E Mafai Faapefea Ona E Tausia se Auaiga?

1. Aisea e mafai ai ona matuā faigata le tausia o se auaiga i aso nei?

“O LE A mavae atu le tu o le lalolagi nei.” (1 Korinito 7:31) O na upu sa tusia i le silia i le 1,900 tausaga ua mavae, ma e maeu le moni o na upu i aso nei! O loo suia tulaga o mea, ae maise lava e tusa ai o le olaga faaleaiga. O mea sa manatu i ai o ni mea masani po o ni tū masani i le 40 po o le 50 tausaga ua mavae, ua masani ona lē taliaina i aso nei. Ona o lenei tulaga, o le tausia ma le manuia o se auaiga e mafai ona oo mai ai ni luʻi tetele. E ui i lea, pe afai e utagiaina fautuaga faale-Tusi Paia, e mafai ona e manumalo i na luʻi.

IA OLA E TUSA O MEA UA E MAUA

2. O ā tulaga tau i le tamaoaiga e faapogaia ai mafatiaga i se aiga?

² E toatele tagata i aso nei ua lē o toe faamalieina i se olaga faigofie e māfuli atu i le tulaga tau i le aiga. A o faatupulaia pea e le lalolagi o faiga faapisinisi le tele o oloa ma faaaogā ona tomai faatosina e taumafai ina ia mailei atu ai le lautele, e faitau miliona tamā ma tinā ua latou faaalu le tele o taimi e faigaluega ai ina ia mafai ona latou faatauina nei oloa. O le isi faitau miliona ua fesagai ma le tauiviga i aso taitasi i le tau lava ina maua ni meaʻai. Ua sili atu le tele o le taimi o loo latou faaaluina i le galuega nai lo le tulaga sa iai muamua, atonu ua tailua galuega, e tau ina ia totogi ai mea o loo matuā manaomia. Peitai o isi o le a fiafia i le tau lava o le mauaina o se galuega, talu ai ua matuā taatele le faafitauli o le leai o ni galuega. Ioe, ua lē faigofie i taimi uma le olaga mo le aiga i ona po nei, ae mafai e mataupu silisili o le Tusi Paia ona fesoasoani i aiga ina ia faia le mea sili latou te mafaia e tusa ai o o latou tulaga.

3. O le ā le mataupu silisili na faamatala e le aposetolo o Paulo, ma e faapefea i le faatatauina o lea mataupu silisili ona fesoasoani i se tasi ina ia manuia ai i le tausia o se auaiga?

³ Na fetaiai le aposetolo o Paulo ma omiga tau tamaoaiga. I le taulimaina o na omiga, na ia aʻoaʻoina ai se lesona aogā, lea ua ia faamatalaina i lana tusi atu i lana uo o Timoteo. Ua tusi Paulo: “Tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manao.” (1 Timoteo 6:7, 8) O le mea moni, e manaomia e le aiga nisi mea e tele atu nai lo na o meaʻai ma lavalava. E manaomia foi se mea e nonofo ai. E manaomia e le fanau aʻoaʻoga. E iai foi pili o togafitiga faafomaʻi ma isi tupe faaalu. E ui i lea, e aogā pea le mataupu silisili o upu a Paulo. Pe afai e gata o tatou manao i le faamalieina i mea o tatou moomia moni (needs) nai lo le pupū atu i mea o loo na ona fia maua, (wants) o le a faigofie la le olaga.

4, 5. E mafai faapefea i le muai mafaufau ma le fuafua mamao ona aogā i le tausiaina o se auaiga?

⁴ O le isi mataupu silisili aogā o loo maua lea i se tasi o tala faatusa a Iesu. Na fetalai o ia: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai?” (Luka 14:28) O loo fetalai Iesu iinei i le muai mafaufau, le fuafua mamao. Sa tatou vaaia i le mataupu ua mavae atu le auala e aogā ai lenei mea pe a manatunatu ni tagata talavou se toalua ua fia faaipoipo. Ma pe a mavae le faaipoipoga, e aogā foi le fuafua mamao i le tausiaina o se auaiga. O le muai mafaufau i lenei itu e aofia ai le iai o se tupe faasoasoa, i le muai lava o le taimi e fuafua ai le faaaogaina i se tulaga e sili ona atamai o alamanuia o loo iai. I lenei auala e mafai ai e se aiga ona pulea lelei tupe faaalu, i le faataatia ese o tupe e faaaogā i mea e manaomia moni i aso taitasi po o vaiaso taitasi, ma ia lē sili atu ai le faaaogā nai lo mea e mafai ona gafatia.

