Amataina o Suesuega i le Polosiua o le Manaomia

¹ Ua faaalia i lipoti mai le lalolagi aoao e faapea, o le polosiua, O le ā e Manaomia e le Atua Mai ia i Tatou? ua avea o se mea faigaluega malosi i le aʻoaʻoina o tagata i le upu moni. E faitauafe suesuega faale-Tusi Paia e amataina i vaiaso taitasi i lenei polosiua. Pe na e taulau manuia i le amataina ma faia se suesuega faale-Tusi Paia i le polosiua o le Manaomia?

² A o iloa e le toatele le faigofie ona ofoina atu le polosiua, ae ua iloa foi e nisi le faigata ona iloa po o le ā e fai atu ai ina ia amataina ai se suesuega. O ā auala ua maua e isi e aogā mo le amataina o se suesuega faale-Tusi Paia e faaaogā ai le polosiua o le Manaomia? O fautuaga nei e ao ona fesoasoani ia te oe.

³ Ofo e Faataitai le Faiga o le Suesuega: Pe a faia le uluai asiasiga po o se toe asiga, na i lo o le tau ina ofo se suesuega faale-Tusi Paia i lē ona le fale, ae e mafai ona tatou faataitaia le auala e faia ai le lesona faale-Tusi Paia lea o le a faia. O lenei faiga atonu o le a aveesea ai le masalosalo ma le popole o le toatele o ē ona fale mulimuli ane pe a taʻu atu le upu “suesuega.” O le taimi lava e tatou te aʻoaʻoina ai le auala e faataitai ai le suesuega, o le a tatou iloa ai, e na o sina faatomuaga faigofie lava, ae o le a mafai ai ona tatou amataina loa le suesuega.

⁴ O le Autū Lava, o le Sauniuni: O lo tatou matuā naunau mo le amataina o ni suesuega faale-Tusi Paia, e manaomia moni ai lava lo tatou sauniuni lelei. O le sauniuni mamao o le a fesoasoani ia i tatou e foia so o se faaletonu e ono oo ia i tatou i le faia o se sao i le galuega o le faia o suesuega faale-Tusi Paia. O le faataitai soo o a tatou taulimaga, o le a sili atu ai ona ia i tatou se uiga faatalanoa, ma mafai ai ona faailoa atu i tatou lava e pei ona masani ai, ma ia faia i a tatou lava upu. E lē gata o le a fesoasoani lenei mea ia i tatou e toafilemu ai ae o le a faanofogofie ai foi lē ona le fale.

⁵ Pe a faia au faataitaiga, e aogā tele le fuaina o le taimi o au faatomuaga ina ia mafai ai ona e faailoa atu i lē ona le fale po o le ā le umi o le a faataitai ai le faiga o le suesuega. Ina ua uma ona faailoa atu e se uso o ia lava, na ia faapea atu: “Ua ou afe mai e faailoa atu ia te oe la matou polokalame o le faia o suesuega faale-Tusi Paia e aunoa ma se totogi. E na o le lima lava minute e faataitai ai. E ā, e te avanoa mo le lima minute?” E mafai ona faataitai le Lesona 1 o le polosiua o le Manaomia pe ā ma le lima minute. O le mea moni, e na o mau o le Tusi Paia ua filifilia e mafai ona faitau i lena taimi, ae o le talanoaina uma o le lesona muamua e faaalu ai ni nai minute e sili atu, ma ua mafai ai e lē ona le fale ona faia lana uluai suesuega. Ia ona faailoa atu lea i ai e faapea pe a e toe foi mai e talanoaina le Lesona 2, o le a na o le 15 lava minute e faaalu ai.

⁶ O se taulimaga foi lenei na faamaonia le aogā:

◼ “Ou te fia faailoa atu ia te oe se auala e matuā faigofie ma vave e suesueina ai le Tusi Paia e faaaogaina ai lenei polosiua, O le ā e Manaomia e le Atua Mai ia i Tatou? Ua iloa e le toatele e faapea, i sina taimi puupuu lava e na o le 15 minute i le vaiaso, ma mo le 16 vaiaso, e mafai ona latou maua ai tali faale-Tusi Paia faamalie loto i nei fesili tāua mai le Tusi Paia.” Faaali puupuu i ai le faasologa o mataupu. Ia suʻe i le Lesona 1, ma faapea atu: “Afai e mafai ona e faaavanoa sina lima minute, e ma te fia faailoa atu ia te oe le auala e faia ai lenei mea. O le Lesona 1 ua faaulutalaina e faapea, ‘Le Auala E te Iloa ai le Mea e Manaomia e le Atua.’” Ona sosoo ai lea ma le faitauina o fesili e tolu, ma faamatala fuainumera na e puipui. Faitau le palakalafa 1, ma faasino i lē ona le fale le auala e maua ai le tali. E mafai foi ona fai atu i lē ona le fale e faitau mai le palakalafa e 2. Ona fesili atu lea: “E faavae i nei faamatalaga, e faapefea ona e taliina lenei fesili? [Toe faitau le fesili, ma faatali i lē ona le fale e fai mai sona manatu.] O le a e iloa e iai mau o le Tusi Paia i palakalafa taitasi. O nei mau e tataʻi atu ai o tatou manatu i tali o loo i le Tusi Paia mo nei fesili. Mo se faaaoaoga, seʻi o tatou faitau i le 2 Timoteo 3:16, 17 ma tagai i ai pe lagolagoina e le mau le tali lea na e fai mai e tusa ai ma le tusitala o le Tusi Paia.” Pe a uma ona faitau o le palakalafa e 3, talanoa i le fesili, ma i le faitauina o le Ioane 17:3, tataʻi le manatu o lē ona le fale i le poto lea ua ia maua e ala i le autaluina o le Lesona 1. I lenei tulaga, e mafai ona e suʻe i le Lesona 2 ma faitau le fesili mulimuli, “O ā auala e lua e mafai ona aʻoaʻoina ai i tatou e uiga i le Atua?” Ona e fesili atu lea: “O afea e maua ai sou 15 minute ina ia mafai ai ona ta talanoaina le Lesona 2 ma saili tali?”

