Lomiga Faale-Tusi Paia I LE INITANETI
Lomiga Faale-Tusi Paia
I LE INITANETI
Faa-Samoa
ā
  • ā
  • ē
  • ī
  • ō
  • ū
  • ʻ
  • TUSI PAIA
  • LOMIGA
  • SAUNIGA
  • w98 1/1 itu. 22-24
  • Pe E te Talisapaia Moni ea Faamanuiaga a Ieova?

Leai se vitiō o maua i lenei vaega.

Faamalie atu na iai se faalētonu i le kopiina o le vitiō.

  • Pe E te Talisapaia Moni ea Faamanuiaga a Ieova?
  • Le Olomatamata Faasilasilaina le Malo o Ieova—1998
  • Tamaʻi Ulutala
  • Mataupu e Taitutusa
  • E Lē Faatusalia i le Avea o Sē e Saunia Mea
  • O Faamanuiaga ua Faatamaoaigaina ai i Tatou
  • Faatalitali ma le Onosai ia Ieova
  • Saili i Ana Faamanuiaga
  • O le Faamanuia a Ieova e Faatamaoaiga ai i Tatou
    Le Olomatamata Faasilasilaina le Malo o Ieova—2001
  • O Faamanuiaga o le Savali ma le Faamaoni
    Le Olomatamata Faasilasilaina le Malo o Ieova—2006
  • “Mai i Gutu o Tamameamea”
    Le Olomatamata Faasilasilaina le Malo o Ieova—1995
  • Pe E te Lotomalie e Faatalitali iā Ieova?
    Le Olomatamata Faasilasilaina le Malo o Ieova (Su‘esu‘ega)—2021
Faitau Atili
Le Olomatamata Faasilasilaina le Malo o Ieova—1998
w98 1/1 itu. 22-24

Pe E te Talisapaia Moni ea Faamanuiaga a Ieova?

O KENICHI, o se tane ua faamatuā tagata, sa asiasi atu i se faletalavai ina ia maua mai se fualaau mo le fulū. Ae ina ua ia inuina le fualaau, sa aliaʻe ai se tulaga ilitata o lona tino ua māfua ai le sasao aʻe o se mageso ma faapepē i lona tino atoa. E lē o se mea la e ofo ai, sa amata ona masalosalo Kenichi po o lelei ona uaʻi atu le tagata o faia vailaau i ona manaoga.

E ono manatu nisi ia Ieova le Atua i le auala lava lea e tasi o loo vaai ai Kenichi i le tagata e faia vailaau. Ua latou masalosalo i le Atua e ona le malosi uma lava, o Ieova, po o fiafia moni mai ia i tatou taitoatasi. E ui ina latou iloaina faapea e lelei le Atua, ae latou te lē o talitonuina faapea e manatu mai o ia ia i tatou taitoatasi. E faapitoa le moni o lenei mea pe a lē lelei tulaga o mea mo i latou, ia po o le oo mai o faafitauli faigata, e māfua ona o lo latou pipiimau atu i mataupu silisili o le Tusi Paia. Talu ai le lē lava o le faautauta, ua latou vaai ai i o latou faafitauli e pei o le pata o le tino lea e mageso ma faapepē ia na faafuasei ona aliaʻe ia Kenichi, ua foliga mai e pei o le Atua ua pogai ai.—Faataoto 19:3.

E lē faatusatusaina Ieova i tagata lē lelei atoatoa. O tagata e gata mai lo latou poto ma tomai. E latou te lē taulau ona malamalama lelei i manaoga moni o isi, e pei o le fai vailaau a Kenichi. I le tuufaafeagai ai, e leai se mea e lilo i fofoga o Ieova. E masani ona fesoasoani Ieova ia i tatou e aunoa ma lo tatou iloaina ma talisapaiaina o lena mea moni ona o loo ia i tatou le uiga masani e taulai atu i mea e lē o ia i tatou ma lē iloa ai le tele o faamanuiaga o loo tatou maua. Nai lo le vave ona tatou tuuaia Ieova mo so o se faafitauli e tatou te fesagai, e ao ona tatou taumafai e manatunatu i faamanuiaga mai ia Ieova o loo tatou olioli ai.

