Mataupu 24

E Faapefea Ona Ou Teena le Faia o Feusuaʻiga a o Leʻi Faaipoipo?

O SE suʻesuʻega i le atunuu atoa a le mekasini o le ’Teen ua faailoa mai ai o le toʻatele o lana ʻaufaitau talavou e mananaʻo i ni faamatalaga e faatatau i le fesili o loo mulimuli mai: “E faapefea ona teena omiga ina ia faia feusuaʻiga.”

I le Salamo 119:9, sa faatū ai e le faisalamo le fesili talitutusa: “E faapefea ea ona faamamāina e le taulealea [po o le tamaʻitaʻi] o lona ala?” O le tali: “Ona ua tausi i ai e tusa ma [le] afioga [a le Atua].” Ae iai ma nisi mea e manaʻomia na i lo tau ina iai le poto i le mafaufau. Sa taʻua e se tamaʻitaʻi talavou: “Ua e iloa i lou mafaufau le mea ua fai mai ai le Tusi Paia e faatatau i faiga lē mamā faaleituaiga, peitaʻi o loo uunaʻi ese pea e lou loto nei māfuaaga mai lou mafaufau.” Ua talafeagai ai ona faaauau le faisalamo: “Ua ou teu i loʻu loto lau afioga, ina neʻi ou agasala ia te oe.”—Salamo 119:11.

Ia Malupuipuia le Loto

Ina ia faatāuaina Afioga a le Atua i lou loto e manaʻomia muamua lava lou faitauina ma suʻesuʻe le Tusi Paia ma lomiga faale-Tusi Paia. O le a fesoasoani lena e faatalitonu ai oe i le aogā o tulafono a le Atua. Ae i le isi itu, o le faitau, faalogo atu, po o le matamata i mea e faagaeeina ai faaleituaiga, o le a tupu aʻe ai le ‘tuinanau i faiga faaleituaiga.’ (Kolose 3:5) O lea ia matuā teena mea faapena! Ae ia mafaufau loloto i mea e mamā ma lē mataʻuleagaina.

Ua faaalia atili i suʻesuʻega faapea o uō vavalalata a se tasi e mafai ona iai sana taaʻiga tele i le pe mata o le a tausisia pea e se tasi le mamā tauamio. Na faapea mai le faisalamo: “Ua matou uo ma i latou uma o e matatau ia te oe [le Atua], ma e ua tausi i au feau.”—Salamo 119:63.

Po o au uō o i latou o ni ē o loo taumafai moni e ‘tausisia faatonuga a le Atua’? O le faamatalaga lenei a se tamaʻitaʻi talavou e igoa ia Ioana e faatatau i le filifilia o uō: “Afai e te faifaimea faatasi ma tagata o ē alolofa ia Ieova, e te iloa ai, a o tou talanoa e faatatau i amioga tatau, e amata ai foʻi ona e lagona e faapei o o latou lagona. Mo se faataʻitaʻiga, afai e te faalogo atu o latou faapea mai o feusuaʻiga lē tatau e inosia, o le a amata ai foʻi ona e lagona faapena. Ae i le isi itu, afai o lua faifaimea ma se tasi e lē manatu mamafa i ai, e lē pine foʻi ona pei lava lea o oe o ia.”—Faataoto 13:20.

Peitaʻi, o tuugatala ma faauōga e masani lava ona tulaʻi mai ai se luʻi tele i le tausisia o amioga mamā. Seʻi mafaufau i se suʻesuʻega i le atunuu atoa sa faia e Robert Sorensen. Sa ia iloa ai, o le 56 pasene o tama talavou ma le 82 pasene o tamaʻitaʻi sa suʻesuʻeina o ē na latou faia feusuaʻiga, sa latou faia mo le taimi muamua ma se tasi o lē sa mautū lelei a latou sootaga—po o sē e masani lelei i ai, pe fiafia tele foʻi i ai. Ae faapefea pe afai ua e oo i le matua e saʻilia ai se faaipoipoga, ma o loo e tuutala foʻi ma se tasi? E mafai faapefea ona e faamasani lelei atu i lena tagata ae tausisia pea lou mamā tauamio?

ʻAlofia Lamatiaga i le Taimi o le Faigauō

Ua lapataʻi mai le Tusi Paia: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa?” (Ieremia 17:9) Atonu e lagona e se tasi lona māfana atu e pei ona masani ai, i se tasi o le isi ituaiga. Ae o le tele o lou iai i tafatafa o le isi, o le tele lena o le tosina i ai. Ma o lenei faanaunauga masani, e mafai ona taʻitaʻisesēina ai lou loto. Sa fetalai Iesu Keriso: “Auā e alu ae mai le loto o le manatu leaga, . . . o le faitaaga.”—Mataio 15:19.

