Ia Aʻoaʻo Isi Ina ia Maua e i Latou Lava Aogā
1 E finagalo Ieova ina ia maua e tagata uma aogā mo i latou lava. (Isa. 48:17) Ua ia silafia le mea e aumaia ai ia i tatou le fiafiaga moni. O lona faanaunauga sili e mo tagata ina ia alofia mala ma ia olioli i le ola e ala i le usitaia o ana poloaiga. E matuā tele aogā ua tatou maua e ala i lo tatou ola e ogatusa ma ala o le Atua. (Sala. 34:8) E mafai faapefea ona tatou aʻoaʻoina isi ina ia faia lea lava mea?
2 O le ā e Mananao i ai Tagata? O le ā o avea ma popolega o tagata i le mea o e nofo ai? Pe lē o le saogalemu ea o o latou aiga, le faatumauina o a latou faaipoipoga, le lumanai o a latou fanau, ma isi mea faapena? Pe a iai ni o latou faafitauli, o fea o latou liliu atu i ai mo se fesoasoani? Atonu o latou faalagolago ia i latou lava, i ni polokalame ua fuafuaina e faaleleia ai e le tagata ia lava, po o ni fautuaga mai isi. I le faagasologa o taimi, e toatele ua lē mautonu ona o le lē tutusa ma le lē aogā o manatu i le auala e maua ai e i latou lava ni aogā. E tatau ona tatou faamautinoa atu ia i latou e faapea, o mea o fai mai ai le Afioga a le Atua e tusa ai ma taiala, e sili mamao atu ona lelei. (Sala. 119:98) E mafai ona tatou faia lenei mea e ala i le faasino atu ia i latou o le auala e mafai ona faaleleia ai le tulaga o o latou olaga e oo lava i le taimi nei pe afai e latou te faia se taumafaiga ina ia suesue le Afioga a le Atua ma faatatauina mea o fai mai ai.—2 Timo. 3:16, 17.
3 Olaga Faaleaiga ua Faaleleia: E toaitiiti tagata ua latou iloa le aogā tele o le fautuaga faagaeeina i le Efeso 5:22–6:4 i le foiaina o faafitauli i le aiga. O le tulaga lena sa iai i se ulugalii o ē ina ua mavae le sefulu tausaga talu ona faaipoipo, na filifili ai e faapea o le a tetea. Ae petai, na faia se suesuega faale-Tusi Paia a le avā, o lē na aʻoaʻoina i mataupu silisili faale-Tusi Paia e faatatau i le olaga faaipoipo. E lei pine ae matauina e le tane suiga na faia e le avā a o ia faatatauina mataupu silisili o le Tusi Paia, ma sa ia aufaatasi atu loa i le suesuega. Na ia faapea mai mulimuli ane: “I le taimi nei, o lea ua ma maua le faavae mo se olaga faaleaiga e fiafia moni.”
4 Fuafuaga Moni i le Olaga: Ina ua saili e se tagata talavou o lē sa fai ma ana masani le faaaogaina o fualaau faasaina se fesoasoani mai Molimau, sa aʻoaʻoina o ia e faapea, o loo silasila alofa totino mai lava Ieova ia te ia. Na faapea mai o ia: ‘Ua ou iloa nei e iai se fuafuaga a Lē na Foafoaina Mea mo le tagata ma ua ia tuuina mai le faamoemoe o le ola e faavavau ia i latou o ē ua ia finagalo malie i ai. Atonu e lē o mafai ona outou iloa mai loʻu fiafia tele i lenei mea. I aso nei ua ou olioli ai i le soifua maloloina lelei, filemu o le mafaufau, ma se faiā matuā māfana ma le Atua.’
5 E mafai e tagata uma lava ona maua aogā mai le fesoasoani aogā o loo maua i le Afioga a le Atua. O le faaaogaina o le Afioga a le Atua e avea ma o tatou taiala, ua tatou faamautinoa ai o le ala a Ieova e sili mamao atu i ala a le lalolagi. (Sala. 116:12) O se faaeaga mo i tatou le faailoa atu o lenei feau i isi, i le aʻoaʻoina o i latou ina ia maua e i latou lava aogā. A o tatou faia faapea, o le a tatou vaaia ai le tele o iuga lelei.