loto ia i tatou, ua sili lava le Atua i o tatou loto, ua silafia foi e ia mea uma.”

Peitai, e tatou te lē mananao ia iai i ni tulaga faigata, ina ia olioli ai i le manatu alofa mai o le Atua. E naunau Ieova i so o se mea e ono aafia ai o tatou lelei faaleagaga ma lelei tau faalogona. Ioe, aua lava neʻi mafaufau faapea o o tatou faalogona, manatunatuga, ma popolega e faalētāua ma e lē tatau ona taʻua i le tatalo. (Filipi 4:6) Afai e te lua faatasi ma se uo mamae, pe e na o mea tetele ea e tutupu i le olaga e te lua talanoaina? Pe lua te lē fetufaai ea foi i popolega laiti? I se tulaga talitutusa, e mafai ona e saʻoloto e talanoa atu ia Ieova i so o se vala o lou olaga, i le iloaina faapea ‘o loo manatu mai o ia ia te oe.’—1 Peteru 5:7.

O le mea moni, e lē umi se faigauo pe afai e na o le pau lava le mea e te talanoa i ai, o oe. Ia faapena foi i a tatou tatalo ona lē faapito ia i tatou lava. E ao ona tatou faailoa atu lo tatou alofa ma lo tatou manatu mamafa ia Ieova ma lona finagalo. (Mataio 6:9, 10) O le tatalo ua lē gata o se avanoa e talosagaina ai se fesoasoani mai le Atua ae ua avea foi ma avanoa e ofoina atu ai se faafetai ma le viiga ia te ia. (Salamo 34:1; 95:2) O le “mauaina pea o le poto” e ala i suesuega totino o le a fesoasoani ia i tatou i lenei tulaga, e pei ona fesoasoani ia i tatou ina ia atili ai ona masani lelei ma Ieova ma ona ala. (Ioane 17:3) E mafai ona e maua patino fesoasoani i le faitauina o le tusi o Salamo ma mātau le auala na mafai ai e isi auauna faamaoni ona faailoa atu i latou lava ia Ieova.

O le faauooga ma Ieova o se meaalofa e tautele moni lava. Tau ina ia faaalia lo tatou talisapaiaina e ala i lo tatou tatalo atu i se tulaga e sili ona mafana, e sau mai le loto, o lagona totino. Ona tatou olioli ai lea i le fiafiaga lea na faailoa atu e le faisalamo e faapea: “Amuia le ua e filifilia, ma e faalatalataina o ia ia te oe.”—Salamo 65:4.

Fesili Mai le Au Faitau

Na faagaeetia i tatou i lo tatou suesueina o le faataoto a Iesu i mamoe ma ʻoti. I le manatu atu e tusa ai ma le malamalamaga fou na tuuina mai i “Le Olomatamata” o Oketopa 15, 1995, pe e mafai ona tatou fai atu pea o loo auai Molimau a Ieova i aso nei i se galuega o le tuueseeseina?

Ioe. I se tulaga malamalama, e toatele ua tau mānatu i lenei mea aua ua faapea mai le Mataio 25:31, 32: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti.” Sa faaalia e Le Olomatamata o Oketopa 15, 1995, le mafuaaga e faataunuuina ai nei fuaiupu pe a maeʻa ona amata le puapuaga tele. O le a maliu mai Iesu i lona mamalu faatasi ma ana agelu ma nofo i lona nofoa faamasino. Ona ia tuueseesea ai lea o tagata. O le ā lona uiga? O le a na tuuina atu faaiuga e faavae i mea na faia e tagata po o mea e lei faia e tagata a o lei oo i lena taimi.

E mafai ona tatou faatusaina i se faagasologa atoa o se iloiloga faafaamasinoga seia oo atu lava i le faia o le faamasinoga. Ua aoaoina mai faamaoniga i se vaitaimi faaumiumi a o lei oo ina faia le faamasinoga ma faaoo atu ai se faaiuga. O faamaoniga e iloa ai pe faamata o tagata o ola nei o le a iu ina avea ma mamoe po o ʻoti ua leva ona aoaoina mo se taimi umi. Ma o loo faaauau pea ona maua mai faamaoniga. Ae pe a nofo Iesu i lona nofoalii, o le a aumaia loa le iuga o le faamasinoga. O le a lava saunia o ia e tuuina atu le faaiuga. O le a vaevaeina tagata a lē mo le faaumatiaga e faavavau ia po o le ola e faavavau.

Peitai, ona o le tuueseeseina o tagata i le ola po o le oti o loo taʻua i le Mataio 25:32 e faia i le lumanai, e lē faapea ai la e lē o iai se tuueseeseina po o se vaevaeina, a o lei oo i lena taimi. O loo taʻua e le Tusi Paia i le Mataio mataupu e 13, se tasi o galuega o le tuueseesega e tupu muamua. Ma le naunautai lava, o le tusi Autasi i le Tapuaiga i le Atua Moni e Toatasi, itulau 179-180, ua talanoaina ai lenei mea i le ulutala “Tuueseeseina o Tagata”.a Ua faapea mai le tusi: “E iai foi isi mea tutupu iloga na matilatila le tuufaatasia e Iesu ma le vaitaimi faaiuiu o le faiga o mea. O se tasi o nei mea o le tuueseeseina lea o ‘tagata o le malo’ mai ‘fanau a le ua leaga.’ Na taʻua lenei mea e Iesu i lana faataoto i se fanua o saito na luluina i ai e le fili le titania.”

