“Afai ua ʻAu ma i Tatou le Atua, o Ai Sē Faasaga Tau Mai ia i Tatou?”
“O lenei, se a sa tatou upu i nei mea? Afai ua ʻau ma i tatou le Atua, o ai sē faasaga tau mai ia i tatou?”—ROMA 8:31.
1. O ai na ō ese faatasi ma le fanauga a Isaraelu mai Aikupito, ma o le ā na māfua ai ona latou faia faapea?
A O AGAʻI atu le fanauga a Isaraelu mo so latou saʻolotoga ina ua mavae tausaga e 215 i Aikupito, o le tele o lena taimi sa faapologaina ai, sa “o ae foi faatasi ma i latou tagata ese e toatele.” (Esoto 12:38) Sa oo i nei tagata e lē o ni Isaraelu mala mataʻutia e sefulu na sa faatamaʻia ai Aikupito ma faalumaina ai ona atua sesē. I le taimi e tasi, sa latou mātauina—aemaise lava i le faasolo mai le mala lona fā—le tomai o Ieova e puipuia ai ona tagata. (Esoto 8:23, 24) E ui sa itiiti so latou malamalamaga i fuafuaga a Ieova, ae tasi le mea na latou mautinoa: Sa lē taulau i atua o Aikupito ona puipuia tagata Aikupito, ae peitaʻi sa faamaonia mai e Ieova lona malosi e puipuia le fanauga a Isaraelu.
2. Aiseā na lagolagoina ai e Raava tagata Isaraelu na ō atu e mataʻitūina le nuu, ma aiseā sa leʻi sesē ai lona talitonuga mautinoa i lo latou Atua?
2 I le fāsefulu tausaga mulimuli ane, a o latalata lava ina ulu atu le fanauga a Isaraelu i le nuu o le Folafolaga, na aauina atu ai e Iosua, o lē na soloaʻi ane i le tofiga ina ua mavae atu Mose, ni tane se toʻalua e la te mataʻitūina faalilolilo le nuu. O iinā na la feiloaʻi atu ai i a Raava, o se tagata sa nofo i Ieriko. O mea sa faalogo i ai Raava e faatatau i gaoioiga mataʻutia a Ieova mo le puipuia o le fanauga a Isaraelu i tausaga e 40 talu mai ona latou tuua Aikupito, na ia iloa ai e faapea, pe afai na te fia maua le faamanuiaga a le Atua, e tatau la ona ia lagolagoina ona tagata. Ona o lana filifiliga atamai, na faasaoina ai o ia ma lona ʻauaiga mai le faaumatiaga ina ua siʻomia mulimuli ane e le fanauga a Isaraelu le aai. O le auala faavavega lea na laveaʻiina ai i latou, sa matuā mautinoa ai lava iinā le faatasi o le Atua ma i latou. O lea, sa leʻi sesē le talitonuga mautinoa o Raava i le Atua o le fanauga a Isaraelu.—Iosua 2:1, 9-13; 6:15-17, 25.
3. (a) O le ā le vavega na faatino e Iesu e lata ane i Ieriko, o se aai na toe fausia, ma na faapefea ona tali i ai taʻitaʻi lotu Iutaia? (e) O le ā na oo ina iloatino e nisi tagata Iutaia, ma mulimuli ane faapena foʻi ma le toʻatele o tagata e lē o ni Iutaia?
