O Ai Ieova?

NA TAʻU atu e Ieova i se tasi o ana tagata tapuai faamaoni: “E le mafai ona vaai mai lava se tagata ia te au, ma ola pea ia.” (Esoto 33:20) “O le Atua o le agaga lava ia,” ma e lē mafai e tagata ona vaai ia te ia i o latou mata faaletino. (Ioane 4:24) E pei ona leaga mo ou mata lou pupula saʻo atu i le la i se aoauli teatea, e faapena foi ona matuā matautia mo i tatou lo tatou vaai atu i le Puna ofoofogia o le malosi lea na foafoaina e lē gata i lo tatou la matagofie, ae faapea foi le lē mafaitaulia o isi la o loo iai i le vateatea.

O le mea e lelei ai, e lē tau manaomia ona tatou vāai i le Atua ina ia iloa ai mea e uiga ia te ia. Ua taʻu mai e le Tusi Paia Lē na sauniunia lena faamomoli matagofie, le lalolagi, mo i tatou ma faaalia mai ona uiga totino. E aogā ai la le saili atu i le Tusi Paia ina ia iloa mea e uiga i le Tamā o lē na foai mai ia i tatou le ola ma auina mai se aiga fiafia lea ua tatou olioli ai i lena ola.

Le Uiga o Lona Suafa

E tofu uma lava igoa ma uiga, e ui o le toatele o tagata atonu e lē o iloaina lena mea i aso nei. Mo se faaaoaoga, o le igoa taatele faa-Peretania David (Tavita) e sau mai le upu Eperu o lona uiga o le “Alofagia.” O le suafa o Lē na Foafoaina Mea, o Ieova, e iai foi lona uiga. O le ā lea? I le uluai gagana na tusia ai le Tusi Paia, le gagana Eperu, o loo tusia ai le suafa tauatua i mataitusi e fa, YHWH, ma e toetoe 7,000 taimi e aliai mai ai i le vaega faa-Eperu o le Tusi Paia. Ua iai le malamalamaga o le suafa tauatua e uiga faapea “O Ia Lava ua Māfua ai Ona Iai.” E faauiga faapea ua faapogaia ma le poto e Ieova o ia lava ina ia avea po o le ā lava e finagalo o ia ina ia avea ai, mo le faataunuuina o ana fuafuaga. O ia o Lē na Foafoaina Mea, le Faamasino, le Faaola, o Lē Faatumauina le Ola, ma o lea ua mafai ai ona ia faataunuu ana folafolaga. E lē gata i lea, i le gagana Eperu e faatatau i le suafa o Ieova o loo i le tulaga faaveape lea e faaali mai ai se gaoioiga i se faagasologa o se mea o loo faataunuuina. Ioe, o loo faaauau pea e Ieova ona faapogaia o ia lava ina ia avea ma lē faataunuuina ana fuafuaga. O ia o le Atua soifua!

Uiga Autū o Ieova

Ua faamatala e le Tusi Paia Lē na Foafoaina Mea e faapea o “le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala.” (Esoto 34:6, 7) O le faaupuga “alofa” e faaliliuina ai se upu Eperu e loloto lava sona uiga. Ua faaali mai ai se agalelei lea e pipii mau atu ma le alofa i se mea seia oo ina iloatino mai lana fuafuaga mo lena mea. E mafai foi ona faaliliuina i le “alofa faamaoni.” O le agalelei o Ieova ua pipii atu ma le alofa i ana mea na foafoaina ma faataunuu ai lana fuafuaga ofoofogia. Po o le a e lē faapelepele ea i lena alofa mai Lē na foaiina atu le ola ia te oe?

O Ieova e telegese lona toasa ae vave ona ia faamagaloina o tatou sese. O se faamafanafanaloto le vavalalata atu i se peresona faapena. Peitai, e lē o le uiga o lena mea faapea e lē o ano mai o ia i measese o loo fai. Ua ia folafola mai: “O aʻu o Ieova, ou te fiafia i le faamasinoga, ou te ʻinoʻino i mea ua faoa faaletaupulea.” (Isaia 61:8) Ona o ia o le Atua o le faamasinoga tonu, o le a lē faavavau ai ona ia faapalepale mai i tagata agasala faauamaaa o ē faaauau pea i a latou amioga leaga. O lea, e mafai ai ona tatou mautinoa, i lana taimi atofaina, o le a faasaʻo ai e Ieova le lē faamasinotonu o loo iai i le lalolagi. O le a lē faagaloina e ia ē o loo mafatia.

E lē faigofie ona tausisia se paleni atoatoa i le va o le alofa ma le faamasinotonu. Pe afai o oe o se matua, po o faigata ea mo oe ona filifilia po o afea, e faapefea, ma i le ā le tele e te faasaʻoina ai lau fanau pe a lē pulea a latou amio? O le faapaleniina o le faamasinotonu ma le alofa mutimutivale e manaomia ai le poto maoaʻe. O le uiga lena o loo faaalia i se tulaga tele e Ieova pe a feutagai o ia ma tagata. (Roma 11:33-36) Ioe, o le poto o le Atua e mafai ona vaaia i so o se mea, mo se faaaoaoga, i mea ofoofogia o le foafoaga o loo siomia ai i tatou.—Salamo 104:24; Faataoto 3:19.

Peitai, e lē lava le na ona iai o le poto. Ina ia faataunuuina lona finagalo, e tatau ai foi i Lē na Foafoaina Mea ona ia te ia le malosi, ma ua faaalia mai e le Tusi Paia faapea e matuā malosi lava o ia: “Seʻi tetepa ae i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa.” (Isaia 40:26) Ona o le “tele o lona malosi,” e mafai ai e Ieova ona faatinoina mea. Po o le a lē avea ea se uiga faapena e te tosina atu ai ia te ia?

