Le Tulaga o Musika i Tapuaiga i Aso Nei

O LE usuina o pese o se mea alofa mai le Atua. O le sii aʻe o o tatou leo i le usuina o pese e mafai ona aumaia ai le fiafia ia i tatou ma Lē na Foafoaina i tatou. O lea le auala, e mafai ona faaali atu ai o tatou faalogona, o le faanoanoa ma le olioli. E sili atu i lena, e mafai ona faaleo atu ai lo tatou alofa, lo tatou tuutoina, ma viiga mo le Tupuaga o pese, o Ieova.

O le tele o faamaumauga e toluselau a le Tusi Paia e faatatau i musika e fesootai atu i le tapuaiga a Ieova. E fesootai atu foi pese i le olioli—e lē gata o le olioli o i latou o loo pepese ae faapea foi le olioli o Ieova. Na tusi le faisalamo e faapea: “Ia latou fai pesega ia te ia . . . Auā o loo fiafia Ieova i lona nuu.”—Salamo 149:3, 4.

Ae o le ā le tāua o le usuina o pese i tapuaiga i aso nei? E mafai faapefea e tagata o Ieova i aso nei ona faafiafiaina o ia e ala i le sii aʻe o o latou leo i pesega? O le ā le tulaga e tatau ona iai musika i le tapuaiga moni? O le suesueina o le talaaga o musika i tapuaiga o le a fesoasoani e taliina nei fesili.

Talafaasolopito o le Tulaga o Musika i Tapuaiga

O le uluai faamaumauga faale-Tusi Paia e faatatau i musika sa lei iai sona fesootaiga patino ma le tapuaiga a Ieova. I le Kenese 4:21, na talitonuina e faapea atonu o uluai meafaifaaili na faia e Iupalu pe atonu foi o ia na muai amataina se ituaiga o galuega tau musika. Peitai ane, sa avea musika ma vaega o le tapuaiga a Ieova e muamua atu a o lei foafoaina tagata. Ua faamatalaina e nisi o faaliliuga o le Tusi Paia agelu o loo pepese. Ua taʻu mai e le Iopu 38:7 o agelu o loo pepese olioli ma “alalaga fiafia.” O lea la, e iai mafuaaga faale-Tusi Paia e talitonuina ai e faapea o le usuina o pese i le tapuaiga ia Ieova o se faiga ua leva ona iai a o lei iai le tagata.

Ua finau mai nisi tagata suesue i talafaasolopito e faapea o musika faa-Eperu anamua sa na o leo, na aunoa ma ni meafaifaaili na fesoasoani i ai. Ae peitai, sa sili atu i le tasi le nota na mafai ona taina i le kitara i lena taimi, o se meafaifaaili sa lauiloa le taʻua i le Tusi Paia. E foliga mai na mātauina e le ʻau ta kitara le ogatasi o leo faamusika e mafai ona maua i le tuufaatasia o nota i lea meafaifaaili. Nai lo o le gata ai lava i se tulaga faigofie, e mautinoa sa agaigai i luma le tulaga o la latou musika. Ma e tusa ai ma le tulaga faafatusolo ma fātuga e faaaogā ai faamatalaga o aso taitasi o i Tusitusiga Eperu, e mafai ona tatou faapea atu sa maualuga le tulaga na iai musika a tagata Isaraelu. E mautinoa lava la, o le faagaeega mo fātuga faamusika sa sili atu ona maualuga nai lo o nuu tuaoi.

O le faamaopoopoina o tulaga o le malumalu anamua na aofia ai ma le saunia o faatulagaga tuufaatasi o laau fai musika e ō faatasi ma pesega i le tapuaiga i le malumalu. (2 Nofoaiga a Tupu 29:27, 28) Sa iai ‘ē e taʻitaʻia le pese,’ o ē “popoto,” o ē na ‘aʻoaʻoina i pese,’ ma “matai o e pepese pese.” (1 Nofoaiga a Tupu 15:21; 25:7, 8; Neemia 12:46) E tusa ma lo latou agaigai i luma i le tomai faamusika, na tusi le tusitala o Curt Sachs e faapea: “O aufaipese ma ʻau faaili i le fesootai atu ma le Malumalu i Ierusalema, ua taʻu mai ai se tulaga maualuga tau aʻoaʻoga faamusika, le tomai, ma le poto . . . E ui tatou te lē o iloa pe na faapeī fati o na musika i aso anamua, ae ua maua faamaoniga o lona malosi, lona faamamaluina ma lona tomai.” (The Rise of Music in the Ancient World: East and West, 1943, itulau 48, 101-102) O le Pese a Solomona o se faataitaiga i le tomai ma le lelei o fātuga faa-Eperu. O se tala ua fatuina faapese, ua tutusa lelei ma le libretto, po o upu o se tala ua lagi faapese. Ua taʻua lea pese i tusitusiga Eperu o “Le Pese o Pese,” lona uiga, o le pese ua silisili atu ona lelei. Mo tagata Eperu anamua, na avea le usuina o pese o se vaega tāua i le tapuaiga. Ma na faatagaina mo le faailoaga o faalogona mautinoa i la latou viiga ia Ieova.