E tusa ai ma le Webster’s Ninth New Collegiate Dictionary, o se “faamanuiaga” e mafai ona faauigaina i “se mea e māfua ai le fiafia po o le lelei.” Pe e te talisapaia ea faapea o le mea tonu lava lena o loo iai faamanuiaga mai ia Ieova?

E Lē Faatusalia i le Avea o Sē e Saunia Mea

Pe a faapea mai se avā o lana tane o sē e tausi aiga lelei, o loo ia faauiga atu faalauaitele e na te vaaia lelei manaoga o le aiga, saunia ia lava meaʻai, fale, ma lavalava mo le fiafia ma le lelei o le aiga. O le ā le lelei o Ieova o Sē e Saunia mea? Seʻi tagai lelei atu i lo tatou paneta le Lalolagi, le aiga o le tagata. E tusa e 93,000,000 maila (150,000,000 kilomita) e va ai ma le la, o loo iai i se mamao talafeagai lelei mo le mauaina o tau e mafai ona maua ai le ola i le lalolagi. O le faasipa o lo tatou lalolagi i le 23.5 tikerī ua matuā fuafuaina lelei, ua maua ai tau eseese lea ua fesoasoani ai i le tele o mea e mafai ona totō ma selesele mai ai. O le iuga, ua maua mai ai meaʻai mai le laueleele e fafagaina ai le sili atu i le lima piliona tagata. Ioe o Ieova lava ia o Sē e Saunia mea lelei!

E lē gata i lea, ua faamautinoa mai ia i tatou e le Tusi Paia faapea o Ieova e matuā naunau mai ia i tatou taitoatasi ma lo tatou lelei. Seʻi tau ina manatu mai, e silafia e Ieova le piliona o fetu taitasi i o latou igoa, e leai foi se manu iti e paʻū i le eleele e aunoa ma lona silafia. (Isaia 40:26; Mataio 10:29-31) E sili atu ai la ona ia manatu mamafa i tagata o ē alolofa ia te ia ma sa faatauina i le toto tāua o lona Alo pele, o Iesu Keriso! (Galuega 20:28) Ua fetaui lava le faapea mai a le tagata poto: “O le faamanuia a Ieova, o lea e faatamaoaiga aʻi; na te le faaopoopo i ai se tiga.”—Faataoto 10:22.

O Faamanuiaga ua Faatamaoaigaina ai i Tatou

Ua ia i tatou se mea e silisili ona tautele lea e tatau ona tatou matuā loto faafetai ai. O le ā lena mea? Ua faailoa mai e le Tusi Paia ina ua ia faapea mai: “E sili ona lelei ia te au o le tulafono a lou fofoga i afe o auro ma ario.” (Salamo 119:72; Faataoto 8:10) Atonu e tāua le fia manao i le auro tautele, ae e sili atu ai le faanaunau i le tulafono a Ieova. O se poto saʻo i ana tulafono faatasi ai ma le malamalama ma le faautauta faapea e tali mai Ieova ia i latou e saili ma le faamaoni i le upu moni, o mea ia e ao ona faatāua. E faaauupegaina ai ina ia puipuia i tatou, ia faafetaiaia tulaga faigata, ia lelei ona taulimaina faafitauli, ma ia fiafia ma maua le loto malie.