Le Atua o Atunuu Uma

Atonu e te ono tau mānatu, ‘ae pe lē o Ieova ea o le Atua o le “Feagaiga Tuai,” le Atua o Isaraelu anamua?’ E moni sa faaali atu e Ieova ia lava i le fanauga a Isaraelu. Peitai, talu ai ona o ia na foafoaina le uluai ulugalii faaletagata, o Ieova le Atua la, “o ia ua faaigoaina ai le aiga uma o i . . . le lalolagi.” (Efeso 3:15) Pe afai e te talitonu e talafeagai ona faaaloalo atu i ou tuaa, po ua lē talafeagai ea la ona faia se faaaloaloga mamalu i Lē na foaiina mai le ola i le uluai tamaloa, lo tatou tuaa faitele, o lē na puna mai ai gafa faaletagata o loo iai i le lalolagi i aso nei?

O Lē na Foafoaina le tagata e lē pitotasi lana silasila mai. E moni, sa iai se taimi na faia ai sana faiā faapitoa ma le nuu o Isaraelu. Peitai e oo lava foi i lena taimi, sa ia talia i latou uma o ē valaau atu i lona suafa. Na taʻua e se tupu poto o Isaraelu i lana tatalo atu ia Ieova: “O le tagata ese foi, e le so lou nuu o Isaraelu, a ua sau o ia mai le nuu mamao ona o lou suafa . . . , ia e faafofoga mai mai le lagi, . . . ma e faia e tusa ma mea uma e valaau atu ai le tagata ese ia te oe; ina ia iloa lou suafa e nuu uma lava i le lalolagi.” (1 Tupu 8:41-43) E oo mai i le asō, o loo mafai e tagata o atunuu uma ona latou aʻoaʻo ina ia iloa Ieova ma faia se faiā uigā ma ia. Ae faapefea e lena mea ona aafia ai oe?

Aogā o le Iloaina o Ieova

Pe a toe mānatu i le faataitaiga i le mataupu na muamua atu, pe afai e te mauaina se faamomoli ua manaia lona afifiina, o le mea masani lava o lou manao e fia iloa pe aisea ua aumai ai lena meaalofa. E tatau faapefea ona faaaogā ma tausia? E faapena foi lo tatou fia iloa po o le ā sa finagalo i ai le Atua ina ua ia sauniunia le lalolagi mo i tatou. Ua faapea mai le Tusi Paia sa ia ‘lei faia fua,’ ae na ia “faia ina ia āina,” o lona uiga, e aināina e tagata.—Isaia 45:18.

E ui i lea, o le toatele o tagata, latou te lē o tausia lelei le meaalofa a Lē na Foafoaina Mea. O loo latou faafanoina le lalolagi, ma ua matuā lē fiafia i ai Ieova. Peitai, ina ia ogatusa ma le uiga o lona suafa, ua maumauai ai pea Ieova e faataunuu lana uluai fuafuaga mo tagata ma le lalolagi. (Salamo 115:16; Faaaliga 11:18) O le a ia toe faaleleia le lalolagi ma foai atu o se tofi ia i latou o ē naunau e fia ola ai o ni ana fanau usiusitai.—Mataio 5:5.

O le tusi mulimuli o le Tusi Paia o loo faamatala mai ai po o le a faapeī tulaga o mea pe a faataunuu lena fuafuaga: “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:3, 4) E leai se tasi o le a toe maligi ni loimata o le faanoanoa pe auē ona o le oti o sē pele. E leai se tasi e toe tagi mo se fesoasoani ona o le fememeai pe mafatia i tigā o ni faamaʻi tugā. E oo lava i le ‘oti o le a faaumatia.’ (1 Korinito 15:26; Isaia 25:8; 33:24) Ua faamatala mai i lenei mea le ituaiga o olaga sa muai finagalo Ieova ina ia tatou olioli ai ina ua ia foafoaina o tatou uluai tuaa.

O le mea moni, e mafai ona iai sina faaātaga puupuu ia te oe o tulaga faaparataiso i le taimi nei i totonu o tagata tapuai o Ieova. Ua ia taʻu atu ia i latou: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.” (Isaia 48:17) O Ieova o se Tamā agalelei o lē aʻoaʻo mai ia i tatou, lana fanau, le ala e sili ona lelei e ola ai. O ana taʻiala mo tagata ua saunia ai, e lē o ni faasasaaga lē talafeagai, ae o ni puipuiga alofa. O le usitaia o na taʻiala o le a iu ai i le saʻolotoga moni ma le fiafiaga, e pei lava ona tusia: “O le Alii foi o le Agaga ia; o le mea o i ai le Agaga o le Alii, o i ai le saʻolotoga.” (2 Korinito 3:17) O le mulimuli atu i taʻiala ua faatulaga mai i le Tusi Paia, ua tofo ai i latou o ē taliaina lana pulega i le taimi nei i le filemu o le mafaufau lea o le a iai se aso o le a ufitia ai le lalolagi atoa o tagata.—Filipi 4:7.

Maeu se Tamā loto foai e iai Ieova! Po o e naunau ea e aʻoaʻoina atili nisi mea e uiga i Lē na māfua ai mea ofoofogia uma o le foafoaga? Mo i latou e mananao ai, e matuā lē mafaatusalia aogā o lenei mea e oo lava i le taimi nei. Ma i le lumanai, o le a faavavau ai faamanuiaga.

[Ata i le itulau 5]

O le suafa tauatua o loo tusia i mataitusi Eperu e fa, e mafai ona vaaia i puipui o le tele o falesa tuai