“Ua Tali Mai Ieova i Aʻu Tatalo!”

I LE lalolagi aoao, ua faia ai e Molimau a Ieova le toetoe lava lima miliona suesuega faale-Tusi Paia i aiga ma tagata o ē o fiafia e aʻoaʻoina le poto saʻo e uiga i le Atua ma ana fuafuaga matagofie mo tagata. E oo lava i tamaiti Molimau a Ieova ua faia so latou sao i lenei galuega. Mo se faataitaiga seʻi manatunatu i se tamaitiiti e igoa ia Joel. Na tuuina atu o ia ia Ieova ma papatisoina ina ua iva ona tausaga. I se tausaga na mulimuli ane ai na tupu ai ia te ia lenei tala:

“A o iai i le fanua, sa ma feiloai ai ma se tamaitai e igoa ia Candy. Na ou ofoina i ai le polosiua ‘Faauta! Ou te Faia ia Fou Mea Uma Lava.’ Sa ia te ia le lomiga lena, ma o lea na ou ofoina loa i ai le tusi E Mafai ona E Ola e Faavavau i Parataiso i Le Lalolagi. Ua uma foi ona ia mauaina. O lea na ou mafaufau ai, ‘O le a ou ofoina i lenei tamaitai se suesuega faale-Tusi Paia.’ Na ia taliaina!

“Na nonofo Candy ma lona uso na vāivāi ona o le maʻi o le kanesa. E lē gata i lea, sa aʻoga foi Candy e avea ma teine tausimaʻi. O lea na taofia ai le suesuega faale-Tusi Paia mo sina vaitaimi. Ae na ou asiasi atu pea i ai ma oʻu mātua ia te ia ma tuu i ai mekasini ia te ia po o lana tane, o Dick. Na fai mai lana tane ia i matou e faapea e teuina e lana avā mekasini i autafa o lona moega ma e faitau i ai i le po.

“Mulimuli ane, na maliu le uso o Candy. Sa matou talanoa atu ma loʻu tamā ma loʻu tinā ia Candy i le tulaga o ē ua maliliu. Na toe filifili loa o ia e faaauau lana suesuega faale-Tusi Paia. I se tasi aso, na matou fesiligia ai Dick pe manao e auai i le suesuega a Candy ma faia ai o se suesuega faaleaiga. Na malie o ia i lena tonu. O le taimi la lenei, o loo oʻu suesue ai ma Dick ma Candy faatasi ai ma le fesoasoani a loʻu tamā. Ua telē se agaigai i luma o i laʻua ma ua taʻutino mai lo la loto talisapaia mo le suesuega faale-Tusi Paia.

“Na ou tatalo mo se suesuega faale-Tusi Paia, ma ua tali mai Ieova i aʻu tatalo!”

Pe e te Talia se Asiasiga?

E oo lava i lenei lalolagi ua tumu i faalavelave, e mafai lava ona e maua ai le fiafia mai le poto saʻo o le Tusi Paia e uiga i le Atua, lona Malo, ma lana fuafuaga matagofie mo tagata. Afai e te fia iloa nisi faamatalaga atili pe manao foi e asiasi atu se tasi e faia se suesuega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Western Samoa, po o se tuatusi talafeagai o loo lisiina mai i le itulau e 2.