Feagaiga e Aafia ai le Fuafuaga e Faavavau a le Atua

“O Ieova . . . e manatua e ia e faavavau o lana feagaiga, o le upu na ia poloai mai ai i tupulaga e afe.”—SALAMO 105:7, 8.

1, 2. Ai se ā ua mafai ai ona tatou faapea atu ua aafia le toatele o i tatou i se feagaiga?

ATONU, e aunoa ma le faaletonu ona aafia ai oe i se feagaiga—lou olaga i aso ua mavae, i le taimi nei, ma lou lumanai. ‘O le ā le feagaiga?’ atonu o le a e tau manatu ai. I lenei itu, o le faaipoipoga, auā o le toatele o i tatou o fanau na maua mai i faaipoipoga ma o le toatele o i tatou ua tatou faaipoipo foi. E oo lava ia i latou e leʻi faaipoipo atonu o manatunatu e uiga i ni faamanuiaga o se faaipoipoga fiafia i le lumanai.

² I senituri ua mavae, na tusi ai le perofeta Eperu o Malaki e uiga i le “avā sa e fai a o ē taulealea,” “o ia sa lua mafuta, o le avā foi o ia o lau feagaiga.” (Malaki 2:14-16) Na mafai ona ia taʻua le faaipoipoga o se feagaiga, auā o le mea lena, o se konekalate po o se ioega aloaia, o se faatulagaga i le va o ni itu e lua ina ia faia se mea i le uiga soofaatasi. O le maliega faalefaaipoipoga o se feagaiga e aafia tutusa ai itu uma e lua i se maliega o le a avea ai o se tane ma se avā, ma talia ai avega tauave a le tasi agaʻi i le isi ma vaavaai atu ai agaʻi i luma mo ni aogā tumau.

3. Ai se ā atonu e sili atu ai ona aafia i tatou i isi feagaiga na i lo o le feagaiga o le faaipoipoga?

³ E foliga mai o le faaipoipoga o le feagaiga ua sili atu ona matuā aafia totino ai i tatou, peitai, ua talanoaina ai e le Tusi Paia ni feagaiga e sili atu ona lautele lo latou tāua. I le faaeseesega o feagaiga faale-Tusi Paia ma na e lē faale-Tusi Paia a lotu, ua faapea mai se tasi lomifefiloi, ua na o i le Tusi Paia lava “o loo faia ai lenei faatonuga o le feagaiga i le va o le Atua ma ona tagata, ua avea ai o se faiga lautele faatasi ai ma ni aafiaga aoao i le i’uga.” Ioe, o nei feagaiga e aafia ai le fuafuaga e faavavau a Lē na Foafoaina i tatou ma le alofa. E pei ona o le a e vaai i ai, o loo fesootai atu lou mauaina o nei faamanuiaga lē mataʻutaʻua ma nei feagaiga. ‘A e o le a faapefea ona faia lena mea?’ ua i ai se mafuaaga e te fesili ai faapea.

4. O le ā le uluai feagaiga ua faasino atu i le fuafuaga e faavavau a le Atua?

⁴ Ua e iloa lelei lava iʻuga faanoanoa ina ua teena e Atamu ma Eva le pule a le Atua. Ua tuufaasolo mai ai ia i tatou le lē lelei atoatoa mai ia i laua, o le mea moni lea o loo i tua o faamaʻi ua tatou pagatia ai, ma i lea foi ua taʻitaʻiina atu ai i le oti. (Kenese 3:1-6, 14-19) A e peitai, e mafai ona tatou loto faafetai faapea na lē mafai e la la agasala ona taofia ai le fuafuaga a le Atua i le faatumuina o le lalolagi i tagata tapuai moni e olioli i le soifua maloloina ma le fiafia e faavavau. I le fesootai atu ma lenei mea, na faia ai e Ieova le feagaiga ua faamauina i le Kenese 3:15: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” A e peitai, ona o le puupuu ma le faafaatusa o le gagana o lenei faamatalaga ua tuua ai le tele o fesili e lē taliina. O le a faapefea ona faataunuuina e Ieova lenei folafolaga o le feagaiga?

5, 6. (a) O ā auala na filifilia e le Atua e faaaogā i le galueaiina o lana fuafuaga? (e) Ai se ā e tatau ai ona tatou naunau i auala a le Atua e faia ai lenei mea?