⁷ E tāua tele le faapuupuu o le talanoaga ma ia faamālō i lē ona le fale pe a tatau ai. Pe a fuafua mo se isi asiasiga, na i lo o le fesili atu pe manao ina ia faaauau, tau ina faalaeiau o ia ina ia mulimuli i le faiga lava lea e tasi mo le isi lesona. Ia faailoa i ai o loo e naunau e toe foi mai i se taimi o i luma. Ua ofoina e nisi tagata talaʻi le faia o le suesuega i le telefoni pe a oo ina tulaga faigata le faasologa. E mafai foi ona e faalaeiau le tagata suesue ina ia teu le polosiua i se nofoaga saogalemu, ma talafeagai ina ia faigofie ona maua i le isi taimi e te asiasi atu ai.

⁸ Ia Maumauai: A o avea le sauniuni ma ki i le taulau manuia, ua tatau ai ona tatou maumauai e faia pea lena mea. O le aʻoaʻoina o se lesona mo ni nai minute, e mafai ona avea ma luʻi, o lea ia maumauai e faataitai soo i le tele e mafai ai ia taulimaga ina ia sologa lelei pe a faataitai le faiga o le suesuega. Taumafai e faataitai le faia o se suesuega ma tagata uma e te feiloai i ai i fale, i le molimau lē fuafuaina, ma i le molimau atu i telefoni. Pe afai e faafaigata ia te oe ona amataina se suesuega faale-Tusi Paia, aua le lotovaivai. O le taulau manuia i le amataina o suesuega faale-Tusi Paia e manaomia ai le maumauai ma se faanaunauga faamaoni e tufa atu le upu moni i isi.—Kala. 6:9.

⁹ O le faatatauina o nei fautuaga, e mafai foi ona e maua ai le faaeaga o le fesoasoani atu i se tasi e ui i le ala i le ola, e ala i le amataina o se suesuega faale-Tusi Paia i le polosiua o le Manaomia.—Mata. 7:14.

Faasilasilaga

◼ Lomiga mo le ofo ia Ianuari: So o se tusi o tusi nei: “Ia Oo mai Lou Malo,” Autasia i le Tapuaiga i le Atua Moni e Toatasi, Lou Talavou—Mauaina mai ai Aogā Silisili, Faia o Lou Olaga Faaleaiga ia Fiafia, po o so o se tusi tuai e 192 itulau atonu o loo iai pea i le faapotopotoga. O faapotopotoga e lē o iai ni a latou tusi faapena e mafai ona ofo le tusi, E Mafai ona E Ola e Faavavau i Parataiso i Le Lalolagi. Fepuari: Le Ala e Maua ai le Fiafia i le Aiga. Mati: Le Poto e Taʻitaʻia ai i le Ola e Faavavau. O le a faia se taumafaiga faapitoa e amataina ni suesuega faale-Tusi Paia i aiga. Aperila: O kopi taitasi o Le Olomatamata ma le Ala Mai! Ia iai ni polosiua o le Manaomia mo tagata loto fiafia, ma taumafai e amataina ai ni suesuega faale-Tusi Paia i aiga.

◼ O tagata talaʻi uma ua papatisoina e auai i le Sauniga o le Auaunaga i le vaiaso o Ianuari 25 o le a tuuina atu i ai le pepa, Faatonuga ua Muai Saunia mo Fomai ma Tuusaunoa Ai (Advance Medical Directive/Release) ma le pepa ID mo a latou fanau.

◼ E amata atu ia Mati, o le lauga lautele fou mo ovasia matagaluega e faapea, “E Faapefea Ona Moni le Atua ia te Oe?”

◼ E tatau i faapotopotoga ona faia fuafuaga mo le faamanatuina o le Faamanatuga i lenei tausaga, i le Aso Tofi, Aperila 1, pe a goto le la. E ui atonu e vave ona amata le lauga, ae o le tufatufaina atu o le areto ma le uaina o le Faamanatuga e lē tatau ona faia seia oo ina goto le la. Fesili i le ofisa o le tau i lo outou atunuu e iloa ai le taimi e goto ai le la. E ui lava e iai le faanaunauga mo faapotopotoga taitasi e faia la latou lava Faamanatuga, ae atonu e lē mafai i taimi uma ona faia o lenei mea. I nofoaga e masani ona faaaogā ai e ni faapotopotoga e sili atu i le tasi le Maota o le Malo e tasi, atonu e mafai e se faapotopotoga se tasi pe sili atu foi ona maua se isi fale e faaaogā mo lena po. Afai e mafai, e matou te fautuaina atu se taimi faatapulaaina e tusa ma le 40 minute i le va o polokalame ina ia mafai ai ona maua se taimi e faafeiloai ai tagata asiasi mai, ma faalaeiauina tagata loto fiafia fou, ma maua atoatoa ai aogā mai le sauniga. E tatau foi ona faaalia le magafagafa e faatatau i faafitauli tau taavale ma mea e paka ai, e aofia ai le aveina atu ma le toe aumaia o pasese. O le au toeaina e tatau ona faia le filifiliga po o ā faatulagaga o le a sili ona lelei mo le faapotopotoga.

◼ O le lauga lautele faapitoa mo le vaitaimi o le Faamanatuga i le 1999, o le a fofogaina atu i le Aso Sa, Aperila 18. O le mataupu o le a talanoaina i le lauga e faapea,