⁵ I nisi atunuu, o sea faasoasoaina o tupe atonu e uiga i le teena o le faanaunauga ina ia nonō mai ni tupe e maualuga tupe tului e toe totogi atu mo ni faatauga e lē o matuā manaomia ona faia. I isi atunuu, atonu e uiga i le matuā maumauai i le pulea o le faaaogaina o pepa ia e faatau faaaitalafu ai mea (credit cards). (Faataoto 22:7) Atonu e faauiga foi i le teena o le uiga, o le vaai loa i ai manao loa e faatau—le faatauina o se mea ua faafuasei ona tosina i ai le vaai, e aunoa ma le mafaufauina lelei o mea o manaomia moni ma āuga foi e iu i ai. E lē gata i lea, o se tupe faasoasoa o le a foliga mai ai, o le faamaimau ma le manatu faapito o tupe i taaloga fai tupe, le ulaula tapaa, ma le inu tele i le ava malosi e faaleagaina ai le tulaga tau tamaoaiga o le aiga, faapea foi ma le feteenai ma mataupu silisili o le Tusi Paia.—Faataoto 23:20, 21, 29-35; Roma 6:19; Efeso 5:3-5.

6. O ā upu moni faale-Tusi Paia e fesoasoani ia i latou o ē o loo ola matitiva?

⁶ Ae faapefea i latou o ē ua omia i se olaga mativa? O le mea mautinoa, e mafai ona faamafanafanaina i latou i le iloa o le a lē tumau lenei faafitauli ua aafia ai le lalolagi aoao. I le lalolagi fou ua lata tele mai, o le a soloiesea ai e Ieova le mativa faatasi ma isi mea leaga uma o loo faapogaia ai mala i tagata. (Salamo 72:1, 12-16) I le taimi nei, e tusa lava pe ua matuā matitiva Kerisiano moni, ae latou te lē lagona se matuā fememeai, auā o loo latou faatuatua atu i le folafolaga a Ieova: “Ou te le tuua lava oe, ou te le tuulafoai lava ia te oe.” O lea la, e mafai e se tagata talitonu ona faapea mai ma le mautinoa: “O le Alii o loʻu fesoasoani ia, ou te le fefe lava.” (Eperu 13:5, 6) I nei aso faigata, ua lagolagoina ai e Ieova ona tagata tapuai i le tele o auala a o latou ola e tusa ai ma ana mataupu silisili ma faamuamuaina lona Malo i o latou olaga. (Mataio 6:33) O le toatele o i latou, e mafai ona molimau mai i upu a le aposetolo o Paulo: “Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea ma ia oge mea. Ou te mafaia mea uma lava ona o ia ua faamalosia mai ia te au.”—Filipi 4:12, 13.

AMOINA FAATASI LE AVEGA

7. O ā fetalaiga a Iesu o le a aogā i le manuia o le tausia o se auaiga pe afai e faatatauina?

⁷ I le lalata atu i le iuga o lana faiva i le lalolagi, na fetalai ai Iesu: “E te alofa atu i lē lua te tuaoi, ia pei o oe lava ia te oe.” (Mataio 22:39) O le faatatauina o lenei fautuaga i le aiga e aogā tele lea i le tausia o se auaiga. Ae maise ai, pe ua lē o i latou ea o loo tatou nonofo faatasi i lo tatou aiga, o o tatou tuaoi na e sili ona vavalalata ma pele ia i tatou—o tane ma avā, o mātua ma fanau? E mafai faapefea e tagata o le aiga ona faaalia le alofa o le tasi i le isi?

