Ia E “Tinoū” i Lau Faiva

¹ Pe a tatou faitau atu faapea sa galue le aposetolo o Paulo i le faia o faleʻie a o iai i Korinito, e tatou te ono manatu ai faapea, atonu sa faatapulaa ai i lenei mea lona avanoa e talaʻi ai. Ae peitaʻi, ua faamatalaina i le Galuega 18:5, e faapea: “Ona tinoū lea o le loto o Paulo, ua taʻutino atu i tagata Iutaia o Iesu o le Keriso lea.” Aiseā na matuā tinoū ai Paulo i le galuega talaʻi? E ui lava e toʻatele tagata Korinito na talitonu, ae na faamautinoa atu e le Alii e faapea, e toʻatele foʻi isi i lena aai e mafai ona fai ma soo. (Galu. 18:8-11) Pe e iai ea se māfuaaga faapena e ao ai ona tatou tinoū i la tatou faiva? Ioe. E toʻatele isi tagata e mafai ona mauaina ma aʻoaʻoina i le upu moni.

² Faaalu ni Taimi e Sili Atu i le Auaunaga ia Aperila: E lē taumatea ua avea ma ou sini le auai pea i le talaʻiina o le tala lelei i masina taʻitasi. Ae e iai isi masina o le a sili atu ai ona tele avanoa e tatou te “tinoū” ai i lenei galuega. E aofia ai la le masina o Aperila, a o tatou pisi i le vaitaimi o le Faamanatuga. Pe e mafai e tusa ai ma ou tulaga ona e paeonia lagolago, pe faateleina au taumafaiga i le faiva i lenei vaitaimi? O le toʻatele o tagata talaʻi o loo faia faapea, ua matuā tele faamanuiaga ua latou maua. (2 Kori. 9:6) Afai o loo e faia mea uma lava e te mafaia, ia manatua o loo fiafia Ieova i lau auaunaga ua faia ma le lotoatoa. (Luka 21:2-4) Po o ā lava ou tulaga, ia fai ma ou sini le “tinoū” i lau faiva ia Aperila. Aua neʻi galo ona tuuina atu lau lipoti o le auaunaga i le fanua i le faaiʻuga o le masina ina ia faaaofia ai lau galuega faatasi ma galuega a isi tagata uma o Ieova.

³ Asiasi i Ē Fou na Auai i le Faamanatuga: I le oganuu a le lālā i Samoa i le tausaga ua mavae, o i latou na auai i le Faamanatuga e 2,292. E lē o iloa pe toʻafia o le a auai i lenei tausaga. Peitaʻi, ua faaalia mai i lipoti e faapea, e matuā maoaʻe lava se “seleselega” o loo faatalitalia i le lumanaʻi. (Mata. 9:37, 38) O lea la, ia faia vave loa ni fuafuaga ina ia asia tagata lotofiafia o ē na auai i le Faamanatuga ina ia avatu se fesoasoani faaleagaga ia i latou. O le tolopōina soo o na asiasiga, e ono maua ai le avanoa e ‘le o leaga e faoesea ai le upu o le malo sa lūlūina i o latou loto.’ (Mata. 13:19) O le vave ona asiasi atu o le a faaalia ai o loo e “tinoū” moni i lau faiva.

⁴ Faaauau Ona Fesoasoani i Ē ua Lē o Toe Talaʻi: Ia Fepuari, na amata ai se tauiviga faapitoa e fesoasoani atu ai i tagata ua lē o toe talaʻi. Afai e iai nisi e leʻi oo atu i ai se asiasiga faaleoleo mamoe, e tatau i toeaina ona faia se fuafuaga ina ia asiasi atu ia i latou a o leʻi faaiʻuina Aperila. O le a taumafai ia toeaina ina ia iloaina le pogai autū o le faafitauli o le tagata, ma le auala e sili ona lelei e fesoasoani ai ia te ia ina ia toe auauna maelega ai ia Ieova. O lenei fesoasoani alofa e faaalia ai o loo manatu mamafa toeaina i la latou tiute tauave i le avea ma leoleo o le “lafu mamoe a le Atua.” (1 Pete. 5:2; Galu. 20:28) I le lomiga o Le Olomatamata o Setema 15, 1993, itulau e 22-23, o loo aumaia ai ni fautuaga e sili ona lelei e mafai ona faaaogā e toeaina pe a feagai ai ma se tasi o faafitauli iloga e lima atonu o loo aafia ai ē ua lē o toe talaʻi. O se mea lelei le fesoasoani atu i nisi o i latou na ina ia toe auai i le faiva i le fanua ia Aperila.

⁵ Fesoasoani i Isi ia Avea ma Tagata Talaʻi e Leʻi Papatisoina: Po ua taʻuagavaaina lau fanau e avea o ni tagata talaʻi fou o le tala lelei? Ae faapefea isi o ē o loo tou suʻesuʻeina le Tusi Paia? Afai ua faamaonia i latou na e toeaina, po o le a lē avea ea la Aperila ma taimi talafeagai mo i latou e amata ai ona talaʻi? Afai ua agaʻigaʻi i luma se tagata ma ua uma ona suʻesuʻeina le polosiua o le Manaomia ma le tusi o Le Poto, e mafai ona faaauau le suʻesuʻega faale-Tusi Paia i se isi tusi—a lē o le tusi o Le Manuia Moni, ia po o le tusi Autasia i le Tapuaiga. O lou sini, o le fesoasoani lea i le tagata suʻesuʻe ina ia maua le malamalama e sili atu i le upu moni, ia agavaa e avea ma tagata talaʻi e leʻi papatisoina, ma oo ai ina avea ma Molimau tuuina atu ma papatisoina a Ieova.—Efe. 3:17-19; 1 Timo. 1:12; 1 Pete. 3:21.

⁶ O lou maumauaʻi ma le naunau moni i au tagata suʻesuʻe o le Tusi Paia, e mafai ona fesoasoani ia i latou i se taimi mulimuli ane e faia le upu moni ma a latou lava meatotino. Na feiloaʻi se Molimau ma se ulugalii matutua o ē na faaalia le lotofiafia e faia se suʻesuʻega faale-Tusi Paia. Ae sa sosoo lava le tolu vaiaso o tolopō e le ulugalii le suʻesuʻega. Mulimuli ane na amata le suʻesuʻega. Ona toe taofia foʻi lea e le ulugalii le suʻesuʻega mo le toetoe lava taʻilua vaiaso. Ae e ui i lea, na iʻu ina agaʻigaʻi i luma le fafine ma oo ina papatisoina. “Ina ua uma ona papatisoina o ia,” ua faapea mai le uso, “sa faatumulia ona mata i loimata o le fiafia, lea na taufai maligi ai foʻi ma o ma loimata o le fiafia ma laʻu avā.” Ioe, o le “tinoū” i le tala lelei e aumaia ai le olioli tele!

⁷ O valoaga o le Tusi Paia ma mea tutupu i le lalolagi ua faaalia ai ua tatou ola i le siʻui o taimi o le iʻuga. O le taimi lenei ua manaʻomia ai e tagata uma o le Atua ona “tinoū” i le faalauiloaina atu o le tala lelei i isi. Ua faamautinoa mai e le aposetolo o Paulo e faapea, o le mea moni lava “e le se mea faaleaoga lo outou tautiga i le Alii.”—1 Kori. 15:58.