Pe Fiafia le Atua i Tausamiga o le Seleselega?

FUA suamalie o laau ʻaina, fualaau faasua e faafiafiaina ai, ma le anoanoai o faaputuga tetele o fuifui saito aulelei, ua aumaia ai se vaaiga matagofie. I le taimi o le seleselega, o faaaliga o na mea ua teuteuina ai fata faitaulaga ma pulelaa o falesa i Egelani atoa. I Europa, e pei lava o isi nofoaga, e anoanoai tausamiga e faia e faailogaina ai e lē gata i le amataga, a o le faaiuga o le vaitaimi o le seleselega.

O i latou la e faalagolago le tausiga o i latou i le eleele, e matuā loto faafetai mo fua o le laueleele. E moni, na faatonu e le Atua le nuu o Isaraelu anamua ina ia faamanatu ni tausamiga se tolu faaletausaga e fesootai lelei ma le seleselega. I le amataga o le tau e totogo ai laau, i le taimi o le Tausamiga o Areto e lē Faafefeteina, e avatu ai e tagata Isaraelu i le Atua se vaega itiiti o uluai fua o le seleselega karite. I le Tausamiga o Vaiasosa (po o le Penetekoso) i le faaiuga o le tau e totogo ai laau, e latou te ofoina atu ai potoi areto e faia i uluai fua o saito ua seleseleina. I le tau e afu ai laau na faia ai le Tausamiga o le Faaputuga o Fua, e faailogaina ai le faaiuga o le tausaga o faiga o faatoaga i Isaraelu. (Esoto 23:14-17) O nei tausamiga sa avea o ni “faapotopotoga paia” ma o ni taimi e olioli ai.—Levitiko 23:2; Teuteronome 16:16.

Ae faapefea la faamanatuga o tausamiga o le seleselega i aso nei? Pe e fiafia i ai le Atua i na tausamiga?

Sootaga Faapaupau

I le lē fiafia i tu masani o tausamiga faaleaganuu i le taimi o le seleselega faapea ma inuga ʻava i le taimi o le faamanatuga, na manatu ai se failotu o le Lotu Egelani i Cornwall, i Egelani, i le 1843 e toe faaolaolaina se tu masani o le seleselega i vaitaimi o tausaga tutotonu. Na ia aveina ni uluai fua o saito o le seleselega ma faia ai se falaoa mo le faailogaina o le komenio i lana lotu. I le faia faapea, na ia faamanatu ai pea le tausamiga o Lammas—o se faamanatuga faa-Kerisiano ua faapea mai nisi e māfua mai i le tapuaiga faaanamua ia Lugh, le atua o tagata Celtic.a I lea, ua iai se amataga faapaupau o le tausamiga faaonaponei o le seleselega a le Lotu Egelani.

Ae faapefea isi faamanatuga na e faia i le faaiuga o taimi o le seleselega? E tusa ai ma le faamatalaga a le Encyclopædia Britannica, o le tele o tu na faailogaina ai nei tausamiga, na amata mai lava i tuā i “le talitonuga e faapea, e iai le agaga i le [fuifui] saito po o le saito fafine.” I nisi vaega o le lalolagi e talitonu ai faifaatoaga e faapea, e iai le agaga e nofo i le ʻau o le fuifui saito mulimuli lava e seleseleina. Ina ia tuli ese la le agaga, e latou te sasaina ai le fuifui saito mulimuli i le eleele. I isi nofoaga, e latou te lalagaina ai lau o saito e faia ai se “faatagata” ma teu lelei ona o le manatu e maua ai se “laki” seia oo i le taimi e lūlū ai fatu saito i le isi tausaga. Ona latou toe tatanu loa lea o ia fuifui saito atoa i le eleele ma le faamoemoe o le a manuia ai le fuata fou.

Ua faafesootai e nisi tala faaanamua le taimi o le seleselega ma le tapuaiga i le atua o Papelonia o Tamusa, o le paaga a le atua fafine o le fanautama o Ishtar. O le seleeseina o le fuifui saito matua, ua faatusaina i ai le vave oti o Tamusa. Ua oo lava ina faafesootai e isi tala faaanamua ia le taimi o le seleselega ma taulaga e faia i tagata—o se faiga e matuā inosia e Ieova le Atua.—Levitiko 20:2; Ieremia 7:30, 31.

