Le Auala e Fefulifulisaʻi Ai

TATOU te faafetai ona o suiga ua faapogaia e le Afioga a le Atua i o tatou olaga, ma tatou te mananaʻo foʻi ia aogā i isi. E lē gata i lenā, ua tatou iloa o le auala e tali mai ai tagata i le tala lelei, o le a faapea ona aafia ai o latou faamoemoega mo le lumanaʻi. (Mata. 7:13, 14; Ioa. 12:48) E tatou te mananaʻo moni lava iā i latou ina ia talia le upu moni. Peitaʻi, o lo tatou talitonuga maumauaʻi ma le maelega e manaʻomia ona ō faatasi ma le faautauta ina ia ausia ai le mea e sili ona lelei.

O se faamatalaga tuusaʻo o upu moni e faaalialia ai le sesē o se aʻoaʻoga e pele i se isi tagata, e tusa lava pe lagolagoina i se lisi umi o mau e sii mai i le Tusi Paia, e masani lava ona lē talileleia. Mo se faaaʻoaʻoga, afai e taʻusalaina aso faamanatu lauiloa ona e tupuga mai i faiga faapaupau, atonu o le a lē suia ai le auala o loo manatu i ai isi tagata. O se auala fetuutuunaʻi, e masani lava ona sili atu ona taulau manuia ai. O le ā e aofia ai i le fetuutuunaʻi?

Ua taʻu mai e le Tusi Paia iā i tatou e faapea “o le poto mai lugā . . . ua filemu, e agamalu [“fetuutuunaʻi,” NW].” (Iako. 3:17) O le upu Eleni lea o loo faaliliuina i le “fetuutuunaʻi” o lona uiga moni lava o le “gauaʻi atu.” O isi faaliliuga o loo faaaogā ai le “magafagafa,” “agavaivai,” po o le “faapalepale.” Seʻi mātau o le fetuutuunaʻi e fesootaʻi ma le filemu. I le Tito 3:2, o loo taʻua faatasi ai ma le agamalu, ae o loo faaeseese ai ma le faamisa. Ua uunaʻia i tatou i le Filipi 4:5 (NW) ina ia iloa i tatou e tagata uma ona o lo tatou “fetuutuunaʻi.” O se tagata e fetuutuunaʻi na te amanaʻia le talaaga, o tulaga, ma faalogona o lē o loo ia talanoa atu i ai. E lotomalie o ia e gauaʻi atu pe a talafeagai ona faia faapea. O le feagai ai ma tagata i lenā auala o le a fesoasoani lea iā i latou ina ia faigofie ona latou talia pe a tatou felafolafoaʻi ma i latou i le Tusi Paia.

Le Mea e Amata Ai. Ua lipotia mai e le tusitala o talafaasolopito o Luka e faapea, a o iai le aposetolo o Paulo i Tesalonia, sa ia faaaogā le Tusi Paia, e “faamatala ma faasino atu, na tatau ona tiga o le Keriso, ma toe tu mai i e ua oti.” (Galu. 17:2, 3) O se mea e ao ona mātauina, sa faia e Paulo lenei mea i se sunako Iutaia. O i latou na ia talanoa atu i ai, sa manatu i Tusitusiga Eperu o se pule i le faia o faaiʻuga. Na talafeagai ai la ona amata i se mea sa latou taliaina.

Ina ua tautala atu Paulo i tagata Eleni i Areopako i Atenai, sa ia leʻi amata i le faasino atu i le Tusi Paia. Na i lo lenā, na ia amata i mea ua uma ona latou iloa ma talia, ma sa ia faaaogā na mea e tataʻi atu ai i latou i se iloiloga e faatatau i Lē na Foafoaina Mea ma Ana fuafuaga.—Galu. 17:22-31.

I ona pō nei, e faitau piliona tagata o ē e lē manatu i le Tusi Paia e faapea o se pule i o latou olaga. Ae toetoe lava o olaga o tagata uma o loo aafia i tulaga faigatā i lenei faiga o mea o loo iai. Ua leva ona moomoo tagata mo se mea e sili atu ona lelei. Afai e muamua ona e faaalia le manatu mamafa i mea o loo latou popole i ai, ona faatoʻā faailoa atu ai lea o le auala o loo faamatalaina ai e le Tusi Paia, atonu o le a uunaʻia ai i latou i lenā auala fetuutuunaʻi ina ia faalogologo ai i mea o loo fai mai ai le Tusi Paia e uiga i le fuafuaga a le Atua mo tagata.

