Faatomuaina o Polosiua e Sailia ai Ē Naunau Fiafia

¹ O polosiua o ni meafaigaluega e malolosi. E na o le 32 itulau o le polosiua, ae e mafai ona matuā faamausaliina ai upu moni o le Tusi Paia ma liaieseina talitonuga ma aʻoaʻoga e feteenai ma le poto o le Atua.—2 Kori. 10:5.

² Ina ua maeʻa ona faitau e se tamaloa le polosiua o Molimau a Ieova—Autasi i le Faia o le Finagalo o le Atua i le Lalolagi Aoao, na oo ai ina tusi mai o ia e faapea: “Ou te leʻi iloa muamua lava se faalapotopotoga faapea. . . . E ofoofogia le mauaina o ni tagata o ē uigā ia i latou le finagalo o le Atua i lenei augatupulaga ua matuā tele ai le pepelo i faiga faalotu.” Sa suesueina e se fomai faataulaitu i Aferika le polosiua o le Olioli i Le Ola i Le Lalolagi e Faavavau! O le ā le iuga na oo ai ia te ia? Na ia lafoaia ana faiga faafomai faataulaitu ma toe faafoi uma fafine sa fai ma ana avā seʻi vagana ai lana uluai avā. Ona ia faaipoipo faaletulafono atu loa lea i ai.

³ O le polosiua o le Pe Ao ona E Talitonu i le Tolutasi? o se meafaigaluega aogā o le upu moni ua lelei ona faaupuina ma e uigā. I se faamatalaga e uiga i ai, na faapea mai se tusitala faalelotu mo le Sunday Gleaner i Iamaika, i le atu Initia i Sisifo: “O le lomiga . . . o se auupega sili lea a Molimau ma ua lē o toe saogalemu—nei sē e talitonu i le Tolutasi—po o sē e talitonu o Iesu o le Atua lea. E anoanoai faamatalaga o i le tamai tusi o loo siitia mai i tusi o talafaasolopito ma tusi faafaifeau e faailoa ai o le aʻoaʻoga o le Tolutasi sa leʻi amataina mai i le Tusi Paia. . . . Ua matuā sili ona faigata i lenei tusitala faalelotu ona iloa pe mafai faapefea e se tagata lotu—po o se tagata foi ua sili ona mapolotu—ona tali atu i finauga malolosi ma le maumauai ua faatulaga lelei mai e Molimau e teena ai le manatu faapea o Iesu o le Atua.”

⁴ Ia Faaaogā Lelei: Ina ia uigā, e ao ona tufa atu nei meafaigaluega faatosina loto malolosi, i tagata o le a latou faitauina. Ona o loo maua a tatou polosiua eseese, e tofu foi le polosiua ma se mataupu fou o talanoaina ai, e ao la ona tatou taumafai e ofoina le polosiua ua tatou mautinoa e sili ona talafeagai mo le tagata o loo tatou molimau atu i ai. O lo tatou masani i a tatou polosiua ma le faatagataga o ni polosiua eseese e faafaigofie ai ia i tatou ona faaaogā lelei, i le auaunaga i le fanua, i le aiga, po o so o se isi lava mea.

⁵ Mo se faaaoaoga, afai e talanoa atu i se tasi o loo fenuminumiai i le aʻoaʻoga a Kerisinetoma o le Tolutasi, po o sē talitonu o Iesu o le Atua lava lea, o lē fea polosiua e te faaaogāina? Pe a fesili se tasi i le pogai ua faataga ai e se Atua alofa le tele o puapuaga, o lē fea polosiua e te faamalieina ai le manaoga? Afai e faaleo mai e se tagata lona popole i le manaomia o se faiga malo e manuia ai tagata, o le ā le polosiua e talafeagai mo ia?

⁶ E lē gata ia iloa le polosiua e faaaogā, ae ia taumafai foi e faamataai le tagata i mataupu o loo iai. Pe afai e talafeagai, ia faasino i ai se faamatalaga po o se faataitaiga e ono faagaee ai lona naunau ina ia faitau le mataupu. Po o lou faitauina foi o se palakalafa e tasi pe lua faatasi ma ia, suʻe mau o loo sii mai, ma talanoaina le mataupu. E tele suesuega lelei faale-Tusi Paia ua amataina faapea.