O le tele o taimi, e lē fuafuaina ai e ni tagata talavou o loo fai se la faigauō le faia o ni feusuaʻiga.a Ae i le tele o tulaga, e tupu lenei mea talu ai ona ua la paʻitino, feasogi, po o le loteloteina o itutino sā e faagaee ai faalogona. Sa taʻutino mai e se tasi tinā e leʻi faaipoipo: “Ia te aʻu faapea foʻi ma le tele o talavou ua ou iloa, e pei e na ona faifai mālie atu lava teisi i luma o gaoioiga i taimi taʻitasi, ma iʻu ai lava ina lē toe avea oe ma taupou. E lua te amata i sina opoopo, milimili ma oo ai lava ina tupu se mea e lē mafai ona lua toe taofia.”

Ina ia ʻalofia le lolo atu o oe lava i faiga lē tatau faaleituaiga, e tatau ona e pulea lou loto, na i lo le pulea o oe e lou loto. (Faataoto 23:19) E mafai faapefea ona e faia lenei mea?

Faataatia tapulaa: O se tama talavou atonu o ia manatu faapea o loo faatalitalia o ia e lana uō teine e tausolomua i le sogi ma opoopo ma milimili atu, ae atonu e lē o le tulaga moni lena. “Na o le faamaualuga lava e tupu ai le misa; a o e filifili [“talanoa faatasi,” NW], e popoto i latou.” (Faataoto 13:10) O lea afai o lua tuutala ma se isi, ia taʻu atu i le isi tagata ou faalogona e faatatau i se mataupu e ala i le “talanoa faatasi.” Ia faatulaga ma le poto tapulaa o gaoioiga i le faaalia o le alofa. I le taimi e tasi, aua neʻi tuuina atu faailoga e faaluafesasi ai mafaufauga o le tagata o le isi ituaiga. O le ofuina o ofu fufusi, valavala, ma lavalava faatosina e avatu ai i lau uō le manatu sesē.

ʻAlofia tulaga e faaosoosoina ai: Ua faamatalaina i le Tusi Paia se teine taupou o lē sa valaaulia e lana uō tama mo se savaliga i se nofoaga tuufua i atumauga. O ā ona faanaunauga? Ina ia la fiafia faatasi i le matagofie o le amataga o le tau e totogo ai mea. Peitaʻi, na logotala tuagane o le teine i le malaga ua fuafuaina, ma sa latou taofia loa, ona sa latou leʻi fiafia i ai. Pe na māfua ea ona sa latou iloa e lologofie lo latou tuafafine i amioga lē mamā? E matuā leai lava! Peitaʻi sa latou iloa lelei le malolosi o faaosoosoga e iai i na tulaga. (Pese a Solomona 1:6; 2:8-15) E faapena foʻi ona tatau ona e ʻalofia tulaga e ono faaosoosoina ai, e pei o le iai na o oulua ma lē o lua tuutala i se fale, se potu, po o se taavale o loo paka.

Ia iloa ou vaivaiga: E iai taimi atonu e ono faigofie ai ona faaosoosoina oe i faiga faaleituaiga na i lo isi taimi. Mo se faataʻitaʻiga, atonu ua e lotovaivai talu ai ua lē taulau nisi o mea na e faia, po o se feteenaʻiga ma ou mātua. Po o le ā lava le tulaga, e tatau ona e matuā faaeteete lelei i le taimi o ia te oe ai ni lagona faapena. (Faataoto 24:10) E lē gata i lea, e manaʻomia foʻi ona e faaeteete i le faaaogāina o le ava malosi. I lalo o aafiaga o nei mea, e mafai ai ona leiloa uiga pulea. “O . . . le uaina, ma le uaina fou e aveeseina ai le loto [lelei].”—Hosea 4:11.

Ia faapea atu leai ma ia maumauaʻi i ai: O le ā e mafai ona faia e ni talavou o faauō pe afai ua malolosi le oso aʻe o faalogona, ma ua iai lamatiaga e fepaʻiaʻi ai lē mamā? O se tasi o i laʻua e tatau ona tautala atu, po o le faia o se mea, e faamutaina ai loa nei lagona. Sa iloa e Tepora o lea ua na o i laʻua ma lana uō, ma sa faatū e lana uō le taavale i se nofoaga tuufua e “talanoa” ai. Ina ua amata ona tutupu aʻe faalogona, sa faapea atu loa Tepora i lana uō: “Po ua lē ova ea a ta feakisiga ma fusifusiga? Po ua lē tatau ea ona tuu loa?” O lea, na taofia ai loa na uiga. Na vave loa ona toe aveina atu o ia i lona aiga. O le faapea atu leai i nei tulaga, atonu o se mea e matuā faigatā lava ona e faia. Ae peitaʻi sa faapea mai se tasi tamaʻitaʻi e 20 ona tausaga o lē na lolo atu i le faia o feusuaʻiga: “Afai e te lē fulitua i ai, o le a e salamō ai!”

