Faasilasilaga

◼ Lomiga e ofo mo Novema: Le Poto e Taʻitaʻia ai i le Ola e Faavavau. O le a faia se taumafaiga faapitoa e toe asia tagata uma na tuu ai tusi, ma le fuafuaga e amataina ai ni suesuega faale-Tusi Paia i aiga. Tesema: Le Tagata Silisili o Ē Uma na Soifua Mai. Ianuari: So o se tusi e 192 itulau na lomia a o lei oo i le 1984 atonu o iai i le faapotopotoga. O faapotopotoga e lē o iai tusi na, e mafai ona ofo le tusi Lou Talavou—Mauaina mai ai Aogā Silisili.

◼ E mafai e faapotopotoga o loo iai pea ia sapalai o Le Tala o le Malo Nu. 34 ona faalaeiau tagata talaʻi ina ia ofo nei sāvali, e pei lava ona ofoina ai isi sāvali, pe mai lea fale i lea fale po o se isi lava nofoaga. Pe afai e faatagaina i lau oganuu, e mafai e le ʻau talaʻi ona tuu se sāvali i fale taitasi e lē o maua atu i ai ni tagata, i le faamautinoaina ua tuu i se mea e lē iloa atu ai e se tasi e ui ane. E tatau ona faia se taumafaiga e tufatufaina atu kopi o loo totoe o lenei feau tāua.

◼ Ua tatau i faapotopotoga ona amata talosagaina le 1997 Yearbook of Jehovah’s Witnesses faatasi ma la latou ota o lomiga ia Novema. O le a mafai ona maua le Yearbook i gagana nei: Arapi, Eleni, Iapani, Initonesia, Italia, Falani, Finilani, Peretania, Polani, Potukali, Saina, Sepania, Serbia, Siamani, Suetena, Hagakeri, Holani, Korea, Rusia, Croatia, ma Czech. Seiloga lava ua maua le Yearbook ma faia felauaiga, o le a aliai mai i le lisi o lomiga a le faapotopotoga e faapea o loo “Faatali.” O Yearbooks o ni tusi e talosagaina faapitoa.

Lipoti o le Auaunaga mo Aokuso

Pae. Pae. Pae. Au Itula Mekasini Toe Suesuega Aofai

Atunuu Faa. Sau. Lago. Talaʻi Asiga Tusi Paia

Amerika Samoa 1 13 7 174 11.7 11.1 3.8 .7 195

Samoa i Sisifo 1 33 18 328 12.4 14.0 3.7 .6 380

Toelau - - - 6 5.0 9.3 1.8 .2 6

Toga 3 10 1 62 12.3 18.4 5.1 .8 76

AOFAI 5 56 26 570 657

Ia Tufa Atu i Isi e Tusa ma o Latou Manaoga

¹ Ua faia e Ieova sauniuniga e ala i le “auauna” faamaoni mo le faamalieina o o tatou manaoga faaleagaga. (Mata. 24:45-47) O le tele o nei sauniuniga ua saunia e ala i tusi, Tusi Paia, tuufaatasiga o tusi, vitiō, kaseti ua uma ona puʻe, ma computer disks mo le faia o sailiiliga i le Tusi Paia. E lava pea mea ua saunia mai e Ieova e aunoa ma le faamaimauina. O loo ia faatalitalia i tatou e fetufaai le tasi ma le isi, ma faamautinoa o loo tutusa aogā e maua e tagata uma.

² O na sauniuniga uma ua saunia e ala i le faaaluina ai o le anoanoai o tupe. O nei tupe faaalu o loo totogia e le auuso i le lalolagi aoao. Ua matuā moni lenei mea talu ona faia e le Sosaiete le fuafuaga e tufa lomiga e aunoa ma se totogi, i le faalagolago atoatoa lea i meaalofa tauofo e totogi ai ia tupe faaalu. E lē gata i lea, o le tele o lālā e latou te maua nei sauniuniga mai le Sosaiete i se tau maualalo ina ia mafai ai e uso ona maua mea o loo latou manaomia mo sauniga ma le galuega i le fanua, e ui lava ina laitiiti a latou alamanuia.

