E Faafeiloaʻi Atu i Lou Auai Mai i le Aʻoga o le Faiva Faatiokarate

I LE lalolagi aoao, i le sili atu i le 200 atunuu, e faitau miliona tagata aʻoga o loo mauaina aogā i vaiaso taʻitasi mai le Aʻoga o le Faiva Faatiokarate. O nisi e fou mai. O isi ua tele tausaga o auai i le aʻoga. E sili atu i le faitau sefulu afe nofoaga o loo faatinoina ai le aʻoga. Po o fea lava o le lalolagi o loo e soifua ai, e mafai lava ona e maua le polokalame tau aʻoaʻoga lea e tasi. O tagata e eseese o latou matutua, o ituaiga tagata eseese, ma i latou e eseese tulaga tau aʻoaʻoga, o loo latou mauaina lenei aʻoaʻoga faatiokarate, e aunoa ma se totogi.

Ina ua amata le aʻoga i faapotopotoga a Molimau a Ieova i le 1943, sa faamatalaina lona fuafuaga i upu nei: “Ina ia sauniunia ai ‘tane faamaoni’ uma, i latou ua faalogo i le Afioga a le Atua ma ua faamaonia lo latou faatuatua i ai, ina ia ‘mafai ona aʻoaʻoina isi’ . . . ina ia mafai ai ona faapogaia isi uma taʻitasi . . . ia sili ona agavaa e taʻu atu i le lautele le faamoemoe ua iā te ia.” (Course in Theocratic Ministry, itu. 4) O loo tumau pea le fuafuaga o le aʻoga e oo mai i aso nei.

Pe a manatu i ai, o le ā le mea e sili ona lelei e mafai e so o se tasi o i tatou ona fai i la tatou meaalofa mai le Atua o le tautala? Ua tali mai le Tusi Paia e faapea: “Ia vivii atu ia Ioa o mea uma lava e mānava.” (Sala. 150:6) Pe a tatou faia lenā, e tatou te faafiafiaina ai le finagalo o lo tatou Tamā faalelagi. E tatou te faamaonia atu ai iā te ia e faapea, o loo talia foʻi ma le faafetai e o tatou loto lona lelei ma lona alofa. E lētioa lava ona faalaeiauina e lē aunoa Kerisiano ina ia “avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa”! (Epe. 13:15) Ona o le faanaunauga ina ia fesoasoani iā te oe e faaleleia lou tomai e faaaogā lau meaalofa mai le Atua e viia ai Ieova, e matou te faafeiloaʻi atu ai iā te oe, o se tagata aʻoga i le Aʻoga o le Faiva Faatiokarate.

A o tele ina taulaʻi atu le aʻoga i le faitau atu i luma o le lautele ma tomai i le tautala ma le aʻoaʻo atu, peitaʻi e lē gata ai i inā aogā o le Aʻoga o le Faiva Faatiokarate. A o faia ai sau vaega, o le a fesoasoani atu iā te oe ina ia e ati aʻe tomai aogā e pei o le faitau tusi, faalogologo ma manatuaina mea, suʻesuʻe, faia o suʻesuʻega loloto, iloiloina ma le faamaopoopoina o mea, fetalanoaaʻi, taliina o fesili, ma le tusiaina o manatu. O le Tusi Paia ma lomiga faale-Tusi Paia o le a avea ma faavae o suʻesuʻega, faamatalaga ma taulimaga e faia i le aʻoga. A o e ave i fale upu moni tautele mai le Afioga a le Atua, o le a e faamasani ai e manatunatu i manatu o le Atua. Maʻeu le aogā o le a iai lenā mea i vala taʻitasi o le soifuaga! E tusa ai o le aogā o le Afioga a le Atua, na tusia e se faiaʻoga i se iunivesite o le luasefulu senituri e suafa iā William Lyon Phelps e faapea: “O i latou uma lava ua loloto se poto i le Tusi Paia, e mafai moni ona taʻua o ni tagata aʻoaʻoina. . . . Ou te talitonu o le iai o se poto o le Tusi Paia e aunoa ma le aʻoaʻoina i se kolisi, e sili atu ona aogā na i lo le aʻoaʻoina i se kolisi e aunoa ma se Tusi Paia.”

Le Auala e Maua Atoatoa ai Aogā

O le mea mautinoa lava, ina ia maua atoatoa aogā mai aʻoaʻoga e ala mai i le Aʻoga o le Faiva Faatiokarate, o oe le tagata aʻoga, e ao ona fai ni au lava taumafaiga. Na uunaʻia e le aposetolo o Paulo lana aumea Kerisiano o Timoteo: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.” (1 Timo. 4:15, LF) O ā ni auala aogā e mafai ona e faatatauina iā te oe lava?

