Mātua e, o ā Mea o Aʻoaʻo Atu e a Outou Faaaoaoga?

“Ia faaaʻoaʻo outou i le Atua, faapei o le fanau pele; ma ia savavali i le alofa.”—EFESO 5:1, 2.

1. O ā ituaiga o taiala na saunia e Ieova mo le uluai ulugalii faaletagata?

O IEOVA o Lē na Amataina le faatulagaga o le aiga. E nofo aitalafu aiga uma ia te ia mo lo latou iai, auā o ia na faavaeina le uluai aiga ma tuuina atu i le uluai ulugalii faaletagata se malosi e mafai ai ona la fanauina mai ni fanau. (Efeso 3:14, 15) Na ia saunia mo Atamu ma Eva ni faatonuga autū e tusa ai o o la tiute tauave ma avatu foi ia i laua se avanoa tele e faaaogā ai o laua lava tomai e tausolomua ai i le faatinoina o nei tiute tauave. (Kenese 1:28-30; 2:15-22) Ina ua agasala Atamu ma Eva, na atili ai loa ona lavelave tulaga ia sa tatau i aiga ona latou faafetaiaia. Peitai, sa saunia mai pea ma le alofa e Ieova taiala o le a fesoasoani i ana auauna i le faatautaiina o na tulaga.

2. (a) O ai ua faaaogā e Ieova e faamalosia atili ai ana fautuaga tusitusia e ala i faatonuga tuugutu? (e) O le ā le fesili o loo manaomia ona fesiligia ai e mātua i latou lava?

² Ona o ia o lo tatou Aʻoaʻo Sili, ua faia ai e Ieova nisi mea e tele atu na i lo le saunia mai o taiala tusitusia i mea e tatau ona tatou fai ma mea e tatau ona tatou alofia. I taimi anamua sa ia aumaia faatasi ai faatonuga tusitusia ma faatonuga tuugutu e ala mai i ositaulaga ma perofeta ma ala mai foi i ulu o aiga. O ai o loo ia faaaogā mo le saunia mai o na aʻoaʻoga tuugutu i o tatou aso? O toeaina Kerisiano ma mātua. Afai o oe o se matua, po o e faia ea lau vaega o le faatonuina o lou aiga i ala o Ieova?—Faataoto 6:20-23.

3. O le ā e mafai e ulu o aiga ona aʻoaʻoina mai ia Ieova e tusa ai o aʻoaʻoga e uigā?

³ E tatau faapefea ona faaoo atu na faatonuga i totonu o le aiga? Ua faataatia e Ieova le faaaoaoga. Ua ia taʻua manino mai le mea e lelei ma le mea e leaga, ma ua faifai pea ona ia toe taʻua mai na mea. (Esoto 20:4, 5; Teuteronome 4:23, 24; 5:8, 9; 6:14, 15; Iosua 24:19, 20) Na te faaaogā fesili faatupu manatu. (Iopu 38:4, 8, 31) E ala i tala faatusa ma faaaoaoga o mea moni na tutupu i tagata, na te faagaee ai o tatou lagona ma ati ae o tatou loto. (Kenese 15:5; Tanielu 3:1-29) Mātua e, pe a tou aʻoaʻoina a outou fanau, po o tou taumafai ea e faataitai i lena faaaoaoga?

4. O le ā tatou te aʻoaʻoina mai ia Ieova e tusa ai o le tuuina atu o aoaiga, ma aisea e tāua ai aoaiga?

⁴ E maumauai Ieova mo le mea saʻo, ae malamalama o ia i aafiaga o le lē lelei atoatoa. A o ia lei faia la se faasalaga, e na te aʻoaʻo ma aumai pea lava pea lapataiga ma faamanatuga i tagata lē lelei atoatoa. (Kenese 19:15, 16; Ieremia 7:23-26) Pe a faia lana aoaiga, e na te faia i se tele ua talafeagai, ae lē o le soona fai ma le lē fuafua tatau. (Salamo 103:10, 11; Isaia 28:26-29) Pe afai o le auala lena o loo tatou faia ai a tatou fanau, o le a faamaonia ai la o loo tatou iloa Ieova, ma o le a faigofie ai foi mo i latou ona latou iloa o ia.—Ieremia 22:16; 1 Ioane 4:8.

5. O le ā e mafai e mātua ona aʻoaʻoina mai ia Ieova e tusa ai o le faalogologo?

⁵ O se mea ofoofogia, o loo faafofoga mai Ieova i lona avea ai ma Tamā alofa i le lagi. E na te lē tau ina faaoo mai faatonuga. Na te faalaeiauina i tatou ina ia sasaa atu o tatou loto ia te ia. (Salamo 62:8) Ma afai e lē saʻo atoatoa faaupuga o loo tatou faaleo atu, e na te lē leoleoā ma otegia i tatou mai le lagi. E aʻoaʻo ma le onosai mai o ia ia i tatou. Maeu la le talafeagai, o le fautuaga a le aposetolo o Paulo: “Ia faaaʻoaʻo outou i le Atua, faapei o le fanau pele”! (Efeso 4:31–5:1) Maeu se faaaoaoga lelei ua faataatia e Ieova mo mātua a o latou saili e faatonu a latou fanau! O se faaaoaoga e pāʻia ai o tatou loto ma tatou mananao ai e savavali i ona ala o le olaga.

O Aafiaga e Faamalosia Atili e Faaaoaoga

6. E faapefea i uiga ma faaaoaoga a mātua ona aafia ai a latou fanau?

⁶ E lē gata i faatonuga e faaleo atu, ae ua iai foi se aafiaga aogā a faaaoaoga i talavou. Pe fiafia i ai mātua pe leai, ae o le a faataitai atu lava a latou fanau ia i latou. Atonu e faafiafiaina ai mātua—o nisi foi taimi e faateʻia ai i latou—pe a faalogo atu o tautatala mai a latou fanau i mea na latou tautatala ai foi. Pe afai e atagia uma mai i amioga ma uiga o mātua se talisapaia loloto mo mataupu faaleagaga, o le a faaoo atu ai e lenei mea se aafiaga lelei i fanau.—Faataoto 20:7.

7. O ā ituaiga o faaaoaoga a mātua na faataatia e Iefata mo lona afafine, faatasi ai ma le ā le iuga?

⁷ O āuga o faaaoaoga a mātua ua faataitaia lelei mai i le Tusi Paia. O Iefata, o lē na faaaogā e Ieova e taʻitaʻia le manumalo o Isaraelu i le fanauga a Amoni, sa fai foi o ia ma tamā tausi aiga. O le tala i lana tali atu i le tupu o Amoni e faaalia ai atonu sa masani ona faitau e Iefata le talafaasolopito o feutagaiga a Ieova ma Isaraelu. Sa mafai ona ia toe taʻua ma le mautinoa lena talafaasolopito, ma na ia faaalia se faatuatua malosi ia Ieova. E leai se faaletonu, na fesoasoani lana faaaoaoga i lona afafine e ati ae ai se faatuatua ma se agaga faataulagaina totino, lea na ia faaalia a o faatinoina lana auaunaga mo lona olaga atoa o le avea o se teine nofofua na tuutoina atu lona ola ia Ieova.—Faamasino 11:14-27, 34-40; faatusatusa i le Iosua 1:8.

8. (a) O le ā le uiga lelei na faaalia e mātua o Samuelu? (e) Na faapefea ona aogā lena mea ia Samuelu?

⁸ O Samuelu na avea ma faaaoaoga lelei o se tamaitiiti ma sa faatuatua o ia i le Atua a o avea ma perofeta i lona olaga atoa. Pe tou te mananao ia tutupu aʻe a outou fanau e pei o Samuelu? Seʻi iloilo lelei le faaaoaoga na faataatia e mātua o Samuelu, o Elekana ma Hana. E ui sa faalēlelei le tulaga na iai lo latou aiga, ae sa ō atu e lē aunoa i latou i Sailo mo le tapuaiga, i le nofoaga sa iai le falefetafai paia. (1 Samuelu 1:3-8, 21) Seʻi mātau faalogona loloto o Hana sa ia faaalia a o tatalo. (1 Samuelu 1:9-13) Seʻi mātau pe na faapeī lagona o i laua uma i le tāua o le faataunuuina o so o se folafolaga ua uma ona faia i le Atua. (1 Samuelu 1:22-28) O le la faaaoaoga lelei e mautinoa na fesoasoani ia Samuelu e ati ae ai uiga ia sa mafai ai ona ia uia se ala saʻo—e ui lava sa faaalia e tagata na latou nonofo faatasi o ē na tatau ona auauna atu ia Ieova, le lē faaaloalo i ala o le Atua. Mulimuli ane, ona foai atu lea e Ieova ia Samuelu le tiute tauave e avea ai ma Ana perofeta.—1 Samuelu 2:11, 12; 3:1-21.