³ Le Auala e Mafai ai Ona Tatou Fesoasoani: E mafai ona tatou tali atu i le apoapoaiga a Paulo ina ia tufatufa atu a outou mea ‘e tusa ma lo latou mativa.’ (Roma 12:13) Pe a tatou faia foai tauofo tautupe i le galuega i le lalolagi aoao, ua tatou fetufaai tuusaʻo ai alamanuia ua ia i tatou ma o tatou uso i le lalolagi aoao. I le manatuaina o lenei tulaga, ua filifili ai nisi e faataatia ese se tupe e fai meaalofa atu ai i masina taitasi i le galuega i le lalolagi aoao, e pei lava ona latou foai atu mo tupe faaalu mo le Maota o le Malo. Ua latou iloa o nei tupe o loo faaaogaina e lē gata mo le saunia o lomiga, ae faapea foi vala uma o le galuega. Manatu i le tele o le aogā o le a tofo i ai la tatou auuso i le lalolagi aoao pe afai e faia pea e lē aunoa e le toatele se sao i lenei auala.

⁴ E lē gata i lea, e mafai ona tatou fetufaai ma i latou i lo tatou faaeteete pe a talosagaina mea e mafai ona mauagofie. O le talosagaina tau o mea tatou te manaomia moni, o le a mafai ai e o tatou uso i isi nofoaga ona maua sauniuniga faaleagaga ia latou te manaomia foi ina ia malolosi ai pea ma faaauiluma ai le talaʻiga o le tala lelei i lo latou itu o le lalolagi.—Epe. 13:16.

⁵ E tatau ona tatou matuā mātauina lenei mea pe a tatou talosagaina mea e taugata tele i le Sosaiete. E aofia ai i nei mea ia ata vitiō, CD-ROMs, tusi faasino lapopoa, tuufaatasiga o tusi, ma tusiga o lipine faalogologo. Nai lo o le talosagaina ia tofu tagata taitoatasi o le aiga ma se mea e tasi, pe e lē mafai ona talosagaina tau o se mea e tasi mo le aiga atoa? Pe afai e faatapulaaina mea e tatou te aveina mo i tatou lava, o le a tuu atu ai i isi le avanoa e maua ai foi e i latou ia mea lelei ia o loo tatou olioli ai.—Fili. 2:4.

⁶ O le tau o lomiga ua tatou tuuina atu i le talaʻiga i le fanua, atonu o le a faapaleniina sona vaega e ala i meaalofa tauofo tatou te faia i le galuega a le Sosaiete i le lalolagi aoao i le Maota o le Malo, faapea ma meaalofa tauofo a ē loto fiafia latou te taliaina lea fuafuaga. Ae peitai, a oo mai i lomiga ia e tatou te talosagaina mo i tatou lava, e aofia ai ia tusi pese, Yearbooks, Tusi Paia faavaa vaivai, ma isi lava mea faapena, e lē mafai ona tatou faatalitalia tagata i tua e totogiina nei mea mo i tatou. O auauna tuuina atu lava a Ieova, o le puna autū lea o le lagolagosua tau tupe. O le manatuaina o lena mea, e fuafua ai e le toatele o tagata talaʻi le tau e ono maua ai nei mea pe a na saunia e ni kamupani faioloa, ma i lea, latou te faia ai se meaalofa tauofo talafeagai. Mo se faaaoaoga, o se Tusi Paia faavaa vaivai e sausau auro autafa, e mafai ona oo atu lona tau i le $20 (tālā Amerika) pe sili atu, o se tusi faasino tusi e mafai ona maua i le $40 agaʻi i luga, o se kalena felanulanuai e tautau i luga o le puipui o le fale, e mafai ona faatau mo le $5 pe a itiiti mai, ma o se lomifefiloi i CD-ROM, o le tau e mai le $50 e oo i le $100 pe sili atu foi, o musika o loo i discs lapotopoto, e masani ona faatauina atu e latalata i le $20 ma o nisi o vitiō e masani ona faatau atu i se tau e sili atu ona taugata. O le lē taulau ona faia o ni meaalofa talafeagai e faafetaui ai le tau o nei mea, o le a iu ina faatapulaa ai i lea itu mea o taumafai le faalapotopotoga e faataunuu mo le faaauilumaina o le galuega i le lalolagi aoao.

⁷ Na fetalai Iesu e faapea, o le a iloatino lava ona soo moni i lo latou alofa o le tasi i le isi. (Ioa. 13:34, 35) O lo tatou matamau i le foai atu o mea faaletino ma lo tatou lē manatu faapito i le tufa atu o mea i isi e tusa ma o latou manaoga, e mautinoa o ni auala lelei na e faamaonia ai o i tatou o Kerisiano moni.