Atonu na tuufaasolo mai i se tagata aʻoga o le Tusi Paia se tofi mai ona mātua, lea sa aofia ai nisi o aʻoaʻoga ma tū faalelotu. O lea la ua iloa nei e le tagata aʻoga e lē fiafia le Atua i na aʻoaʻoga ma aganuu, ma ua faapea ona ia fulitua ese ai ona o mea ua ia aʻoaʻoina i le Tusi Paia. E mafai faapefea i le tagata aʻoga ona ia faamatala atu lenā faaiʻuga i ona mātua? Atonu e la te manatu faapea o lona fulitua ese mai le tofi faalelotu na la foaʻiina atu iā te ia, o lona fulitua foʻi lenā iā i laʻua. E ono manatu le tagata aʻoga o le Tusi Paia e faapea, a o leʻi taumafai e faaaogā le Tusi Paia e faamatala atu ai le māfuaaga o lana faaiʻuga, e manaʻomia ona ia faamautinoa i ona mātua lona alofa ma le faaaloalo mo i laʻua.

Le Taimi e Gauaʻi Ai. E ui ina iai iā Ieova le pule atoatoa e faatonu atu ai, ae ua ia faaalia le maoaʻe o le fetuutuunaʻi. I le laveaʻiina o Lota ma lona aiga mai Sotoma, sa nanati atu ai le agelu a Ieova e faapea: “Ia sola lava i le mauga ina neʻi malaia oe.” Peitaʻi, na ʻaiʻoi atu Lota: “Le Alii e [Ieova], aua lava.” Na ia ole atu e fia sola i Soara. Sa faaalia e Ieova le magafagafa mo Lota i le faatagaina o ia ina ia faia faapea; o lea ina ua faatamaʻia isi aai uma, sa faasaoina Soara. Peitaʻi mulimuli ane, sa usiusitai Lota i le uluaʻi faasinoga a Ieova ma agaʻi atu ai i atumauga. (Kene. 19:17-30) Sa silafia e Ieova e saʻo ona ala, ae sa ia faaalia ma le onosai le magafagafa seʻia oo ina malamalama ai Lota.

Ina ia taulau i le feagai ai ma isi, e manaʻomia foʻi ona tatou fetuutuunaʻi. Atonu tatou te talitonu faapea e sesē le isi tagata, ma atonu o loo iā i tatou ni faamaoniga maufaatuatuaina e faamaonia atu ai. Ae i nisi taimi, e lelei pe a aua tatou te faamalosia le mataupu. O le fetuutuunaʻi, e lē uiga i le faagutugutulua i tapulaa a Ieova. Atonu e lelei atu ai le faafetai i le isi tagata mo le talanoa mai, po o le lē tali atu foʻi i ni faamatalaga sesē ina ia mafai ai ona e tataʻi atu le talanoaga i se mea o le a tele se lelei e maua mai ai. E tusa lava pe na te taʻusalaina mea o loo e talitonu i ai, ae aua e te faaseā i ai. Atonu e te fesili atu iā te ia pe aiseā ua ia manatu ai faapena. Ia faalogologo ma le faaeteete i lana tali mai. O le faia faapea, o le a e malamalama ai i ona manatunatuga. Atonu foʻi o le a maua ai le avanoa mo ni talanoaga aogā i se taimi i le lumanaʻi.—Faata. 16:23; 19:11.

Ua foaʻiina mai e Ieova i tagata le tomai e filifili ai. Ua ia faataga i latou e faaaogā lenā tomai, e ui ina atonu o le a latou lē faaaogāina ma le atamai. I le avea o se fofoga fetalai a Ieova, sa toe faamanatu atu ai e Iosua feutagaʻiga a le Atua ma Isaraelu. Ona ia faapea atu lea: “Afai foi e leaga ia te outou ona auauna ia Ieova, ina filifili ia o outou i le aso nei, po o ai tou te auauna i ai; po o atua na auauna i ai o outou tamā, o e sa i le la itu o le vaitafe, po o atua o sa Amorī, e o latou le nuu ua outou nonofo ai; a o aʻu nei ma loʻu aiga, matou te auauna ia Ieova.” (Iosua. 24:15) O lo tatou tofiga i aso nei, o le avatu lea o se “molimau,” ma tatou te tautatala atu ma le mautinoa, ae tatou te lē taumafai e faamalosia isi ina ia talitonu mai. (Mata. 24:14) E tatau ona latou filifili, ma tatou te lē teena lenā aiā o loo iā i latou.

