Na Ia Auauna Ia Ieova ma le Loto Maulalo

“E LĒ o le mea tāua po o fea o fai ai lau auaunaga ae o lē o loo e auauna i ai e tāua moni lea.” Sa fiafia John Booth e fai atu na upu, ma ola aʻe ai. O le gasologa o lona soifuaga i le lalolagi, lea na faaiuina i le Aso Gafua, Ianuari 8, 1996, na lei fesiligia ai po o ai na ia filifilia e auauna i ai.

A o avea ma tama talavou i tuā i le 1921, na sailia ai e John Booth se fuafuaga i le olaga. Na ia aʻoaʻo atu i le Aʻoga Aso Sa i le lotu o le Dutch Reformed, ae na ia teena le manatu e toleniina o ia e avea ma faifeau auā na ia manatu o taʻitaʻi lotu sa ola i ni olaga manatu faapito. Ina ua ia vaaia se faasilasilaga mo se lauga na faaulutalaina “E Faitau Miliona o Loo Soifua Nei o le a Lē Oo Lava i ai le Oti,” sa ia lei faamaumauina se taimi ae saili loa mo le mauaina o le lomiga lea na faasalalauina ai. I le uunaia e ala i mea na ia faitauina, na alu ai loa i lana uila vilivae i le 15 maila [24 kilomita] i sauniga a Tagata Aʻoga o le Tusi Paia, lea na iloa ai Molimau a Ieova i na taimi. Na papatiso o ia i le 1923 ma amata ona talaʻi mai lea fale i lea fale i oganuu o Wallkill, i New York, o iina sa iai se fale taususu a lona aiga.

Na ulu atu le uso o Booth i le faiva faataimi atoa ia Aperila 1928. Na talaʻi i oganuu o lona aai ma nuu maotua o le itu i Saute, i le fesuiaia o lomiga faale-Tusi Paia mo meaʻai ma nofoaga na tau ina mapu i ai. Sa lototele e ui i fana a i latou na gaosia le ʻava malosi e aunoa ma se faatagaga, lea na fanaina ai e se tasi le paga paeonia a John Booth ma faamanuʻalia ai. I le 1935, na tofia ai le uso o Booth o se ovasia femalagaai ma na amata ona asiasi i faapotopotoga ma vaega toalaiti sa i nuu i tua. Na ia faamaopoopoina fonotaga ma fesoasoani i uso ma tuafāfine ina ia tutumau i teteega. I le faafesagaia o le mau tagata tetee, o le tulai atu i faamasinoga, ma mafatiaga mai le faafalepuipuiina, na avea uma ma mea ua masani ai le olaga o le uso o Booth. I se tasi taimi na ia tusi mai ai e faapea: “Atonu e faaaluina ai se tusi atoa e tusia ai faamatalaga auiliili e faatatau i na taimi fiafia.”

I le 1941, na tofia ai e Joseph F. Rutherford, lea na avea ma peresitene o le Sosaiete o le Olo Matamata i lena taimi, le uso o Booth e galue i le Kingdom Farm, e latalata i Ithaca, i New York. O iina na ia auauna ai ma le faamaoni mo le 28 tausaga. Ona sa lei faavaivaia lona alofa mo le auaunaga, na fiafia ai o ia mo le tele o tausaga e auaufaatasi ma le faitau afe o tagata aʻoga o le Aʻoga Faale-Tusi Paia o le Olomatamata o Kiliata mo le toleniga faamisionare, lea na faatūina iina i le Kingdom Farm seia oo i le 1961. I le 1970, na valaaulia ai le uso o Booth e auauna i le Watchtower Farms i Wallkill, New York, ma sa iai o ia iina i le vaega lava lea na amata paeonia ai mo le 45 tausaga ua tuanai.

I le 1974, na tofia ai le uso o Booth e avea ma se tasi o le Vaega Pule o Molimau a Ieova i Brooklyn, New York. Na auauna ma le faamaoni o ia i lena tulaga seia oo i lona maliu i le 93 o tausaga o lona soifuaga. Na alofagia John Booth ona o le tele o lona loto maulalo ma uiga agalelei faa-Kerisiano. E oo ane lava i le taimi na mou atu ai lona soifua maloloina lelei ma lona malosi, na talaʻi atu pea o ia ma le faamaoni mai lea fale i lea fale ma i magaala o aai.

A o faanoanoa ē na auauna faatasi ma ia ona o lona maliu, ae ua latou maua se faamafanafanaga mai le folafolaga a le Tusi Paia e faatatau i na Kerisiano faauuina, e faapea ua toe faatutūina nei i latou i le olaga faalelagi ma o “a latou galuega e mulimuli ia te i latou.” (Faaaliga 14:13; 1 Korinito 15:51-54) E mautinoa o se siomaga fou, ae o se siomaga o le a mafai e John Booth ona auauna ai e faavavau ia Ieova!

[Ata i le itulau 32]

John Booth 1903-1996

[Ata i le itulau 32]

HERALD-AMERICAN, ANDOVER 1234

76 Jehovites Jailed in Joliet

[Ē Ana le Ata 32]

Chicago Herald-American