Tauaofiaga Itumalo o le 1999 “Afioga Faavaloaga a le Atua”
1 A o toeitiiti lava ulu atu le nuu o Isaraelu i le Nuu Folafolaina, na aioi atu Mose ia i latou ina ia latou talisapaia faatonuga a le Atua. Na ia taʻu atu ia i latou e faapea: “E le se upu faatauvaa lea ia te outou, auā o i ai lo outou ola.” (Teu. 32:45-47) Pe tatou te lē loto faafetai ea ia Ieova ona o le tāua o o tatou ola ia te ia, lea foi ua ia faaauau ai pea ona taʻitaʻia i tatou e ala mai i lana Afioga tautele? O lea ua tatou faatalitalia ai ma le naunautai le Tauaofiaga Itumalo e tolu aso o “Afioga Faavaloaga a le Atua” ma faatalitalia mea o loo teuina e Ieova mo i tatou.
2 I lenei tausaga, ua fuafuaina ai tauaofiaga itumalo mo atunuu e tolu o loo i le oganuu a la tatou lālā, ma o le a faia i le faa-Peretania, faa-Samoa, ma le faa-Toga. O nofoaga ma aso e faia ai o loo mulimuli mai. Amerika Samoa: Maota o le Malo, Tafuna, Iulai 30–Aokuso 1, 1999 (faa-Peretania); Community College, Mapusaga, Aokuso 6-8, 1999 (faa-Samoa). Toga: Meeting Hall, Main Road, ʻAtele, Aokuso 27-29, 1999. Samoa: Maota mo Fonotaga, Sinamoga, Setema 17-19, 1999.
3 E lē masalomia ua maeʻa ona faia ni au fuafuaga ina ia e auai i aso uma o le tauaofiaga ona o loo e talitonu o loo faatalitalia oe e Ieova ina ia e auai. Ia mautinoa o loo ia silafia taumafaiga a tagata taitoatasi ma faataulagaina ua faia e ana auauna ina ia auai, ma na te manatuaina ma le talisapaia. (Epe. 6:10) E ala i le auai i aso taitasi o le tauaofiaga mai lava i le pese amata seia oo i le tatalo faaiu, tatou te faailoa atu ai ia Ieova e tautele ia i tatou ana afioga. (Teu. 4:10) Tatou te faaalia ai foi le talisapaia mo galuega mamafa a le toatele o o tatou uso o loo aafia i sauniuniga mo le tauaofiaga.
4 O le fuafuaina ina ia faatasitasi le faitau afe o tagata o le Atua i nofoaga o tauaofiaga taitasi e manaomia ai le muai fuafua mamao ma le faamaopoopoina lelei. O le iloaina faapea o fuafuaga mo tauaofiaga ua faia ma le alofa mo i tatou, e uunaia ai i tatou ina ia lagolagosua, ina ia “faia ai mea uma lava ma le matagofie ma le saunia lelei.” (1 Kori. 14:40) O faamatalaga ma faamanatuga o loo mulimuli mai ua saunia ina ia mafai ona e taunuu i la outou tauaofiaga ae ua e lava sauni e olioli i taumafa faaleagaga ma le mafutaga faa-Kerisiano.
A o Lei Oo i le Tauaofiaga
5 Po o manaomia e i latou o loo e faia a latou suesuega faale-Tusi Paia ma isi lava o ē e faaalia le fiafia se fesoasoani i le faia o ni sauniuniga totino ina ia auai i le tauaofiaga? O mea latou te vāai ma faalogo i ai iina e ono uunaia ai i latou ina ia avea ma tagata tapuai o Ieova. (1 Kori. 14:25) E tatau i toeaina ona nofouta i so o se tasi e faatalosagaina se fesoasoani mo āpi po o femalagaaiga, ae maise lava ē matutua o le faapotopotoga, ma faamautinoa ma le alofa ua faamalieina o latou manaoga.—Kala. 6:10.