3 I le sefululima o senituri mulimuli ane, na faamālōlō ai e Iesu Keriso se tagata ʻaisi sa tauaso, e lata ane i Ieriko, le aai sa toe fausia. (Mareko 10:46-52; Luka 18:35-43) Sa augani atu lenei tamāloa i a Iesu ina ia faaali ane i a te ia le alofa mutimutivale, e faailoa ai sa ia talitonu o lea na maua e Iesu le lagolagosua mai le Atua. Ae, i le tulaga lautele, sa leʻi taliaina e taʻitaʻi lotu Iutaia ma o latou soo, vavega na faatinoina e Iesu e faamaonia ai lona faia o galuega a le Atua. Na i lo o lea, sa latou vaavaai masei i a te ia. (Mareko 2:15, 16; 3:1-6; Luka 7:31-35) E ui lava ina fesagaʻi ma le mea moni e faapea ua toe faatūina aʻe Iesu ina ua mavae ona latou fasiotia o ia, ae sa latou mumusu lava e talia faapea o lena mea sa faia e le Atua. Na i lo lea, sa latou tausolomua lava i le sauāina o soo o Iesu, i le taumafai e faasāsā la latou galuega o le ‘folafolaina atu o le tala lelei i le Alii o Iesu.’ Peitaʻi o nisi tagata Iutaia, ma mulimuli ane faapena foʻi ma le toʻatele o tagata e lē o ni Iutaia, na latou mātauina nei mea na tutupu ma faia ai ma le tonu a latou faaiʻuga. Sa manino mai i a i latou, le teena e le Atua o taʻitaʻi faafiaamiotonu a Iutaia, ae lagolagoina soo lotomaulalo o Iesu Keriso.—Galuega 11:19-21.
O Ai o Loo Lagolagoina e le Atua i Aso Nei?
4, 5. (a) O ā ni faalogona o nisi tagata e faatatau i le filifilia o se lotu? (e) I le mātauliaina o le lotu moni, o le ā le fesili e sili ona tāua?
4 E tusa ai o le mataupu i le lotu moni, na taʻua ai e se tasi taʻitaʻi lotu i se faatalatalanoaga na faia talu ai nei i le televise, e faapea: “Ou te maumaututū lava e saʻo se lotu pe afai e mafai ona avea ai se tasi ma tagata ua sili atu ona lelei pe a ola ai e tusa ma lea lotu.” O le mea moni, o le lotu moni e mafai ona avea ai tagata o nisi e sili atu ona lelei. Ae po o le iai ea i se lotu o ni tagata e sili atu ona lelei, ua lava lena e faamaonia ai o loo lagolagoina e le Atua lena lotu? Po ua na o le pau ea lena o le vala mo le faamautūina pe moni se lotu?
5 E fiafia uma lava tagata pe a mafai ona latou faia a latou lava filifiliga, e aofia ai le filifilia o se lotu. Peitaʻi o le iai o le saʻolotoga e filifili ai, e lē faamautinoa ai faapea o le a faia e sea tagata le filifiliga tonu. Mo se faaaʻoaʻoga, e filifilia e nisi tagata se lotu e faavae aʻe i le toʻatele o tagata o loo lolotu ai, se tamaoaiga o iai, le mataʻina o le auala e faia ai a latou sauniga lotu, ia po o sootaga foʻi i o latou aiga. E aunoa ma se tasi o nei vala o iai se malosi e faamautinoa ai pe moni se lotu pe leai. O le fesili e sili ona tāua i lenei mataupu o lenei: O lē fea lotu o loo uunaʻia ona soo ia fai le finagalo o le Atua ma aumaia se faamaoniga maumaututū o le iai o le lagolagosua tauatua, ina ia mafai e ona tagata lotu ona faapea mai ma le mautinoa, “ua ʻau ma i tatou le Atua”?
6. O ā fetalaiga a Iesu na faamalamalamaina ai le mataupu i le lotu moni ma le lotu sesē?
6 Sa faatulaga mai e Iesu le tulafono mo le mātauliaina o le eseesega o le lotu moni mai le lotu sesē ina ua ia fetalai: “Ia outou ma perofeta pepelo, o e o mai ia te outou i ofu faamamoe, a o totonu o luko feai lava i latou. Tou te iloa i latou i o latou fua.” (Mataio 7:15, 16; Malaki 3:18) Seʻi o tatou autaluina nisi o “fua,” po o faailoga e mātaulia ai le lotu moni ina ia mafai ona tatou iloa lelei po o ai o loo lagolagoina e le Atua i aso nei.