Pesega a Kerisiano o le Uluai Senituri

Sa faaauau pea ona avea musika ma vaega o le tapuaiga a uluai Kerisiano. E faaopoopo atu i Salamo faagaeeina, e foliga mai na latou fatuina fati ma upu o uluai musika mo le tapuaiga, ua faataatia ai se faaaoaoga mo fātuga o pese faa-Kerisiano i aso nei. (Efeso 5:19) Na faamatalaina e le tusi The History of Music, na tusia e Waldo Selden Pratt e faapea:“O le usuina o pese i nofoaga faitele ma tapuaiga patino sa avea o se faiga masani mo uluai Kerisiano. Mo tagata Iutaia liulotu sa avea lenei ma tū masani faifai pea i sunako . . . E faaopoopo atu i Salamo Eperu . . . , na mātele atu le faatuatuaga fou i le saunia pea o pese lotu fou, e foliga mai o ni fātuga o faaupuga o lagona ootia e toe taʻu ma toe taʻu (rhapsodies).”a

Ua faamamafaina le tāua o le usuina o pese, ina ua faavaeina e Iesu le Talisuaga Afiafi a le Alii, e foliga mai na usuina ai e ia ma ona aposetolo le Hallels. (Mataio 26:26-30) O pese nei o viiga ia Ieova o loo faamauina i Salamo ma na usuina e fesootai atu i le faamanatuga o le Paseka.—Salamo 113-118.

Taaʻiga a Tapuaiga Sese

Na paʻū maulalo musika faalelotu e avea ma solo faanoanoa na lagi faapese ona o le Augatupulaga o le Pouliuli. Pe ā o le 200 T.A., na faapea mai ai Clement o Alexandria: “E tasi le meafaifaaili tatou te manaomia: o le leo mālie ae lē o ni kitara po o ni tagipalau po o ni fagufagu po o pu foi.” Na faamalosia faasasaaga, na faatapulaa ai le faaaogaina o musika faalelotu ae sa tele i leo. Na lauiloa lenei ituaiga faiga o se solo e lagi faapese po o ni pese tatalo. “E itiiti ifo i le fasefulu tausaga talu ona mavae atu le tulai mai o Constantinople, na faasaina ai e le Council of Laodicea (i le T.A. 367) le faaaogaina o meafaifaaili ma faapotopotoga i faiga o tū masani i tapuaiga e faia mo le lautele. O musika orthodox na manino mai sa na o leo,” o le faamatalaga lea a le tusi Our Musical Heritage. (O upu faasisipa o ā matou ia.) O nei faasasaaga sa lei faavaea mai i le uluai Faa-Kerisiano.

A o faagasolo taimi o Augatupulaga o le Pouliuli, na avea le Tusi Paia o se tusi sa seāseā maua pe faitauina e tagata lautele. O so o se Kerisiano sa iai pe faitauina foi le Tusi Paia na faasalaina ma na oo lava ina fasiotia. E letioa la ona faapea ona matuā mou atu le usuina o viiga i le Atua a o faagasolo lena vaitaimi o le pouliuli. Auā o le mea moni, afai sa lei maua e tagata lautele le Tusi Paia, sa faapefea la ona latou iloaina o le tasi vae sefulu o le Tusi Paia atoa o pese? O ai o le a na taʻuina ia i latou e faapea na faatonuina e le Atua ona tagata tapuai e “pepese ia Ieova i le pese fou, pepese i lona viiga i le faapotopotoga a ona tagata amio Atua”?—Salamo 149:1.

Le Toe Faafoisia o Musika i Lona Tulaga Tatau i le Tapuaiga

E tele mea ua faia e le faalapotopotoga a Ieova e toe faafoisia ai musika ma pesega i lo latou tulaga tatau i le tapuaiga. Mo se faaaoaoga, o le lomiga o Fepuari 1, 1896 o le Zion’s Watch Tower o loo aofia ai na o pese. Na faaulutalaina “O Uluai Pese Fiafia a Siona” (Zion’s Glad Songs of the Morning).

