Po o Lelei Lau Taumafa Faaleagaga?

¹ Ua faapea mai se muagagana, ‘e aafia i tatou i mea tatou te aai ai.’ E moni, e aafia ai lo tatou malosi faaletino ma le soifua mālōlōina i mea e masani ona tatou aai ai. Talu ai o Iesu na fetalai e faapea: “E le na o mea e ʻai e ola ai le tagata, a o afioga uma e tulei mai i le fofoga o le Atua,” o a tatou meaʻai faaleagaga, e faapena ona aafia ai i tatou a lē o le lelei o le leaga. (Mata. 4:4) O lea la, po o lelei lau taumafa faaleagaga? Po o oe o se tasi e ʻai filifili? Pe e faatopetope ona e taumafa? Po o le mea o e faaalu le taimi e olioli ai e lē aunoa e taumafa i meaʻai paleni faaleagaga?

² Iloilo Lau Mea Taumafa: Ua saunia e Ieova “mea e ʻai i ona itu aso” ma “le faigaai o mea lelei,” e ala mai i “le auauna faamaoni ma le mafaufau.” (Mata. 24:45; Isa. 25:6) Ina ia maua atoatoa aogā mai nei sauniuniga alofa, e tatau ona tatou faia ni taumafaiga ina ia taumamafa lelei ai faaleagaga.

³ E te ono fesili ifo iā te oe lava: ‘Po o oʻu faitauina le mau o le aso ma faaopoopoga i aso taʻitasi? Po o oʻu faitau i aso taʻitasi le Tusi Paia ma mafaufau loloto i ai? Pe ou te sauniuni mo sauniga a le faapotopotoga e ala i le muaʻi suʻesuʻeina o mataupu? Po o oʻu faitauina lomiga fou uma e aofia ai ma le tusi, Faaaliga—Ua Latalata Lona Tumutumuga Matagofie!?’

⁴ Na folafola mai e Iesu e faapea: “Amuia i latou e manatu mamafa i o latou manaʻoga faaleagaga.” (NW) “Amuia ē fia aai ma fia inu i le amiotonu; auā e maoona i latou.” (Mata. 5:3, 6) O lea, ia taumafa lelei i meaʻai faaleagaga e ala i le faatumuina o lou mafaufau ma le loto i le poto e uiga i le Atua.