Saʻo Lelei le Faitau

O LOO taʻua mai e le Tusi Paia e faapea, o le finagalo o le Atua mo ituaiga uma o tagata ina “ia oo ina iloa lelei le upu moni.” (1 Timo. 2:4) I le ōgatusa ai ma lenā manatu, pe a tatou faitauina leotele le Tusi Paia, e ao i lo tatou faanaunauga e faaoo atu le poto saʻo ona aafia ai le auala e fai ai la tatou faitau.

E tāua uma lava i talavou ma ē matutua le tomai e faitau leotele ai le Tusi Paia po o lomiga na e faamalamalama ai le Tusi Paia. I le avea ai ma Molimau a Ieova, ua iā i tatou le tiute tauave o le tufa atu i isi le poto e uiga iā Ieova ma ona ala. E masani ona aofia ai i lenei mea le faitau atu i se tagata e toʻatasi po o se vaega toʻaitiiti. E mafai foʻi ona tatou faia se faitau tusi faapena i le aiga. I le Aʻoga o le Faiva Faatiokarate, e iai avanoa talafeagai mo uso ma tuafāfine, o ē talavou ma ē matutua, e maua ai fautuaga ina ia faaleleia a latou faitau.

O le faitauina atu o le Tusi Paia i le lautele, pe i se tagata e toʻatasi po o se faapotopotoga, o se mea e ao ona manatu mamafa i ai. Na faagaeeina le Tusi Paia e le Atua. E faaopoopo atu i lenā, “o loo ola le afioga a le Atua, o loo matuā galue foi, . . . o loo faamasino foi i manatu ma filifiliga o le loto.” (Epe. 4:12) O loo i le Afioga a le Atua le poto tautele lea e lē mafai ona maua mai i se isi lava mea. E mafai ona fesoasoani i se tagata ina ia iloa le Atua moni e toʻatasi ma atiina aʻe se faiā lelei ma ia atoa ai ma le taulau manuia i le fesagaʻia o faafitauli o le soifuaga. O loo faamatalaina ai le ala i le ola e faavavau i le lalolagi fou a le Atua. E ao la ona avea ma o tatou sini le faitauina o le Tusi Paia i le mea sili e oo i ai lo tatou tomai.—Sala. 119:140; Iere. 26:2.

Le Auala e Saʻo Lelei ai le Faitau. E tele vala o le faitau lelei, peitaʻi o le laasaga muamua lava o le ati aʻe o le saʻo lelei. O lona uiga o lenā mea o le taumafai malosi lea e faitau saʻo mai lava mea o loo i le tusi o faitauina. Faaeteete aua le misia ni upu, pe faaselemutu le taʻuina o upu, po o le sesē foʻi ona faitauina upu ona e tai tutusa i isi upu.

Ina ia saʻo le faitauina o upu, e manaʻomia ona e malamalama i le mataupu atoa. E manaʻomia i lenei mea sauniuniga ma le faaeteete. I se taimi mulimuli ane, a o e atiina aʻe le tomai e taulaʻi atu ai i luma ma iloiloina le faagasologa lelei o manatu, o le a faaleleia le saʻo lelei o lau faitau.

O faailoga mo le kalama ma faailoga mo faaleoga o ni vaega tāua tele na o le gagana tusitusi. O faailoga e ono faailoa mai ai po o fea e mānava ai, le umi o le mānavaga, ma atonu foʻi ma le manaʻoga ina ia suia le malosi o le leo. I nisi gagana, o le lē taulau ona suia o le leo pe a manaʻomia e ala i faailoga e ono suia ai se fesili i se faamatalaga, ia po o le sui atoa ai foʻi o le uiga. E moni o nisi taimi, e fua le faaaogāina o faailoga i le kalama. O le tele o gagana e lē mafai ona faitau saʻo e aunoa ma le uaʻi atu ma le faaeteete i faailoga mo faaleoga—e lē gata i faailoga o loo tusia, ae atoa foʻi ma faailoga ia e malamalama lava i ai mai i manatu o siʻomia ai. E aafia ai i le faiga lenei le faaleoina o mataʻitusi o loo faaaogāina. Ia faamautinoa ua e masani ma le auala e faaaogā ai faailoga mo le kalama ma faailoga mo faaleoga i lau gagana. O le mea lenei e faalagolago i ai le faitau i se auala uigā. Manatua o lou faanaunauga ia faaoo atu manatu, ae lē faapea na o le taʻua o upu.

