Ia Iloa Ieova le Atua e Iai Ona Uiga Patino

I LE faatusatusaina o le talitonuga faa-Hinitū e faatatau i le Atua ma talitonuga o isi faiga faalotu, ua taʻua e Dr. Radhakrishnan o Initia e faapea: “E ese le ituaiga e iai le Atua o sa Eperū. O ia o se peresona moni ma o loo galue maelega pea talu mai anamuā ma naunau mai i suiga ma fesuiaiga o loo tutupu i lenei lalolagi tau atiae. O ia o se Peresona o loo fesootai mai ia i tatou.”

O le suafa faa-Eperu o le Atua o le Tusi Paia o le יהוה, lea ua taatele ona faaliliuina “Ieova.” E aoao o ia i isi atua uma. O le ā ua tatou iloa e uiga ia te ia? Sa faapefea ona feutagai o ia ma tagata i aso anamua o le Tusi Paia?

Na “Faafesagai” Ieova ma Mose

Sa matuā “faafesagai” ma le māfana Ieova ma lana auauna o Mose, e ui ina lē mafai e Mose ona vaai tino atu i le Atua. (Teuteronome 34:10; Esoto 33:20) A o talavou Mose, sa mafuta atu pea lona loto i tagata Isaraelu, o ē na faapologaina i Aikupito i lena taimi. Na ia teena lona olaga o le avea o se tasi o le auaiga o Farao, e ala i le “filifili . . . ia agaleagaina o ia faatasi ma tagata o le Atua.” (Eperu 11:25) O le iuga, e tele ni faaeaga faapitoa na tuuina atu e Ieova ia Mose.

Ona o se tasi o le auaiga o Farao, “na aʻoaʻoina [ai] foi Mose i le poto uma lava o Aikupito.” (Galuega 7:22) Peitai ina ia taitaia le nuu o Isaraelu, sa manaomia foi ona ia atiina ae uiga o le lotomaulalo, le onosai, ma le agamalu. O le mea lena sa ia faia i le 40 tausaga a o avea ma leoleo mamoe i Mitiana. (Esoto 2:15-22; Numera 12:3) E ui sa tumau pea ona lē vaaia Ieova, ae na ia faaalia atu o ia ma ana fuafuaga ia Mose, ma e ala atu i agelu, na tauaaoina atu ai e le Atua ia te ia Tulafono e Sefulu. (Esoto 3:1-10; 19:3–20:20; Galuega 7:53; Eperu 11:27) Ua taʻu mai e le Tusi Paia ia i tatou e faapea “ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo.” (Esoto 33:11) O le mea moni, o Ieova lava ia na fetalai: “Ma te faafesagaʻi ona ma tautala ma ia.” Maeu se faiā tautele, se faiā vavalalata na olioli ai Mose ma lona Atua, o lē e ui ina lē vaaia, ae e iai ona uiga patino!—Numera 12:8.

Na tusia e Mose, e lē gata i talafaasolopito anamua o le nuu o Isaraelu, ae faapea foi le Tulafono ma ona vala eseese uma. Na faatuatuaina foi o ia i le vaaiga o le isi faaeaga tāua—o le tusiaina lea o le tusi o Kenese. O le vaega faaiu o lena tusi, o se tala i le mea na tupu moni lava i totonu o lona aiga ma o lea sa faigofie ai mo ia ona tusiaina. Ae o fea na maua mai ai e Mose auiliiliga o le talafaasolopito sili ona leva o le tagata? Atonu sa iai ia Mose tusitusiga anamua, ia sa teu lelei e ona augatamā, e maua mai ai ana faamatalaga. I le isi itu, atonu sa ia mauaina ni auiliiliga e ala mai ni faamatalaga tuugutu po o le tuusaʻo mai foi i ni faaaliga tauatua mai ia Ieova. Ua leva ona ioeina e tagata mamalu anamua le faiā totino lea sa olioli ai Mose ma lona Atua i lenei itu.

Ieova—Avea ma Atua Moni e Iai Ona Uiga Patino ia Elia

Sa iloa foi e le perofeta o Elia o Ieova o se Atua e iai ona uiga patino. Sa maelega Elia mo le tapuaiga mamā ma sa auauna ia Ieova e ui ina avea ma taulaiga o le matuā ʻinoʻino ma teteega mai tagata sa tapuai ia Paala, le atua sili o le malumalu o sa Kananā.—1 Tupu 18:17-40.

