Se Lesona Mai le Tagatafolau

O LE folau toʻatasi i le vasa laolao e ono avea o se mea e vaivai ai. O le gagase o tino ona o le vaivai, e faigofie lava ona oo ai le tagatafolau i se tulaga lamatia, ma iʻu ina faia ai ni gaoioiga sesē ma faaiʻuga lē saʻo. O le māfuaaga lea e na te matuā talisapaia ai le tāua o se taula i le sami. Ua mafai e lea mea ona maua ai e le seila ua vaivai se mālōlōga ma toe faafouina ai lona malosi e aunoa ma le tafea ese atu i se tulaga lamatia. I le taimi lava lea e tasi, e uunaʻi malosi ai e le taula i le sami le taumua o le vaa e faasaga atu i le matagi ma peau o le sami ma taofiofia ai le vaa i se tulaga e sili ona mausalī.

E pei lava ona fesagaʻi seila ma le anoanoaʻi o lamatiaga i le sami, ua faapena foʻi ona fesagaʻi Kerisiano ma omiga faifai pea mai lenei lalolagi ma lagona ai le manaʻomia o se mapusaga. O le mea moni, i se tasi taimi na fetalai atu ai Iesu i ona soo e faapea: “Ina o mai ia, tau lava o i tatou, i se mea tuufua, seʻi tou mapu ae teisi.” (Mareko 6:31) I aso nei, atonu e faaalu ai e nisi ni nai vaiaso mo ni faiga malaga pe e ō ese atu mo se faaiʻuga o se vaiaso ina ia mālōlō faatasi ma o latou aiga. O nei taimi e mafai ona faafouina ai ma toe maua ai le malosi. E mafai la faapefea ona tatou faamautinoa o loo tatou saogalemu faaleagaga i na taimi? O le ā e mafai ona avea ma o tatou taula faaleagaga i le sami ina ia fesoasoani ai ia i tatou e tetee i le tafetafea ese atu ma mafai ai ona tumau pea?

Ua faia ma le lima foaʻi e Ieova se sauniuniga mo i tatou. E leai lava se isi mea na i lo o lana Afioga Paia, le Tusi Paia. O le faitau i ai i aso taʻitasi, e mafai ai ona tatou vavalalata atu ia Ieova ma lē taitai ai ona tafetafea ese mai ia te ia. O fautuaga a le Tusi Paia e mafai ona faatumauina ai i tatou ma mafai ai ona tatou tatalia faaosoosoga a Satani ma lana lalolagi. O lo tatou tausisia pea o se polokalame faifai pea o le faitauina o le Tusi Paia, e tusa lava po ua tatou lē faia la tatou faasologa masani, ae e mafai ona faamausalīina ai faaleagaga i tatou.—Iosua 1:7, 8; Kolose 2:7.

Ua faamanatu mai e le faisalamo ia i tatou e faapea, ‘amuia [pe e fiafia] le tagata o lē e “naunau o ia i le tulafono a Ieova, e mafaufau foi o ia i lana tulafono i le ao atoa ma le po.” (Salamo 1:1, 2) O le faitauina o le Afioga a le Atua i aso taʻitasi o le a tatou maua ai le iʻuga “fiafia” o le faafouina moni ma toe faamalosia ai, ma nofosauni ai e faaauau pea i o tatou ala faa-Kerisiano.

Pe E te Talia se Asiasiga?

E oo lava i lenei lalolagi ua tumu i faalavelave, e mafai lava ona e maua ai le fiafia mai le poto saʻo o le Tusi Paia e uiga i le Atua, lona Malo, ma lana fuafuaga matagofie mo tagata. Afai e te fia iloa nisi faamatalaga atili pe manaʻo foʻi e asiasi atu se tasi e faia se suʻesuʻega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Samoa, po o se tuatusi talafeagai o loo lisiina mai i le itulau e 2.