9. (a) O ā taaʻiga i le aiga sa iai ni ona aafiaga lelei ia Timoteo? (e) O le ā le ituaiga o tagata sa iai Timoteo?

⁹ Pe e te manao ea e avea lau tama po o lou atalii ia pei o Timoteo, o lē na avea ma aumea a o tama talavou, a le aposetolo o Paulo? Sa lē o se tagata talitonu le tamā o Timoteo, peitai na faataatia e lona tinā ma le tinā o lona tinā se faaaoaoga lelei o le talisapaia o mea faaleagaga. E lē taumatea sa fesoasoani lenei itu e faataatia ai se faavae lelei mo le olaga o Timoteo o se Kerisiano. Ua taʻu mai ia i tatou faapea o lona tinā, o Eunike, ma Loi le tinā o lona tinā, sa la “faatuatua faamaoni.” O o la olaga o ni Kerisiano sa lei faatagafai; na la ola moni lava e ogatusa ma mea na la taʻutino o loo la talitonu i ai, ma na la aʻoaʻoina ai foi le talavou o Timoteo ina ia fai na lava mea. Na faamaonia mai e Timoteo lona maufaatuatuaina ma sa manatu mamafa moni o ia mo le lelei o isi.—2 Timoteo 1:5; Filipi 2:20-22.

10. (a) O ā faaaoaoga i fafo atu o le aiga e ono aafia ai a tatou fanau? (e) E tatau faapefea ona tatou tali atu pe a aliaʻe nei aafiaga i gagana po o uiga o a tatou fanau?

¹⁰ O faaaoaoga e aafia ai a tatou fanau e lē na o le aiga e maua uma i ai. O loo iai tamaiti o loo latou aʻoʻoga faatasi, o faiaʻoga o loo fai ma a latou galuega le atiina ae o mafaufau o tamaiti, o tagata e malolosi o latou lagona faapea, e tatau i tagata taitoatasi ona usitaia tū masani ua matuā mauaa ona faavaeina a se ituaiga o tagata po o se nuu, o tagata taʻutaʻua i taaloga ua matuā viiviia mea ua latou ausia, ma tagata maualuluga a le malo o loo faamatilatila mai a latou amioga i tala fou. E faitau miliona tamaiti ua latou vaaitino foi i faiga sauā o loo faia i taua. Pe tatau ai ea la ona faateʻia i tatou pe a teʻi ua aliaʻe mai nei aafiaga i gagana po o uiga a a tatou fanau? E faapeī la tatou tali atu i ai pe a latou faia na mea? Pe foia ea le faafitauli i ni faamatalaga tutui o le ita po o se otegia malosi? Na i lo le tali vave atu i a tatou fanau, pe lē sili atu ea ona lelei pe a tatou fesili ifo ia i tatou lava, ‘Pe iai ea se mea i le ala a Ieova lea o loo ia feutagai ai ma i tatou, e ono aogā i le iloaina o le auala e taulima ai lenei faafitauli?’—Faatusatusa i le Roma 2:4.

11. Pe a faia e mātua ni mea sese, e faapefea i lenei mea ona aafia ai uiga o a latou fanau?

¹¹ O le mea moni, e lē o taimi uma o le a faafetaiaia ai e mātua lē lelei atoatoa tulaga i se auala e sili ona lelei. O le a latou faia foi ni mea sese. Pe a oo ina iloa e le fanau lena mea, po o le a mou ese atu ai ea lo latou faaaloalo i o latou mātua? Atonu e tupu, ae maise pe afai e taumafai mātua e taʻumāmāina o latou sese e ala i le soona inainā e faaali la latou pule. Peitai e ono matuā ese lava le iuga pe afai e loto maulalo mātua ma taʻutino mai o latou sese. O lenei tulaga, e mafai ai ona latou faataatia se faaaoaoga tāua mo a latou fanau, o ē e tatau ona iloa le auala e faia ai lena lava mea.—Iakopo 4:6.

Mea e Mafai Ona Aʻoaʻo Atu e a Tatou Faaaoaoga

12, 13. (a) O le ā e manaomia e le fanau ona iloa e faatatau i le alofa, ma e mafai faapefea ona aʻoaʻoina lenei mea i se tulaga sili ona uigā? (e) Aisea e tāua ai ona aʻoaʻoina le fanau e faatatau i le alofa?

¹² E tele lesona aogā e mafai ona aʻoaʻo atu ma le matuā uigā pe afai e ō faatasi le faaleo atu o faatonuga ma se faaaoaoga lelei. Seʻi manatu i nisi nei o faaaoaoga.

¹³ Le faaalia o le alofa lē manatu faapito: O se tasi o lesona sili ona tāua e mafai ona faamalosia e faaaoaoga, o le uiga o le alofa. “Ua tatou alolofa, auā na . . . muai alofa mai [le Atua] ia te i tatou.” (1 Ioane 4:19) O ia o le Puna ma le faaaoaoga silisili o le alofa. O lenei alofa e faavae i mataupu silisili, a·gaʹpe, e sili atu i le 100 taimi o loo taʻua ai i le Tusi Paia. O se uiga e mataulia ai Kerisiano moni. (Ioane 13:35) O lena alofa e tatau ona faaali atu i le Atua ma Iesu Keriso e faaalia foi e isi tagata i isi—e oo lava i tagata atonu e leai ni o tatou lagona fiafia i ai. (Mataio 5:44, 45; 1 Ioane 5:3) O lenei alofa e tatau ona iai i o tatou loto ma ia faaalia mai i o tatou olaga a o tatou lei aʻoaʻoina atu ma le uigā i a tatou fanau. E leotele gaoioiga na i lo upu. I totonu o le aiga, e manaomia e le fanau ona latou iloa mai ma lagonaina le alofa ma isi uiga e fesootai atu i ai, e pei o lagona māfana. Pe a aunoa ma nei uiga, o lona uiga o le a faalautagitagi le tuputupu aʻe o lena tamaitiiti i le tino, le mafaufau, ma ona faalogona ootia. E manaomia foi ona vaaia e le fanau le auala o loo faaalia lelei atu ai le alofa ma lagona māfana i isi uso Kerisiano e ese mai tagata o le aiga.—Roma 12:10; 1 Peteru 3:8.

14. (a) E mafai faapefea ona aʻoaʻo le fanau ina ia fai ia lelei galuega e maua ai le faamalieina? (e) E mafai faapefea ona faia lenei mea i le tulaga o lou aiga?

¹⁴ Le aʻoaʻoina o le auala e galue ai: O le galue o se vala autū lea o le olaga. Ina ia iai se lagona i le tagata o le taʻuaogaina o ia lava, e manaomia ona ia faamasani e fai lelei galuega. (Failauga 2:24; 2 Tesalonia 3:10) Afai e tofia se tamaitiiti na te faia ni galuega sa itiiti sona faatonuga na tuuina i ai, ona toe otegia lea pe a lē lelei ona ia faia na galuega, ailoga la o le a ia iloa fai lelei se galuega. Ae pe afai e aʻoaʻoina le fanau e ala i le galulue faatasi ma o latou mātua ma avatu ia i latou se faamālō talafeagai, o le a sili atu foi la ona latou iloa fai ni galuega e maua ai le faamalieina. Pe afai e avatu faatasi faaaoaoga a mātua ma se faamalamalamaga, o le a mafai ai e le fanau ona iloa e lē gata o le auala e fai ai se galuega ae o le auala foi e foia ai faafitauli, le auala e faia ai pea se galuega seia oo ina maeʻa, ma le auala e fefulisai ma faia ai filifiliga. I lena tulaga e mafai ai ona fesoasoani atu ia i latou ia latou iloa o loo galue foi Ieova, e na te faia galuega lelei, ma e faataitai atu Iesu i lona Tamā. (Kenese 1:31; Faataoto 8:27-31; Ioane 5:17) Pe afai e iai se faatoaga a le aiga pe fai sa latou pisinisi, atonu o le a iai nisi o le aiga e galulue faatasi. Pe mafai foi e le tinā ona aʻoaʻo lana tama tama po o lana tama teine i le kukaina o meaʻai pe faamamā ipu pe a uma se taumafataga. O se tamā o lē e faigaluega ese mai le aiga e mafai ona ia fuafua e galulue faatasi ma lana fanau i ni galuega i le fale. Maeu le aogā pe afai e lē tau ina mafaufau mātua i le vave ona faataunuu o ni galuega, ae ia mafaufau foi i le auala e faaauupegaina ai le fanau i o latou olaga atoa!