O Faailoga e Mātaulia ai i Latou o Loo Lagolagoina e le Atua
7. O le ā le uiga o le aʻoaʻo atu na o mea ua faavae mai i le Tusi Paia?
7 E faavae mai a latou aʻoaʻoga i le Tusi Paia. Na fetalai Iesu: “O laʻu aʻoaʻoga e le o saʻu lava, a o lana na auina mai aʻu. Ai se tasi e fia fai lona finagalo, e iloa ai e ia le aʻoaʻoga pe mai le Atua, pe ou te tautala fua lava aʻu.” Ma le isi: “O lē mai le Atua, e faalogo ia i afioga a le Atua.” (Ioane 7:16, 17; 8:47) O le tulaga saʻo lava, ina ia maua le lagolagosua a le Atua, e tatau i se tasi ona ia aʻoaʻoina atu na o mea ua faaalia mai e le Atua i lana Afioga ae teena aʻoaʻoga e faavae aʻe i le atamai faaletagata po o uputuu.—Isaia 29:13; Mataio 15:3-9; Kolose 2:8.
8. Aiseā e tāua ai le faaaogā o le suafa o le Atua i le tapuaʻiga?
8 E latou te faaaogā ma faalauiloa le suafa o le Atua, o Ieova. Na valoia mai e Isaia: “O lea aso foi tou te faapea atu ai, Ia outou vivii atu ia Ieova, ina valaau atu ia i lona suafa; ia outou faailoa atu i nuu o ana galuega; ia outou taʻutaʻu atu ua viia lona suafa. Pepese atu ia ia Ieova, auā ua faia e ia mea silisili ese; ina faailoa atu ia o lea mea i le lalolagi uma.” (Isaia 12:4, 5) Na aʻoaʻo e Iesu ona soo ina ia tatalo: “Lo matou Tamā e, o i le lagi, Ia paia lou suafa.” (Mataio 6:9) O lea la, pe o se Iutaia pe leai, sa tatau pea i Kerisiano ona auauna atu o “se nuu mo lona [Atua] suafa.” (Galuega 15:14) Ua manino mai le fiafia o le Atua e na te lagolagoina i latou o ē mitamita e avea o “se nuu mo lona suafa.”
9. (a) Aiseā e mātaulia ai tagata o le tapuaʻiga moni i le olioli? (e) Ua faapefea ona faaeseese e Isaia le tapuaʻiga moni mai le tapuaʻiga sesē?
9 E latou te faaatagia maia uiga olioli o le Atua. Talu ai o Ieova o le puna o le “tala lelei,” ua avea ai o ia o le “Atua fiafia.” (1 Timoteo 1:11, faatusatusa i le NW.) E faapefea la ona lē fiafia ona tagata tapuaʻi pe faifai pea ona i a i latou lagona lē mautinoa? E ui lava i mafatiaga o le lalolagi ma o latou lava faafitauli totino, ae tausisia pea e Kerisiano moni se uiga fiafia, auā o loo fafagaina e lē aunoa i latou i le anoanoaʻi o taumafa faaleagaga. Ua taʻua e Isaia le eseesega o i latou mai ē o loo tapuaʻi i lotu sesē: “O loo faapea ona fetalai mai ai o le Alii o Ieova, Faauta mai, e aai aʻu auauna, a o outou tou te fia aai; faauta, e feinu aʻu auauna, a o outou tou te fia inu; faauta, e olioli aʻu auauna, a o outou tou te mamā; faauta, e alalaga aʻu auauna ona o le loto fiafia, a o outou tou te faataio ona o le loto tiga, ma outou uio ona o le loto momomo.”—Isaia 65:13, 14.
10. E faapefea i a i latou o ē ua mauaina le tapuaʻiga moni ona ʻalofia le tau saʻilia o le tele o ni auala eseese po o lē fea e maua ai le manuia?
