaga.

Ia Muai Saili le Malo

Na uunaia e Iesu tagata Kerisiano ina ia ‘saili muamua le malo o le Atua ma lana amiotonu.’ (Mataio 6:33) Ae i le isi itu, e mafai e le agaga o le lalolagi ona uunaia i tatou e faamuamua ma le lē tusa ai o tatou lava fiafiaga ma mea e faamalieina ai. O le uluai lamatiaga lava la, e lē o le tuulafoaia atoatoa o mea faaleagaga, ae ona ua tuu faatulaga lua. E ono mafai ona tatou faalēamanaia le tulaga lamatia—e pei ona faia e tagata i Kazakstan—ona o foliga taufaasese o le saogalemu. O le tele o tausaga o la tatou auaunaga faamaoni ma lo tatou talisapaia o o tatou uso ma tuafāfine faaleagaga, e ono mafai ona mao ai i tatou e manatu faapea, e lē taitai lava ona tatou tuulafoaia le ala o le upu moni. Atonu o le lagona lena sa iai i le toatele o tagata o le faapotopotoga i Efeso.

Pe tusa o le tausaga e 96 T.A., na avatu ai e Iesu lenei fautuaga ia i latou e faapea: “A ua ou le fiafia ia te oe, ona ua e tuua o lou uluai alofa.” (Faaaliga 2:4) O nei Kerisiano ua loa ona auauna na mafai ona onosaia le tele o mea faigata. (Faaaliga 2:2, 3) Sa aʻoaʻoina i latou e toeaina faamaoni, faapea ma le aposetolo o Paulo. (Galuega 20:17-21, 27) Ae peitai, a o mavae atu tausaga, na tauāu ai ina faaitiitia lo latou alofa, ma leiloa ai lo latou malosi faaleagaga.—Faaaliga 2:5.

Atonu sa aafia ai nisi i Efeso i faatosinaga faapisinisi ma le tulaga manuia faaletino o le aai. O le mea e faanoanoa ai ona o taaʻiga manao tele i mea faitino a le sosaiete i aso nei, ua faapena ona taaina ai nisi Kerisiano. O se taumafaiga maumauai e fia maua se olaga e sili ona lelei, o le a faatosina ese ai i tatou mai sini faaleagaga.—Faatusatusa le Mataio 6:24.

I le lapataia e uiga i lenei lamatiaga, na fetalai ai Iesu: “O le molī o le tino, o mata ia; pe afai foi e lelei ou mata, e malamalama uma ai lou tino. A e afai e leaga [“matauʻa,” faaopoopoga i le NW] ou mata, e pouliuli uma ai lou tino.” (Mataio 6:22, 23) O se mata e “lelei” e taulai pea i mea faaleagaga, e taulai atu i le Malo o le Atua. I le isi itu, o se mata e “leaga” pe e “matauʻa” e gata mai le vaai, e taulai atu lava na o tuinanauga o le tino o loo lagona i lena taimi. E lē iloa atu sini faaleagaga ma taui mo le lumanai.

Na fetalai Iesu i le fuaiupu na seʻi mavae atu: “Auā o le mea ua i ai lo outou oa, e i ai atoa foi ma o outou loto.” (Mataio 6:21) E mafai faapefea ona tatou iloa po o faaautū o tatou loto i mea faaleagaga po o mea faaletino? Atonu o le taiala sili ona lelei o a tatou talanoaga, talu ai ‘o le tele o mea i le loto e tautala mai ai le gutu.’ (Luka 6:45) Afai tatou te talanoa pea i mea faaletino po o manuia faalelalolagi, e faailoa mai ai ua fevaevaeaina o tatou loto ma ua faaletonu la tatou vaaiga faaleagaga.

