20. Ina ia puipuia mai Lē e Taui ma Sui i le toto, o le ā e tatau ia i latou o i totonu o le ata faaonaponei o le aai o sulufaiga ona faia?

²⁰ Ina ia puipuia mai lē taui ma sui i le toto, sa tatau i le fasioti tagata paivalea ona nofo i totonu o se aai o sulufaiga ae aua le se ese mai i ona laufanua lafulemu. Ae faapefea i latou o loo iai i le ata faaonaponei o le aai o sulufaiga? Ina ia puipuia mai Lē Taui mai Sui sili i le toto, e ao ia i latou ona tuua le aai. E mautinoa lava le manaomia ia i latou ona puipui faasaga i faaosoosoga ina neʻi ō atu i le faatausiusiuga o laufanua lafulemu, i se uiga faafaatusa. E ao ia i latou ona matuā faaeteete ina ia lē faatagaina le fiafia i le lalolagi a Satani e tuputupu aʻe i o latou loto. Atonu e manaomia ai i lenei mea le tatalo ma taumafaiga, ae e faalagolago atu i ai o latou ola.—1 Ioane 2:15-17; 5:19.

Atua Fafine o le Fanau Tama ma Taua

I LE faagasologa o suesuega a le au suesue o mea na totoe i le eleele mai anamua i Ebla, i Suria, na maua ai se toega o mea mai anamua e faaāta mai ai Ishtar, le atua fafine o le fanau tama ma taua a Papelonia. Ua faamatalaina lea faatagata e le tagata suesue o mea i le eleele o Paolo Matthiae e faapea o se “maa lapotopoto o loo iai se vaaiga o se tu faalelotu e faaāta mai ai se ositaulaga fafine e ufiufi ona mata i luma o se faatusa e toatasi o se atua . . . faatasi ai ma lona ulu ua faalagolago atu i se mea e miti toe umī.”

E tāua le mea na maua, auā o le faatagata na iai i tuā i le amataga o le lona 18 senituri T.L.M. E tusa ai o tala a Matthiae, ua ofoina mai e lenei suesuega se “faamaoniga mausalī” e faapea o tapuaiga ia Ishtar sa faia mo le 2000 tausaga le umi.

O le tapuaiga ia Ishtar na amataina i Papelonia ma faaauau mai ai i le faagasologa o senituri ma salalau atu ai i le Emepaea atoa o Roma. Na faatonuina e Ieova tagata Isaraelu ia tafiesea faiga uma faatapuaiga sese mai le Nuu Folafolaina, ae ona sa lē taulau ona latou faia faapea, sa avea ai o se mailei ia i latou le tapuai atu ia Asaira (le atua fafine a tagata Kanana e tutusa ma Ishtar).—Teuteronome 7:2, 5; Faamasino 10:6.

E ui lava la ina lē o toe iai Ishtar ma lona soa o Asaira, ae o uiga la te faaataina—amioga lē mamā ma faiga sauā—ua matuā taatele lava. Atonu e lelei ai ona tatou fesili pe o matuā eseese moni lava le sosaiete o tagata i aso nei mai na faiga faaanamua sa tapuaia ai nei atua fafine o le fanau tama ma taua.