6 O le toatele o i latou e auai i tauaofiaga i atunuu o loo i lalo o le vaavaaiga a la tatou lālā e mafai ona nonofo i aiga po o le faia o a latou lava fuafuaga mo ni āpi. Peitai, afai e te manaomia se āpi, ia tusi se tusi e faamatala atu ai mea e te manaomia ma tuuina atu i le failautusi o la outou faapotopotoga ina ia auina atu i le matagaluega mo āpi o le tauaofiaga.
7 Afai e te manaomia ni faamatalaga e faatatau i la outou tauaofiaga, e mafai ona maua atu na faamatalaga i le failautusi a la outou faapotopotoga. Afai e lē maua ia te ia, e mafai ona ia faafesootaia le komiti o le tauaofiaga po o le ofisa o le lālā. Faamolemole aua neʻi faafesootaia le pulega o fale na o loo totogi e faaaogā mo tauaofiaga.
8 Talu ai ua faatulagaina le Matagaluega o le Fesoasoani Muamua i le tauaofiaga ina ia taulimaina na o faalavelave faafuasei, o lea matou te fautuaina ai le aumaia o au lava fualaau asipulini, mea faapipii, pamu okesene, vai manava, ma mea faapena i le tauaofiaga pe afai e te iloa o na mea e ono manaomia. Pe afai e te aafia i se gasegase tumau matuia po o sē foi e pele ia te oe, e pei o le maʻi fatu, maʻi suka, po o se maʻi oso faafuasei, faamolemole aumai ni vai po o ni fualaau manaomia i le tauaofiaga mo le tausiaina o nei manaoga. O se faiga atamai mo se tasi o le aiga po o se uo vavalalata e malamalama i lea tulaga ona iai faatasi pea ma lea tagata, talu ai o le a iai ai o ia i se tulaga e sili ona lelei e saunia ai se fesoasoani manaomia.
9 O avanoa e molimau ai lē fuafuaina o le a ono tulai mai a o e faimalaga atu i le tauaofiaga ma toe foi mai. Pe o le a e nofo sauni ea e tufa atu le upu moni i isi? O i tatou uma lava, e aofia ai ma tamaiti laiti, e mafai ona aofia ai i le ofoina atu o sāvali i ē o faigaluega i pamu penisini, avepasi po o ave tamai taavale, ma isi tou te feiloai i lau malaga. O le a iai avanoa e mafai ona ofoina atu ai mekasini, polosiua, po o isi lomiga i ē faaalia le fiafia. Ia nofo sauni e molimau lē fuafuaina i tagata o ē atonu na misi i le galuega talaʻi masani.
10 Faamolemole ia talosaga atu mo ni pine fatafata ma faavaa mo oe ma lou aiga e ala atu i la outou faapotopotoga, auā o le a lē maua na mea i le tauaofiaga. Aua e te nofoai seʻi lata i le aso o le tauaofiaga ona faatoʻā fai lea. Faamolemole ia faamautinoa o loo fai lau pine a o e agaʻi atu i le tauaofiaga ma toe foi mai, ma i so o se taimi lava a o e iai i le aai o loo faia ai le tauaofiaga. O lenei mea e masani ona maua ai avanoa e avatu ai se molimau lelei.
A o Faia le Tauaofiaga
11 E mafai ona e taofia na o ni nofoa mo lou aiga po o i latou na tou ō mai faatasi i lau taavale. I tauaofiaga tetele, e faaleoleo ai nofoa e faigofie ona nofoia mo uso ma tuafāfine matutua, ma o le a iai nofoaga o le a faaagaga mo i latou e lē atoatoa le malosi ma i latou e manaomia ona faaaogaina nofoa faataavalevale. E lē mafai ona faaavanoaina ni potu faapitoa i le nofoaga o le tauaofiaga mo i latou e maua i gasegase ona o le siomaga o loo iai pe e ono aafiagofie. I aso taitasi a o e lei tuua lou nofoa, faamolemole ia siaki ina ia faamautinoa ua atoa uma au mea totino.