10 E faavae aʻe a latou amio ma a latou faaiʻuga i mataupu silisili o le Tusi Paia. Ua fautua mai le tusitala o le Faataoto i a i tatou: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) E lagolagoina e le Atua i latou o ē saʻili atu i a te ia mo taʻiala na i lo le saʻili atu i filosofia feteenaʻi a tagata, o ē latou te lē amanaʻiaina le atamai faaleatua. O le tele e lotomalie ai se tagata e faataʻitaʻi atu le ala o lona olaga i le Afioga a le Atua, o le a ia ʻalofia ai le tau saʻilia o le tele o ni auala eseese po o lē fea e maua ai le manuia.—Salamo 119:33; 1 Korinito 1:19-21.
11. (a) Aiseā e lē mafai ai ona vaevaeina tagata o le tapuaʻiga moni i se vaega o taʻitaʻi lotu ma le ʻaulotu? (e) O le ā le faaaʻoaʻoga e tatau i a i latou o loo taʻimua i tagata o le Atua, ona faataatia mo le lafu mamoe?
11 Ua faamaopoopoina i latou i le auala sa iai le faapotopotoga Kerisiano i le uluaʻi senituri. Sa faataatia e Iesu le mataupu silisili: “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o aʻoaʻo; auā e toatasi la outou aʻoaʻo, o le Keriso lea. A o lē sili ia te outou e fai lea ma a outou auauna.” (Mataio 23:8-11, LF) O se faapotopotoga e faia aʻe i uso e lē mafai ona maua ai se vaega o ni taʻitaʻi lotu fiasili, e latou te faamamaluina i latou lava i ni taʻu maualuluga ma faasilisilia ai i latou na i lo le ʻaulotu. (Iopu 32:21, 22) Ua faatonuina i latou o loo leoleoina le lafu mamoe a le Atua ina ia faia e “le o le faatauanauina; aua foi neʻi faia ma le fia fai oloa, a o le loto fiafia. Aua foi neʻi faapei o e pule faasaua i e ua tofia i ai outou, a ia fai outou ma faaaʻoaʻo i le lafu mamoe.” (1 Peteru 5:2, 3) E taumamao leoleo mamoe Kerisiano moni mai le taumafai e fia aliitaʻi i le faatuatua o isi. Ona o i latou o se ʻaufaigaluega faatasi i le auaunaga a le Atua, ua latou tauivi ai e faataatia se faaaʻoaʻoga lelei.—2 Korinito 1:24.
12. O le ā le tulaga paleni e faatatau i faiga malo faaletagata, o loo faafinagaloina e le Atua mai i a i latou o loo faanaunau mo le mauaina o lana lagolagosua?
12 E latou te gauaʻi atu i faiga malo faaletagata peitaʻi e tumau pea ona latou solitū. O se tasi e lē taulau ona ‘usiusitai i faipule silisili’ e lē mafai ona ia faatalitalia se lagolagosua a le Atua. Aiseā? Talu ai “o pule uma lava o loo fai nei, ua faatuina e le Atua. O lenei, o le na te tetee i le pule, ua tetee e ia i le sauniga a le Atua.” (Roma 13:1, 2) Peitaʻi ane, sa silafia e Iesu le ono iai o se feteenaʻiga o manatu ina ua ia fetalai: “Ina avatu ia o mea a Kaisara ia Kaisara; ia avatu foi mea a le Atua i le Atua.” (Mareko 12:17) E ao i a i latou o loo faanaunau mo le mauaina o le lagolagosua a le Atua ona “muai saili [“pea,” NW] le malo [o le Atua] ma lana amiotonu,” ae i le taimi lava e tasi o loo usiusitai atu foʻi i tulafono a le atunuu lea e ōgatusa ma o latou tiute tauave e sili atu ona tāua o loo faatinoina i le Atua. (Mataio 6:33; Galuega 5:29) Na faamamafa e Iesu le solitū ina ua ia fetalai e faatatau i ona soo: “E le ni o le lalolagi i latou, faapei o aʻu foi, ou te le so le lalolagi aʻu.” Mulimuli ane na ia toe fetalai mai: “E le mai le lalolagi nei loʻu malo.”—Ioane 17:16; 18:36.