15. O ā auala e mafai ona aʻoaʻo atu ai lesona e uiga i le faatuatua? Ia faataitai mai.

¹⁵ Le tausisia o le faatuatua a o feagai ai ma tulaga faigata: O le faatuatua foi o se vala tāua tele i o tatou olaga. Pe a talanoaina le faatuatua i le suesuega a le aiga, e mafai ona aʻoaʻo le fanau ina ia latou faamatalaina. E mafai foi ona latou iloa faamaoniga e faapogaia ai le faatuatua ina ia amata ona tupu aʻe i o latou loto. Ae pe a latou vaai atu o loo faaalia e o latou mātua se faatuatua lē maluelue a o fesagai ma tofotofoga matuitui, e mafai e aafiaga e maua mai ai ona tumau i le olaga atoa. O se tagata na suesueina le Tusi Paia i Panamā sa faamataʻuina e lana tane o le a tuliesea mai lo latou aiga pe a lē taofia lona auauna atu ia Ieova. Peitai, sa lē aunoa ona savavali pea o ia ma lana fanau laiti e toafā i maila e 10 (16 kilomita) ma toe ō i se pasi mo le isi 20 maila (30 kilomita) ina ia oo atu i le Maota o le Malo sa latalata ane. I le faalaeiauina i lena faaaoaoga, ua talia ai e ni tagata se toʻa 20 o lona aiga le ala o le upu moni.

Le Faataatiaina o se Faaaoaoga i le Faitauina o le Tusi Paia i Aso Taitasi

16. Aisea ua fautuaina ai le faitauga Tusi Paia a le aiga i aso taitasi?

¹⁶ O se tasi o tū masani e sili ona tāua e mafai e so o se aiga ona faavaeina—o se tū masani o le a aogā i mātua ma e avea o se faaaoaoga mo le fanau e faataitai i ai—o le faitauina e lē aunoa o le Tusi Paia. Pe afai e mafai, ia fai ni faitauga Tusi Paia i aso taitasi. E lē o le tele o mea e faitau e sili atu ona tāua. E sili atu ona tāua le faifai pea ma le uigā o loo faia ai. Mo le fanau, e mafai ona fesuisuiai le faitauina o le Tusi Paia e ala i le faalogologo atu i kaseti o Laʻu Tusi o Tala o Le Tusi Paia pe afai o maua i la outou gagana. O le faitau i le Afioga a le Atua i aso taitasi e fesoasoani ia i tatou e faamuamua ai pea manatu o le Atua. Ma pe afai e faia lena faitauga Tusi Paia e lē gata o le tagata lava ia ae faapea foi i aiga, e mafai ona fesoasoani lenei mea i le auaiga uma ina ia savavali ai i ala o Ieova. O le faiga lenei sa faalaeiauina i Tauaofiaga talu ai nei o “Le Ala a le Atua i le Ola” i le tala “Aiga e—Ia Avea le Faitauina o le Tusi Paia i Aso Uma o se Vaega o lo Outou Soifuaga!—Salamo 1:1-3.

17. E faapefea i le faitauga Tusi Paia a le aiga ma le taulotoina o mau autū ona fesoasoani i le faatatauina o le fautuaga i le Efeso 6:4?

¹⁷ O le faitauina o le Tusi Paia e se aiga e ogatusa lea ma le mea na tusi mai ai le aposetolo o Paulo i lana tusi faagaeeina i Kerisiano i Efeso e faapea: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga [“aʻoaʻoga faalemafaufau,” NW] a le Alii.” (Efeso 6:4) O le ā le uiga o lena mea? O “aʻoaʻoga faalemafaufau” o lona uiga moni o le “tuuina o manatu i totonu”; o lea la ua uunaia ai tamā Kerisiano ina ia tuu manatu o Ieova le Atua i totonu o mafaufau o a latou fanau—ia fesoasoani i le fanau ia latou iloa mafaufauga o le Atua. O le faalaeiauina o fanau e tauloto mau autū e mafai ona fesoasoani e ausia ai lenei mea. O le sini ia aumai manatu o Ieova e taʻitaʻia ai mafaufauga o le fanau ina ia faasolosolo ai ona faaalia mai e o latou faanaunauga ma amio tapulaa faale-Atua e tusa lava pe o iai faatasi mātua ma le fanau pe leai foi. O le Tusi Paia le faavae o na mafaufauga.—Teuteronome 6:6, 7.

18. Pe a faitauina le Tusi Paia, o le ā e ono manaomia ina ia (a) malamalama lelei i ai? (e) maua ai aogā mai fautuaga o loo iai? (i) tali atu ai i mea o loo faaalia mai e uiga i fuafuaga a Ieova? (o) maua ai aogā mai mea o loo fai mai ai e uiga i amioga ma gaoioiga a tagata?

¹⁸ O le mea moni, afai o le a faaaafia e le Tusi Paia o tatou olaga, e manaomia la ona tatou malamalama i le mea o fai mai ai. Mo le toatele o tagata, e ono manaomia ai i lenei mea le faitauina soo o vaega e sili atu i le faatasi. Ina ia maua le malamalamaga manino o nisi faamatalaga, tatou te ono manaomia ona sailia upu i se lomifefiloi po o le Insight on the Scriptures. Afai o iai i le mau se fautuaga po o se poloaiga, ia faaalu se taimi e talanoa ai i tulaga i o tatou aso ua faapea ona talafeagai atu i ai. Atonu la e te fesili atu, ‘E mafai faapefea e le faatatauina o lenei fautuaga ona aogā ia i tatou?’ (Isaia 48:17, 18) Afai o taʻu mai e le mau nisi o vala o le fuafuaga a Ieova, ia fesili atu, ‘Ua faapefea ona aafia ai o tatou ola i lenei mea?’ Atonu o loo e faitau i se tala o loo taʻu mai ai uiga ma gaoioiga a tagata. O ā omiga i le olaga na oo ia i latou? Na faapefea ona latou fesagaia nei omiga? E mafai faapefea ona aogā ia i tatou a latou faaaoaoga? Ia faaavanoa pea taimi e talanoa ai mea o loo uiga i ai le tala i o tatou olaga i aso nei.—Roma 15:4; 1 Korinito 10:11.

19. I le avea o ē faaaʻoaʻo i le Atua, o le ā o le a tatou saunia mo a tatou fanau?

¹⁹ Maeu se auala lelei e faamausalīina ai manatu o le Atua i o tatou mafaufau ma loto! Ona tatou maua moni ai lea o se fesoasoani ina ia avea ai o ē ‘faaaʻoaʻo i le Atua, faapei o le fanau pele.’ (Efeso 5:1) Ma o le a tatou saunia ai se faaaoaoga ua onomea moni lava ona faataitai i ai a tatou fanau.

Ia Suesue e Lē Aunoa e le Aiga Atoa le Afioga a le Atua

“E le na o mea e ʻai e ola ai le tagata, a o afioga uma e tulei mai i le fofoga o le Atua.”—MATAIO 4:4.

1. O le ā ua fai mai ai le Tusi Paia e faatatau i le tiute tauave o ulu o aiga ina ia aʻoaʻoina a latou fanau i ala o Ieova?

SA FAAMANATU soo mai e Ieova le Atua i ulu o aiga lo latou tiute tauave ina ia aʻoaʻoina a latou fanau. O na faatonuga o le a faaauupegaina ai le fanau mo le olaga i le taimi nei ma fesoasoani foi e sauniunia ai i latou mo le olaga i le lumanai. O se agelu na fai ma sui o le Atua, sa ia taʻuina ia Aperaamo lana tiute tauave o le aʻoaʻo atu i lona auaiga ina ia latou “tausia le ala o Ieova.” (Kenese 18:19) Sa taʻu atu i mātua Isaraelu ina ia latou faamatala i a latou fanau le faasaoina e le Atua o Isaraelu mai Aikupito ma lona tuuina mai ia i latou o lana Tulafono i le Mauga o Sinai, i Horepa. (Esoto 13:8, 9; Teuteronome 4:9, 10; 11:18-21) Ua fautuaina ulu o aiga Kerisiano ina ia tausia aʻe a latou fanau “i aoaiga ma apoapoaiga [“aʻoaʻoga faalemafaufau,” NW] a le Alii.” (Efeso 6:4) E tusa lava pe toatasi le matua e auauna ia Ieova, e tatau ia te ia lena ona taumafai malosi e aʻoaʻoina le fanau i ala o Ieova.—2 Timoteo 1:5; 3:14, 15.

2. Pe manaomia se suesuega faaleaiga pe afai e leai se fanau i le aiga? Ia faamatala.

² E lē o le uiga o lenei mea faapea e patino le suesueina o le Afioga a le Atua i na o aiga e iai tamaiti. Pe a faia e se tane ma se avā le la suesuega faaleaiga e tusa lava pe leai se fanau i le aiga, e faaalia ai i lena mea se talisapaia lelei mo mea faaleagaga.—Efeso 5:25, 26.

