Talavou—Ia Ati Aʻe se Faavae Lelei mo le Lumanaʻi
1. Aiseā e manaʻomia ai e talavou Kerisiano ona ati aʻe se faatuatua malosi?
1 O le ā le mea o loo sili ona tāua i lou manatu? O ā mea e te manatunatu i ai? Po o taulaʻi atu ea ou popolega autū i mea o loo iai i le taimi nei, po o oo atu i le lumanaʻi ma taulaʻi atu i mea ua folafola mai e le Atua? (Mata. 6:24, 31-33; Luka 8:14) E manaʻomia le faatuatua malosi ina ia gaoioi ai e tusa ma folafolaga a le Atua, e pei ona vaaia i faaaʻoaʻoga a Aperaamo ma Mose. (Epe. 11:8-10, 24-26) E faapefea ona e ati aʻe lenā faatuatua ma ati aʻe se “faavae lelei mo aso atalī”?—1 Timo. 6:19.
2. O le ā e tatou te aʻoaʻoina mai le faaaʻoaʻoga a le tupu o Iosia?
2 Saʻili iā Ieova: Afai e iai sau faasologa o gaoioiga faaleagaga faatasi ai ma lo outou aiga, e avatu le faamālō i lenā itu. Ae aua neʻi manatu faapea o lenā faasologa o le a faafuaseʻi ai ona maua se faatuatua malosi. Ina ia maua “le poto i le Atua,” e ao ona e saʻili oe lava iā Ieova. (Faata. 2:3-5; 1 No. 28:9) Sa faia faapena e le tupu talavou o Iosia. E ui lava na soifua aʻe i se siʻomaga e lē fesoasoani mo lona tuputupu aʻe faaleagaga, ae ina ua 15 ona tausaga, ona ʻamata lea e ia ona saʻili i le Atua o Tavita lona tamā.’—2 No. 34:3.
3. E faapefea ona saʻili Kerisiano talavou i aso nei iā Ieova?
3 E faapefea ona e saʻili iā Ieova? E ala i le iloiloina o mea o loo e talitonu i ai ma ia ʻsuʻesuʻe iā te oe’ lava po o le upu moni lea. (Roma 12:2) Mo se faaaʻoaʻoga, pe e mafai ona e faamatalaina le mea ua fai mai ai le Tusi Paia e faatatau i le toto, po o le faamaonia faapea na amata le pulega o le Malo o le Atua i le lagi i le 1914? O le “oo ina iloa lelei le upu moni” o se vala tāua i le atiina aʻe o se faavae lelei mo le lumanaʻi.—1 Timo. 2:3, 4.
4. E faapefea ona faaalia e tagata talaʻi e leʻi papatisoina lo latou agaʻigaʻi i luma?
4 O le saʻili o Iosia iā Ieova na ia mauaina ai ni iʻuga lelei. A o leʻi oo i le 20 o ona tausaga, na ia gaoioi ma le loto tele i le aveesea o tapuaʻiga sesē i le nuu. (2 No. 34:3-7) E faapena foʻi ona iloa lou agaʻigaʻi i luma faaleagaga e ala i au gaoioiga. (1 Timo. 4:15) Afai o oe o se tagata talaʻi e leʻi papatisoina, ia taumafai e faaleleia le tulaga o lau faiva. Aua neʻi faamalieina i le tau lava o le ofoina o lomiga. Ia fai ma ou sini le faaaogā o le Tusi Paia, e fefulifulisaʻi ai ma tagata, ma ati aʻe le fiafia lea ua e mauina. (Roma 12:7) O le a fesoasoani lea iā te oe e tupu aʻe ai faaleagaga.
5. O ā avanoa e faalautele atu ai le auaunaga a Kerisiano ua papatisoina?
5 Avatu iā Ieova le Mea e Sili Ona Lelei: Ina ua e faailogaina lou tuuina atu iā Ieova e ala i le papatisoga, ua avea oe ma faifeʻau tofia a le Atua. (2 Kori. 3:5, 6) Ua tatalaina ai i inā avanoa mo oe e auauna ai iā Ieova faataimi atoa. E aofia ai le auai i le auaunaga paeonia faapea ma Peteli, le avea o se misionare, faapea ma le auaunaga faavaomalo. E lē gata i lea, o loo iai pea nisi o auala e faateleina ai lau faiva e ala i le aʻoaʻoina o se isi gagana po o le siitia atu e auauna i se mea o loo tele ai se manaʻoga.
6. E mafai faapefea e i tatou uma ona ati aʻe se faavae lelei mo le lumanaʻi?
6 O le mea moni, e lē o tagata uma e mafai ona auai i nei faaeaga o le auaunaga, ae e tatou te mafai uma lava ona tuuina atu iā Ieova le mea sili e tatou te mafai i le auaunaga. (Mata. 22:37) Po o ā lava ou tulaga o loo iai, ia avea le auauna iā Ieova ma taulaʻiga o lou olaga. (Sala. 16:5) O le faia faapea, o le a e ati aʻe ai se faavae lelei mo le lumanaʻi.