8. E mafai faapefea ona faaalia le alofa i totonu o le aiga?

⁸ O le tasi o auala o le faia lea e tagata taitoatasi o le aiga o sona sao talafeagai i feau a le aiga. E manaomia ai la ona aʻoaʻoina le fanau ina ia teu lelei mea pe a uma ona faaaogā, e tusa po o nei mea o ni lavalava po o ni meataalo. Atonu e alu ai le taimi ma taumafaiga i le teuina o le moega i taeao taitasi, ae o se fesoasoani tele i le tausiaina o le auaiga. O le mea moni, e iai nisi gasu laiti lē tumau, e lē mafai ona alofia, peitai e mafai e tagata uma ona galulue faatasi i le tausia mamā o le fale, ma le fufuluina o ipu pe a maeʻa taumafataga. O le paie, le manatu faapito, ma le uiga o le faaloloto, ma le augatā, e iai sona āuga leaga i tagata taitoatasi. (Faataoto 26:14-16) I le isi itu, o se uiga fiafia, ma le lotomalie e faatupuina atili ai se olaga fiafia faaleaiga. “E alofa le Atua i le ua foai ma le loto mālie.”—2 Korinito 9:7.

9, 10. (a) O le ā le avega e masani ona paʻū atu i le fafine o le aiga, ma e mafai faapefea ona faamāmāina lenei avega? (e) O le ā le vaaiga paleni lelei i galuega i le fale ua fautuaina mai?

⁹ O le magafagafa ma le alofa o le a fesoasoani e taofia ai le tupu aʻe o se tulaga o loo avea ma faafitauli matuia i nisi aiga. Ua masani ona avea tinā o tagata autū e tausia le aiga. O i latou e tausia le fanau, faamamāina le fale, faia le tagamea a le aiga, e faia faatau ma kukaina meaʻai. I nisi atunuu, ua avea ai foi o se tū masani mo fafine le galulue i faatoaga, e faatau atu fua o faatoaga i le maketi, po o le saosaolaumea mai i nisi auala mo le tupe faasoasoa a le aiga. E oo lava i atunuu sa lei avea muamua ai lenei faiga o sa latou aganuu, ae o le sailia o mea manaomia ua uunaia ai le faitau miliona o fafine faaipoipo ina ia faigaluega i ni galuega e ese mai le aiga. O se avā ma o se tinā e faigaluega mamafa i nei vala eseese ua onomea i ai le faamālō. I le pei o le “avā amio lelei” o loo faamatalaina i le Tusi Paia, ua matuā toaga o ia i lona olaga. “E le ʻai foi o ia mea e ʻai a le paie.” (Faataoto 31:10, 27) Ae ua lē o le uiga o lenei mea e faapea, ua na o le fafine lava e mafai ona faia galuega i le fale. Pe a maeʻa se galuega sa galulue ai le tane ma le avā i le aso atoa i fafo o le fale, pe tatau ea la ona tuu na o le avā na te faia uma galuega i totonu o le fale, ae mālōlō le tane ma le isi vaega uma o le aiga? E mautinoa lava e lē tatau. (Faatusatusa i le 2 Korinito 8:13, 14.) Mo se faaaoaoga la, pe afai o le a saunia e le tinā le meaʻai, atonu o le a loto faafetai o ia pe a fesoasoani atu isi tagata o le aiga i le sauniuniga i le tapenaina o le laulauʻai, faia nisi o faatauga, po o le tapenapena solo ifo o nisi mea i le fale. Ioe, o tagata uma lava e mafai ona latou tofu sao i lenei tiute tauave.—Faatusatusa i le Kalatia 6:2.

¹⁰ Atonu e faapea mai nisi: “I le atunuu o loo oʻu nofo ai, e lē o se matafaioi a se tamaloa le faia o na mea.” Atonu e saʻo lena, ae pe ua lē lelei ea ona seʻi toe manatunatu i lenei mataupu? Ina ua amataina e Ieova le Atua le aiga, sa ia lei poloaiina e faapea e iai ni galuega patino o le a na o fafine latou te faia. I se tasi o taimi, ina ua asiasi atu ni avefeau faapitoa mai ia Ieova i le tagata faatuatua o Aperaamo, sa lagolagosua atu foi o ia i le sauniunia ma le laulauina o se taumafataga mo mālō. (Kenese 18:1-8) Ua fautua mai le Tusi Paia: “[E] tatau ona alolofa o tane i a latou lava avā, faapei o latou lava tino.” (Efeso 5:28) Pe afai i le iuga o le aso, ua vaivai le tane ma ua manao e mālōlō, pe ua lē faapena ea foi faalogona o loo lagonaina e le avā, atonu pe sili atu? (1 Peteru 3:7) Pe ua lē talafeagai ai ea la ma o se uiga alofa mo le tane ona fesoasoani atu i galuega i le fale?—Filipi 2:3, 4.