Pe afai e mafai ona fai, ia e auai i le Aʻoga o le Faiva Faatiokarate i vaiaso taʻitasi. Ia faaaogā ma le atamai lenei tusi aʻoga, o le Mauaina o Aogā Mai i le Aʻoga o le Faiva Faatiokarate. Ia tusia lou suafa i le avanoa ua saunia atu i le itulau o mataupu. Ia aumai e lē aunoa le tusi i taimi uma e te auai ai i le aʻoga. O le tusi aʻoga lenei e mafai foʻi ona fai ai ni au faamaumauga. Pe a e faitau ai i ni manatu tāua e te lagona o le a aogā iā te oe, vase lalo o na manatu. Faaaogā avanoa tetelē o loo iai e tusia ai manatu aogā e te aʻoaʻoina i taimi e talanoaina ai i le aʻoga.

O le a saunia ese atu se kopi ua lomia o le polokalame lea e mulimuli ai le Aʻoga o le Faiva Faatiokarate. O le a aofia ai foʻi i le faasologa faamatalaga i le auala e ao ona faafoe ai le aʻoga. Atonu o le a e mātauina e aogā le tuu o le faasologa i totonu o le tusi lenei, e faigofie ai ona maua.

A o faia sauniuniga mo vaega o le aʻoga mo vaiaso taʻitasi, ia manatua o le Tusi Paia o le tusi aʻoga autū lea. Ave le faamuamua i so o se vaega o le Tusi Paia lea e faatulaga mai mo le vaiaso. Afai foʻi e mafai ona e muaʻi faitauina mataupu o isi vaega o le polokalame, o le a matuā aogā lava foʻi le faia faapea.

A o faagasolo le aʻoga, e ono iai ni avanoa e fai ai se sao o le aofia. Ia faaaogā lelei avanoa na. O le aafia ai i talanoaga faapena o se vaega tāua lea i le manatuaina o mea e te faalogo i ai ma mafai ai ona e faaaogā i lou lava soifuaga.

O le mea moni, o le a maua e tagata aʻoga uma le avanoa e fai ai lauga po o ni faataʻitaʻiga i luma o le faapotopotoga. Ia faaaogā lelei avanoa taʻitasi faapena. Ia e uaʻi atu i le faaleleia o so o se vaega o le tautala e tofia mai iā te oe. O le a avatu iā te oe ni fautuaga ma le fuafuaga ina ia faaauau pea ona e agaʻigaʻi i luma. Ia talia lenā fesoasoani totino. Ia faamaumau i lau tusi ni manatu patino e faatulaʻi atu e faatatau i ni mea o le a e faia e oe lava, ina ia faaleleia ai lou tulaga. Talu ai e lē faigofie i se tagata ona faatutusa atu i le auala e fai ai e isi ni mea, o le a matuā fesoasoani la fautuaga alofa ma manatu faatutū nei e faavae mai i le Tusi Paia i lou agaʻigaʻi i luma. E moni lenā mea e tusa lava po ua tele tausaga o e auai i le aʻoga.—Faata. 1:5.

Pe e te manaʻo e faia nisi agaʻigaʻi vave i luma? Afai e te taulamua ona fai o au lava taumafaiga totino, e mafai ona fai le mea lenā. Ia suʻesuʻe muamua le mataupu lea o le a aofia i lauga a tagata aʻoga taʻitasi. Afai e manaʻomia se failauga tauofo, o le a faigofie la ona e tauofo, ma o le a mafai ona e maua ai le tele o le poto masani. A o faia e isi lauga, ia faalogologo ma le faaeteete i le auala o loo latou taulimaina ai le mataupu. Tatou te aʻoaʻoina mai i mea e fai e isi.

E faaopoopo atu i ai, pe afai e fetaui ma lou tulaga, e mafai ona e faatelevaveina lou agaʻigaʻi i luma e ala i lou suʻesuʻe muamua o oe lava i lenei tusi aʻoga. A uma loa ona e aʻoaʻoina lelei mea o loo i suʻesuʻega e 15 o loo sosoo mai, ona e faaauau atu loa lea i le “Polokalame mo le Atiina Aʻe o Tomai i le Avea o se Failauga ma se Faiaʻoga,” e amata i le itulau e 78. Muamua, ia suʻesuʻeina lesona taʻitasi, ma fai mea e ao ona fai o faatulaga mai e fesootaʻi atu i ai. Faaaogā i lau faiva mea o loo e aʻoaʻoina. O le faia faapea o le a matuā faaleleia ai lava lou agaʻigaʻi i luma o se failauga ma se faiaʻoga o le Afioga a le Atua.