3. Aisea e tāua ai le faia e lē aunoa o le suesuega faaleaiga?

³ Ina ia maua iuga e silisili ona lelei, e manaomia ai ona tuuina atu e lē aunoa faatonuga, ina ia ogatusa ma le lesona lea na aʻoaʻo atu e Ieova ia Isaraelu i le vao matua: “E le na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.” (Teuteronome 8:3) E fuafua lava i tulaga o le aiga, ua faatulaga ai e nisi auaiga se suesuega e faia i vaiaso taitasi; a o isi atonu e faapupuu a latou suesuega ae fai i aso uma lava. Po o le ā lava le faatulagaga ua outou fuafuaina, ae ia aua lava neʻi tuua le suesuega seʻiloga e maua se avanoa ona fai lea. ‘Ia puʻe le taimi’ e fai ai. O le faataatia ese o lena taimi o se gaoioiga e sili ona lelei iuga o le a maua mai ai. Ua iai i se tulaga lamatia ola o tagata o lou aiga.—Efeso 5:15-17; Filipi 3:16.

O Sini ia Teu i le Mafaufau

4, 5. (a) E ala mai ia Mose, o le ā sa faataatia mai e Ieova i mātua e avea ma sini tāua i le aʻoaʻoina o a latou fanau? (e) O le ā e aofia ai i lena mea i aso nei?

⁴ Pe a e faia le suesuega a le aiga, o le a sili ona lelei ni iuga e maua ai pe afai o manino i lou mafaufau sini maʻoti. Seʻi talanoaina ni nai sini nei.

⁵ I suesuega taitasi, taumafai e ati ae le alofa mo Ieova le Atua. A o faapotopoto Isaraelu i fanua laugatasi o Moapi, a o latou lei ulu atu i le Nuu Folafolaina, na tatai atu ai e Mose o latou manatu i le mea o le a mulimuli ane faaalia mai e Iesu Keriso faapea o ‘le poloaiga silisili i le tulafono.’ O le ā lea poloaiga? “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:36, 37; Teuteronome 6:5) Na matuā faalaeiau atu Mose i le fanauga a Isaraelu ina ia tāmau lenei mea i o latou loto, ma aʻoaʻo atu ai i a latou fanau. O le a manaomia ai se faiga e faifai pea, le tatai atu o manatu i mafuaaga e alofa ai ia Ieova, le feagai ai ma uiga ma amioga e mafai ona taofia ai le faaalia atu o lena alofa, ma le faaalia o le alofa mo Ieova i o latou lava olaga. Pe manaomia e a tatou fanau lena ituaiga o faatonuga? Ioe! Ma latou te manaomia foi se fesoasoani ia ‘peritomeina ai o latou loto,’ o lona uiga, ia aveesea so o se mea o le a taofiofia ai lo latou alofa mo le Atua. (Teuteronome 10:12, 16; Ieremia 4:4) O nisi o na taofiofiga atonu o se faanaunauga mo mea a le lalolagi ma avanoa e ono matuā aafia ai i ana meafai. (1 Ioane 2:15, 16) O le alofa mo Ieova e tatau ona olaola, ia faaleo atu, ia uunaia ai i tatou e faia mea e faafiafiaina ai lo tatou Tamā faalelagi. (1 Ioane 5:3) Ina ia maua e la outou suesuega faaleaiga ni aogā tumau, e tatau ai ona faafoeina suesuega uma i se auala e mafai ona faamalosia ai lenei alofa.

6. (a) O le ā e manaomia ina ia faaoo atu ai le poto saʻo? (e) Ua faapefea ona faamamafa mai e le Tusi Paia le tāua o le poto saʻo?

⁶ Ia faaoo atu le poto saʻo e uiga i mea e faafinagaloina e le Atua. O le ā e aofia ai? E aofia ai mea e sili atu na i lo le tau ina mafai ona faitau se tali mai se mekasini po o se tusi. E masani ona manaomia ai se talanoaga ina ia faamautinoa o malamalama lelei i upu tāua ma manatu autū. O le poto saʻo o se vala e matuā tāua i le ofuina o le tagata fou, i le taulai atu pea i mea e sili ona tāua pe a faafetaiaia faafitauli i le olaga, ma faia ai le mea e fiafia moni i ai le finagalo o le Atua.—Filipi 1:9-11; Kolose 1:9, 10; 3:10.

7. (a) O le faaaogaina o ā fesili e ono fesoasoani i le aiga e fai ai se faatatauga aogā o le mataupu na suesueina? (e) Ua faapefea ona faamamafa mai e le Tusi Paia le matuā tāua o lena sini?

⁷ Fesoasoani ia faia ni faatatauga aogā o mea ua aʻoaʻoina. A o manatuaina lenei sini, ia fesili ifo a o faia suesuega taitasi a le aiga: ‘E tatau faapefea ona aogā lenei mataupu i o matou olaga? Pe manaomia ai ea se suiga mai mea o loo matou faia i le taimi nei? Aisea e tatau ai ona matou mananao e faia ni fetuutuunaiga?’ (Faataoto 2:10-15; 9:10; Isaia 48:17, 18) O le tele o le uaʻi atu i se faatatauga aogā o mea ua aʻoaʻoina e mafai ona avea o se vala tāua i le tuputupu aʻe faaleagaga o tagata o le aiga.

Ia Faaaogā ma le Atamai Meafaigaluega mo le Aʻoaʻo Atu

8. O ā meafaigaluega mo suesuega faale-Tusi Paia ua saunia mai e le vasega a le auauna?

⁸ Ua saunia e “le auauna faamaoni ma le mafaufau” le anoanoai o meafaigaluega e mafai ona faaaogā mo le suesuega. Ua mauaina le mekasini o Le Olomatamata, mo le faaaogaina faatasi ma le Tusi Paia, i gagana e 131. O tusi mo le faia o suesuega faale-Tusi Paia ua maua i gagana e 153, o polosiua i gagana e 284, o kaseti pueleo i gagana e 61, o kaseti vitiō i gagana e 41, e oo lava i se polokalame a le komepiuta mo le faia o ni sailiiliga i mataupu faale-Tusi Paia, ua maua i gagana e 9!—Mataio 24:45-47.

9. Tatou te ono faatatauina faapefea fautuaga i mau ua faasino mai e lenei palakalafa, pe a suesueina e le aiga Le Olomatamata?

⁹ E toatele auaiga ua latou faaaogā le taimi o le suesuega a le aiga e sauniuni ai mo le Suesuega o Le Olomatamata a le faapotopotoga. Maeu se aogā o lena fuafuaga! Ua iai i Le Olomatamata meaʻai autū faaleagaga ua saunia mai ina ia ati ae ai tagata o Ieova i le lalolagi aoao. Pe a outou suesueina faatasi o se aiga Le Olomatamata, ia tele atu nisi mea tou te faia na i lo tau ina faitau palakalafa ma tali fesili o loo lomia atu. Ia saili ma le naunautai i le malamalama. Ia faaalu se taimi e suʻe ai mau na o loo faasino mai ae lē o sii maia upu. Ia valaaulia tagata o le aiga e fai mai ni o latou manatu i le pe faapefea ona fesootai atu nei mau i manatu o loo taʻua i le palakalafa o loo talanoaina. Ia faia i se auala e faaaofia ai le loto.—Faataoto 4:7, 23; Galuega 17:11.

10. O le ā e mafai ona fai ina ia faaaofia ai le fanau i le suesuega ma avea ai o se taimi fiafia mo i latou?

¹⁰ Pe afai o iai se fanau i lou auaiga, o le ā e mafai ona e faia ina ia lē avea ai la outou suesuega e na o se tū masani a le aiga e ao ona fai, ae o se taimi e ati ae ai, o se taimi manaia ma fiafia ai? Taumafai ia faaaofia tagata uma i se auala talafeagai ina ia uaʻi atu ai pea manatu i le mataupu o suesueina. Pe a talafeagai, taumafai ia tofu lava le tamaitiiti ia ma lana Tusi Paia ma lana mekasini o le suesuega. I le faataitai atu i lagona māfana na faaalia e Iesu, e ono mafai e se matua ona faanofo latalata ane ia te ia se tamaitiiti laitiiti, atonu pe tuu atu lona lima e faauouo ai le tamaitiiti. (Faatusatusa i le Mareko 10:13-16.) Atonu e tofi e le ulu o le aiga se tamaitiiti na te faamatala mai se ata o loo iai i le mataupu o suesueina. E ono muai tofia se tamaitiiti a o lei faia le suesuega na te faitauina se mau. Atonu e tofia se tamaitiiti ua matua na te taʻu maia se faatatauga aogā o le mataupu o loo suesueina.

