Ua Tatou Saʻoloto Ona o le Upu Moni
1 I se tasi mea na tupu, na fetalai atu ai Iesu i tagata Iutaia o ē na talitonu iā te ia e faapea: “E iloa foʻi e outou le mea moni, e tuu saʻoloto foʻi outou e le upu moni.” (Ioa. 8:32) Na fetalai Iesu i se saʻolotoga e sili atu na i lo o aiā a tagata i le taimi nei, lea e mafai uma e tagata ona maua—mativa pe mauʻoa, lelei le tulaga tau aʻoaʻoga pe e lē lelei foʻi. Sa aʻoaʻoina e Iesu le upu moni lea o le a aumaia le saʻolotoga i le nofo pologa i le agasala ma le oti. E pei ona faamatalaina mai e Iesu, “o sē faia le agasala, o le pologa lea i le agasala.” (Ioa. 8:34) Maʻeu lo tatou moomoo atu i le taimi o le a mafai ai e tagata amiotonu ona “tuusaunoa ia lava mea na faia ia lē faapologaina e le iʻu vale, a e oo i le saʻolotoga o le fanau a le Atua e manuia ai”!—Roma 8:21.
2 Ua aumaia e le upu moni e faatatau iā Iesu ma lana matafaioi i le faataunuuina o le fuafuaga a le Atua lenā saʻolotoga. E aofia ai le poto e faatatau i le taulaga togiola na ia saunia mo i tatou. (Roma 3:24) O le tulaga foʻi lenā i le taimi lenei, o le taliaina ma gauaʻi atu i upu moni o le Tusi Paia o le a fesoasoani iā i tatou e maua ai se saʻolotoga mai le mataʻu, atuatuvale ma masaniga leaga uma.
3 Saʻoloto Mai le Mataʻu ma le Atuatuvale: E lē manaʻomia ona tatou atuatuvale i mea o loo tutupu i le lalolagi, ona ua tatou malamalama lelei i le pogai o mea leaga uma, ma ua tatou iloa foʻi ua lē o toe umi se taimi ona aveesea atoatoa lea mai le lalolagi. (Sala. 37:10, 11; 2 Timo. 3:1; Faaa. 12:12) E lē gata i lenā ua mafai foʻi e le upu moni ona faasaʻolotoina i tatou mai aʻoaʻoga sesē e faatatau i le mea e tupu pe a oti le tagata. Ua tatou iloa e lē mafai e tagata ua maliliu ona faaleagaina i tatou, e lē faapuapuagatiaina foʻi i latou i se afi e faavavau, ma e lē faapogaia foʻi e le Atua le maliliu o tagata ina ia faatasi ma ia i le nofoaga o agaga.—Fai. 9:5; Galu. 24:15.
4 Na mafai e lenā upu moni ona faamalosia ai se tamā ma se tinā ina ua maliu lo la tama i se faalavelave faafuaseʻi. Na faapea mai le tinā: “E iai le mea ua misi i o ma olaga e lē mafai ona toe maua mai seʻiloga ua ma vāai i si a ma tama tama i le toetū. Ae ma te talitonu o ma faalogona tigā e mo na o se taimi lē tumau.”
5 Saʻoloto Mai Masaniga Leaga: E mafai e upu moni o le Tusi Paia ona faaliliuina manatu o le tagata ma ona uiga e saʻoloto mai ai i faafitauli e mafai ona ʻalofia. (Efe. 4:20-24) E mafai ona faaitiitia le lē tagolima pe a faamaoni ma toʻaʻaga e galulue. (Faata. 13:4) O le faaalia o le alofa faataulagaina, e mafai ona faaleleia ai le faiā ma isi. (Kolo. 3:13, 14) O le faaalia o le faaaloalo i le tulaga ulu e faaitiitia ai faafitauli i le aiga. (Efe. 5:33–6:1) O le ʻalofia o le onā, faiga lē mama faaleituaiga, ulaula tapaa, ma le pulea e fualaau faasāina ona faalelei ai le soifua mālōlōina.—Faata. 7:21-23; 23:29, 30; 2 Kori. 7:1.
6 Sa lē taulau se tama talavou e taofia le puleaina o ia e fualaau faasāina i le iva tausaga. I se tasi aso sa ia fetaui ai i se tagata talaʻi o loo molimau atu i luga o magāala. Na ia talia lomiga, ma na faia se fuafuaga e toe asia o ia i lona fale. Na amata se suʻesuʻega faale-Tusi Paia. I le lua masina mulimuli ane ai na ia taofia atoatoa ai loa le faaaogāina o fualaau faasāina, ma ina ua māeʻa le valu masina o lana suʻesuʻega na papatisoina ai loa o ia. I le mātauina o ia i le lē toe faaaogāina o fualaau faasāina na uunaia ai lona uso ma le avā a lona uso e amataina sa la suʻesuʻega faale-Tusi Paia.
7 Fesoasoani i Isi Ina ia Maua le Saʻolotoga: O i latou ua loa tausaga o pologa ona o aʻoaʻoga sesē atonu e faigatā ona latou malamalama i le saʻolotoga ua ofoina mai e le Afioga a le Atua. Atonu e manaʻomia ni taumafaiga faapitoa aemaise sauniuniga lelei a le faiaʻoga mo le faatinoina o lana vaega ina ia pāʻia ai loto o i latou nei. (2 Timo. 4:2, 5) E lē o se taimi lenei e faavaivai ai i la tatou galuega o le ʻtalaʻia o le saʻolotoga i le tafeaga.’ (Isa. 61:1) E tāua tele le saʻolotoga faa-Kerisiano. O le mauaina o lea saʻolotoga e iʻu ai i le ola e faavavau.—1 Timo. 4:16.