⁷ Ua saunia e a tatou polosiua tali faale-Tusi Paia ma totōina le faamoemoe ia i latou o ē ua feoi ma mapu i tiga ona o mea inosia ua faia i le lalolagi. (Faatusatusa i le Esekielu 9:4.) O tagata e pei ni mamoe o le a tali mai i le feau o loo iai i na lomiga. O lo tatou faaeaga la, o le faaaogā lelei lea o polosiua i vala uma o la tatou faiva, a o tatou saili atu mo ē naunau fiafia.

Le Faaaogāina Lelei o Le Olomatamata ma le Awake!

¹ O Le Olomatamata ma le Awake! o mekasini ia ua sili ona tāua ma aogā e mafai ona faitauina e tagata i aso nei. Aisea? Auā o upu moni faaleagaga o loo iai e mafai ona oo atu ai se aafiaga lelei e faavavau i olaga o tagata. Peitai, e toatele e lē o matuā iloaina lelei o latou manaoga faaleagaga, pe latou te lē iloa foi le itu e saili atu i ai ina ia faamalieina ai. O lo tatou faaeaga la o le faataitai lea i le aposetolo o Paulo e ala i le fesoasoani i tagata ina ia ala mai faaleagaga.—Mata. 5:3; Galu. 26:18.

² Ia Saʻo le Vaai ma Sauniuni Lelei: Atonu e toatele tagata e pei ni mamoe i lau oganuu o le a tali mai i le upu moni. O nisi e na o sina faalaeiauga agalelei lava latou te manaomia ina ia faitau ai i mekasini. O lea la, ia saʻo ai le vaai ma ia iai le uiga faatauanau a o e ofoina atu Le Olomatamata ma le Awake! Ia lava pea ni kopi o mekasini ia te oe ma faaaogā tatau avanoa uma e tufa atu ai, e tusa lava po o loo faatomuaina isi lomiga.

³ O le ā atonu e atili ai ona tatou uigā i le tufatufaina atu o mekasini? O le mea muamua lava, e tatau ona tatou matuā talisapaia lo latou aogā. E ao ona tatou faamasani i mataupu o mekasini o loo tatou ofoina atu, ma o le a faateleina ai lo tatou mautinoa ma lo tatou mataalia e ofoina atu. Ia manatua lenei manatu a o e faatoʻā faitauina mekasini. Ia mataala e filifili manatu tāua e faamatilatila atu i le faiva. Fesili ifo ia te oe lava: ‘O ai e sili ona fetaui i ai lenei mataupu? Pe o le a talisapaia ea e se tina tausi aiga, se talavou, po o se tagata faipisinisi? Po o le a faatupu naunau ea lenei manatu i se tagata aʻoga, se tagata ua faaipoipo, i se tasi o loo popole i le siosiomaga?’ Ina ia uigā moni, e ao ona mafai ona tatou faaupu lelei atu mekasini e faavae i lo tatou iloa totino ma le olioli, ona o le talafeagai o o latou mataupu ma tulaga o loo ua iai nei.

⁴ Ia Faaaogā Lelei Lomiga Tuai: Ia manatua, e lē uma le aogā o Le Olomatamata ma le Awake!, e tusa lava po ua lē uma ona ofoina i se masina e tasi pe lua mai aso o ia lomiga. E mavae le taimi, ae lē faaitiitia ai le tāua o faamatalaga o iai, ma e lē tatau ai la ona tatou faatautu e ofoina atu kopi tuai pe afai o loo foliga lelei pea. O le na ona faaputuputu o mekasini tuai e lē taitai ona faaaogāina, ua faaalia ai le leai o se talisapaia o nei meafaigaluega aogā. O loo iai i mekasini taitasi upu moni e mafai ona faagaee ma faamalieina ai le mataai faaleagaga. Na i lo o le teu ese o lomiga tuai ma galo ai lava, po ua lē lelei ea ona taumafai faapitoa e ofoina atu i tagata naunau fiafia po o le faataatitia i se nofoaga e lilo mai i le vaaiga a isi pe a lē maua atu se tasi i le fale?

⁵ O le mekasini o le Awake! ua fesoasoani i le toatele o ē sa muai teena mea faaleagaga, ina ia manatunatu ai i o latou manaoga faaleagaga. O Le Olomatamata o le meafaigaluega autū i le