11. I le ā le auala na faia ai e Iesu se faaaoaoga lelei mo tagata taitoatasi o le auaiga?

¹¹ O Iesu o le faaaoaoga sili ona lelei lea o lē na faafiafiaina le finagalo o le Atua ma aumaia le fiafiaga i ana aumea. E ui ina sa lei faaipoipo lava Iesu, ae o ia o se faaaoaoga sili ona lelei mo tane, faapea i avā ma fanau. Na ia fetalai e faatatau ia te ia lava: “O le Atalii o le tagata e lei sau ia ina ia auauna mai tagata ia te ia, a ia auauna atu ia,” o lona uiga, ia auauna atu i isi. (Mataio 20:28) Maeu le fiafia o na aiga o loo atiina aʻe ai e tagata uma sea uiga!

TUMAMĀ—AISEA E TĀUA TELE AI?

12. O le ā ua finagalo i ai Ieova mai ia i latou o ē auauna atu ia te ia?

¹² O le isi mataupu silisili o le Tusi Paia e mafai ona fesoasoani i le tausia o se auaiga o loo maua lea i le 2 Korinito 7:1. O iina tatou te faitau ai: “Ia tatou faamamā ia te i tatou i mea uma e leaga ai le tino atoa ma le agaga.” O i latou e usitaia nei upu faagaeeina ua talia e Ieova, o lē finagalo i le “tapuaiga e mamā ma lē faaleagaina.” (Iakopo 1:27, NW) Ma e mauaina ai e lo latou auaiga ni aogā faaopoopo.

13. Aisea ua tāua ai le tumamā i le tausiaina o le auaiga?

¹³ Mo se faaaoaoga, ua faamautinoa mai e le Tusi Paia ia i tatou e faapea, o le a oo mai le aso o le a lē toe iai ni faamaʻi ma ni maʻi. Ma i lena taimi, “e le fai mai foi se tasi ua mau ai, Ou te maʻi.” (Isaia 33:24; Faaaliga 21:4, 5) Peitai, a o lei oo mai lena taimi, e tatau i aiga uma ona latou tauivi ma maʻi mai lea taimi i lea taimi. E oo lava ia Paulo ma Timoteo sa mamaʻi foi. (Kalatia 4:13; 1 Timoteo 5:23) E ui i lea, ua faapea mai tagata popoto i mea faafomaʻi e mafai ona puipuia le tele o maʻi. O aiga atamamai ua latou alofia nisi o maʻi na e mafai ona puipuia mai ai pe a latou alofia le lē tumamā i le itu faaletino ma i le itu faaleagaga foi. Seʻi o tatou iloiloina pe faapefea.—Faatusatusa i le Faataoto 22:3.

14. O le ā le auala e mafai ai e le mamā tau amio ona puipuia se aiga mai faamaʻi?

¹⁴ O le mamā i le faaleagaga e aofia ai le mamā tau amio. E pei ona ua lauiloa, e uunaia e le Tusi Paia tapulaa maualuluga o amioga tatau ma taʻusalaina so o se ituaiga o faiga faaleituaiga i fafo atu o le faaipoipoga. “O e faitaaga, . . . ma e mulilulua, ma e tauātane, ma e faasotoma . . . e le fai mo latou tofi le malo o le Atua.” (1 Korinito 6:9, 10) O le usitaia o nei tapulaa maumaututū e tāua tele mo le ola ai o Kerisiano i le lalolagi i aso nei o loo paʻū ifo i le leaga tau amio. O le faia faapea e faafiafiaina ai le Atua ma e aogā foi ina ia puipuia ai le aiga mai faamaʻi pipisi e māfua mai faiga faaleituaiga e pei o le AIDS, sifili, maʻiafi, ma le chlamydia.—Faataoto 7:10-23.

