Ofoina o le Tusi “Ia Oo mai Lou Malo”

¹ E faitau miliona tagata e tatalo i upu o loo i le Tatalo a le Alii, “Ia oo mai lou malo.” (Mata. 6:9, 10) E ui i lea, e toatele e talitonu o lea ua amata pule mai le Malo i inei i le lalolagi auā o lea ua talia e tagata le “Tala Lelei.” Ua lagona e isi, o le Malo e faalelagi ma e na o le pau le taimi e maua ai, pe a oti se tagata. O le tusi “Ia Oo mai Lou Malo” e mo tagata uma o loo i ai manatu faapena. O lenei lomiga o loo aumaia ai ni faamatalaga o suesuega maeʻaeʻa e uiga i mea o loo aafia ai i le oo mai o le Malo o le Atua. Ia Iuni, o le a tatou ofoina ai lenei tusi matagofie.

² Atonu e te filifili e faia se taulimaga puupuu e pei o lenei:

◼ Suʻe i le itulau e 4, ma faapea atu: “E toatele tagata e mananao e ola i ni tulaga faapenei. Pe e te iloa o le mea tonu lava lena o loo tatou tatalo i ai pe a tatou tatalo “Ia oo mai lou malo”? O le ā sou manatu i se mea o le a faia e le malo mo tagata? [Faatali mo se tali.] Seʻi mātau le mea o loo fai mai ai le Isaia 25:6-8.” Pe a uma ona faitau, ona faamatala puupuu lea o le auala ua ia fuafua e faaliliuina i ai le lalolagi atoa e avea ma parataiso.

³ Afai e te manao e tuusaʻo i le manatu autū, e mafai ona e faapea atu:

◼ “Pe sa e tau mānatu po o le ā moni lava le malo o le Atua?” Faasino i le matua o le tusi, suʻe i le itulau e 11, faamatala le pusa i le pito i lalo o le itulau, ma fai i ai, ua saunia e le tusi ni tali faamalie loto mai le Tusi Paia.

⁴ Ia pe e te faapea atu foi:

◼ “E talitonu nisi tagata o le malo o le Atua ua na o se mea i loto o Kerisiano. E masani ona latou faasino i le Luka 17:21. [Faitau.] Po o le uiga moni lena o lenei fetalaiga a Iesu?” Suʻe i le palakalafa 7 i le itulau e 8, ma faamatala pe aisea ua le avea ai le malo e na o se mea i loto o Kerisiano.

⁵ O lenei tusi, e mafai ona avea o se faamanuiaga i tagata faamaoni o e ua faaseseina e i latou o loo aʻoaʻoina tala pepelo faalotu. O faamatalaga saʻo i le tusi “Ia Oo mai Lou Malo” e fesoasoani i tagata faapena ia tuputupu aʻe i le talisapaia mo Lē na Foafoaina i tatou, o lē o loo tausia ma le alofa i tatou, ma mulimuli ane, o le a latou aufaatasi ma i tatou i le talaʻia o le tala lelei o le malo o le Atua.—Mata. 24:14

Fesoasoani ia i Latou ua Leai se Faatuatua

¹ I aso nei, e toaitiiti lava ni nai tagata o loo vaavaai moni atu i luma i le faaliliuina e le malo o le Atua o lenei lalolagi e avea ma parataiso. Ua sili ona viiviia filosofia ma manatu eseese a tagata, a e ua faaleamanaia mea tāua faaleagaga. O tagata loto faamaoni o e naunau i upu moni faigofie, o le a talia le avanoa e iloiloina ai le tusi “Ia Oo mai Lou Malo.” O lenei tusi, e mafai ona fesoasoani ia i latou o e ua leai se faatuatua. (Roma 1:19, 20) Ia mautinoa ua toe asia i latou o e na faaalia le naunau.

² E mafai ona amata lau talanoaga i le auala lenei:

◼ “I le taimi mulimuli na ou asiasi mai ai, na ta talanoa ai e faatatau i le uiga o le malo o le Atua. O se pulega amiotonu o le a le pine ona ia aveesea lea o faafitauli o loo fesagai ma tagata i lenei vaitaimi. O le ā sou lagona e uiga i lena mea? [Faatali mo se tali.] Ou te fia faailoa atu foi ia te oe se isi mau mai le Tusi Paia e faatatau i le mea o le a faia e le malo o le Atua mo tagata. O loo maua lea i le Faaaliga 21:1-4.” Pe a uma ona faitau le mau, ona suʻe lea i le itulau e 178 o le tusi ma talanoa i le palakalafa e 11 ma lē ona le fale.

³ Pe e mafai foi ona e fai atu faapenei pe a toe foi atu:

◼ “E i ai nisi tagata e lē talitonu i le Atua. I tausaga ua mavae, sa seāseā ona i ai o se mea faapea. E te manatu, aisea ua le faatuatua ai nisi tagata i le Atua? [Faatali mo se tali.] E toatele ua tuuaia le leai o so latou faatuatua i le tulaga matautia ua faateleina ai faiga sauā ma puapuaga i lo tatou lalolagi. Ua latou faapea mai, afai e i ai se Atua e ona le malosi uma lava, aisea ua ia le taofia ai nei puapuaga uma? O i latou e le o maua se tali faamalie loto i lenei fesili, e masani ona avea ma ē e lē talitonu i le Atua. A e e matuā tele faamaoniga o loo i ai e faamaonia ai o loo soifua le Atua ma ua le pine ona ia faia lea o le lalolagi ma nofoaga o le fiafia ma le filemu.” Faaauau le talanoaga i le faaaogaina o manatu mai le Tusi Paia o loo maua i le pusa i le itulau e 44 i le pogai ua faatagaina ai e le Atua le amioleaga mo sea taimi umi.

⁴ A o uu lau Tusi Paia, e mafai ona e amata le talanoaga i lou faapea atu:

◼ “Ua matou toe asiasi mai foi e fia faasino atu le mafuaaga e aogā ai ona faia se suesuega o le Tusi Paia i o tatou taimi. O le toatele o tagata e i ai a latou Tusi Paia, a e toaitiiti e faaavanoa se taimi e faitau ai. E taʻu saʻo mai lava e nisi ia i tatou e faapea, latou te le o toe faatuatuaina le Tusi Paia. O le ā sou lagona e uiga i lena mea? [Faatali mo se tali.] O se tasi o mea e faamautinoa mai ai ia i tatou o le Tusi Paia o le Afioga faagaeeina a le Atua, o le faataunuuga lea o ona valoaga.” Faasino i mau o le Tusi Paia lea o loo i le pusa i le itulau e 67.

⁵ E mafai ona avea i tatou ma faamanuiaga i isi e ala i le faaaogaina o lenei tusi e fesoasoani ia i latou ia mauaina se faavae mautū e faatuatua ai i le malo o le Atua ma mea o le a na faataunuuina mo tagata.