11. O ā isi meafaigaluega mo le aʻoaʻo atu ua saunia mai, ma i vaipanoa o loo mauaina ai, e ono faapefea ona faaaogaina lelei i le suesuega a le aiga?

¹¹ E ui atonu o loo outou faaaogaina Le Olomatamata e fai ma faavae o la outou talanoaga, ae aua neʻi galo isi meafaigaluega mo le faia o suesuega, na o loo maua i gagana e tele. Afai e manaomia ni faamatalaga auiliili po o se faamalamalamaga o se faaupuga faale-Tusi Paia, atonu e maua mai le tusi o le Insight on the Scriptures. O isi fesili e mafai ona taliina e ala i le suʻe atu i le Watch Tower Publications Index pe ala i le faaaogā o le polokalame a le komepiuta lea e mafai ona sailiili ai i faamatalaga, ua saunia mai e le Sosaiete. O le faamasani e faaaogā nei meafaigaluega, pe afai o maua i la outou gagana, e mafai ona avea o se vaega matuā tāua o le suesuega a le aiga. E tusa ai o le sini ina ia faagaee le naunau fiafia o ē talavou, e mafai ai foi ona outou faataatia ese se vaega o le taimi o la outou suesuega e matamata ai i se vaega o se tasi o vitiō aogā a le Sosaiete, pe faalogologo atu i se vaega o se tala i kaseti pueleo, ona talatalanoa lea i ai. O le faaaogaina lelei o nei meafaigaluega mo suesuega e mafai ona fesoasoani ina ia avea ai la outou suesuega faaleaiga o se mea e fiafia i ai ma aogā i le aiga atoa.

Ia Faafetaui Atu i Manaoga o Lou Aiga

12. E mafai faapefea e le suesuega a le aiga ona faatinoina se matafaioi i le taulimaina o manaoga faanatinati o le aiga?

¹² Atonu e masani ona suesueina e lo outou aiga le lesona o Le Olomatamata mo le vaiaso. Ae ia lua mataala pea i nisi o faafitauli ma ni lagona e ono tulai mai o le aiga. Pe afai e lē o faigaluega totogi le tinā, atonu e mafai ona ia faaalu se taimi faatasi ma le fanau i aso taitasi pe a tuua mai a latou aʻoga. Atonu e mafai ai loa iina ona taulimaina nisi tulaga; ae o nisi tulaga atonu e manaomia ona uaʻi atili atu i ai. Pe afai o iai ni manaoga faanatinati o le aiga, ia aua lava neʻi lē amanaiaina. (Faataoto 27:12) Atonu e aofia ai e lē gata o faafitauli i le aʻoga ae o isi foi tulaga. Ia fili ni mataupu talafeagai, ma vave taʻu atu i le aiga le mataupu o le a suesueina.

13. Aisea e ono aogā ai le talanoaina e le aiga o auala e faafetaiaia ai le mativa?

¹³ Mo se faaaoaoga, ua pagatia se vaega tele o le lalolagi i le mativa; o lea i le tele o nofoaga, atonu e talafeagai ona talanoaina auala e faafetaiaia ai na tulaga. Faamata e aogā mo tagata o le aiga le faia o se suesuega a le aiga e faaautū atu i tulaga moni o loo iai le olaga faapea ma mataupu silisili o le Tusi Paia?—Faataoto 21:5; Failauga 9:11; Eperu 13:5, 6, 18.

14. O ā tulaga e ono matuā fetaui lelei ai ona talanoaina e le aiga le silafaga a Ieova i faiga sauā, o taua, ma le solitu faa-Kerisiano?

¹⁴ O se isi mataupu e manaomia ona talanoaina, o faiga sauā. O i tatou uma e manaomia ona matuā tāmau i o tatou mafaufau ma loto le silafaga a Ieova i lea mataupu. (Kenese 6:13; Salamo 11:5) O le suesueina e le aiga o lenei mataupu e mafai ona saunia ai se polokalame mo le talanoaina o auala e feutagai ai ma tamaiti fasi tamaiti i le aʻoga, pe aʻoaʻo ia iloa karate, ma le auala e filifilia ai faafiafiaga talafeagai. Ua taatele feteenaiga e faaaogā ai faiga sauā; e toetoe lava o atunuu uma ua pagatia a lē i fetauaiga a tagata lava o le atunuu, o fevesiaiga i le va o ituaiga pe i faiga faapolotiki, po o taua i le va o kegi. O le iuga, atonu e manaomia ai e lo outou aiga ona talanoaina le tausisia o amioga faa-Kerisiano a o siomia e nei feteenaiga.—Isaia 2:2-4; Ioane 17:16.

15. E tatau faapefea ona tuuina atu i le fanau faatonuga e faatatau i faiga faaleituaiga ma faaipoipoga?

¹⁵ A o tutupu aʻe le fanau, latou te manaomia faatonuga e faatatau i faiga faaleituaiga ma faaipoipoga, e talafeagai ma lo latou matutua. I nisi o aganuu o le toatele lava o mātua e lē tāitai ona talanoaina faiga faaleituaiga ma a latou fanau. O fanau e lei muai aʻoaʻoina i na mea atonu latou te maua mai ni manatu ua mimiloseseina mai isi talavou, ma e mafai ona matautia iuga e oo i ai. Po o le a lē lelei ea ona faataitai atu ia Ieova, o lē na te aumaia fautuaga tuusaʻo ae logoleleia, e tusa ai o lenei mataupu i le Tusi Paia? O fautuaga faale-Atua o le a fesoasoani i a tatou fanau ina ia latou faaaloalogia ai i latou lava, ma ia latou feagai ai foi ma tagata o le isi ituaiga i se uiga mamalu. (Faataoto 5:18-20; Kolose 3:5; 1 Tesalonia 4:3-8) E tusa lava po ua uma ona outou talanoaina nei mataupu, ae ia aua neʻi faatalatū e toe talanoa foi i ai. A o tulai mai nisi faafitauli fou, e matuā tāua lava le toe faamanatu atu e lē aunoa.

16. (a) I auaiga eseese, o le ā le taimi e mafai ona faia ai le suesuega a le aiga? (e) Ua faapefea ona outou faafetaiaia ni toatuga ina ia mafai ona faia e lē aunoa le suesuega a le aiga?

¹⁶ O le ā le taimi e mafai ona faia ai le suesuega a le aiga? I le faataitai atu i aiga Peteli i le lalolagi aoao, e toatele auaiga ua faatulaga la latou suesuega faaleaiga i afiafi o Aso Gafua. Mo isi, e ese foi la latou faasologa. I Anitenitina, o se aiga e toʻa 11 le aofai, e aofia ai ni tamaiti se toaiva, e alapopō lava i taeao uma i le lima i le vaveao ina ia faia la latou suesuega faaleaiga. Talu ai e eseese faasologa o a latou galuega, e leai ai lava se isi taimi e talafeagai. Sa lei faigofie, ae na tāmau ai i mafaufau ma loto o le fanau le tāua o le suesuega a le aiga. I Filipaina, sa faia ai e lē aunoa e se toeaina se suesuega faaleaiga ma lana avā ma le la fanau a toatolu a o tuputupu aʻe le fanau. I le gasologa o le vaiaso sa fai ai foi e mātua suesuega totino ma tamaiti taitoatasi, ina ia mafai e le tamaitiiti lava ia ona avea le upu moni o sana mea totino. I le Iunaite Setete, e iai se tuafafine e lē o se Molimau lana tane, e savavali lenei tuafafine ma lana fanau e momoli i le pasi a le aʻoga i taeao uma. A o faatalitali la mo le pasi, latou te faaalu ai pe tusa ma le sefulu minute e faitau faatasi ai ma talanoaina se mataupu talafeagai faale-Tusi Paia, ona fai lea e le tinā se tatalo puupuu a o lei ō atu le fanau i le pasi. I le malo faatemokalasi o Kogo, sa iai se fafine na alu ese lana tane lē talitonu mai lo latou aiga, ma sa tatau ai i le fafine ona taumafai malosi i le suesuega ona sa lei lava ni ana aʻoaʻoga. E fesoasoani atu ia te ia lana tama tama ua matua, e ala i le asiasi atu i le aiga i vaiaso taitasi e taimua i le suesuega lea e aofia ai lona tinā ma ona uso laiti. E faataatia e le tinā se faaaoaoga lelei e ala i ana sauniuniga maelega. Po o iai ea se tulaga e ono faafaigata ai ona faia e lē aunoa le suesuega faaleaiga i lou auaiga? Aua lava neʻi faavaivai. Ia saili atu ma le naunautai mo le faamanuiaga a Ieova i a outou taumafaiga ina ia faia e lē aunoa la outou suesuega faale-Tusi Paia.—Mareko 11:23, 24.

