Le Faalauiloaina o le Suafa o Ieova i le Lalolagi Uma
1 Ina ua faatonuina e Iesu ona soo e fai ma molimau “i tuluʻiga o le lalolagi,” sa ia muaʻi faataatia le faaaʻoaʻoga mo i latou ina ia mulimuli ai. (Galu. 1:8) I so o se taimi ma i so o se nofoaga sa ia maua i ai ni tagata, na ia talanoa atu i ai e uiga i le fuafuaga a le Atua mo le fanau a tagata. I le faaaʻoaʻo ia Iesu, ua faaaogāina ai e le vasega o le auauna faamaoni le tele o auala eseese e ‘faailoa atu ai i le lalolagi uma’ le suafa o Ieova.—Isa. 12:4, 5.
2 O Mea na Faia i Aso ua Mavae: I tausaga ua mavae, sa faasalalauina ai lauga i nusipepa; o le ata o le “Photo-Drama of Creation” na saunia ma faaali atu i le faitau miliona o tagata; na faaaogāina foʻi taavale sa iai masini faaleotele leo; ma sa tele foʻi ina faaaogāina laau tautala (phonograph) ma, mo se taimi, sa faaaogāina ai foʻi leitiō—o nei auala uma ina ia talaʻiina ai le tala lelei. O le mea moni, sa muamua lava ona faamamafa pea le faafeiloaʻia totino o tagata ina ia mafai ona atiina aʻe le naunau fiafia na faaalia. I le iʻuga, na faamaonia ai o le faiva mai lea fale i lea fale, o se auala e aogā tele lea i le faalauiloaina atu o le suafa o Ieova i so o se vaipanoa.—Galu. 5:42.
3 O Mea ua Faia i o Tatou Aso: I le suia o taimi, ua agaʻi atu ai le lalolagi i se tulaga e matuā saoasaoa, ma i le tele o nofoaga, ua seāseā ai ona maua atu tagata i o latou fale. E toʻaitiiti e mananaʻo e faaalu se taimi e faitau ai ma mafaufau loloto i mea faaleagaga. O le mea lea e tatau ai ona faafetaui atu la tatou faiva i se tulaga talafeagai. E faaopoopo i le galueaʻiina e lē aunoa o le oganuu i le talaʻiga mai lea fale i lea fale, ua faalaeiʻauina foʻi i tatou ina ia ō atu i nofoaga o iai tagata ma ia “saunia pea” e tali atu e tusa ma le faamoemoe ua ia i tatou. (1 Pete. 3:15) O le uiga o lenei mea, o le taumafai lea e talaʻi atu i ē tatou te faigaluega faatasi, o ē aʻoʻoga faatasi, tagata i ala tetele ma paka, po o nofoaga e paka ai taavale, mai lea faleoloa i lea faleoloa, ma i so o se vaipanoa lava e ono maua i ai tagata. Faatasi ma le lagolagosua a Ieova, e mafai ai ona taulau manuia a tatou taumafaiga. Po o faia ea sou sao e oo atu ai i tagata i so o se mea lava o latou iai?
4 Seʻi o tatou taʻitoʻatasi ma taumafai ina ia uia auala uma tatou te mafaia ina ia faalauiloa atu ai le suafa o Ieova i la tatou oganuu. E mafai ona tatou maua le loto malie sili i le matuā faataulauina o la tatou faiva, a o tatou vaavaai atu ia Ieova na te tosina mai tagata e saʻo o latou loto.—Ioa. 6:44.