13. O le ā le vaega e faia e le alofa i le mātauliaina o tagata o le Atua?
13 E latou te lē faailogatagata i le faaalia o le ‘agalelei i tagata uma lava.’ (Kalatia 6:10) E lē faailogatagata le alofa faa-Kerisiano, e taliaina tagata uma e tusa lava po o ā lanu o o latou paʻu, le tulaga tau i le tamaoaiga po o le tulaga tau i aʻoaʻoga, le atunuu, po o le gagana. O le agalelei atu i tagata uma aemaise i ē latou te aiga i le faatuatua, e fesoasoani lea ina ia mātaulia ai i latou o loo lagolagoina e le Atua. Na fetalai Iesu: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35; Galuega 10:34, 35.
14. Pe faatalitalia ea e tagata o loo lagolagoina e le Atua, o le a taliaina i latou e tagata uma? Faamatala.
14 E latou te lotomalilie e oo i a i latou sauāga ona o le faia o le finagalo o le Atua. Na muaʻi lapataʻia e Iesu ona soo: “Afai ua latou faasaua mai ia te au, e faasaua foi ia te outou; afai ua latou tausia laʻu upu, latou te tausia foi la outou.” (Ioane 15:20; Mataio 5:11, 12; 2 Timoteo 3:12) O i latou o loo lagolagoina e le Atua e masani lava ona lē taliaina e le lautele, e pei foʻi ona sa iai Noa, o lē na ia taʻusalaina le lalolagi i lona faatuatua. (Eperu 11:7) I aso nei, e tatau i a i latou o loo faanaunau mo le lagolagosua a le Atua ona aua lava neʻi o latou taumafai e faalēaogāina le tāua o le afioga a le Atua, pe fesuiaʻia mataupu silisili a le Atua ina ia ʻalofia ai sauāga. E latou te iloa, talu ai latou te auauna ma le faamaoni i le Atua, o le a faapena ai foʻi ona ‘ofo ma taufaifai’ tagata i a i latou.—1 Peteru 2:12; 3:16; 4:4.
Ua Oo i le Taimi e Iloiloina ai Vala Moni
15, 16. (a) O ā fesili o le a fesoasoani i a i tatou ina ia mātaulia le vaega faalelotu o loo lagolagoina e le Atua? (e) O le ā le faaiʻuga ua faia e le faitau miliona o tagata, ma aiseā?
15 Fesili ifo i a te oe lava, ‘O le ā le vaega faalelotu lea ua lauiloa i lo latou pipiimau atu i le Afioga a le Atua, e ui lava o ana aʻoaʻoga e eseese ma talitonuga o le toʻatele o tagata? O ai o loo faamamafaina le tāua o le suafa totino o le Atua, ua oo lava ina latou faaaogā e mātaulia ai i latou? O ai o loo faasino atu ma le mautinoa i le Malo o le Atua ua na o lea le vaifofō i faafitauli uma o tagata? O ai o loo sapasapaia tapulaa tau amio a le Tusi Paia, e ui lava ina manatu nisi faapea ua fai si tuai? O ai le vaega ua lauiloa ona o le leai o sona vaega o taʻitaʻi lotu e fai ni totogi, ma o ona sui uma ua avea ma tagata talaʻi? O ai o loo viiviia i le avea o ni tagatanuu e tausia tulafono, e ui lava ina latou taumamao mai le faia o se vaega i faiga faapolotiki? O ai o loo faaaluina ma le alofa o latou taimi ma tupe e fesoasoani atu ai i isi ina ia aʻoaʻo e uiga i le Atua ma ana fuafuaga? Ma e ui lava i nei vala uma ua onomea ai ona viiviia, ae o ai o loo manatu faatauvaa pea i ai, o loo faifaia, ma sauāina pea?’