Ia iai sau talitaliuli: E ui e vaai i ai nisi o se faiga faaanamua, ae o le iai o se talitaliuli e faatasi ma oe i se tuugatala o se faiga o loo lelei pea. Ua faaseā nisi o ē faauō faapea: “E foliga mai e lē faatuatuaina i maʻua.” Atonu e saʻo. Ae po o se mea atamai ea le faatuatuaina e le tagata o ia lava? Ua taʻu saʻo mai e le Faataoto 28:26: “O le ua faatuatua i lona lava loto, o le vale ia; a o lē savali ma le poto, e laveaiina o ia.” Ia savali ma le poto e ala lea i le iai o se tasi e tou te toʻatolu i se tuugatala. Sa faailoa mai e Tepora: “Ou te faaaloalo tele i le tagata e sau ma aumai lana talitaliuli. Ou te iloa ai o loo naunau o ia i tulaga mamā e pei foʻi ona ou naunau i ai. E lē o se mea faigatā, auā afai ma te mananaʻo e talanoa i se mea e na o maʻua e tatau ona iloa, e na ona ma meʻi ese teisi lava neʻi lagona mai e nisi. O le puipuiga o le iai o se talitaliuli e sili atu ona lelei na i lo le faapea ua fai o ia ma faalavelave.”

Faauōga ma le Atua

Ae o le sili i nei mea uma, o le atiina aʻe o se faauōga vavalalata ma le Atua, e ala i le iloa o ia o se peresona moni e iai ni ona faalogona, o le a fesoasoani lea ia te oe e ʻalofia ai amioga e faatigā ai ia te ia. O le sasaa atu o lou loto ia te ia e faatatau i ni faafitauli patino e te vavalalata atu ai ia te ia. O le toʻatele o i latou o loo faia ni faigauō o ē mananaʻo e tumau i le mamā, ua latou tatalo faatasi atu i le Atua i taimi e malolosi ai faalogona, e tatalo atu ia foaʻi mai ia i latou le malosi o latou manaʻomia.

E tali mai ma le agalelei Ieova ia i latou e ala i le tuuina atu i ai o “le matuā tele o le mana.” (2 Korinito 4:7) Ae o le mea moni, o oe foʻi lava ia, e tatau ona faia lau vaega. Ia mautinoa lelei, e ala i le fesoasoani ma faamanuiaga a le Atua, o le a mafai ai ona e teena amioga lē tatau faaleituaiga.

[Faamatalaga faaopoopo]

Fesili mo Talanoaga

◻ O ā nisi o mea e mafai ona e faia o le a fesoasoani ai ia te oe e faatāuaina tulafono a Ieova e faatatau i faiga faaleituaiga?

◻ E mafai faapefea e au uō ona faaaafia lau vaaiga i feusuaʻiga a o leʻi faaipoipo?

◻ Aiseā ua e manatu ai e tatau ona faaeteete a o faia tuugatala?

◻ O ā nisi o mea e mafai ona faia e i laʻua o loo faia se faigauō ina ia puipuia ai mai lo la paʻūū atu i le faia o feusuaʻiga lē mamā?

[Faamatalaga faaopoopo i le itulau 193]

“E lua te amata i sina opoopo, milimili . . . ”

[Faamatalaga faaopoopo i le itulau 194]

A o faia tuugatala, ia ʻalofia amioga lē tatau, e ala i le lē faaesea o oulua

[Pusa/Ata i le itulau 195]

Ia Faatumauina le Mamā a o Faia Tuugatala

Ia ʻalofia tulaga e mafai ona taʻitaʻia atu ai i feakisiga ma fusifusiga ma le loteina e le tasi o itutino sā o le isi

Ia tuutala i mea o iai vaega o tagata po o le iai o se talitaliuli

Ia tausia talanoaga i se tulaga e ati aʻe ai

I le amataga, ia faailoa atu i lau uō ou uiga e faatatau i tapulaa o le faaalia o le alofa

Ia laʻei talafeagai ma ia ʻalofia gaoioiga e faagaee ai tuʻinanauga

Ia talosaga atu e ave oe i le fale pe a e lagona ua lamatia lou tulaga mamā

Ia ʻalofia le uumi o “faamavaega i po”

Ia tausia pea le vave ona e alu i le fale pe faamuta le evaga

[Ata]

O uō o tuutala e mafai ona saʻilia gaoioiga e lē o faaesea ai i laʻua mai isi tagata

[Ata i le itulau 196]

Pe afai ua tulaʻi mai se tulaga ua matuā “malolosi” le oso aʻe o faalogona, ia iloa ona faapea atu Leai!—ma ia maumauaʻi i ai!