12 Ina ia tatou faapotopoto i aofaiga tetele mo a tatou tauaofiaga itumalo, e manaomia ai ona tatou usitaia tulafono o le nofoaga, āiāiga tau tineimu, ma isi lava lapataiga mo le saogalemu. O lea la, o taavale toso pepe, ma nofoa e mafai ona faamoe, e lē tatau ona aumaia i le nofoaga o loo tatou aofia potopoto ai. O nei mea e ono fai ma faalavelave i mea e savavali ai po o va foi o atu nofoa. Peitai, e taliaina nofoa mo tamaiti lea e faaaogā i totonu o taavale pe afai e ofi lelei i luga o se nofoa e sosoo ma mātua.
13 Pe o le a e papatiso ea i le tauaofiaga itumalo? Mo le polokalame i le taeao o le Aso Toonai, o le a faaleoleo ai se vaega o nofoa mo tagata papatiso, ma o le a faasino oe e le au tautua i lenei nofoaga. Pe afai e mafai, faamolemole nofoi ai iina a o lei amataina le polokalame. Tauaao mai lau Tusi Paia, tusi pese, solo taele, ma se ofu taele onomea. O ofuvae ua tatipi faapupuu vae, mitiafu e lolomi ai faaupuga, ma laei tai faapena e lē talafeagai mo se sauniga mamalu faapea. O toeaina latou te autaluina ma tagata o loo fuafua e papatiso, fesili mai le tamai tusi Aʻoaʻoga Faavae o le Tusi Paia, e tatau ona faamautinoa ua malamalama tagata taitoatasi i nei manatu. Talu ai o le papatisoga o se faailoga lea o le tuuina atu o le tagata lava ia ia Ieova le Atua, o le a lē talafeagai ai mo ni sui papatiso ona uulima a o faia le papatisoga.
14 E mafai ona e faaaogaina mea pueata, mea pueata vitiō, ma laau pueleo i le tauaofiaga. Peitai, o le vaipanoa o le a faatulaga mai ai nei masini po o le faaaogaina, e lē tatau ona polokaina ai le auala, ma pupuni ai le vaai a isi, po o le faalavelavea ai foi o le uaʻi atu i le polokalame. E lelei pe afai o nei mea e alu i maa molīuila—o lona uiga, ia lē suluina atu i palaka eletise po o mea faaleoteleleo.
15 E pei ona faateleina le faaaogaina o telefoni feaveai ma pagers, faamolemole ia faaeteete le faaaogaina o nei mea ina ia lē mafai ona faalavelavea ai lou uaʻi atu i le polokalame po o le uaʻi atu foi o i latou o loo tou nonofo faatasi. O nei masini e lē tatau ona tuu e faatatagi a o e iai faatasi ma le aofia. Afai e manaomia ona e faaaogaina se telefoni feaveai a o faagasolo le polokalame, faamolemole ia faia i fafo atu o le fale fono.
16 Ina ia faaaogā tatau le taimi ma ia faafaigofie, ua talosaga mai ai le Sosaiete ina ia tatou ō atu i le fono i aso taitasi ma avatu ni a tatou mea taumafa. O le tele o uso ua mulimuli atu i lenei taiala ma ua latou iloa ai, ina ua taape atu mo le malologa i le aoauli, ua mafai ai ona latou nonofo faatasi ma o latou aiga ma taumamafa faatasi i meaʻai na latou aumaia mo le aso. E toatele ua faapea mai, o le avanoa lea latou te mālōlō ai i le malologa i le aoauli ma faaalu ai se taimi faaopoopo ma o latou uso ma tuafāfine sa avea o se mea e fiafia ai. E manaomia la i lenei fuafuaga le muai faatauina o meaʻai ma faguinu ma tuu i totonu o se tamai pusa, po o se cooler e mafai ona ofi i lalo o le nofoa. Matou te talosaga atu i le aofia ina ia mulimuli uma i lenei faatonuga. Afai e tuua e uso le tauaofiaga ina ia faatau mai meaʻai i faleoloa e latalata ane, tatou te ono faatalitali ai i ni laina uumi ma milo faatasi ai ma tagata o le lalolagi, lea e faaleagaina ai le siomaga filemu o a tatou tauaofiaga. O lea la, matou te talosaga atu ai i tagata taitoatasi uma e taumafai e aumai sana meaʻai ma sana faguinu i le tauaofiaga i aso taitasi. O ē fiafia tou te ō mai faatasi i le tauaofiaga e tatau foi ona aumai ni a latou meaʻai. E lē faatagaina ona aumai i nofoaga o tauaofiaga, ni ʻava malosi faapea foi fagu po o nisi mea mataʻetaʻe e tuu ai meaʻai ma meainu.