⁵ Ona filifilia atili lea e le Atua le faia o se faatatauga mo se faasologa patino o feagaiga tauatua, lea, ua aofia ai le feagaiga faa-Etena, ua atoa i ai feagaiga uma e fitu. O i tatou taitoatasi o ē faamoemoe ina ia olioli i faamanuiaga e faavavau, e ao ona malamalama i nei feagaiga. E aofia ai i lenei mea le iloa po o anafea ma na faapefea ona faia, o ai na aafia ai, o ā o latou sini po o tulaga autū, ma ua faapefea ona fesootai ia feagaiga o le tasi i le isi i le fuafuaga a le Atua e faamanuia le fanau usiusitai a tagata i le ola e faavavau. O le taimi talafeagai lenei e autaluina ai nei feagaiga, auā ia Aperila 10, 1990, o le a tauaofia ai faapotopotoga o Kerisiano e faamanatuina le Talisuaga Afiafi a le Alii, lea e aafia tuusaʻo ai nei feagaiga.

⁶ O le mea moni, i nisi tagata, o le manatu i feagaiga atonu e paʻōpapa, o se mea faaletulafono, e itiiti lava sina naunau i ai o tagata. A e ui i lea, seʻi manatu i le mea ua fai mai ai le Theological Dictionary of the Old Testament: “O faaupuga mo le ‘feagaiga’ i Sasae Lata mai anamua faapea foi ma le lalolagi o Eleni ma Roma . . . ua faasalalauina atu e tusa ai ma ni suesuega se lua e faatatau i le uiga o upu: i le tasi itu, o le tautoga ma le taʻutinoga a e i le isi itu, o le alofa ma le faauo.” E mafai ona tatou vaai i ai i nei vala e lua—o le tautoga ma le faauo—e avea o ni matua autū o feagaiga a Ieova.

Le Feagaiga Faa-Aperaamo—O le Faavae mo Faamanuiaga e Faavavau

7, 8. O le ā le ituaiga o feagaiga na faia e Ieova ma Aperaamo? (1 Nofoaiga a Tupu 16:15, 16)

⁷ O le augātamā o Aperaamo, o le “tamā o e faatuatua,” sa o se “uo a Ieova.” (Roma 4:11; Iakopo 2:21-23, NW) Na tauto le Atua ia te ia i se tautoga, e faavae ai se feagaiga lea ua avea ma autū o lo tatou mauaina o faamanuiaga e faavavau.—Eperu 6:13-18.

⁸ A o i ai Aperaamo i Uro, na fetalai atu Ieova ia te ia ina ia alu atu i se isi nuu, lea na avea o Kanana. I lena taimi na folafola atu ai e Ieova ia Aperaamo: “Ou te faia oe ma nuu tele, ou te faamanuia foi ia te oe, ou te matuā faamamaluina lou igoa; . . . e manuia foi ia te oe o aiga uma o le lalolagi.”a (Kenese 12:1-3) Mulimuli ane, na faaopoopo auaumalie atu e le Atua auiliiliga i le mea ua tatou tautala i ai ma le tonu o le feagaiga faa-Aperaamo: le fanau a Aperaamo, po o le suli, o le a ulu atu i le Nuu o le Folafolaga; o le a faatoateleina le fanau a lana fanau; o le a avea Aperaamo ma Sara o le puna o tupu.—Kenese 13:14-17; 15:4-6; 17:1-8, 16; Salamo 105:8-10.

9. E faapefea ona tatou iloa faapea e mafai ona aafia ai i tatou i le feagaiga faa-Aperaamo?

⁹ Na taʻua e le Atua lenei mea “o laʻu feagaiga i le va o aʻu ma oe [Aperaamo].” (Kenese 17:2, NW) Peitai e mautinoa lava le tatau ona ia i tatou se lagona faapea o o tatou ola o loo aafia ai, auā na mulimuli ane ona faamamafaina ai e le Atua le feagaiga, i lona fetalai mai: “O le mea lea ou te matua faamanuia ai ia te oe, ma ou matuā faatoateleina lava lau fanau e pei o fetu o le lagi, e pei o le oneone foi i le matafaga; e maua foi e lau fanau faitotoa o e ita ia i latou; o lau fanau foi e manuia ai atu nuu uma lava o le lalolagi.” (Kenese 22:17, 18) O i tatou o se vaega o na atunuu; o se faamanuiaga e mautinoa le oo mai ua teuina mo i tatou.