Fai Fesili. Ua faataatia e Iesu se faaaʻoaʻoga matilatila i le felafolafoaʻi ma tagata. Sa ia silafia o latou talaaga ma faaaogā talafaatusa e faigofie ona latou malamalama i ai. Na ia faaaogā foʻi ma le uigā fesili. O lenei mea sa maua ai e isi le avanoa e faailoa atu ai o latou manatu ma faaalia ai mea sa i o latou loto. Sa faalaeiau ai foʻi i latou ina ia manatunatu i le mataupu sa iloiloina.

Na fesili ane se aʻoaʻo o le tulafono iā Iesu e faapea: “Le aʻoaʻo e, se a se mea ou te faia ina ia ou maua ai le ola faavavau?” Sa faigofie iā Iesu ona tali atu i ai. Ae sa ia valaaulia le tamāloa ina ia faailoa ane ona manatu. “O le a ea ua tusia i le tulafono? O le a lau faitau?” Na saʻo le tali ane a le tamāloa. Pe na iʻu ai ea le talanoaga i lana tali saʻo? E leai. Sa faataga e Iesu le tamāloa e faaauau, ma o le fesili na fesiligia e le tamāloa lava ia, sa faaalia ai lona taumafai e taʻuamiotonuina ia lava. Na ia fesili ane: “O ai foi le tagata ma te tuaoi?” Na i lo le taʻu atu i ai po o ai, lea atonu e teena e le tamāloa ona o uiga sa iai o tagata Iutaia agaʻi i tagata o Nuu Ese ma tagata Samaria, sa valaaulia o ia e Iesu ina ia manatunatu i se talafaatusa. Sa faatatau le talafaatusa i se Samaria agalelei o lē na fesoasoani i se tagata malaga sa fasia ma gaoia ana mea, ae sa leʻi fesoasoani i ai se faitaulaga ma se sa Levī. I le faaaogā o se fesili faigofie, sa faamautinoa ai e Iesu ua malamalama le tamāloa. O le auala sa fefulifulisaʻi ai Iesu, sa avatu ai i le upu “tuaoi” se uiga sa leʻi faapea ona iloa muamua e le tamāloa. (Luka 10:25-37) Maʻeu se faaaʻoaʻoga e sili ona lelei e faataʻitaʻi i ai! Na i lo o lou talanoa lava na o oe, o le mea moni, ia manatunatu i le tagata o le aiga, ia aʻoaʻo le auala e faaaogā ai ma le faautauta fesili ma talafaatusa ina ia faalaeiau ai lau ʻaufaalogologo e mafaufau.

Avatu Māfuaaga. Ina ua tautala atu le aposetolo o Paulo i le sunako i Tesalonia, sa sili atu mea na ia faia na i lo o le faitau atu mai se tusi ua taliaina e lana aofia. Na lipotia mai e Luka e faapea, sa faamatala, faamaonia, ma sa avatu e Paulo se faatatauga o mea sa ia faitauina. O le iʻuga, “sa talitonu mai foi nisi o i latou, ma ua faaopoopoina i latou ia Paulo ma Sila.”—Galu. 17:1-4.

E tusa lava po o ai atonu o loo iai i lau aofia, e mafai ona aogā iai se ituaiga fulifulisaʻiga faapena. Ua moni lenā pe a e molimau atu i ou tauaiga, talanoa atu i aumea faigaluega po o aumea i le aʻoga, talanoa ma tagata ese i lau molimau atu i le lautele, faia o se suʻesuʻega faale-Tusi Paia, po o le faia o se lauga i le faapotopotoga. Pe a e faitauina se mau, atonu o loo manino iā te oe lona uiga, ae e lē o faapena i le isi tagata. Atonu i le vaai a isi tagata ua e maumaututū i lau faamalamalamaga ma lau faatatauga. Po o le a aogā ea le filifilia ma le faamatalaina o nisi o upu autū i le mau? Pe mafai ea ona e avatu ni faamaoniga lagolago, atonu e aumai i faamatalaga o loo siʻomia ai, pe aumai i se isi mau o loo feagai ma le mataupu? Pe ono faataʻitaʻia ea i se talafaatusa le talafeagai o mea ua e taʻua? Po o le a fesoasoani ea fesili i lau aofia ina ia manatunatu ai i le mataupu? O lenā auala felafolafoaʻi o le a maua ai se lagona fiafia ma avatu ai i isi le tele o mea e mafaufau i ai.