17 Pe mafai ona e tauofo e fesoasoani i le faamamāina o le fale pe a maeʻa le polokalame i aso taitasi? Pe mafai foi ona e galue i se tasi o matagaluega o le tauaofiaga? Pe afai e mafai ona e fesoasoani, faamolemole susū mai i le Matagaluega o Auaunaga Tauofo i le tauaofiaga. O tamaiti e i lalo ifo o le 16 tausaga le matutua e talisapaia ona galulue faatasi ma o latou mātua po o se isi foi tagata matua o loo gafa ma le vaavaaia o i latou. O le mea moni, e mafai ona fesoasoani tagata uma i le faamamāina o le nofoaga e ala i le vaai pe iai ni lapisi e ono ave ma lafoai faalelei.
18 Ua tatou mauaina taiala lelei i ituaiga laei ma teuga e talafeagai i a tatou tauaofiaga. Mo se faaaoaoga: Ua ia i tatou taiala i lenei mataupu i faaopoopoga o La Tatou Faiva o le Malo, ua iai faataitaiga ma ata i a tatou lomiga, ae sili ona tāua i na mea uma, o loo ia i tatou fetalaiga a Ieova o loo i le Tusi Paia. (Roma 12:2; 1 Timo. 2:9, 10) E iloa i tatou e tagata ma le mafuaaga ua tatou faapotopoto ai i lo latou aai. O lea, o o tatou laei ma teuga o se molimau malosi lea. Ua faataatia e le toatele o tagata o Ieova se faataitaiga lelei i lenei mataupu. E ui i lea, e iai taimi e atagia mai ai le agaga o le lalolagi i laei ma teuga a nisi o ē auai i a tatou tauaofiaga. So o se ituaiga ofu lava e valavala ma aliali mai ai vaega o le tino e ono fesiligia ai le tulaga o se tasi pe o se tagata faaleagaga. O ni foliga e onomea, mamā, e sili atu ona talileleia. O lea, e tatau ai i ulu o aiga, ona iloiloina ma le faaeteete ofu o loo fuafua sui o le aiga e faaaogā. E mafai foi ona faatatau lenei mea pe afai ua tatou ō ese mai le nofoaga o le tauaofiaga. O le laeiina o a tatou pine fatafata a o lei amataina le fono ma pe a maeʻa foi, e mataulia atili ai i tatou faatasi ma tagata mamā o Ieova.—Faatusatusa i le Mareko 8:38.
19 Na faagaeeina le tupu poto o Solomona ina ia matauina e faapea e “fusifusia le valea i le loto o le tama” ma o le “tama ua tuulafoaiina, e tupu ai le mā o lona tinā.” (Faata. 22:15; 29:15) A o faagasolo le polokalame, o Molimau laiti e lē vaavaaia lelei e mafai ona faalavelave i isi uso ma tuafāfine o loo taumafai e mauaina aogā mai le polokalame. E mautinoa o nei talavou sa lei aogā i ai le polokalame faaleagaga lea na saunia foi mo i latou. Talu ai o mātua e tali atu i a Ieova e tusa ai o amio a a latou fanau, e tatau ai i le tamā po o le tinā ona mautinoa e na o le pau lava le auala e mafai ai ona pulea amio a tamaiti ma faalogo i aʻoaʻoga a Ieova pe afai latou te nonofo faatasi. O le a faalatalata atu le au tautua i so o se tasi e pisa ma talosaga atu e taofia le faia faapea, ma faamanatu atu ma le agaalofa ina ia uaʻi totoʻa i le polokalame.