Sa saili Aapo, le tupu o Isaraelu, ma lana avā o Iesepela, ina ia fasiotia Elia. Ona o le popole i lona saogalemu, na sola atu ai Elia i Peresepa, i le itu i sisifo o le Sami Mate. O iina na ia fesavaliai solo ai i le vaomatua ma tatalo ai ina ia oti. (1 Tupu 19:1-4) Pe na tuulafoaia ea e Ieova Elia? Pe sa lē toe naunau mai o Ia i lana auauna faamaoni? Atonu o ni lagona na sa mafaufau i ai Elia, ae pagā sona sese! Mulimuli ane, ona fetalai lemū atu ai lea o Ieova ia te ia, i le fesili atu: “Elia e, se a lau mea e fai iina?” Ina ua maeʻa se faaaliga mataina o le mana silisili ese, ona “oo mai [lea] ia te ia le leo, ua [toe] faapea mai, Elia e, se a lau mea e fai iina?” Sa faaalia atu e Ieova lenei naunau totino ia Elia ina ia mafai ai ona faalaeiauina lana auauna maufaatuatuaina. Sa tele nisi galuega a Ieova e ao ona faia e Elia, ma sa naunautai o ia e taliaina lena valaau! Sa faataunuuina ma le faamaoni e Elia ona tofiga, ma faapaiaina ai le suafa o Ieova, lona Atua moni.—1 Tupu 19:9-18.

Ina ua teena e Ieova le nuu o Isaraelu, ona ia lē toe fetalai totino mai lea i ana auauna i le lalolagi. E lē o le uiga o lenei mea faapea ua lē toe naunau totino mai o ia ia i latou. E ala i lona agaga paia, ua ia faatonutonuina ma faalaeiauina ai pea i latou i lana auaunaga. Seʻi fai ma faaaoaoga, le aposetolo o Paulo, o lē na muai igoa ia Saulo.

Ua Taitaia Paulo e le Agaga Paia

O Saulo e sau mai Taso, o se aai taʻutaʻua i Kilikia. O ona mātua o ni Eperu, ae na fanau aʻe o ia o se tagatanuu Roma. Peitai, sa tausia aʻe Saulo e tusa ai ma talitonuga maumauai a le au Faresaio. Mulimuli ane, i Ierusalema, sa ia maua le avanoa e aʻoaʻoina ai “i le aʻoga a Kamalielu,” o se faiaʻoga taʻutaʻua o le Tulafono.—Galuega 22:3, 26-28.

Ona o le maelega sese o Saulo mo tu masani faa-Iutaia, na ia auai atu ai i taumafaiga matautia sa fai e tetee atu ai i soo o Iesu Keriso. O ia foi na ioeina le fasiotia o Setefano, le uluai Kerisiano na faamaturoina. (Galuega 7:58-60; 8:1, 3) Mulimuli ane na ia tautino ai e ui lava sa muai avea o ia ma sē e faifai ma faasauā ma o se tagata faamaualuga, sa “alofagia [o ia], auā na [ia] faia faapea i [lona] le iloa ma le le faatuatua.”—1 Timoteo 1:13.

Sa uunaia Saulo e se faanaunauga moni ina ia auauna atu i le Atua. Ina ua mavae le faaliliuina o Saulo i le ala i Tamaseko, ona faaaogā lea o ia e Ieova i se tulaga e sili ona ofoofogia. O Anania, o se uluai soo Kerisiano, o ia lea na faasino atu e le Keriso ua toetu mai, ina ia fesoasoani ia Paulo. Ina ua mavae lena, ona taitaiina ai lea o Paulo (le igoa faa-Roma lea na lauiloa ai Saulo o se Kerisiano) e le agaga paia o Ieova ina ia faataunuuina se faiva umi ma le fua tele mai, i vaega uma o Europa ma Asia Itiiti.—Galuega 13:2-5; 16:9, 10.

Pe mafai ona mataulia i aso nei lena lava taitaiga a le agaga paia? Ioe, e mafai.

O le Lē Talitonu i le Atua e Lē Taofia Mai ai Ieova i le Naunau Totino Atu i Tagata

O Joseph F. Rutherford o le peresitene lona lua lea o le Sosaiete a le Olo Matamata. Na papatisoina o ia i le 1906 e avea o se Tagata Aʻoga o le Tusi Paia—o le taʻu lena sa iloa ai Molimau a Ieova i na taimi—na tofia e avea ma loia a le Sosaiete i le tausaga na sosoo ai, ma avea ai loa ma peresitene ia Ianuari i le 1917. Peitai, na iai se taimi sa avea ai lenei loia talavou o se tagata e lē talitonu i le Atua. Na faapefea ona avea o ia o se auauna Kerisiano maelega a Ieova?

Ia Iulai 1913, na auauna ai Latafoti o se taitaifono i se tauaofiaga a le International Bible Students Association na usuia i Springfield, Massachusetts, U.S.A. Sa faatalanoaina Rutherford e se tagata fai lipoti mo le nusipepa a lea aai, le Homestead, ma sa toe lomia lena tala i se polosiua sa faamau ai manatu tāua o lena tauaofiaga.