15. Aumai se faaaoaoga o le lē tumamā faaletino lea e mafai ona māfua ai ni maʻi sa lē tatau ona tutupu.

¹⁵ ʻO le faamamāina e se tasi o ia lava mai mea e faaleagaina ai le tino,’ e fesoasoani lea i le puipuia o le aiga mai isi maʻi. E tele faamaʻi ua māfua ona o le lē tumamā faaletino. O se faaaoaoga autū, o le amioga o le ulaula. E lē gata o le ulaula e faapalapalāina ai māmā, o lavalava, ma le ea, ae e mamaʻi ai foi tagata. E faitau miliona tagata ua maliliu i tausaga taitasi ona o lo latou ulaula tapaa. Seʻi mafaufau i lena mea; i tausaga taitasi e faitau miliona tagata na semanū e lē mamaʻi ma maliliu vave pe ana latou alofia lea ʻmea e faaleagaina ai le tino’!

16, 17. (a) O le ā le tulafono na tuuina mai e Ieova na puipuia ai le fanauga a Isaraelu mai nisi o faamaʻi? (e) E mafai faapefea e le mataupu silisili ua faaalia i le Teuteronome 23:12, 13 ona faatatauina i auaiga uma?

¹⁶ Seʻi manatunatu i le isi faaaoaoga. E tusa ma le 3,500 tausaga ua mavae, na tuuina atu ai e le Atua i le nuu o Isaraelu lana Tulafono ina ia mafai ai ona faamaopoopoina la latou tapuaiga, ma i nisi itu, i o latou olaga i aso taitasi. Sa fesoasoani lena Tulafono e puipuia le nuu mai faamaʻi e ala i le faatutūina o nisi tulafono autū o le tausia o le soifua maloloina. O se tasi o na tulafono sa faia e faatatau i le lafoaiina o otaotavale o tagata, lea sa tatau ona tanu lelei e mamao ese mai le togalauapi ina ia lē faaleagaina le vaipanoa sa nonofo ai tagata. (Teuteronome 23:12, 13) O lena tulafono anamua o loo avea pea o se fautuaga lelei. E oo lava i aso nei ua mamaʻi ma maliliu tagata talu ai latou te lē o usitaia lea tulafono.a

¹⁷ Ina ia tusa ai ma le mataupu silisili o loo iai i lena tulafono ia Isaraelu, e tatau ai ona tausia mamā ma ia faaaogā vailaau e tapē ai siama i le faleese o se aiga—pe i totonu o le fale pe i fafo. Pe afai e lē tausia mamā ma ufiufi lelei le faleese, o le a mumu ai iina lago ma faasalalau atu ai siama i isi vaega o le fale—ma oo atu ai i meaʻai o loo tatou aai ai! E lē gata i lea, e tatau i tamaiti ma tagata matutua ona fufulu o latou lima pe a ō ese mai le faleese. Pe a lē faia faapena, latou te aumaia ai siama i o latou paʻu. E tusa ai o le manatu o se fomaʻi Falani, o le fufuluina o lima, “o loo tumau pea ona avea o se tasi o faamautinoaga e sili ona lelei mo le puipuia o maʻi o le manava, mānava, po o le paʻu.”

18, 19. O ā manatu ua fautuaina mai mo le tausisia pea o se fale mamā e tusa lava pe o iai i se vaipanoa matitiva?

¹⁸ E moni, o le tumamā o se luʻi i se vaipanoa matitiva. Na faamatala mai e se tasi o lē ua masani i tagata o lena vaipanoa e faapea: “O le matuā vevela o le tau ua faafaigata tele ai le galuega o le faamamā. O matagi malolosi e aumaia le pefu ua lilofia ai tamai pūpū uma o se fale i le enaena mafiafia mai o le pefu. . . . O le faatuputupulaia o aofaiga o tagata e nonofo i taulaga, faapea i nisi o nofoaga i nuu i tua, ua mapuna aʻe ai foi lamatiaga o le soifua maloloina. O paipa tetele e faatafe ai otaota o tagata e lē o ufiufia, o faaputuga o lapisi e lē aoina, o faleese ua faainaelo solo ai tagata i nofoaga faitele, o isumu e feaveaia faamaʻi, o mogamoga, ma lago ua avea o ni vaaiga masani.”