10. O ā malamalamaga ua tatou maua mai le feagaiga ma Aperaamo?

¹⁰ Seʻi tatou faatali laitiiti e manatunatu i le mea e mafai ona tatou aʻoaʻoina mai i le feagaiga faa-Aperaamo. I le pei o le feagaiga faa-Etena na muamua atu i lo o lea, ua faasino mai ai e lenei mea se “fanau” o loo sau, i lea ua taʻua ai faapea o le fanau o le a sau mai i se gafa faaletagata. (Kenese 3:15) O le a sau i le gafa o Semu, faasolo mai ai ia Aperaamo, ma faasolo mai ai i lona atalii o Isaako. O lenei gafa o le a aafia ai tulaga tautupu, ma i se auala o le a na aumaia faamanuiaga e lē mo na o se aiga e toatasi peitai o tagata o nuu uma. Na faapefea ona faataunuuina lena feagaiga?

11. Na faapefea ona oo mai le faataunuuga faaletino o le feagaiga faa-Aperaamo?

¹¹ O le fanau a Aperaamo e auala mai ia Iakopo, po o Isaraelu, na faatoateleina ina ia avea o se nuu tele. I le avea o se fanau faaletino e lē mafaitaulia a Aperaamo, na tuuina atu ai i latou i le tapuaiga mamā a le Atua o Aperaamo, Isaako, ma Iakopo. (Kenese 28:13; Esoto 3:6, 15; 6:3; Galuega 3:13) E masani lava ona liliuese tagata Isaraelu mai le tapuaiga mamā, peitai “ua alofa Ieova ia te i latou, ua alofa mutimuti vale mai foi ia te i latou, . . . ona o lana feagaiga ma Aperaamo, ma Isaako, ma Iakopo; e lei finagalo foi e faauma ia te i latou.” (2 Tupu 13:23; Esoto 2:24; Levitiko 26:42-45) E oo lava i le taimi ina ua uma ona talia e le Atua le faapotopotoga Kerisiano e avea o ona tagata, sa faaauau pea mo sina taimi ona ia faaalia le loto malie faapitoa i tagata Isaraelu i le avea o ni tagata o ē o le fanau faaletino a Aperaamo.—Tanielu 9:27.

Le Fanau Faaleagaga a Aperaamo

12, 13. Na faapefea ona faamaonia o Iesu o le vaega muamua o le fanau i le faataunuuga faaleagaga o le feagaiga faa-Aperaamo?

¹² Sa i ai se isi faataunuuga o le feagaiga faa-Aperaamo, o se faataunuuga faaleagaga. O lenei faataunuuga sili sa leʻi mafai ona iloa a o leʻi oo i le taimi o Iesu, a e ua mafai ona tatou fiafia ona ua manino mai nei i o tatou taimi. Ua tatou maua le faamatalaga o lona faataunuuga i le Afioga a le Atua. Ua tusia e Paulo: “Na fetalaia mai folafolaga ia Aperaamo, ma so lana fanau; e lei faapea mai, O le fanau, peiseai e toatele, a e toatasi, O so lau fanau, o Keriso lava lea.”—Kalatia 3:16.

¹³ Ioe, o le fanau o le a sau mai le na o le tasi le gafa, po o le aiga, lea ua moni ai e uiga ia Iesu, na fanau mai i se Iutaia aʻiaʻi, o se fanau faaletino a Aperaamo. (Mataio 1:1-16; Luka 3:23-34) E faaopoopo atu i ai, sa o ia o se vaega o le aiga o le Aperaamo Sili i le lagi. Ia manatua faapea ma le faatuatua matuā loloto na loto malie ai le tamā matua o Aperaamo e faataulagaina lona atalii o Isaako pe ana fai sa finagalo i ai le Atua. (Kenese 22:1-18; Eperu 11:17-19) Na faapena foi ona auina mai e Ieova lona Alo pele e toatasi i le lalolagi e avea o se taulaga togiola mo le fanau a tagata talitonu. (Roma 5:8; 8:32) Ma i lea, ua malamalama ai i le pogai na faailoa mai ai e Paulo Iesu Keriso e avea o le vaega autū o le fanau a Aperaamo e tusa ai o lenei feagaiga.