Na faamatala e Latafoti e faapea, i le taimi na ia fuafua ai e faaipoipo, sa talitonu o ia i talitonuga o le Lotu Papatiso, ae o lana avā o le a fai, sa talitonu i talitonuga a le Lotu Perepereane. Ina ua taʻu atu e le faifeau o le lotu a Latafoti e faapea “o lana avā o le a iai e alu atu o ia i le afi i seoli ona sa lei papatisoina ae o ia [Latafoti] o le a alu atu saʻo i le lagi auā ua uma ona papatiso, o iina na suia ai lona mafaufau tonu na iai, ae amata ai loa ona lē toe talitonu i le Atua.”

E tele tausaga o sailiili ma le faaeteete Latafoti ina ia toe faatupuina lona faatuatua i le Atua moni. Na ia faapea mai, sa faasolo lona mafaufau i le manatu moni e faapea, “o faaiuga e lē talafeagai i le mafaufau e lē tatau ona taliaina e tau ina faamalieina ai le lagona.” O Kerisiano “e tatau ona latou mautinoa o loo moni le Tusi Paia lea o loo latou talitonu i ai,” o le faamatalaga lea a Latafoti, ma toe faaopoopo mai: “E tatau ona latou malamalama i o latou talitonuga.”—Tagai i le 2 Timoteo 3:16, 17.

Ioe, ua mafai e oo lava i aso nei e se tagata e lē talitonu pe lē ioe i le iai o se atua ona ia saili atu i le Tusi Paia, faatupu aʻe le faatuatua, ma atiina ae se faiā totino vavalalata ma Ieova le Atua. Sa iai se tasi tama talavou, ina ua uma ona ia suesueina maeʻaeʻa le Tusi Paia faatasi ai ma le fesoasoani a le lomiga a le Sosaiete, le tusi o Le Poto e Taʻitaʻia ai i le Ola e Faavavau, na ia tautino mai: “Sa ou lei talitonu i le Atua ina ua ou amataina lenei suesuega, ae i le taimi nei, ua ou iloa, o le poto e uiga i le Tusi Paia ua ia suia atoatoa loʻu mafaufau. Ua amata ona ou iloa Ieova ma faatuatua atu ia te ia.”

“Le Vale” ma le Atua

Ua faapea mai Dr. James Hastings i le Dictionary of the Bible: “Sa lei iai lava se faanaunauga i so o se tusitala o le Feagaiga Tuai [Tusitusiga faa-Eperu] e fesiligia pe finau mai i le iai o le Atua. E lē tusa ai ma faanaunauga o tagata lautele i aso anamua ona faafitia le iai o le Atua, pe faaaogā ni finauga e tau faamaonia mai ai. O le talitonuga sa avea o se mea e masani ai le mafaufau o le tagata ma sa taatele i tagata uma.” O le mea moni, e lē o le uiga o lenei mea faapea, sa matataʻu i le Atua tagata uma lava o lena vaitaimi. E matuā lē moni lena manatu. I le Salamo 14:1 ma le 53:1 o loo tau fai taʻua ai “le tagata valea,” pe e pei ona faapea mai le King James Version, o “le vale,” o lē ua faapea ifo i lona loto, “E leai se Ieova.”

O le ā le ituaiga o tagata e iai lenei vale, le tagata o loo ia faafitia le iai o le Atua? E lē o ia o se tagata e valea i le atamai faalemafaufau. Nai lo lea, o le upu Eperu na·valʹ o loo faasino atu i le leai o ni amioga tatau. I manatu na tusia e le polofesa o S. R. Driver, i le tusi The Parallel Psalter, ua ia faapea mai ai, o le mea sese e “lē o se vaivaiga i le fetuutuunai o le mafaufau, ae o le leai o se mafaufau lelei i amioga tatau ma tulaga faalotu, o se matuā leai o se mafaufau, po o se malamalamaga lelei.”

Ua faamatala atili mai e le faisalamo le faaleagaina o amioga tatau ona o na ituaiga o uiga: “Ua leaga lava i latou; ua inosia a latou amioga; e leai se tasi ua amio lelei.” (Salamo 14:1) Ua taaofai mai e Dr. Hastings manatu tāua e faapea: “Ona o le leai o le Atua mai mafaufauga o tagata ma le saolotoga e faia ai so o se mea leaga, ua oo ai ina leaga tagata ma latou faia mea e sili ona matagā.” Ua latou matuā sapasapaia manatu e lē faale-Atua ma faagalogalo i le Atua moni, o lē latou te lē o mananao e tali atu i ai. Peitai o na mafaufauga ua matuā valea ma lē mafaufau i aso nei e pei foi ona sa iai i le taimi na tusia ai e le faisalamo ana upu i le silia ma le 3,000 tausaga ua mavae.