E moni lenei mea e oo lava ia i latou e laiti. Manatu i le auala na faafetaiaia ai e se teineitiiti ona faafitauli e ala i le mulimuli i tulafono a Ieova. O le teine, e igoa ia Akemi, e nofo latalata i Tokyo. Sa faatatauina e lona tamā ma lona tinā mataupu silisili o le Tusi Paia i le toleniina o ia ma e ala i upu ma faataitaiga sa fesoasoani ai i le la tama teine e ati ae le alofa mo Ieova ma tuaoi. I lo la uluai mafaufauina o faafitauli e ono oo ia te ia i le aʻoga, sa la taumafai ai e fai le mea sili la te mafaia e sauniunia ai o ia. Ina ua alu atu Akemi i le aʻoga tulagalua, sa mataulia ai e nisi o le vasega le “ese” mai lava o ia auā e tatalo a o lei ʻai ma e taumafai malosi ia lē auai i gaoioiga e lē faale-Tusi Paia. E lei umi ae avea loa o ia ma taulaiga a se vaega o ni tamaiti sauā fia malolosi i le aʻoga lea sa latou puea o ia i se tulimanu pe a tuua le aʻoga ma tapō ia te ia i ona foliga, mimilo ona lima, ma ūla ia te ia.

E lei taui ma sui atu lenei teineitiiti o Akemi, e lei palaai foi e tu atu i luma o i latou na sauāina o ia. Nai lo lena, sa ia taumafai e faatatauina mea ua ia aʻoaʻoina. O le mea na iu i ai lona amio lelei ma lona lototele, na faaaloalogia ai o ia e le toatele o tamaiti o le aʻoga. Sa latou lipotia le mataupu i le faiaʻoga, ma talu mai lena aso, e lei toe fasia pe ulagia lava e se isi Akemi i le aʻoga.

O le ā na fesoasoani ia Akemi e taulimaina ma le manuia se faafitauli faigata? O le poto saʻo, le malamalama, ma le atamai mai ia Ieova lea na aʻoaʻo i ai e ona mātua. Sa masani lelei o ia ma le onosai o Iesu, ma na uunaia e lena mea o ia e faataitai i lana faaaoaoga. Sa fesoasoani le Tusi Paia ia te ia e iloa ai e faapea e fai e nisi tagata mea sese ona o le valelea, ma sa faamalosia ai o ia e ʻinoʻino i le sese o loo faia e nei tamaiti sauā fia malolosi ae lē o le ʻinoʻino i tagata.—Luka 23:34; Roma 12:9, 17-21.

E moni, e leai ni mātua e mananao e vaai atu ua feagai se la tama ma ni faiga sauā ma ni tauemuga. Ae ui i lea, e te mafai ona faaāta i lou mafaufau le fiafia na oo i mātua o Akemi ina ua la faalogo i faamatalaga uma o le mea na tupu. O fanau faapea o ni faamanuiaga moni lava mai ia Ieova.—Salamo 127:3; 1 Peteru 1:6, 7.

Faatalitali ma le Onosai ia Ieova

Ae ui i lea, i nisi taimi a o e lei mauaina faamanuiaga a Ieova, e ao ona e faatali mo lana lava taimi. Ua silafia e Ieova lou tulaga ma na te talia manaoga taitasi i le taimi e sili ai ona lelei. (Salamo 145:16; Failauga 3:1; Iakopo 1:17) Atonu e te naunau e taumafa i fualaau aina, ae o le ā sou manatu i se tagata talimalo e na te avatu ia te oe ni fualaau ae e lei oo i le taimi e lelei ai mo le taumafa? Po o se apu, se moli, ia po o se isi lava mea, e te manao i lau fualaau aina ia matua pe pula, ia susua, ma suamalie. E faapena foi ona saunia e Ieova ou manaoga i le taimi tatau—e lē o le vave naʻuā po o le tuai tele foi.

Manatu i le mea na tupu ia Iosefa. E aunoa lava ma sana mea sese na fai, ae uma aʻe ua falepuipui i Aikupito. O se tasi sa la falepuipui faatasi, le tautū uaina a Farao, a o faamoemoe e iai le taimi e magalo ai na ia folafola atu o le a ia aveina le mataupu e uiga ia Iosefa i luma o Farao. Ae ina ua magalo sa matuā galo lava ia te ia Iosefa. Sa foliga mai ua tuulafoaia Iosefa. Peitai, e lua tausaga mulimuli ane ai, na iu ina tatala ai o ia mai le falepuipui ma avea ai ma pule numera lua i Aikupito. Nai lo le lē lavā onosai, sa faatali atu pea Iosefa ia Ieova. Ona o lenei mea, sa faamanuiaina ai o ia i le tulaga lea na iu i le faasaoina o ola e lē gata i tagata Isaraelu ae faapea foi ma tagata Aikupito.—Kenese 39:1–41:57.