14. O le ā le vaega lona lua o le fanau a Aperaamo, ma o le ā le isi talanoaga atili ua taʻitaʻiina atu i ai lenei mea?

¹⁴ Na faaauau ona faailoa mai e Paulo faapea o le a ‘faatoateleina le fanau a Aperaamo’ e le Atua i se faataunuuga faaleagaga. Na ia tusi: “Afai foi e o Keriso outou, e moni, o le fanau outou a Aperaamo, o suli foi e tusa ma le mea na folafolaina.” (Kenese 22:17; Kalatia 3:29) O i latou na o le 144,000 o Kerisiano faauuina e le agaga o ē ua faia aʻe ai le vaega lona lua o le fanau a Aperaamo. Latou te lē tetee atu i le vaega autū o le fanau peitai “e o Keriso” i latou. (1 Korinito 1:2; 15:23) Ua tatou iloa o le toatele o i latou na e lē mafai ona toe sue i tua lo latou tupuaga ia Aperaamo, auā o i latou e mai nuu e lē ni Iutaia. E ui i lea, o le mea e sili ona tāua i le faataunuuga faaleagaga, e lē o i latou o se vaega faaletino o le aiga o le Aperaamo Sili, o Ieova; na i lo o lea, ua latou ōmai mai le aiga lē lelei atoatoa o Atamu agasala. O lea o le a manaomia ai ona tatou iloa mai feagaiga o mulimuli mai pe mafai faapefea ona taʻuagavaaina i latou e avea o se vaega o le ‘fanau a Aperaamo.’

Feagaiga o le Tulafono na Faaopoopo atu mo Sina Taimi Lē Tumau

15-17. (a) Ai se ā na faaopoopo atu ai le feagaiga o le Tulafono i le feagaiga faa-Aperaamo? (e) Na faapefea ona faataunuuina e le Tulafono nei sini autū?

¹⁵ Ina ua uma ona faia e le Atua le feagaiga faa-Aperaamo e avea o se laasaga autū agaʻi i le faataunuuina o lana fuafuaga, o le a faapefea ona puipuia le gafa o le Fanau mai le faaleagaina po o le soloia foi seia oo i le taimi mo ia e aliaʻi mai ai? Ina ua oo mai le Fanau, na faapefea ona iloa o ia e tagata tapuai moni? Ua tali e Paulo na fesili i lona faasino atu i le atamai o le Atua i le faaopoopo mai i se tulaga lē tumau le feagaiga o le Tulafono. Ua tusi le aposetolo:

¹⁶ “O lenei, se a le aoga o le tulafono? Na faaopoopo mai lea ona o solitulafono, ina seia maliu mai le fanau na folafola i ai, sa saunia e agelu na aumaia e le tautuu upu. . . . ua fai mo tatou taʻitaʻitama le tulafono, na te taʻitaʻiina i tatou ia Keriso, ina ia taʻuamiotonuina i tatou i le faatuatua.”—Kalatia 3:19, 24.

¹⁷ I le Mauga o Sinai, na faia e Ieova se feagaiga faalemalo tutasi i le va o ia ma Isaraelu—le feagaiga o le Tulafono, lea na fai ai Mose ma puluvaga.b (Kalatia 4:24, 25) Na ioe tagata ina ia i ai i lenei feagaiga, ma sa aogā ona o le toto o povi ma oti. (Esoto 24:3-8; Eperu 9:19, 20) O lenei mea na avatu ai ia Isaraelu tulafono faatiokarate ma se auivi mo se malo amiotonu. Na faasa ai i le tulafono ona faaipoipo atu i nuu faapaupau po o le auai foi i faiga lē mamā tau amio ma tapuaiga sese. I lea, na puipuia ai Isaraelu ma sa avea o se malosi e faasaoina ai le gafa o le fanau ia lē faaleagaina. (Esoto 20:4-6; 34:12-16) Peitai talu ai e lē mafai e se Isaraelu lē lelei atoatoa ona tausia atoa le Tulafono, na ia faaalia ai agasala. (Kalatia 3:19) Na faasino atu foi lenei mea i le manaomia o se faitaulaga lelei atoatoa e faavavau ma se taulaga e lē tau faia i tausaga uma. Sa avea le Tulafono e pei o se taʻitaʻitama e taʻitaʻiina atu ai se tamaitiiti i le faiaʻoga manaomia, o lē o le a avea o le Mesia, po o Keriso. (Eperu 7:26-28; 9:9, 16-22; 10:1-4, 11) Ina ua ia faataunuuina lana fuafuaga, ua iʻu ai le feagaiga o le Tulafono.—Kalatia 3:24, 25; Roma 7:6; tagai i “Fesili mai le Au Faitau,” Le Olomatamata faa-Peretania o Fepuari 1, 1989, itulau 31.