O Sieni, o se tuafafine mai Sepania, sa tauivi ma lenei faafitauli.a Ua faamatala mai e Sieni e faapea: “Sa ou ola aʻe i le upu moni, ae ina ua 18 ou tausaga, sa amataina ai saʻu lava pisinisi o le faavaeina o se aʻoga faataitai mo tamaiti laiti. I le tolu tausaga mulimuli ane, na iai ni aʻu tagata faigaluega se toafā, sa olaola le pisinisi, ma sa tele lava ni tupe na ou mauaina. Atonu o le mea sa sili ona faamalieina ai aʻu, o le mea moni e faapea, ou te lē o toe faalagolago i se isi i mea tautupe, ma sa ou ‘taulau manuia.’ O le mea moni lava, sa sili ona naunau loʻu loto i laʻu pisinisi—o loʻu fiafiaga sili lena.

“Sa ou lagona e mafai lava ona avea pea aʻu ma Molimau a o tuuina atu le tele o loʻu taimi i le faaauilumaina o le pisinisi. I le isi itu, sa faatalatala mai pea ia te au le lagona e tatau ona ou faia mea e sili atu e auauna ai ia Ieova. O le mea na iu ina uunaia ai aʻu e faamuamua mea tau le Malo, o faaaoaoga a aʻu uo e toalua o ni paeonia. O le tasi o i laua sa i laʻu faapotopotoga, o Iulia. E na te lei uunaia faamalosi aʻu ina ia ou paeonia, ae o ana talanoaga faapea ma le olioli e manino lava na ia maua mai i lana faiva, na fesoasoani lea ia te au e toe iloilo ai i mea faaleagaga e tatau ona ou faamuamuaina.

“I se taimi mulimuli ane, a o ou iai i le Iunaite Setete mo se faiga malologa, sa ou nofo ai ia Tolia, o se tuafafine paeonia. E lei leva ona maliu lana tane, ma sa tausia e ia lana tama teine e lima tausaga ma o lona tinā foi sa maua i le kanesa. Peitai sa paeonia o ia. O lana faaaoaoga faatasi ma lona talisapaia mai le loto o le faiva, na paʻia ai loʻu loto. I aso puupuu e fa ia na ou nofo ai i lona fale, na ou faia ai se filifiliga e avatu ia Ieova le mea aupito sili ou te mafaia. Muamua lava, na avea ai aʻu o se paeonia sauatoa, ma i nai tausaga mulimuli ane, na valaaulia ai i maʻua ma loʻu toalua ma te auauna i Peteli. Sa ou faamavae atu i laʻu pisinisi—o se faalavelave lea i loʻu agaigai i luma faaleagaga—ma i le taimi nei ua ou lagona ai ua taulau manuia loʻu olaga i le silafaga a Ieova, lea e avea ma mea e sili ona tāua.”—Luka 14:33.

O le aʻoaʻoina ina ia ‘iloa o mea e sili ona tāua,’ e pei ona faia e Sieni, o le a fesoasoani ia i tatou e faia ni faaiuga atamai e faatatau i a tatou galuega, aʻoaʻoga, faia o fale, ma ituaiga olaga o tatou ola ai. (Filipi 1:10) Ae pe mafai foi ona tatou iloa mea e sili ona tāua pe a oo mai i faafiafiaga? O le isi lenei vala e matuā anoanoai taaiga ua faia ai e le agaga o le lalolagi.

Tuu Faafiafiaga i Lona Tulaga Tatau

Ua faaaogā ma le faaʻoleʻole e le agaga o le lalolagi tuinanauga masani o tagata mo ni mālōlōga ma faafiafiaga. Talu ai e toatele tagata e leai se faamoemoe moni mo le lumanai, e mautinoa lava la e tatau ona latou saili e faaalu le taimi nei i faafiafiaga ma faiga malologa. (Faatusatusa le Isaia 22:13; 1 Korinito 15:32.) Po o tatou iloa ua sili atu ona tatou faatauaina faafiafiaga? E ono avea lena ma faailoga e iloa ai ua suia e le auala o mafaufauga o le lalolagi o tatou manatu.