I le 1938 na tele lava ina lē usuina pese i sauniga a faapotopotoga. Peitai ane, na iu lava ina faasili le mulimuli atu ma le poto i faaaoaoga ma taʻiala faaaposetolo. I le tauaofiaga itumalo i le 1944, na avatu ai e F. W. Franz se lauga na taʻua “Pese o le Auaunaga o le Malo” (Song of Kingdom Service). Na ia faaalia ai o pese o viiga ia Ieova na avatua e foafoaga faalelagi a le Atua e muamua atu a o lei foafoaina le tagata ma sa faapea mai: “E talafeagai ma e faafiafiaina ai le Atua pe a sii aʻe leo o Ana auauna o loo i le lalolagi i pesega.” Ina ua maeʻa ona talanoaina faamatalaga e faatatau i le usuina o pese i tapuaiga, na ia faasilasilaina loa le tatalaina o le Kingdom Service Song Book mo le faaaogaina i sauniga mo le auaunaga faalevaiaso.b Ona faasilasila mai ai lea e le Informant (lea ua taʻua nei La Tatou Faiva o le Malo) o Tesema 1944 e faapea o le a faaaofia ai foi i isi sauniga pese amata ma pese faaiu. Ona toe avea ai lea o le usuina o pese o se vaega o le tapuaiga a Ieova.

‘Vivii Atu ma o Tatou Loto ia Ieova’

O le tāua o le usuina o pese mai le loto sa faataitaia e o tatou uso i Europa i Sasaʻe ma Aferika o ē na ogotia i tausaga e tele i mafatiaga ma sauāga. Na faaaluina e Lothan Wagner tausaga e fitu i le falepuipui na loka ai na o ia. Na faapefea ona ia onosaia? Na ia faapea mai: “Mo ni nai vaiaso sa ou uaʻi faapitoa atu ai lava i le taumafai e manatuaina pese o le Malo. Pe a ou lē iloaina se fuaiupu ou te fatuina se fuaiupu se tasi pe lua foi . . . Maeu le anoanoai o faalaeiauga ma manatu e atiina ae ai o loo aofia i a tatou pese o le Malo!”—1974 Yearbook of Jehovah’s Witnesses, itulau 226-228.

A o faagasolo tausaga e lima i le falepuipui lea na loka ai na o ia ona o lona tumau faamaoni, na maua e Harold King faamafanafanaga i le fatuina ma le usuina o pese o viiga ia Ieova. O nisi o ana fātuga o loo faaaogaina nei e Molimau a Ieova i la latou tapuaiga. O le olioli e fesootai atu i le usuina o pese e tumau pea. Ae e lē faapea seiloga o sauāga ona faatoʻā faatalitonuina ai lea o i tatou i le tāua o le usuina o viiga i le Atua.

E mafai ona maua e tagata uma o Ieova le olioli i pese. E ui lava atonu e iai ni faaletonu i le faailoaina atu o i tatou lava i upu, o o tatou faalogona agaʻi ia Ieova e mafai ona saʻoloto pe a faaleo atu i pesega. Na faaali mai e le aposetolo o Paulo le auala tatou te maua ai le olioli i le usuina o viiga, ina ua timai atu i Kerisiano ina “ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto.” (Efeso 5:19) Pe a faatumuina o tatou loto i mea faaleagaga, tatou te faaleoina atu ai i faamatalaga malolosi i pese. O lea la o le ki mo le faaleleia o le usuina o pese o le saʻo lea o uunaiga o le loto.

O le iai o se faiā lelei ma Ieova e saosaolaumea i le agaga olioli, e uunaia ai i tatou e tautatala, e pepese, ma alalaga i viiga o Ieova. (Salamo 146:2, 5) Tatou te pepese mai le loto ona o mea o loo tatou olioli ai. Ma pe afai tatou te fiafia i le pese po o upu foi o le pese, o le a sili atu ona tatou pepese ai ma le uigā.

E lē faapea seiloga e pese leotele se tasi ona iloa ai lea o loo pese atu o ia ma lagona mai le loto. E lē faapea a pese leotele ona faapea ai lea ua e pese lelei; ae e lē o se pese lelei foi pe a lē lagona atu le leo. O nisi e leo lelei atonu e tumatilatila e tusa lava pe lemu le pese. O se tasi o luʻi i le usuina lelei o pese i se faapotopotoga o tagata, o le aʻoaʻoina lea ina ia faafetaui lelei atu le leo. E tusa lava po o loo usuina le pese i se tulaga fetaui lelei ma leo o isi po o le autasi uma foi o leo, ae o le faatutusa atu o le malosi o lou leo ia i latou o loo i ou tafatafa e mālie ai ma lē salalau ai le pese. O le lotomaulalo faa-Kerisiano ma le faalogologo lelei e fesoasoani ai i se tasi e mauaina le paleni o le usuina o pese ma le agaga moni ae lē o le fia leo lagona. Peitai ane, o i latou e usuina pese ma le tomai pe lelei foi o latou leo e lē tatau ona faavaivaia mai le usu leotele. O se leo mālie e mafai ona avatua ai le lagolagosua malosi i se faapotopotoga o loo usuina viiga o Ieova.