16 E faitau miliona tagata i le lalolagi aoao ua latou iloiloina māeʻaeʻa mea moni ma ua talitonu maumauaʻi ai e faapea, ua na o Molimau a Ieova lava o loo faatinoina le tapuaʻiga moni. Ua latou faia lenei faaiʻuga e faavae mai i mea o loo aʻoaʻo atu e Molimau a Ieova ma le auala o loo latou amioaʻi ai, ma faavae mai foʻi i aogā ua aumaia e la latou tapuaʻiga. (Isaia 48:17) E faitau miliona tagata o loo faapea mai, e pei ona sa valoia i le Sakaria 8:23 e faapea: “Tatou te o ma outou; auā ua matou faalogo, o loo ia te outou le Atua.”
17. Aiseā ua lē o se faamaualuga ai o Molimau a Ieova lo latou faapea atu o i latou o le tapuaʻiga moni?
17 Po ua faamaualuga ea Molimau a Ieova i lo latou faapea atu ua na o i latou lava o loo lagolagoina e le Atua? O le mea moni lava, ua leai se eseesega o lena mea ma le taimi na faapea mai ai le fanauga a Isaraelu lea sa i Aikupito, o loo lagolagoina i latou e le Atua e ui lava e leʻi ioe i ai tagata Aikupito, po o le taimi foʻi na faapea mai ai Kerisiano o le uluaʻi senituri o loo lagolagoina i latou e le Atua ae sa leʻi faapena i tagata lotu Iutaia. E tautala lava mea moni. I atunuu e 235 o loo faia ai e Molimau a Ieova le galuega na valoia mai e Iesu o le a faia e ona soo moni i le taimi o le iʻuga: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.
18, 19. (a) Aiseā e leai ai se māfuaaga o le a taofia ai fua e Molimau a Ieova le faia o la latou galuega talaʻi, e ui lava ina fesagaʻi ma teteega? (e) E faapefea ona lagolagoina e le Salamo 41:11 le mea moni faapea o loo maua e Molimau le lagolagosua a le Atua?
18 O le a faaauau pea ona faatinoina e Molimau a Ieova lenei tofiga, ma e lē taitai ona faatagaina sauāga po o teteega e taofia ai la latou galuega. E ao ona fai, ma o le a faia lava le galuega a Ieova. O taumafaiga uma sa faia e isi a o faagasolo le senituri na teʻa nei ina ia taofia Molimau mai le faataunuuina o le galuega a le Atua, sa matuā lē taulau lava, auā na folafola mai e Ieova: “O auupega uma e faia e tau ma oe e le manuia ia; o laulaufaiva uma e finau atu ia te oe i le faamasinoga e te faasalaina ia; o le tofi lena o auauna a Ieova, o a latou amiotonu foi mai ia te au lea.”—Isaia 54:17.
19 Ua sili atu ona malolosi Molimau a Ieova ma sili atu ona maelega i le taimi nei na i lo o se isi lava taimi na muamua atu—ma o loo tupu lenei mea i le lotolotoi o teteega mai le lalolagi aoao—o se faamaoniga lea o le fiafia mai o Ieova i mea o loo latou faia. Na faapea mai le tupu o Tavita: “O le mea lea ua ou iloa ai e te finagalo malie mai ia te au, ina ua le mitamita mai ia te au o lē ita mai ia te au.” (Salamo 41:11; 56:9, 11) O le a lē taitai mafaia e fili o le Atua ona latou manumalo i tagata o Ieova, auā o loo agaʻi atu pea i luma lo latou Taʻitaʻi, o Iesu Keriso, i le manumalo faaiʻu!
Pe Mafai Ona E Tali Mai?
• O ā nisi o faaaʻoaʻoga anamua o tagata sa lagolagoina e le Atua?
• O ā nisi o faailoga e mātaulia ai le tapuaʻiga moni?
• Aiseā e te talitonu maumauaʻi ai lava oe, ua iai i Molimau a Ieova le lagolagosua a le Atua?
[Ata i le itulau 13]
Ua na o le Afioga lava a le Atua e tatau ona faavae aʻe ai aʻoaʻoga a i latou o ē faanaunau e mauaina le lagolagosua a le Atua
[Ata i le itulau 15]
Ua avea toeaina Kerisiano o ni faaaʻoaʻo mo le lafu mamoe