Ua lapatai mai le Tusi Paia: ‘O lē ua naunau i mea faafiafia, [“faafiafiaga,” Lamsa] o le tagata mativa lea.’ (Faataoto 21:17) E lē sese le fiafia o se tasi, ae o le naunau tele i ai, po o le tuu faamuamua, o le a iu ai i le mativa faaleagaga. O le a iu ina leai so tatou naunau mo mea faaleagaga ma o le a faaitiitia ai taimi e maua mo le talaʻiina o le tala lelei.

O le mafuaaga lenei ua fautua mai ai le Afioga a le Atua ia i tatou ina ia “faamamā i o outou mafaufau mo galuega, ma ia pulea lelei.” (1 Peteru 1:13, The New English Bible) E manaomia le pulea totino e faatapulaaina ai i se tulaga tatau o tatou taimi mo faafiafiaga. O le faamamā mo galuega, o lona uiga o le nofo sauni lea mo le galuega faaleagaga, e tusa lava po o se suesuega, sauniga, po o le auaunaga i le fanua.

Ae faapefea pe a manaomia ona faia se malologa? Pe tatau ona ia i tatou le lagona ua tausalaina pe a faaalu se taimi e mālōlō ai? O le mea moni e leai. E tatau ona mālōlō, ae maise lava i le lalolagi tumu i omiga i aso nei. Ae peitai, ona o ni Kerisiano tuuina atu, e lē mafai ai ona faaautū o tatou olaga i faiga malologa. O le tele o le faia o malologa, e mafai ona tatou paiē ai i le faia o ni galuega aogā. E mafai ona faagesegese ai lo tatou lagona faanatinati, ma e ono mafai foi ona faamalosia ai le manatu i le faamalieina o le tagata lava ia. E mafai la faapefea ona tatou maua se vaaiga paleni e faatatau i le faia o se malologa?

Ua fautuaina e le Tusi Paia le faia o sina malologa itiiti nai lo o le soona galue mamafa—ae maise lava pe afai e lē tau manaomia ona faigaluega totogi. (Failauga 4:6) E ui lava o le faia o se malologa e fesoasoani i o tatou tino ia toe maua ai le malosi, a o le puna o le malosi faaleagaga, o le mana galue o le Atua. (Isaia 40:29-31) Tatou te maua lenei agaga paia i le fesootai atu ma la tatou galuega faa-Kerisiano. O suesuega totino e fafagaina ai o tatou loto ma faagaee ai faanaunauga saʻo. O le auai i sauniga e faagaee ai lo tatou talisapaia mo Lē na Faia i tatou. O le faia o se sao i le faiva faa-Kerisiano e faatupu ai lagona lelei agaʻi i isi. (1 Korinito 9:22, 23) E pei ona faamatala manino mai e Paulo e faapea, “auā e tigaina le tagata i fafo i mea a le olaga nei, a e e faafouina pea le malosi o le tagata i totonu i lea aso ma lea aso.”—2 Korinito 4:16, Phillips.

O Elena, o le tinā o se fanau e toʻaono ma o le avā a se tane e lē talitonu, e pisi lava lona olaga. E iai ona tiute tauave mo lona lava aiga ma nisi o ona tauaiga, e foliga mai e fepisiai solo o ia i lea mea ma lea mea. Ae peitai, e na te faataatia foi se faaaoaoga aogā i le talaʻiga ma le sauniuni atu mo sauniga. E mafai faapefea ona ia taulimaina le tele naua o na gaoioiga?

Ua faamatala mai e Elena e faapea: “O sauniga ma le auaunaga i le fanua ua matuā fesoasoani ia te au i le feagai ai ma isi tiute tauave. Mo se faaaoaoga, pe a uma le talaʻiga, e tele lava isi mea e tatau ona ou mafaufau i ai pe a faia aʻu galuega i le fale. E masani lava ona ou pese a o faia ia galuega. I le isi itu, afai ou te misia se sauniga pe itiiti se sao na faia i le auaunaga i le fanua, e avea ai galuega i le fale ma mea mamafa.”

Pagā se eseesega ma le soona faamamafa o faigā malologa!