O le a fesoasoani mea e te aʻoaʻoina i le Aʻoga o le Faiva Faatiokarate e sauniunia oe mo mea e sili ona tāua i le soifuaga. Talu ai ua māfua ona tatou ola ona o le finagalo o le Atua, o le viiaina la o ia e faailoa atu ai lo tatou amanaʻiaina o le fuafuaga na foafoaina ai i tatou. E talafeagai ona avatu iā Ieova le Atua le viiga aupito sili ona maualuga. (Faaa. 4:11) O le aʻoaʻoga lea tatou te maua i le aʻoga, o se auala e faataulau ai lenei mea, ina ia manino o tatou mafaufau, ia gaoioi ma le atamai, ma fetufaaʻi ma le uigā i upu moni ofoofogia mai le Afioga faagaeeina a le Atua.

SE FAAVAE O LE A ATI AʻE AI

O le tomai ina ia fetufaaʻi ma le uigā, o se tomai faapitoa. E lē o tagata uma e mafai ona latou faia i se tulaga lelei. E tele tusi aʻoga ua fuafuaina e fesoasoani i tagata ina ia faaleleia lenei tulaga. Peitaʻi, o Lē na Foafoaina Mea, o Lē na foaʻiina mai i tagata le tomai e tautala ai, e sili atu lona silafia e faatatau i le tautala ma le aʻoaʻo atu na i lo o se isi lava faiaʻoga o le tautala o iai. Sa soosootauʻau i ai lona Alo e toʻatasi i le avea ma Matai Tufuga i le saunia o le faiʻai o le tagata ma totoga ua mafai ai ona tautala le tagata, atoa ai ma isi foafoaga uma e maofa ai.

A o amata ona iai agelu sosoo mai ai ma tagata, sa auauna ai lenā Alo e avea ma Upu a le Atua, o Ia lea sa faaautū ona auala mai ai faatonuga a le Atua i agelu ma tagata. (Faata. 8:30; Ioa. 1:1-3) O le Alo lenā na auina mai i le lalolagi, o le Alii lea o Iesu Keriso. E faatatau iā te ia, ua faapea mai le faamaumauga faagaeeina: “Ona matuā taufaiofo ai lea o le motu o tagata i lana aʻoaʻoga.” Ma o le molimau a i latou sa faalogologo iā te ia: “Ua leai lava se tagata e tautala pei o lena tagata.” (Mata. 7:28, LF; Ioa. 7:46) E sili atu i le 40 taimi o loo taʻua ai Iesu i tusi a Evagelia o se Faiaʻoga, ma e iai māfuaaga tāua o le faia faapea. E anoanoaʻi mea e faatatau i le tautala ma le aʻoaʻo atu e mafai ona tatou aʻoaʻoina mai iā te ia.

O loo iai foʻi i le Tusi Paia se faamaumauga i le auala sa faaaogā ai e Ieova le Atua, o tane ma fafine e eseese talaaga e ō mai ai, ina ia faataunuuina ai lona finagalo. O nisi o i latou sa latou aumaia ni feʻau pupuu ae malolosi. E toʻatele i latou sa leʻi tautala atu i luma o ni aofia tetele, peitaʻi sa latou faia ma le faamaoni se sao i le molimau atu e uiga i le Atua moni ma lana fuafuaga. E foliga mai, o le toʻatele o i latou e lē o ni failauga lelei, peitaʻi sa faamanuia e le Atua a latou taumafaiga. E mafai ona aʻoaʻoina i tatou i mea o loo taʻu mai e le Tusi Paia, e faatatau i le auala sa faataunuu ai la latou faiva.—Sala. 68:11.

O le mea moni lava ia, o le Tusi Paia e lē o se tusi aʻoga e aʻo ai le tautala i luma o le lautele. Peitaʻi o i latou e faitau ma faaalia le utaga mamao, o loo iai i le Tusi Paia faamatalaga tāua e fesoasoani iā i latou ina ia uigā i le tautala ma le aʻoaʻo atu. O loo taumafai malosi le Mauaina o Aogā Mai i le Aʻoga o le Faiva Faatiokarate e ati aʻe i le faavae lenā.