18. O le ā le isi fuafuaga atili na aafia i le feagaiga o le Tulafono, peitai ai se ā na faigata ai ona malamalama i lenei mea?

¹⁸ Ina ua faia lenei feagaiga lē tumau, na taʻua ai foi e le Atua lenei sini e faafiafiaina ai: “Afai tou te matuā faalogo mai i loʻu leo ma tausiusi i laʻu feagaiga, ona fai lea outou ma oloa tāua moʻu, . . . E fai foi outou ma malo o ositaulaga, ma nuu paia mo aʻu.” (Esoto 19:5, 6) Maeu se faamanuiaga! O se nuu o tupu ma ositaulaga. E ui i lea, e mafai faapefea ona faia lena mea? E pei ona faamaʻoti mai mulimuli ane e le Tulafono, o le ituaiga pule (o Iuta) ma le ituaiga o ositaulaga (o Levi) sa tuuina atu i ai tiute tauave eseese. (Kenese 49:10; Esoto 28:43; Numera 3:5-13) E leai se tagata e mafai ona avea o se pule ma se ositaulaga i le taimi e tasi. Peitai, ua aumaia i fetalaiga a le Atua i le Esoto 19:5, 6 mafuaaga e talitonu ai faapea i ni uiga e lē o taʻua ai, o i latou i le feagaiga o le Tulafono o le a maua le avanoa e saunia ai e avea o sui o le “malo o ositaulaga, ma nuu paia.”

Feagaiga o le Malo Faa-Tavita

19. Na faapefea ona faasino atu i le tulaga tautupu i nei feagaiga?

¹⁹ I le gasologa o taimi na faaopoopo ai e Ieova se isi feagaiga lea ua na faamanino atili le auala o le a ia faataunuu ai lana fuafuaga mo lo tatou faamanuiaga e faavavau. Ua uma ona tatou iloa ua faasino atu le feagaiga faa-Aperaamo agaʻi i luma i le tulaga tautupu i totonu o le fanau faaletino a Aperaamo. (Kenese 17:6) Na muai faailoa mai foi e le feagaiga o le Tulafono tupu i totonu o tagata o le Atua, auā na taʻu atu e Mose ia Isaraelu: “Pe a e oo atu foi i le [Nuu Folafolaina] ma e faapea ane, Ou te faia se tupu moʻu, e pei o nuu uma lava e vagavagai mai ia te au; ia e matuā tofia mo oe se tupu e filifilia e Ieova lou Atua. . . . e le mafai ona e tofia mo oe se tagata ese.” (Teuteronome 17:14, 15) O le a faapefea ona fuafuaina e le Atua mo lenei tulaga tautupu, ma o le a faapefea ona ia faatinoina ai le feagaiga faa-Aperaamo?

20. Na faapefea ona oo mai Tavita ma lona gafa i lenei vaaiga?

²⁰ E ui lava o le uluai tupu o Isaraelu o Saulo o le ituaiga o Peniamina, a e na soloai ane i ai Tavita lototele ma le faamaoni o le ituaiga o Iuta. (1 Samuelu 8:5; 9:1, 2; 10:1; 16:1, 13) I totonu o le pulega a Tavita, na filifili ai Ieova e faia se feagaiga ma Tavita. Muamua lava na Ia fetalai atu: “Ona ou faatuina ai lea o so lau fanau pe a mavae atu oe, e tupu mai ai ia te oe, ou te faatumauina foi lona malo. O ia lava na te faia se fale mo loʻu igoa; ou te faatumauina foi le nofoālii o lona malo e faavavau.” (2 Samuelu 7:12, 13) E pei ona faaalia ai i inā, o Solomona le atalii o Tavita na avea ma tupu na sosoo mai ai, ma sa faaaogāina o ia e fausia se fale, po o le malumalu, mo le Atua i Ierusalema. Peitai, sa i ai pea nisi mea e tele.