O le Matagofie Faaleagaga e Fiafia i ai Ieova

O loo tatou ola i se lalolagi ua tele ina faatāua ai le foliga atu i fafo. Ua faaalu e tagata le tele o tupe i togafitiga e faaleleia ai o latou foliga ma faaitiitia ai āuga o le tagata matua. E aofia ai i nei mea le toe taumafai e faatutupuina le laulu ma le valiina, taotoga e faaaulelei ai susu, ma taotoga e faaleleia ai foliga. E faitau miliona o loo auai atu i nofoaga faamalositino e faapaeee ai, po o vasega faamalositino, pe latou te faatauina mai foi le anoano o vitiō faamalositino ma tusi e faamatala mai ai le auala e faapaee ai le tino. O le a faatalitonuina i tatou e le lalolagi e faapea, o le ala i le fiafia, o o tatou “foliga” vaaia, e matuā tāua lava i le vaaiga a isi tagata.

I le Iunaite Setete, na taʻua ai i le mekasini o le Newsweek se suesuega na faia, ma iloa ai e 90 pasene o talavou papalagi i Amerika sa “lē fiafia i o latou tino.” O le soona moomoo mo se fuaitino manaia e mafai ona aafia ai lo tatou itu faaleagaga. O Tora, o se talavou Molimau a Ieova o lē na lagona le mā ona o ona foliga faaletino auā sa foliga mai ua fai si puta tele. Ua ia faamatala mai e faapea: “Pe a ou alu ou te faatau, sa faigata ona maua ni ofu talafeagai e fetaui ia te au. E foliga mai o lavalava mananaia sa faia e fuafua mo na o talavou paeee. O le mea e sili ona leaga, o le fai mai lea e tagata o tala e ula mai ai ia te au i loʻu puta, ma ou te matuā lē fiafia ai lava, ae maise lava pe a fai mai e uso ma tuafafine faaleagaga.

“O le iuga, sa oo ina atili ai ona ou popole i oʻu foliga vaaia, ua oo ai ina amata ona ou lē faamuamuaina mea faaleagaga i loʻu olaga. E pei ua foliga mai e faalagolago loʻu fiafia i loʻu fuaitino. Ina ua mavae ni nai tausaga, ma ua oo nei ina ou matua i le tino ma matua o se fafine Kerisiano, ua ese laʻu vaaiga i mea. E ui lava ou te vaaia lelei oʻu foliga, ae ua ou iloa o le lalelei faaleagaga e sili ona tāua, o le mea lena ua aumaia ai ia te au le loto malie e sili atu. Ina ua ou malamalama i lena tulaga, sa mafai ai loa ona ou tuua manaoga o le Malo i le tulaga saʻo.”

O Sara, o se fafine faamaoni o aso ua mavae, o lē na iai lenei vaaiga paleni. E ui lava o loo tautala le Tusi Paia e uiga i lona lalelei faaletino ina ua sili atu i le 60 ona tausaga, ae sa sili ona tatai atu e le Tusi Paia manatu i ona uiga lelei—le tagata lilo o le loto. (Kenese 12:11; 1 Peteru 3:4-6) Sa ia faaalia se agaga loto maulalo ma agamalu, ma sa ia usiusitai ma gauai atu i lana tane. Sa lei popole tele Sara e uiga i le vaaiga a isi tagata e uiga ia te ia. E ui lava e tupuga mai o ia i se aiga mauoloa, ae sa loto malie o ia e nofo i faleie mo le sili atu i le 60 tausaga. Sa ia lagolagosua ma le loto maulalo ma le lē manatu faapito i lana tane; sa avea o ia o se fafine faatuatua. O lena mea na avea ai o ia o se fafine e lalelei moni.—Faataoto 31:30; Eperu 11:11.

I le avea o ni Kerisiano, ua tatou naunau ai e faaleleia lo tatou lalelei faaleagaga, o se lalelei afai e ati ae pea e lē aunoa, o le a tupu ma tumau. (Kolose 1:9, 10) E lua ni auala autū e mafai ai ona tatou tausia o tatou foliga faaleagaga.