O Taui e Maua Mai le Filigā

17. (a) Ina ia mafai ona faifai pea le suesuega a le aiga, o le ā e manaomia? (e) O le ā le tala o se mea na tupu o loo faataitaia ai le matuā tāua o le aʻoaʻoina e lē aunoa o le aiga i ala o Ieova?

¹⁷ E manaomia ai le faia o ni fuafuaga. E manaomia ai le filigā. Peitai o aogā e maua mai le suesuega faifai pea a le aiga e matuā tauia ai lava. (Faataoto 22:6; 3 Ioane 4) O Falani ma Ila, i Siamani, sa la tausia aʻe lo la aiga e toʻa 11 le fanau. I ni tausaga mulimuli ane, na faapea mai le la tama teine o Matalena: “O le mea ou te manatu i ai e sili atu ona tāua i aso nei, o le leai lea o se aso se tasi na mavae atu e aunoa ma lo matou mauaina ai o ni faatonuga faaleagaga.” Ina ua matuā faatetele le agaga o le lotonuu i le faiga malo a Adolf Hitler, na faaaogā ai e le tamā o Matalena le Tusi Paia e sauniunia ai lona aiga mo tofotofoga na ia iloa lelei o le a oo mai. A o faagasolo taimi, na puʻea le vaega laiti o le aiga ma avatu i se aʻoga e taumafai e suia ai uiga ma mafaufau; o isi tagata o le aiga na puʻeina ma taofia i falepuipui ma nofoaga o faasalaga mamafa. O nisi na fasiotia. Sa tumau mausalī le faatuatua o i latou uma—e lē gata i taimi o sauaga matuitui, ae oo foi i ē na faasaoina, sa mausalī pea lo latou faatuatua i tausaga na sosoo mai.

18. Ua tauia faapefea taumafaiga a mātua nofo toatasi?

¹⁸ E toatele mātua nofo toatasi, faapea foi i latou e lē talitonu a latou paaga, ua faapena ona latou saunia mo a latou fanau faatonuga faale-Tusi Paia e lē aunoa. E iai se tinā i Initia, o lē ua nofo toatasi ona ua maliu lana tane, sa taumafai malosi e totōina le alofa mo Ieova i loto o lana fanau e toalua. Peitai, na nutimomoia lona loto, ina ua musu lana tama tama e toe auaufaatasi ma tagata o Ieova. Sa ia augani atu ia Ieova ina ia faamagalo mai o ia i so o se mea sa ia lē taulau ai i le aʻoaʻoina o lana tama. Peitai, sa lei matuā faagaloina e le tama mea na ia aʻoaʻoina. Ina ua mavae le silia ma le sefulu tausaga, na toe foi ane le tama, sa ia toe faia ni agaigai lelei i luma faaleagaga, ma avea ai ma toeaina o le faapotopotoga. I aso nei, o loo auauna ai o ia ma lana avā o ni faifeau paeonia faataimi atoa. Maeu le loto faafetai o na mātua, o ē na latou teulotoina le fautuaga mai ia Ieova ma lana faalapotopotoga ina ia saunia faatonuga faale-Tusi Paia e lē aunoa i totonu o le liʻo o le aiga! Po o e faatatauina ea lena fautuaga i totonu o lou auaiga?

Pe Mafai Ona E Faamatala?

◻ Aisea e tāua ai le faia e lē aunoa o le suesuega faaleaiga?

◻ O ā o tatou sini e tatau ona iai i taimi uma e fai ai le suesuega faaleaiga?

◻ O ā meafaigaluega mo le aʻoaʻo atu ua mafai ona tatou mauaina?

◻ E mafai faapefea ona faafetaui atu le suesuega i manaoga o le aiga?

[Ata i le itulau 15]

O sini mautinoa o le a faaleleia atili ai la outou suesuega faaleaiga

Aiga e, ia Vivii Atu i le Atua o se Vaega o Lana Faapotopotoga

“Ou te faamanū atu ia Ieova i totonu o faapotopotoga.”—SALAMO 26:12.

1. O le ā se vaega tāua o le tapuaiga moni e faaopoopo atu i tatalo ma suesuega o loo faia i le aiga?

O LE tapuai atu ia Ieova e aofia ai e lē gata o tatalo ma le suesueina o le Tusi Paia i le aiga ae faapea foi gaoioiga e faia o se vaega o le faapotopotoga a le Atua. Sa poloaia Isaraelu anamua ia “faapotopotoina le nuu, o tane, ma fafine, ma tama iti,” e aʻoaʻoina le tulafono a le Atua ina ia savavali ai i lana ala. (Teuteronome 31:12; Iosua 8:35) Sa faalaeiauina uma ē matutua ma ‘taulelea atoa ma teine’ ina ia auai faatasi i le vivii atu i le suafa o Ieova. (Salamo 148:12, 13) O faatulagaga foi faapena e faatatauina i totonu o le faapotopotoga Kerisiano. I Maota o le Malo i vaega uma o le lalolagi, e faia ai e tane, o fafine, ma tamaiti so latou sao ma le loto i ai i vaega o loo faaaofia ai le aofia, ma ua iloa e le toatele se fiafiaga tele e maua mai le faia o se sao.—Eperu 10:23-25.

2. (a) Aisea ua avea ai sauniuniga o se vala autū i le fesoasoani atu i ē talavou ina ia olioli i sauniga? (e) O le faaaoaoga a ai e tāua?

² E moni, o le fesoasoani atu i ē talavou ina ia auai i le faasologa aogā o galuegafai a le faapotopotoga e mafai ona avea o se luʻi. Afai e iai nisi tamaiti o loo auai atu ma o latou mātua ae foliga mai latou te lē fiafia i sauniga, o le ā le faafitauli atonu o iai? O le mea moni, o le toatele o tamaiti e puupuu lava se taimi e mafai ona uaʻi lelei mai ai, ma e vave lava ona fiu. E mafai ona fesoasoani sauniuniga i le taulimaina o lenei faafitauli. Pe a aunoa ma sauniuniga, e lē mafai e le fanau ona faia se sao e uigā i sauniga. (Faataoto 15:23) Pe a aunoa ma sauniuniga, o le a faigata mo i latou ona faia se agaigai i luma faaleagaga lea e maua ai le faamalieina. (1 Timoteo 4:12, 15) O le ā e mafai ona fai? Muamua, e manaomia ona fesili ifo mātua ia i laua lava pe o faia ni a laua foi sauniuniga mo sauniga. O le la faaaoaoga o se taaʻiga e sili ona malosi. (Luka 6:40) O le fuafuaina ma le faaeteete o le suesuega a le aiga e mafai foi ona avea o se vala tāua.

Le Atiina ae o le Loto

3. I le taimi o le suesuega faaleaiga, aisea e tatau ai ona faia ni taumafaiga faapitoa ina ia ati ae loto, ma o le ā e manaomia ai i lenei itu?

³ O le suesuega a le aiga e tatau ona avea ma taimi e lē tau ina faatumu ai ulu i le poto ae o le taimi foi e ati ae ai loto. E manaomia ai i lenei itu le mataalia i faafitauli e fesagai ma tagata o le aiga, faapea foi se manatu mamafa alofa atu mo tagata taitoatasi. O Ieova o lē “suesue i le loto.”—1 Nofoaiga a Tupu 29:17.

4. (a) O le ā le uiga o le ‘leai o sona mafaufau’? (e) O le ā e aofia ai i le ‘mauaina o le loto’?

⁴ O le ā o loo maua e Ieova pe a ia suesueina loto o a tatou fanau? O le toatele o i latou o le a faapea mai e alolofa i le Atua, ma o se mea lelei tele lena. Peitai, o se tasi o loo laitiiti pe e lei leva ona aʻoaʻoina o ia e uiga ia Ieova, e tapulaa mea ua ia tofo i ai i ala o Ieova. Ona o le lē lava o lona potomasani, atonu ai e “leai sona mafaufau,” e pei ona faamatala ai e le Tusi Paia. Atonu e lē leaga uma uunaiga o ana gaoioiga, peitai e manaomia se taimi tele ina ia faaoo atu ai le loto o se tagata i se tulaga o le a matuā faafiafiaina ai le Atua. E aofia ai i lenei mea le aumaia o manatu, o faanaunauga, o lagona māfana, o lagona ootia, ma sini i le olaga o le tagata ina ia ogatusa mea e faamaonia e le Atua, i le tele e mafai ai mo tagata lē lelei atoatoa. Pe a faia e se tasi se suiga faapena i lona tagata i totonu i se ala faale-Atua, o lona uiga ua ‘maua e ia le loto.’—Faataoto 9:4; 19:8.

5, 6. E mafai faapefea e mātua ona fesoasoani i a latou fanau ina ia ‘maua le loto’?