Sa avea Masashi o se toeaina i se faapotopotoga i Iapani i mātū. E lei tuuina o ia i se falepuipui e pei o Iosefa, ae sa manaomia foi ona ia faatalitali atu ia Ieova. Aisea? Talu mai lava ona faavaeina le Aʻoga mo Toleniga i le Faiva, i Iapani, le aʻoga e toleni ai faifeau Kerisiano ua agavaa, sa avea ma ona faanaunauga malosi ia auai atu i le aʻoga. Sa ia tatalo faatauanau e faatatau i le faaeaga. O lana paga sa la paeonia faatasi na iu ina valaaulia, peitai e ui lava i lona faanaunauga malosi, e lei valaauliaina o ia. Sa ia matuā faanoanoa lava.

E ui i lea, sa ia uia laasaga ina ia faalelei ai ona faalogona. Sa ia suesueina le Tusi Paia ma lomiga e lomia e le Sosaiete o le Olo Matamata, taulai atu i mataupu e pei o le lotomaulalo ma le pulea o faalogona o se tasi. Sa ia toe faatulaga ona faalogona ma ia maua ai le faamalieina i lona tofiga. Mulimuli ane, i le taimi na te lei mafaufauina, na ia maua ai se valaaulia e auai i le aʻoga.

Ona ua ia ati ae na uiga e pei o le onosai ma le lotomaulalo, sa sili ai ona aogā ia te ia le aʻoga. Mulimuli ane, na maua e Masashi le faaeaga e auauna ai i ona uso o se ovasia femalagaai. Ioe, sa silafia e Ieova le mea e sili ona lelei mo Masashi ma na ia saunia mai i le taimi e sili ona talafeagai ai.

Saili i Ana Faamanuiaga

O le mea moni, e lē pei Ieova o le fai vailaau. E ui lava atonu e lē taulau ona tatou amanaiaina le tausiga ma le manatu mamafa mai o Ieova, ae eseese tulaga e oo mai ai lona agalelei—i taimi ma i auala e sili ona aogā mo i tatou. O lea la ia faaauau ona saili mo ana faamanuiaga. Manatua ua uma ona ia te oe mafuaaga e tele e ao ai ona e loto faafetai. Ua faamanuiaina oe i le saunia mai o mea autū e manaomia mo le ola ai i lenei lalolagi. Ua avatu ia te oe le poto e uiga ia Ieova ma ona ala lelei atoatoa. Ua avatu ia te oe le malamalama. Ma ua e maua foi le faautauta. O mea uma nei ua saosaolaumea i lou soifua solo lelei ma lou fiafia.

Ina ia atoatoa ona e mauaina faamanuiaga mai ia Ieova, ia faaauau ona suesue e lē aunoa le Tusi Paia. Ia ole atu ia Ieova e fesoasoani mai ia e malamalama ma faatatauina ia aʻoaʻoga matagofie o loo i lana Afioga faagaeeina. E faatamaoaigaina moni ai lava oe faaleagaga, ina ia leai se mea e te mativa ai. Ioe, e mafai ona iu i lou fiafia ma le loto malie nei ma le ola e lē uma i le lalolagi fou i le lumanai.—Ioane 10:10; 1 Timoteo 4:8, 9.

[Ata i le itulau 23]

O le faamanuia a Ieova e sili atu ona tāua i lo le auro

    Lomiga Faa-Samoa (1971-2026)
    Log Out
    Log In
    • Faa-Samoa
    • Lafo Faamatalaga
    • Faapolokalame
    • Copyright © 2025 Watch Tower Bible and Tract Society of Pennsylvania
    • Aiāiga Faapitoa
    • Aiā Faaletulafono
    • Privacy Settings
    • JW.ORG
    • Log In
    Lafo Faamatalaga