21. Mo le ā na faia ai e le feagaiga o le Malo faa-Tavita se sauniuniga?

²¹ Sa faia ai loa e Ieova lenei feagaiga ma Tavita: “Ou te faatumauina lou aiga ma lou malo e faavavau i ou luma; e mausali lou nofoālii e faavavau.” (2 Samuelu 7:16) Ma le manino lava, na faatuina ai e le Atua i lea se faasologa tautupu mo Isaraelu i le aiga o Tavita. Sa lē na o se faasologa lē mamotusia o tupu faa-Tavita. Mulimuli ane, o se tasi mai le gafa o Tavita o le a oo mai ina ia pule “e faavavau, . . . lona nofoālii [o le a pei] o le la lea i . . . luma [o le Atua].”—Salamo 89:20, 29, 34-36; Isaia 55:3, 4.

22. Na faapefea ona fesootai atu le feagaiga ma Tavita i le gafa o le Fanau, ma o le ā le iʻuga?

²² O lea, ua iloatino ai faapea o le feagaiga faa-Tavita, na faaitiitia atili ai le gafa o le Fanau. E oo lava i tagata Iutaia o le uluai senituri na latou iloa faapea o le Mesia o so le fanau a Tavita. (Ioane 7:41, 42) O Iesu Keriso, o le vaega muamua o le fanau o le feagaiga faa-Aperaamo, ua agavaa e avea o le Suli tumau o lenei Malo faa-Tavita, e pei ona faamautinoa atu ai e se agelu. (Luka 1:31-33) I lea, na maua ai e Iesu le aiā e pule ai i le Nuu Folafolaina, le oganuu faalelalolagi lea na pule ai Tavita. O lenei mea ua tatau ona faateleina ai lo tatou mautinoa e faatatau ia Iesu; ua pule o ia, e lē i se tulaga faamalosi, peitai e auala i se fuafuaga faaletulafono ua faavaeina, o se feagaiga tauatua.

23. O ā fesili ma mataupu o tumau pea ona fia faaleleia?

²³ O lea ua tatou talanoaina nei na o le fa ni feagaiga tauatua e faatatau i le pe faapefea ona faatulaga e le Atua e faataunuu lana fuafuaga ina ia aumaia ai faamanuiaga e faavavau i le fanau a tagata. Ua faapena foi ona e iloa faapea e leʻi uma le ata. O loo i ai pea fesili: Talu ai ona o loo faaauau pea le lē lelei atoatoa o le fanau a tagata, o ai le ositaulaga po o le ā le taulaga e mafai ona suia e faavavau lena mea? O le a faapefea ona taʻuagavaaina tagata e avea o se vaega o le fanau a Aperaamo? Pe e i ai se mafuaaga e talitonu ai faapea o le aiā e pule ai o le a faalauteleina atu ina ia aofia ai e sili atu na i lo na o le oganuu faalelalolagi? E mafai faapefea e le fanau a Aperaamo, le vaega muamua ma le vaega lona lua, ona aumaia faamanuiaga i “atu nuu uma lava o le lalolagi” e aofia ai i tatou taitoatasi? Seʻi tatou vaai.

[Faaopoopoga i lalo]

O le ā Lau Tali?

◻ Na faapefea ona faataatia e le feagaiga faa-Aperaamo le faavae mo lo tatou mauaina o faamanuiaga e faavavau?

◻ O le ā le fanau moni faaletino a Aperaamo? Le fanau faafaatusa?

◻ Ai se ā na faaopoopo atu ai le feagaiga o le Tulafono i le feagaiga faa-Aperaamo?

◻ Na faapefea ona faaauilumaina e le feagaiga o le Malo faa-Tavita le fuafuaga a le Atua?

[Siata i le itulau 10]

(Tagaʻi i le lomiga mo le ata atoa)

Le feagaiga faa-Etena Kenese 3:15

Le feagaiga faa-Aperaamo

Le fanau muamua

Le fanau lona lua

[Siata i le itulau 11]

(Tagaʻi i le lomiga mo le ata atoa)

Faamanuiaga e faavavau

Le feagaiga faa-Etena Kenese 3:15

Le feagaiga faa-Aperaamo

Le feagaiga o le Tulafono

Le feagaiga o le Malo faa-Tavita

Le fanau muamua

Le fanau lona lua

Faamanuiaga e faavavau

[Ata i le itulau 7]

Ina ia galueaiina lana fuafuaga ona o le fanau a tagata, na faia ai e le Atua le feagaiga ma Aperaamo faamaoni