⁵ Pe mafai ea e mātua ona fesoasoani i a latou fanau ina ia ‘maua le loto’? E moni, e leai se tagata e mafai ona ia tuuina se loto lelei i totonu o le isi tagata. E tofu uma i tatou taitoatasi ma le filifiliga saoloto, ma o le tele lava e faalagolago i mea o loo tatou faatagaina i tatou e mafaufau i ai. Peitai, o le faautauta, e mafai ai e mātua ona utufia mai manatu o le la tamaitiiti, ma iloa ai po o ā mea o i lona loto ma o fea foi o loo manaomia ai se fesoasoani. O le faaaogaina o fesili e pei o le ‘O le ā sou lagona i lenei mea?’ ma le ‘O le ā se mea e te manao moni lava e fai?’ Ona faalogologo lelei lea ma le onosai. Aua le mateletele. (Faataoto 20:5) O se siomaga e iai le agalelei, le loto malamalama, ma le alofa e tāua pe a e manao e pāʻia le loto.

⁶ Ina ia faamalosia faanaunauga aogā o le loto, ia talanoa pea lava pea i fua o le agaga—i ona vala uma taitasi—ma galulue faatasi o se aiga ina ia ati ae. (Kalatia 5:22, 23) Ia faatupu aʻe se alofa mo Ieova ma Iesu Keriso, e lē i le na ona faapea e tatau ona tatou alolofa ia i laua, ae ala foi i le talanoaina o mafuaaga e mafua ai ona tatou alolofa ia i laua ma le auala e mafai ona tatou faaalia ai lena alofa. (2 Korinito 5:14, 15) Ia faamalosia le faanaunauga e faia le mea tonu e ala i le talatalanoa i aogā o le a maua mai ai. Ia ati ae le faanaunauga e teena mafaufauga sese, o gagana sese, ma amioga sese e ala i le talanoaina o āuga leaga e iu i ai na mea. (Amosa 5:15; 3 Ioane 11) Ia faaalia pe mafai faapefea i mafaufauga, o gagana, ma le amio—pe lelei pe leaga—ona aafia ai le faiā a se tasi ma Ieova.

7. O le ā e mafai ona fesoasoani atu ai i fanau ina ia latou faafetaia faafitauli ma faia filifiliga i se auala o le a latou vavalalata ai pea ia Ieova?

⁷ Pe a iai se faafitauli o se tamaitiiti po o le tatau foi ona ia faia se filifiliga tāua, e mafai ona tatou fesili atu ia te ia: ‘O le ā sou manatu i le silafaga a Ieova i lenei mea? O le ā se mea ua e iloa e uiga ia Ieova ua māfua ai ona e fai mai faapena? Po ua e tatalo ea ia te ia e uiga i lena mea?’ I se vave e mafai ai, ia amata ona fesoasoani atu i lau fanau ia ati ae se ituaiga o olaga o loo masani pea ona faia ai ni taumafaiga maelega e faamautinoa ai le finagalo o le Atua ona faia lea. A o amata ona latou maua se faiā totino ma le vavalalata ma Ieova, o le a latou maua ai le fiafia i le savavali i ona ala. (Salamo 119:34, 35) O lenei mea o le a tupu aʻe ai i o latou loto le talisapaia mo le faaeaga o le auaufaatasi ma le faapotopotoga a le Atua moni.

Sauniuniga mo Sauniga a le Faapotopotoga

8. (a) O le ā e ono fesoasoani ia i tatou ina ia faaaofia ai i la tatou suesuega faaleaiga mea uma e manaomia ona uaʻi atu i ai? (e) O le ā le tāua o lenei suesuega?

⁸ E tele mataupu e manaomia le uaʻi atu i ai i taimi o suesuega faaleaiga. E mafai faapefea ona outou faaaofia uma na mataupu? E lē mafai ona faia mea uma i se taimi e tasi. Ae atonu o le a outou iloa le aogā o le faia o se lisi o mea e fai. (Faataoto 21:5) Mai lea taimi i lea taimi, ia toe autalu lena lisi ma iloiloina mea e manaomia ona uaʻi faapitoa atu i ai. Ia iai se naunau fiafia i le agaigai i luma o tagata taitoatasi o le aiga. O lenei faatulagaga mo le suesuega a le aiga o se vaega tāua o aʻoaʻoga faa-Kerisiano, o loo faaauupegaina ai i tatou mo le olaga i le taimi nei ma sauniunia ai i tatou mo le ola e lē uma o loo fotuai mai.—1 Timoteo 4:8.

9. O ā sini e tusa ai o sauniuniga mo sauniga e ao ona faasolosolo mālie ona tatou galulue i ai a o faagasolo a tatou suesuega faaleaiga?

⁹ Pe o faaaofia e le suesuega a la outou aiga sauniuniga mo sauniga a le faapotopotoga? E tele ni galuega atonu e mafai ona outou galulue faasolosolo i ai a o outou suesue faatasi. O nisi o nei galuega e ono faaaluina ai ni vaiaso, ni masina, po o ni tausaga foi ina ia faataunuu ai. Seʻi manatu i sini nei: (1) o tagata taitoatasi o le aiga e nofo sauni e faia se tali i sauniga a le faapotopotoga; (2) o tagata taitoatasi e taumafai e fai ni tali i a latou lava upu; (3) ia faaaofia ai ma mau i tali; ma (4) toe iloiloina le mataupu ma vaai pe iai sona faatatauga totino i le tagata lava ia. O nei sini uma e mafai ona fesoasoani i se tasi ina ia avea ai le upu moni ma ana lava mea totino.—Salamo 25:4, 5.

10. (a) E ono faapefea ona tatou uaʻi atu i a tatou sauniga taitasi a le faapotopotoga? (e) Aisea e aogā ai lenei mea?

¹⁰ E tusa lava pe o la outou suesuega faaleaiga e masani ona faavae aʻe i se lesona o Le Olomatamata mo le vaiaso, ae aua neʻi faagaloina le tāua o sauniuniga a le tagata lava ia po o le aiga atoa, mo le Suesuega Tautusi a le Faapotopotoga, le Aʻoga o le Faiva Faatiokarate, ma le Sauniga o le Auaunaga. O nei sauniga o ni vaega tāua o le polokalame mo le aʻoaʻoina o i tatou ia savavali i le ala a Ieova. Atonu tou te mafai ona fai o se aiga, mai lea taimi i lea taimi ona sauniuni mo sauniga. O lo outou galulue faatasi, o le a faaleleia atili ai o outou tomai tau suesue. O le iuga, o le a tele mea lelei e maua ai mai sauniga. E lē gata i isi mea, ae ia talanoa foi i aogā o le sauniuni e lē aunoa mo nei sauniga ma le tāua o le iai o se taimi maʻoti ua faataatia ese mo lenei fuafuaga.—Efeso 5:15-17.

11, 12. O le a aogā faapefea ia i tatou sauniuniga mo pese i le faapotopotoga, ma e mafai faapefea ona faia lena mea?

¹¹ I Tauaofiaga o “Le Ala a le Atua i le Ola,” sa faalaeiauina ai i tatou ina ia sauniuni mo le isi vala o a tatou sauniga—o pesega. Po ua outou mulimuli atu i lena mea? O le faia faapea e mafai ona fesoasoani e faamanino atili ai upu moni o le Tusi Paia i o tatou mafaufau ma loto ma i le taimi e tasi o loo faalautele atu ai foi lo tatou olioli i sauniga a le faapotopotoga.

¹² O sauniuniga e aofia ai le faitau ma le talanoaina o le uiga o upu i nisi o pese ua faatulaga atu, e mafai ona fesoasoani ia i tatou e pepese ai mai le loto. I Isaraelu anamua, sa lauiloa le faaaogaina o meafaimusika i le tapuaiga. (1 Nofoaiga a Tupu 25:1; Salamo 28:7) Pe iai se tasi o lo outou aiga e iloa faaaogā se meafaifaaili? Aisea e lē faaaogā ai lena meafaifaaili e aʻoaʻo ai se tasi o pese o le Malo mo lena vaiaso, ona usu faatasi lea e le aiga le pese? O le isi mea e mafai ona fai, o le faaaogā o pese ia ua uma ona puʻe le usuina. I nisi atunuu, e matuā matagofie le auala o loo usuina ai e o tatou uso pese e aunoa ma ni meafaimusika. A o latou savavali i le auala pe agaʻi atu e galulue i a latou faatoaga, e masani ona latou fiafia e usuina pese ua faatulaga atu mo sauniga a le faapotopotoga i lena vaiaso.—Efeso 5:19.

Sauniuniga a le Aiga mo le Auaunaga i le Fanua

13, 14. Aisea e tāua ai talanoaga a le aiga lea e saunia ai o tatou loto mo le faiva i le fanua?