O le usuina o pese i a tatou sauniga e mafai foi ona saunia ai se faatulagaga talafeagai i le usuina faatasi o vaega e fa o le leo. O i latou e faigofie ona iloa le autasi o se pese e aunoa ma le vaai i nota po o ē e mafai ona faitauina nota i le tusipese ma pepese ai ua faalaeiauina ia faafetaui atu i pesega ma faaopoopo atu ai i le manaia o le musika.c

Atonu e faapea mai nisi, ‘E lē mafai ona ou usuina saʻo le fati o se pese’ pe ‘E ese le leaga o loʻu leo; e paʻulua pe a oo atu i nota maualuluga.’ O lea ua leai ai so latou mautinoa pe a pepese e oo lava i le pepese faatasi i le Maota o le Malo. O le upu moni lava ia e leai se leo e alagaina viiga ia Ieova e “leaga” i lana silasila. E pei lava ona mafai ona faaleleia le leo e tautala ai se tasi pe a faataitai soo ma mulimuli i fautuaga aogā o loo aumaia i le Aʻoga o le Faiva Faatiokarate, e faapena foi ona mafai ona faaleleia ai le leo e pese ai se tasi. O nisi ua faaleleia o latou leo e ala i le usuusu e aunoa ma ni upu a o faia feau e masani ai i aso taitasi. O le usuusu e aunoa ma ni upu e fesoasoani e faaleleia ai le maualuga o le leo. Ma i taimi talafeagai a o na o i tatou pe o tatou faigaluega foi i se mea e lē o faalavelave ai i isi, o le usuina o pese o le Malo o se faiga e sili ona lelei mo le toleniina o le leo ma o lona uiga o le a avatua ai le olioli, ma toafilemu ai le mafaufau o se tasi.

E mafai foi ona tatou faalaeiau e usu ni pese o le Malo i faatasitasiga. O na ituaiga o pesega, e fesoasoani i ai ma se meafaifaaili e pei o le kitara po o se piano po o lipine foi a le Sosaiete ua uma ona pueina, e avatua ai se uiga faaleagaga i a tatou faatasitasiga. E mafai foi ona saunia ai se fesoasoani mo le aʻoaʻoina o pese ma usuina lelei i sauniga a le faapotopotoga.

Ina ia fesoasoani i le faapotopotoga e maua le agaga o le usuina o pese i sauniga, ua saunia e le Sosaiete musika ua uma ona tapueina e fesoasoani i lena tulaga. Pe a taina, o lē o loo vaaia masini faaleotele leo e tatau ona nofouta i le malosi o le leo. Afai e lē o leotele le musika, atonu e meia le faapotopotoga e pepese. A o pese faatasi le uso o loo faatonutonuina masini faaleotele leo ma le faapotopotoga, o le a mafai ai ona ia fuafua pe o taimua le musika pe leai.

Faia Pesega ia Ieova

O le usuina o pese e aumaia ai ia i tatou le avanoa e faamatalaina atu ai o tatou faalogona mo Lē na Foafoaina i tatou. (Salamo 149:1, 3) E lē o le pasae aʻe o faalogona, ae o ni faaleoga o a tatou viiga, e pulea, e fetuutuunai, ma e olioli ai. O le sasaaina atu o o tatou loto i pesega a le faapotopotoga e mafai ona aumaia ai ia i tatou le mafaufau ma le loto saʻo mo le polokalame o loo faapea ona mulimuli mai ma e mafai ona uunaia ai i tatou e faia se sao sili i le tapuaiga a Ieova. E ui lava o le usuina o pese e aafia ai faalogona, ae e mafai foi e upu ona faatonutonuina ai i tatou. E ala i le faaali atu o i tatou lava i le autasi ma le fetaui lelei, ua tatou saunia ai ma le agamalu ma le lotomaulalo o tatou loto ina ia faapea ona aʻoaʻoina faatasi ai i tatou o ni tagata ua faapotopotoina.—Faatusatusa i le Salamo 10:17.

O le a avea pea le usuina o pese o se vaega o le tapuaiga a Ieova. O lea ua ia i tatou ai le faaeaga o le auai atu e faavavau i saafiafiga a le faisalamo e faapea: “Ou te vivii atu ia Ieova a o ou ola; ou te fai pesega i loʻu Atua a o ou tumau i le ola nei.”—Salamo 146:2.

[Faaopoopoga i lalo]

[Pusa i le itulau 27]

O Nisi o Fautuaga mo le Faaleleia o le Pese

1. Ia uu i luga le tusipese pe a pese. E fesoasoani lenei i se tasi e saʻo ai le mānava.

2. Ia mānava lelei i totonu a o lei usuina fuaiupu taitasi.

3. Ia tatala tele teisi le fofoga nai lo o le mea e masani ona iai e faatelēina ai le malosi ma le lelei o le leo.

4. Ae sili ai i na mea uma, ia taulai atu i lagona o faaupuga o le pese o loo usu.