¹⁹ E faigata le tausisia o le tumamā i nei tulaga. Ae ui i lea, e aogā pea i ai ni taumafaiga. O le fasimoli ma le vai ma sina taumafaiga faaopoopo e sili atu ona taugofie lena nai lo fualaau ma pili a le falemaʻi. Pe afai o loo e alaala i se siomaga faapena, ia e taumafai i se tele e mafai ai, ina ia tausia pea lou fale ma lou laufanua ia mamā ma ia lē faainaelo ai manutataa. Pe afai e amata ona toʻa vaivai palapalā i le auala atu i lou fale i vaitaimi o timuga, faamata e mafai ona e tanuina le auala i ni iliili po o ni maa e fesoasoani e taofia ai le avatu o le palapala i le fale? Pe afai o loo faaaogā seevae, faamata e mafai ona tatala ese a o lei ulufale atu lē o loo ia seeina i totonu o le fale? E tatau foi ona tausia lou vaipaipa ma tane vai ina ia lē faaleagaina. Ua iai se faatatauga e lē itiiti mai i le lua miliona ē ua maliliu i tausaga taitasi, e māfua ona o faamaʻi e fesootai atu i suavai palapalā ma le lē mamā o le tausiaina o le tumamā.

20. Pe afai e tatau ona mamā le fale, o ai e ao ona saosaolaumea i le tiute tauave?

²⁰ O se fale mamā e faalagolago atu i tagata taitoatasi—le tinā, le tamā, le fanau, ma ē asiasi ane. Na faapea mai se tinā i Kenya e toavalu lana fanau: “Ua aʻoaʻoina uma lava i latou i le faia o a latou vaega.” O se fale e mamā, ma teu faalelei, e viia ai le aiga atoa. E faapea se alagaupu faa-Sepania: “E lē faapea o le mativa o le a tueleelea ai.” E tusa lava pe nofo se tasi i se fale e uigaese le telē, se potu mautotogi, se faleoo po o se tamai faasee, ae o le tumamā o le ki lea i se aiga e sili atu ona soifua maloloina.

O FAALAEIAUGA E ATILI AI ONA TATOU LELEI

21. Ina ia ogatusa ma le Faataoto 31:28, o le ā o le a fesoasoani ina ia mauaina ai le fiafiaga i se auaiga?

²¹ Ina ua talanoaina le avā amio lelei, ua faapea mai le tusi o le Faataoto: “E tulai mai lana fanau, ma faafetai ia te ia; o lana tane foi ua vivii ia te ia.” (Faataoto 31:28) O anafea le taimi mulimuli na e faamālō atu ai i se tagata o lou aiga? Ua pei moni i tatou o laau i le tau e totogo ai mea, o loo sauniuni e fuga aʻe pe a latou maua sina mafanafana ma se faasūsū. I lo tatou tulaga, tatou te manaomia le māfana e maua mai le faamālō. E fesoasoani lena i se avā ina ia ona iloa ai o loo talisapaia e lana tane ana galuega mamafa ma lana tausiga alofa, ma e lē o manatu māmā atu lana tane ia te ia. (Faataoto 15:23; 25:11) Ma e matagofie pe a faamālō atu se avā i lana tane mo ana galuega i fafo ma totonu o le fale. E faalaeiauina atili foi le fanau pe a faamālō atu i ai o latou mātua mo ni a latou taumafaiga sa fai i le aiga, i le aʻoga, pe i le faapotopotoga Kerisiano. Ma e maeu le tele e mafai ona faia e sina faafetai itiiti! O le ā le tele o taumafaiga e faaalu i le faapea atu: “Faafetai lava”? E itiiti, ae o āuga tau i le mafaufau ma faalogona i totonu o se aiga e mafai ona matuā tele.

22. O le ā e manaomia ina ia “faamausaliina” ai se auaiga, ma e mafai faapefea ona maua lenei mea?

²² I le tele o mafuaaga, o le tausiaina o se auaiga e lē faigofie. Peitai, e mafai ona faatinoina ma le manuia. Ua faapea mai se faataoto faale-Tusi Paia: “Ua atiina ae le fale i le poto; a e faamausaliina i le faautauta.” (Faataoto 24:3) O le poto ma le faautauta e mafai ona maua pe a tauivi tagata uma i le aiga e aʻoaʻoina le finagalo o le Atua ma faatatauina i o latou olaga. O se aiga fiafia e mautinoa lava le aogā o taumafaiga e faaalu ai!