Na faasino atu le tusi i le tala faatusa a Iesu ua faatulaga mai i le Mataio 13:24-30 ma faamalamalama mai i fuaiupu e 36-43. Mātau mai le fuaiupu e 38 e faapea, o saito lelei ua fai ma sui o tagata o le Malo, ae o titania ua fai ma sui o le fanau a lē ua leaga. I le fuaiupu e 39 ma le 40 ua faaalia ai e faapea i le ‘vaitaimi faaiuiu o le faiga o mea’—le vaitaimi lenei o loo tatou ola ai—ua faapotopoto mai ai titania. Ua tuueseeseina ma mulimuli ane ai lava ona susunuina lea, ua faaumatia.

O le tala faatusa o loo faatatau atu i Kerisiano faauuina (o ē o loo taʻua i le faataoto i mamoe ma ʻoti, o uso o Iesu). O loo faaauau pea ona manino le manatu faapea e iai se tuueseeseina tāua o loo faia i o tatou taimi, o ē faauuina ua matuā manino lelei le ese mai ia i latou o ē faapea mai o Kerisiano ae ua faamaonia o i latou o “fanau ia a le o loo leaga.”

Ua aumaia foi e Iesu isi faataitaiga o tagata o loo faapea ona vaevaeina, po o le tuueseeseina. Manatua foi na ia fetalai e faatatau i le ala va tele e tau atu i le faaumatiaga e faapea: “E toatele foi i latou o e ui atu ai.” (Mataio 7:13) Sa lē faatatau atu lena faamatalaga i le na o se taunuuga mulimuli. O se faamatalaga e faatatau i se mea o loo faagasolo pea, e pei foi ona tupu moni i le taimi nei i le toaitiiti o i latou o mauaina le ala va apiapi e tau atu i le ola. Manatua foi, ina ua auina atu e Iesu le au aposetolo, na fetalai Iesu e faapea o le a latou maua nisi e tatau i ai. O isi o le a lē tatau i ai, ma sa tatau ona tūtū atu eleele o vae o aposetolo “e fai ma molimau” faasaga i na tagata. (Luka 9:5) Pe e lē o tupu moni ea le mea lenei a o faia e Kerisiano la latou faiva i le lautele i aso nei? O isi e talilelei mai, a o isi latou te teena le feau tauatua o loo faapea ona tatou avatua.

O mataupu i Le Olomatamata o loo faatatau atu i mamoe ma ʻoti ua faapea mai: “A o faatulaga mai i le lumanai le faamasinoga e pei ona faamatalaina i le faataoto, peitai e oo lava i le taimi nei o loo faia ai se galuega matuā tāua. O i tatou o Kerisiano o loo tatou auai i se galuega faasaoola o le folafolaina atu o se feau e faapogaia ai fevaevaeaiga i le va o tagata. (Mataio 10:32-39).” I le vaega lena o le Mataio mataupu e 10, tatou te faitau i ai e faapea, na fetalai Iesu o i latou e mulimuli atu ia te ia o le a faapogaia ai fevaevaeaiga—o le tamā faasaga i le atalii, o le tama teine faasaga i le tinā.

Mulimuli lava, o uso ua faauuina i le agaga o Keriso ua taimua i le galuega talaʻi o le feau o le Malo i le lalolagi aoao. A o faalogo i ai tagata ma talilelei mai po o le teena foi, ua latou faailoa mai le ituaiga tagata e iai i latou lava. O tatou o tagata e lē mafai, ma e lē tatau ona tatou, fai atu, ‘O le tagata lenei o se mamoe; o le tagata le la o se ʻoti,’ i se uiga e pei ona faailoa mai e le Mataio mataupu e 25. E ui i lea, o lo tatou faailoa atu o le tala lelei i tagata, ua tuu atu ai ia i latou e faailoa mai lo latou lava tulaga—le ituaiga tagata e iai i latou ma e faapefea foi ona latou tali atu i uso o Iesu. O lea la, e pei ona faateleina faamaoniga mo se mataupu tau faamasinoga, le eseesega i le va o i latou e lagolagoina uso o Iesu ma i latou o ē mumusu e lagolagoina i latou, ua oo ina matuā mautinoa lava. (Malaki 3:18) E pei ona faaalia mai e Le Olomatamata, e lē toe umi ona nofo lea o Iesu i lona nofoalii ma fofogaina mai le faaiuga, ona faia loa lea o le tuueseesega tau faamasinoga i se uiga faaiu mo le ola pe mo le faaumatiaga.

[Faaopoopoga i lalo]