E oo ina sili atu ona matagofie i tatou i le silafaga a Ieova pe afai e faia so tatou sao i la tatou faiva faasaoola. (Isaia 52:7; 2 Korinito 3:18–4:2) E lē gata i lea, a o tatou aʻoaʻoina e faaalia uiga faa-Kerisiano, ua faateleina ai lo tatou lalelei. O le a tele ai avanoa e faaleleia ai lo tatou matagofie faaleagaga: “Ia fefaapelepeleai i le fealofani o uso; ia tausolomua ona ava o le tasi i le tasi. . . . ia malosi le loto, . . . ia tausisi i le alofa i tagata ese. . . . Ia outou olioli faatasi ma e ua olioli, ia outou tagi foi faatasi ma e ua fetagisi. . . . Aua le taui atu le leaga i le leaga i se tasi; . . . ia outou nofo lelei ma tagata uma lava.” (Roma 12:10-18) O le atiaeina o na uiga o le a alofagia ai i tatou e le Atua atoa ma tagata, ma o le a faaitiitia ai foliga matagā o o tatou faanaunauga ona o le agasala tuufaasolo.—Kalatia 5:22, 23; 2 Peteru 1:5-8.

E Mafai Ona Tatou Tetee Atu i le Agaga o le Lalolagi!

I le matuā tele o auala togafiti poto, e mafai ai e le agaga oona o le lalolagi ona faavaivaia lo tatou faamaoni. E mafai ona lē maua ai e i tatou le loto malie i mea ua tatou maua ma manatu ai e faamuamua o tatou lava manaoga ma faanaunauga nai lo o le finagalo o le Atua. E mafai foi i lea ona taitaiina ai i tatou e mafaufau i mafaufauga o tagata nai lo o le silafaga a le Atua, ma soona faatāuaina ai ia faiga malologa po o foliga vaaia faaletino.—Faatusatusa le Mataio 16:21-23.

O loo maumauai Satani e faaumatia lo tatou itu faaleagaga, ma o le agaga o le lalolagi o se tasi lea o ana auupega autū. Ia manatua e mafai e le Tiapolo ona liua ana togafiti mai le pei o se leona tagi i le avea e pei o se gata atamai. (Kenese 3:1; 1 Peteru 5:8) E iai taimi e faatoilalo ai e le lalolagi se Kerisiano e ala i faiga sauā matuitui, ae e sili ona faia faapea e Satani e ala i le faaoonaina mālie o se Kerisiano. Sa sili ona manatu mamafa Paulo e uiga i le lamatiaga mulimuli lenei: “A e ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.”—2 Korinito 11:3.

Ina ia puipuia i tatou mai togafiti poto a le gata, e manaomia ona tatou iloaina faatosinaga “mai le lalolagi” ma matuā teena ai. (1 Ioane 2:16) E lē tatau ona faaseseina i tatou i le talitonu faapea, e lē afaina auala o loo mafaufau ai le lalolagi. Ua oo atu le ea oona o le faiga o mea a Satani i ni tulaga lamatia.—Efeso 2:2.

O le taimi lava e iloa ai ni mafaufauga faalelalolagi, e mafai ona tatou tau faasaga i ai e ala i le faatumuina o o tatou mafaufau ma loto i aʻoaʻoga mamā a Ieova. I le pei o le tupu o Tavita, seʻi o tatou faapea atu: “Ieova e, ia e faailoa mai ia te au ou ala; ia e aʻoaʻo mai ia te au i ou magāala. Ia e taʻitaʻi mai ia te au i le mea moni mai ia te oe, ma aʻoaʻo mai ia te au, auā o oe o le Atua o loʻu olataga.”—Salamo 25:4, 5.

[Faaopoopoga i lalo]

[Ata i le itulau 26]

O le fia maua o se olaga e sili ona lelei, o le a faatosina ese ai i tatou mai sini faaleagaga