20 Talu ai o lea tatou te valaauliaina le lautele i a tatou tauaofiaga, o se mea atamai ai le amanaia o lapataiga e faatatau i fanau ma mea totino. O a tatou fanau o se meaalofa tāua mai ia Ieova. Ae ua tatou iloaina o loo faaatagia mai e le lalolagi uiga faataugā tagata o Satani. O lea la, faamolemole ia e silafia le mea o iai lau fanau i taimi uma. E lē gata i lena, o mea pueata, ato tuutupe, ma isi mea tāua e tatau ona ia te oe i taimi uma ma ia aua neʻi tuua i lou nofoa. Ia mautinoa ua loka lau taavale, ma tuu mea totino i tua i le keli po o lou alu ma ave. O le faia faapea o le a faaitiitia ai le faaosoosoina o se tasi e oso faamalosi i totonu o lau taavale.
21 O televise ma vitiō e iai i faletalimalo e masani ona maua ai ālaata faasalalau lea e faaali mai ai polokalame o faiga faaleituaiga lē mamā. Afai o loo outou nonofo faatasi ma ni tauaiga o le lalolagi, atonu e te matauina ai foi o a latou filifiliga mo polokalame o televise ma vitiō e lē talafeagai mo se Kerisiano. O lea, faamolemole, ia vaavaai faalelei le faaaogaina e lau fanau o le televise, e pei lava ona e faia i lo outou aiga.
22 O se mea e faalaeiauina ai le vaai atu i uso ma tuafāfine o fai a latou faamaumauga a o faagasolo le polokalame. O faamaumauga pupuu o le a fesoasoani ia te oe e uaʻi atu ma manatua ai manatu tāua. O le toe autaluina mulimuli ane o au faamaumauga faatasi ma lou aiga po o au uo e uunaia ai oe e te mafaufau loloto i manatu tāua o le tauaofiaga ina ia lē galo.
23 O tagata o Ieova e masani lava ona faaalia le lima foai i le saosaolaumea lea i manaoga faatiokarate. (Eso. 36:5-7; 2 No. 31:10; Roma 15:26, 27) O a outou meaalofa tauofo i le galuega i le lalolagi aoao ua faaaogaina e totogi uma ai tupe faaalu o loo aofia i le faaaogaina o nofoaga tetele e faia ai tauaofiaga. Pe afai o lau tauofo e faasiaki, faamolemole fai ina ia totogi atu i le “International Bible Students Association.”
24 E pei ona faamauina i le Amosa 3:7, na fetalai mai Ieova o le a ia “le faia lava se mea . . . a e faaalia lona finagalo i ana auauna o perofeta.” Ona o ia o ‘lē faaalia mea ua lilo,’ ua faamauina ai e Ieova i le Tusi Paia le faitau selau o valoaga lea ua faataunuuina ma le saʻo ma le atoatoa. (Tani. 2:28, 47) Ua toeitiiti lava ona faataunuuina loa lea o folafolaga matagofie. O le a faamalosia lou faatuatua i folafolaga a le Atua e Tauaofiaga Itumalo o le 1999 o “Afioga Faavaloaga a le Atua.” Ia faalogologo lelei i afioga a Ieova mo oe. Ia e faatatauina mea o le a e vaai ma faalogologo i ai—i le faiva, i le faapotopotoga, ma i lou olaga totino. Matou te tatalo ia matuā faamanuia Ieova i au fuafuaga ina ia e auai i aso uma o lenei faigaʻai susua faaleagaga!
[Faamatalaga faaopoopo i le itulau 3]
Taimi o le Polokalame
Aso Faraile ma le Aso Toonai
9:30 a.m. – 5:00 p.m.
Aso Sa
9:30 a.m. – 4:00 p.m.
[Faamatalaga faaopoopo i le itulau 5]
Fuafua e auai i le aso atoa o le Aso Faraile, Aso Toonai, ma le Aso Sa!