¹³ O le molimau atu i isi e uiga ia Ieova ma ana fuafuaga o se vala tāua o o tatou olaga. (Isaia 43:10-12; Mataio 24:14) Pe talavou pe matutua, e sili atu le olioli tatou te maua i lenei galuega ma sili atu ni lelei tatou te faataulauina pe afai tatou te sauniuni. E mafai faapefea ona tatou faia lena mea i totonu o le aiga?

¹⁴ E tusa ai o mataupu uma e aofia i la tatou tapuaiga, e tāua le sauniunia o o tatou loto. E manaomia ona tatou talanoa e lē gata i mea o le a tatou faia ae o mafuaaga foi o le a tatou faia ai. I aso o le tupu o Iosefatu, sa tuuina atu ai i tagata faatonuga i le tulafono tauatua, ae o loo taʻu mai e le Tusi Paia ia i tatou faapea, sa latou ‘lei saunia o latou loto.’ O lena mea na faigofie ai ona latou lolo atu i faatosinaga sa mafai ona aveesea ai i latou mai le tapuaiga moni. (2 Nofoaiga a Tupu 20:33; 21:11) O lo tatou sini e lē o le tau ina lipotia mai itula na faaaluina i le auaunaga i le fanua, e lē o le tau foi ina ofoina atu lomiga. O la tatou faiva e tatau ona avea ma faaaliga o lo tatou alofa mo Ieova ma lo tatou alofa mo tagata o ē ao ona maua le avanoa e filifili ai i le ola. (Eperu 13:15) O se galuega o loo avea ai i tatou ma ‘au faigaluega faatasi ma le Atua.’ (1 Korinito 3:9) Maeu se faaeaga! A o tatou saosaolaumea i le faiva, ua tatou lagolagosua atu ai i agelu paia. (Faaaliga 14:6, 7) O le ā se isi taimi e sili atu ona lelei e ati ae ai se talisapaia mo lenei mea na i lo taimi o talanoaga a le aiga, i a tatou suesuega faalevaiaso po o le taimi foi e talanoaina ai se mau talafeagai mai le tusi, Iloiloina le Tusi Paia i Aso Taitasi.

15. O afea e ono mafai ai ona tatou sauniuni faatasi o se aiga mo le auaunaga i le fanua?

¹⁵ Po o masani ona outou faaaogā le taimi i a outou suesuega faaleaiga e fesoasoani ai i tagata o lo outou auaiga ia sauniuni mo le auaunaga i le fanua i le vaiaso? O le faia faapea e mafai ona matuā aogā. (2 Timoteo 2:15) E mafai ona fesoasoani ina ia uigā ma fuatele mai ai la latou auaunaga. Mai lea taimi i lea taimi, e mafai ona e faaavanoa ai se suesuega atoa lava mo le faia o lena sauniuniga. Ae i le tele o taimi e mafai ona e faapupuu ni vala o le faiva i le fanua pe a uma le suesuega a le aiga pe i se isi taimi a o faagasolo le vaiaso.

16. Ia talanoa le tāua o laasaga taitasi na o loo lisiina mai i le palakalafa.

¹⁶ E ono taulai atu talanoaga a le aiga i se faasologa o laasaga, e pei o mea nei: (1) Ia sauniuni se taulimaga ua lelei ona muai faataitaia, o loo aofia ai le faitauina o se mau mai le Tusi Paia pe a lava le taimi. (2) Ia mautinoa pe afai e mafai, ia tofu le tagata ma lana lava ato talaʻi, sana Tusi Paia, sana api e tusi ai faamaumauga, sana peni, ni ana sāvali, ma isi lomiga, ma o loo iai i se tulaga lelei. E lē tau manaomia se ato talaʻi taugata, ae ao ona mamā ma lelei lona foliga mai. (3) Ia talanoaina po o fea ma e faapefea ona faia le molimau atu lē fuafuaina. Ia toe talanoaina foi vala taitasi o lenei faatonuga i ni taimi o loo outou galulue faatasi ai i le auaunaga i le fanua. Ia faaali atu manatu aogā, ae aua le faia ni aoaiga i ni manatu ua tele naua.

17, 18. (a) O le ā le ituaiga o sauniuniga a le aiga e mafai ona fesoasoani ina ia atili fuatele mai ai la tatou faiva i le fanua? (e) O le ā le vala o lenei sauniuniga e mafai ona faia i vaiaso taitasi?

¹⁷ O le vaega tele o le galuega na tofia e Iesu Keriso i ona soo o le faia lea o isi ma soo. (Mataio 28:19, 20) O le faia o soo e tele atu nisi mea e aofia ai na i lo le tau ina talaʻi. E aofia ai le aʻoaʻo atu. E mafai faapefea e la outou suesuega faaleaiga ona fesoasoani ia te outou ia uigā ai i le faia o lenei mea?

¹⁸ Ia talanoaina faatasi o se aiga, po o ai tagata e lelei ona toe asia. O nisi tagata atonu na latou talia lomiga; o nisi atonu sa na ona faalogologo lava. Atonu na feiloai atu i na tagata i le galuega mai lea fale i lea fale pe i le molimau atu lē fuafuaina i le maketi pe i le aʻoga. Tau ina ia taʻitaʻia outou e le Afioga a le Atua. (Salamo 25:9; Esekielu 9:4) Ia filifili po o ai e manao le tagata lava ia o outou e asia i lena vaiaso. O ā mea o le a talanoa atu i ai? E mafai e le talanoaga a le aiga ona fesoasoani i tagata taitoatasi ina ia sauniuni ai. Ia fai ni faamaumauga o mau patino e fia faailoa atu i ē fiafia faapea foi ni manatu talafeagai mai le polosiua O le ā e Manaomia e le Atua Mai ia i Tatou? po o le tusi Le Poto e Taʻitaʻia ai i le Ola e Faavavau. Aua le taumafai e talanoaina ni manatu se tele i se asiasiga se tasi. Ia tuua le tagata e ona le fale ma se fesili o le a taliina i le isi toe asiasiga. O se mea lelei le avea o se vaega o le faasologa faalevaiaso a le aiga le fuafua po o ā toe asiga o le a taitoatasi ma ō atu e fai, o afea o le a fai ai, ma o ā mea o loo ia faamoemoe e faataulauina i na toe asiga. O le faia faapea e mafai ona fesoasoani ina ia sili atu ona fuatele mai le faiva i le fanua a le aiga atoa.

Ia Aʻoaʻoina i Latou i le Ala a Ieova

19. Pe afai o le a savavali pea tagata o le aiga i le ala a Ieova, o le ā e tatau ona latou tofo i ai, ma o le ā e mafai ai lenei mea?

¹⁹ O se luʻi le avea ma ulu o se aiga i lenei lalolagi amioleaga. O loo taumafai malosi Satani ma ana temoni e faatamaia le tulaga faaleagaga o auauna a Ieova. (1 Peteru 5:8) E lē gata i lea, e anoanoai omiga o loo omia ai outou mātua i aso nei, ae maise lava outou mātua nofo toatasi. E faigata ona maua se taimi e fai ai mea uma o loo outou mananao e fai. Peitai e aogā i ai taumafaiga, e tusa lava pe na o le tasi se fautuaga e mafai ona outou faatinoina i se taimi, ma faasolosolo mālie ai ona faaleleia la outou polokalame o suesuega faaleaiga. O le vaai atu i ē pele ia te oe o loo savavali ma le faamaoni i le ala a Ieova o se taui e faamafanafanaloto. Ina ia savavali ma le taulau manuia i le ala a Ieova, e manaomia ai e tagata o le aiga ona olioli i le auai atu i sauniga a le faapotopotoga ma le auai i le faiva i le fanua. Ina ia moni lena mea, e manaomia ai sauniuniga—o sauniuniga e ati ae ai le loto ma faaauupegaina ai tagata taitoatasi e faia se sao uigā.

20. O le ā e mafai ona fesoasoani i ni mātua se toatele ina ia tofo ai i le ituaiga olioli lea o loo faamatalaina i le 3 Ioane 4?

²⁰ E tusa ai o i latou o ē sa fesoasoani faaleagaga atu i ai le aposetolo o Ioane, na ia tusi ai e faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.” (3 Ioane 4) O suesuega faaleaiga e faia faatasi ai ma ni sini manino o mafaufauina, faapea foi ni ulu o aiga o loo latou feutagai i se auala agalelei, ma loto fesoasoani ma manaoga taitasi o tagata o le aiga, e tele ni mea e mafai ona latou fai ina ia maua ai e le aiga lena olioli. E ala i le atiina ae o se talisapaia mo le ala a le Atua i le ola, o loo fesoasoani atu ai mātua i o latou aiga ina ia olioli i le ala e sili ona lelei o le ola.—Salamo 19:7-11.