O Lapataiga Mai lo Tatou Atua e Iai Ona Uiga Patino

Seʻi o tatou taliu atu nei i fesili ia na lāgā i la tatou mataupu amata. Aisea ua toatele naʻuā ai tagata ua lē mafai ona latou faafesootaia atu le Atua e iai ona uiga patino, ma mafatiaga ua faatumulia ai le lalolagi i aso nei?

O loo iai i le Tusi Paia faamatalaga tusitusia mai ia i latou, “o tagata o le Atua na talatalaina mai ina ua osofia mai e le Agaga Paia.” (2 Peteru 1:21) Ua na o iina lava o loo faaalia mai ai ia i tatou le Atua o se peresona moni, o Ieova lea. O loo lapataia mai ai foi i tatou e faatatau i sē o loo iai uiga e sili ona leaga, e lē vaaia e tagata, o lē e malosi i le tataʻiina ma le puleaina o mafaufauga faaletagata—o Satani le Tiapolo. O le mea mautinoa, afai tatou te lē talitonu i le Atua e iai ona uiga patino, e mafai la faapefea ona tatou talitonu o loo iai foi le Tiapolo moni, po o Satani?

Na faagaeeina le aposetolo o Ioane e tusia faapea: “[O lē] ua igoa i le tiapolo, i le ma Satani, o lē faasese i le lalolagi uma.” (Faaaliga 12:9) Mulimuli ane na faapea mai Ioane: “Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.” (1 Ioane 5:19) O nei faamatalaga ua atagia mai ai fetalaiga a Iesu, o fetalaiga na sa faamauina e Ioane lava ia i lana Evagelia: “O le a sau le alii o lenei lalolagi, a e le maua e ia se mea ia te au.”—Ioane 14:30.

Maeu le matuā ese o lenei aʻoaʻoga faale-Tusi Paia mai mea o loo talitonu i ai tagata i aso nei! Ua taʻua i le Catholic Herald: “O le talanoa e faatatau i le Tiapolo o se mea ua matuā pasiā i aso nei. Ua lē o toe faitaulia Satani i mafaufau o lo tatou augatupulaga masalosalovale.” Peitai, sa matuā mamafa fetalaiga a Iesu i na tagata o ē sa iai o latou faanaunauga e fia fasioti ia te ia: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā.”—Ioane 8:44.

Ua talafeagai le faamatalaga a le Tusi Paia e faatatau i le mana o Satani. Ua faamanino mai ai le mafuaaga, e ui lava i le faanaunauga o se vaega tele o tagata ina ia nonofo fifilemu ma autasi, ae ua matuā malaia le lalolagi i le feitagai, o taua, ma faiga sauā lē mafaufau, e pei ona sa faataitaia mai i Dunblane (lea na taʻua i le itulau e 3 ma le 4). E lē gata i lea, o Satani e lē na o ia le fili e tatau ona tatou tauivi e tetee atu i ai. Ua aumaia e le Tusi Paia nisi lapataiga e faatatau i tevolo, po o temoni—o foafoaga agaga leaga o ē ua leva ona aufaatasi ma Satani i le taitaiseseina ma le faaleagaina o tagata. (Iuta 6) E tele taimi na fetaiai ai Iesu Keriso ma le mana o nei agaga, ae sa mafai ona ia manumalo mai ia i latou.—Mataio 12:22-24; Luka 9:37-43.

Ua fuafuaina e Ieova le Atua moni, le faamamāina o lenei lalolagi mai mea leaga ma soloiesea atoatoa gaoioiga uma a Satani ma ana temoni. E faavae aʻe i lo tatou iloa e uiga ia Ieova, ua mafai ai ona tatou maua se faatuatua mausalī ma faamoemoe atu i ana folafolaga. Ua fetalai o ia: “E leai se atua na gaosia e muamua ia te au; e leai foi se tasi e mulimuli ia te au. O aʻu o aʻu lava o Ieova; a e leai se faaola ua na o aʻu lava.” O Ieova o ia moni lava o le Atua e iai ona uiga patino ia i latou uma e iloa, tapuai, ma auauna atu ia te ia. E mafai ona tatou faatalitali atu ia te ia, e na o ia lava, mo lo tatou faaolataga.—Isaia 43:10, 11.

[Ata i le itulau 7]

Se ata vane i le senituri lona 18 ua faaalia mai ai Mose o loo ia tusia le Kenese 1:1 a o faagaeeina o ia

[Ē Ana le Ata]

From the Holy Bible by J. Baskett, Oxford

[Ata i le itulau 8]

E tele taimi na manumalo ai Iesu Keriso mai temoni