O le ā le Silafaga a le Atua?

I feutagaiga a le Atua ma Isaraelu anamua, ua faaalia manino ai e faapea, o Ieova, Lē na Foafoaina Mea ma o le Puna o le ola, na te manaomia le tuutoina atoatoa atu o ona tagata tapuai. (Salamo 36:9; Nauma 1:2) I aso o le perofeta o Esekielu, o le fetagisi i le atua o Tamusa, sa o se mea na ‘matuā inosia’ i le silafaga a Ieova. O lenei faiga, faatasi ma isi faiga sese faalotu, na lē faafofogaina ai e le Atua tatalo a i latou i tapuaiga sese.—Esekielu 8:6, 13, 14, 18.

Seʻi faatusatusa lenei mea ma le mea na faatonu atu e Ieova le Atua i tagata Isaraelu ina ia faamanatu e tusa ai ma le seleselega. I le Tausamiga o le Faaputugā Fua, sa faia ai e tagata Isaraelu se fonotaga faalelotu lea e nonofo ai tagata matutua ma e talavou, o ē mauoa ma ē matitiva i ni nofoaga lē tumau e teuteuina i lālā o laau matagofie. Sa avea lenei o se taimi na matuā olioli ai i latou, ae avea foi o se taimi na mafaufau loloto ai i le faaolataga na faia e le Atua mo o latou augatamā i le taimi na Malaga ese mai ai mai Aikupito.—Levitiko 23:40-43.

I le taimi o tausamiga a Isaraelu, sa ofoina atu ai taulaga ia Ieova, le Atua moni e toatasi. (Teuteronome 8:10-20) Ae e tusa ai ma le talitonuga na muai taʻua e uiga i le iai o se solu i totonu o le fuifui saito mulimuli e seleseleina, e leai lava se mea i le Tusi Paia o taʻua ai le iai o se solu i se fuifui saito.b Ma ua faailoa manino mai i le Tusi Paia e faapea o faatusa e tumau pea ona leai se ola e iai, e lē mafai ona tautala, vaai, faalogo, sogisogi, lagona, pe fesoasoani atu i o latou tagata tapuai.—Salamo 115:5-8; Roma 1:23-25.

E lē o aofia ai Kerisiano i aso nei i le feagaiga o le Tulafono lea na osia e le Atua ma le nuu o Isaraelu anamua. O le mea moni, na ‘aveesea e le Atua i le tuʻituʻiina lea i fao i le satauro.’ (Kolose 2:13, 14) O auauna a Ieova i aso nei ua ola i “le tulafono a Keriso” ma ua faaalia le talisapaia mo mea uma ua saunia e le Atua.—Kalatia 6:2.

Ua taʻua manino mai e le aposetolo o Paulo e faapea, o tausamiga faa-Iutaia sa avea ma “ata o mea lelei atali,” ma faaopoopo mai, “a o le tino, e a Keriso lava lea.” (Kolose 2:16, 17) O le iuga, ua talia ai e Kerisiano moni le manatu o le Tusi Paia e faapea: “O mea ua fāsia e nuu ese, ua fāsia e i latou mo temoni, a e le o le Atua. . . . Tou te le mafaia ona inu i le ipu a le Alii [Ieova] atoa ma le ipu a temoni.” (1 Korinito 10:20, 21) E lē gata i lea, ua utagia e Kerisiano le faatonuga ina ia “aua foi tou te papai atu i se mea leaga.” Pe e iai ni fesootaiga faapaupau pe faalotu sese i tausamiga o le seleselega i lo outou tuaoi? Afai e iai, e mafai e Kerisiano moni ona aloese mai le faia o se mea e lē fiafia ai Ieova e ala i le faamamao ese mai so o se aafiaga i na tapuaiga ua faaleagaina.—2 Korinito 6:17.

Pe a maua e se tamaitiiti loto talisapaia se meaalofa mai lona tamā, o ai e faafetai atu i ai o ia? Po o se tagata ese po o lona matua? E ala i tatalo mai le loto, e ofo atu ai i lea aso ma lea aso e tagata tapuai o Ieova le Atua i lo latou Tamā faalelagi le faafetai ona o le tele o lona limafoai.—2 Korinito 6:18; 1 Tesalonia 5:17, 18.

[Faaopoopoga i lalo]