E manaʻomia le faataʻitaʻi pe afai o le a e ati aʻe le tomai ina ia saʻo lelei le faitau. Faitau tau o se palakalafa se tasi, ma toe fai pea lava pea seʻia oo ina mafai ona e faitauina e aunoa ma se mea sesē. Ia ona faaauau lea i le isi palakalafa. A uma loa, taumafai malosi e faitau ni itulau o le mataupu e aunoa ma le misi o ni upu, le toe taʻua o ni upu, po o le sesē ona faitauina o so o se upu. A uma ona e faia laasaga na, ona fai atu lea i se tasi e siaki mai lau faitau ma taʻu mai so o se mea sesē e te faia.

I nisi vaega o le lalolagi, e avea le leaga o le vaai ma le lē lava o le malamalama o molī e māfua ai ona faafaigatā le faitau. Afai e mafai ona fai se gaoioiga ina ia faaleleia nei tulaga, e mautinoa lava o le a faaleleia le faitau.

A o faagasolo taimi, e ono valaaulia uso e lelei a latou faitau ina ia faitau atu i luma o le lautele le mataupu suʻesuʻe i le Suʻesuʻega Tautusi a le Faapotopotoga ma le Suʻesuʻega o Le Olomatamata. Peitaʻi ina ia lelei le taulimaina o na faaeaga, e tele mea e manaʻomia na i lo le tau ina saʻo le taʻuaina o upu. Ina ia avea ma faitau lelei i luma o le lautele i le faapotopotoga, e manaʻomia ona e ati aʻe se masaniga lelei i lau lava faitau. E aofia ai i lenei mea lou amanaʻiaina e faapea, e aogā uma lava upu taʻitasi i se fuaiupu. E lē mafai ona e faatuatuanaʻi i nisi o upu ae e te mauaina pea le malamalamaga o le manatu atoa. Afai e sesē ona e faitauina ni upu, e tusa pe o loo e faitau iā te oe lava, e mafai ona sesē le faauigaina o le fuaiupu. Atonu e māfua ona sesē le faitauina, ona o le lē taulau ona mātauina o faailoga mo faaleoga, po o manatu o loo siʻomia ai lea e faaaogā ai upu e pei ona taʻua. Ia fai se taumafaiga ina ia e malamalama i le faauigaina o upu taʻitasi i le fuaiupu lea o loo faaaogā ai. Ia iloilo foʻi le auala o loo aafia ai le uiga o le fuaiupu i faailoga mo le kalama. Ia manatua, o manatu e masani lava ona faamatala mai e le tuufaatasiga o upu. Ia mātau nei mea ina ia oo ai i le taimi e faitau leotele ai, ae ua e faitauina le tuufaatasiga o upu—o faaupuga ma faamatalaga—na i lo le tau ina faitau lava o upu. O le malamalama lelei i mea o loo e faitauina o se laasaga tāua tele ina ia mafai ona faaoo atu le poto saʻo i isi e ala i le faitau atu i le lautele.

O se toeaina Kerisiano ua iai le poto masani lea na tusi atu i ai le aposetolo o Paulo ma faapea atu: “Ia faaauau ona e uaʻi atu i le faitau i luma o le lautele.” (1 Timo. 4:13, NW) E mautinoa lava o se tasi lenei o vaipanoa o loo iai se avanoa mo i tatou uma lava e fai ai ni faaleleiga.