Ia Faalagolago iā Ieova mo le Malosi
1 E tele lava māfuaaga e manaʻomia ai ona tatou faalagolago iā Ieova. O le talaʻia o le tala lelei “i le atu laulau uma” o se tofiga e lē faigofie. (Mata. 24:14) I aso uma lava, e tatou te tau ai pea ma o tatou tino lē lelei atoatoa. (Roma 7:21-23) E lē gata i lea, ‘e tatou te tau ma alii malolosi o lenei lalolagi.’ (Efe. 6:11, 12) E manino lava la lo tatou manaʻomia o le fesoasoani. Pe mafai faapefea ona tatou maua le malosi mai iā Ieova?
2 E Ala i le Tatalo: E foaʻiina fua mai e Ieova lona agaga paia e sili ona malosi i ana auauna o ē e talosaga i ai. (Luka 11:13) Pe e lē o lava lou mautinoa e uiga i lou tomai e molimau atu ai mai lea fale i lea fale, i le alatele, po o le telefoni? Pe e te matamuli e molimau atu lē fuafuaina? Po o faavaivaia e le lē ano mai o tagata i le oganuu lou maelega? Ae faapefea pe afai e omia oe ina ia faagutugutulua i lou faatuatua po o le faamaoni? Ia faalagolago iā Ieova. Tatalo mo le malosi.—Fili. 4:13.
3 E Ala i Suʻesuʻega Totino: E pei lava ona tatou maua le malosi mai le taumafaina o meaʻai faaletino, e tatou te maua foʻi la le malosi faaleagaga e ala i le taumamafa e lē aunoa i le Afioga a le Atua, faapea ma lomiga ua saunia e le “auauna faamaoni ma le mafaufau.” (Mata. 4:4; 24:45) Ina ua fesiligia po o le ā na avatua iā te ia le malosi e tumau ai i tausaga e tele na faafalepuipuiina ai o ia i se potu na o ia i Saina e aunoa ma se Tusi Paia, na faapea mai Stanley Jones: “E mafai ona tatou tutumau i le faatuatua. O le mea moni, e tatau ona tatou suʻesuʻe muamua. E lē mafai ona maua so tatou malosi i totonu pe afai e tatou te lē suʻesuʻe.”
4 E Ala i le Auai i Sauniga: I se sauniga faa-Kerisiano i le uluaʻi senituri, sa “faamafanafana atu, ma faamalosi atu i le au uso i upu e tele” ia Iuta ma Sila. (Galu. 15:32) E faapena foʻi i aso nei, o mea o loo tatou faalogo ai i sauniga ua faalolotoina ai lo tatou lotofaafetai iā Ieova, ati aʻe ai lo tatou faatuatua, ma uunaʻia ai i tatou e faia se sao i le faiva. O sauniga e tatou te feiloaʻi ai e lē aunoa ma ē o loo tatou “galulue faatasi . . . i le malo o le Atua,” o ē ua fai ma “faamatalaloto” iā i tatou.—Kolo. 4:11.
5 E tatou te manaʻomia le fesoasoani i nei “aso faigata.” (2 Timo. 3:1) E faatatau iā i latou o loo maua le malosi mai iā Ieova, ua faamautinoaina i tatou e faapea: “Latou te sii ae apaau e pei o aeto; latou te femoei, a e le vaivai; latou te savavali, a e le tigaina.”—Isa. 40:31.