Taumafa Faaleagaga i Ona Itu Aso
1. Ua faapefea ona faataunuuina le Esekielu 36:29 i aso nei?
1 Ua faapea ona fetalai mai le Alii Silisili Ese o Ieova: “Ou te valaau foʻi i le saito, ma ou faatuputeleina, a e ou te lē tuu atu se oge iā te outou.” (Eseki. 36:29) Ua faatatauina na upu faavaloaga i tagata o le Atua i aso nei. I se tulaga faafaatusa, ua faatuputeleina e Ieova le saito mo le mauaina o le ola mo ona tagata. O taumafa faaleagaga ua saunia i ona itu aso i a tatou tauaofiaga, ua faataʻitaʻia lelei mai ai lenei tulaga.
2. Ua faapefea ona faaaogā e Ieova tauaofiaga itumalo e aumaia ai taumafa faaleagaga i ona itu aso e tatau ai?
2 I le tauaofiaga na faia i Kolomepia, Ohio, i le 1931, na taʻitaʻia ai e Ieova ona tagata tapuaʻi e taliaina se igoa fou—Molimau a Ieova. (Isa. 43:10-12) O le 1935 na faamaninoina mai ai ma le tonu le motu o tagata e toʻatele o loo i le Faaaliga 7:9-17. I le 1942, na faia ai e le uso o Knorr le lauga “Filemu—Pe e Mafai Ona Tumau?” O lenā lauga na faamamafa ai le faia o le galuega talaʻi i le lalolagi atoa, ma oo ai ina faatūina le Aʻoga Faale-Tusi Paia o le Olomatamata a Kiliata. E ui lava o nisi o tauaofiaga sa faapitoa ona mataʻina, ae o tauaofiaga taʻitasi sa laulauina ai le anoanoaʻi o taumafa lelei faaleagaga sa aumaia i ona itu aso e tatau ai.—Sala. 23:5; Mata. 24:45.
3. O le ā e tatau ona tatou faia ina ia maua ai aogā mai le faigaʻai faaleagaga i a tatou tauaofiaga itumalo?
3 Po o E Taumafa i Meaʻai Aogā? E mafai ona siʻosiʻo i tatou i taumafa ae e tatou te lē o mauaina aogā pe afai e tatou te lē o taumafai e faaaogā. (Faata. 26:15) E faapena foʻi i se uiga faaleagaga. I ni nai tauaofiaga, na mātauina ai faapea o le toʻatele lava o tagata, sa feoaʻi solo ae sa lē manaʻomia ona faia faapea po o le talanoa foʻi i isi a o faagasolo le polokalame. E ui lava e tāua le talatalanoa faatasi ma isi i le tauaofiaga, ae o le taimi mo lenā fuafuaga e faia a o leʻi amata ma le taimi e uma ai le tauaofiaga. (Fai. 3:1, 7) Afai e tatou te lē o nonofo i o tatou nofoa ma uaʻi totoʻa atu, ua tatou misia la se manatu tāua. Mai lea taimi i lea taimi, e manaʻomia ai e uso o loo vaaia matagaluega taʻitasi, ona talanoaina ma uso o loo iai tofiga i le tauaofiaga mea e faatatau i le tauaofiaga a o faagasolo le polokalame. Ae afai e lē o faia na mea, e tatau iā i latou ona faia se faataʻitaʻiga lelei e ala i lo latou uaʻi atu i le polokalame. E lē tatau i se tasi o i tatou ona misia so o se taumafa faaleagaga ua saunia.—1 Kori. 10:12; Fili. 2:12.
4. E faapefea ona tatou faaalia le loto talisapaia mo le anoanoaʻi o taumafa faaleagaga ua saunia e Ieova?
4 Maʻeu lo tatou olioli i le anoanoaʻi o taumafa lelei faaleagaga ua saunia e Ieova, ua ese mai i aʻoaʻoga sesē lē aogā a ē o loo faapea mai o Kerisiano! (Isa. 65:13, 14) O se tasi o auala e tatou te faaalia ai lo tatou “saga faafetai,” e ala lea i le vaai i le tauaofiaga o se avanoa e aʻoaʻoina ai e Ieova. (Kolo. 3:15) Vaai i le feʻau o loo aumaia e le uso o loo faia le lauga, o le feʻau o loo sau mai lo tatou “Aʻoaʻo Sili.” (NW) (Isa. 30: 20, 21; 54:13) Ia uaʻi atoatoa atu. Fai ni faamaumauga pupuu o manatu autū. Toe autalu manatu tāua o le polokalame i afiafi taʻitasi. Ia faatatauina mea ua e aʻoaʻoina.
5. O ā mea e tatou te olioli ai ua aumaia e tauaofiaga itumalo?
5 O tauaofiaga uma lava i lenei itu o Amaketo, pe fai i se nofoaga o tagata sulufaʻi, i atunuu o faia ai taua, po o se nofoaga telē e toʻafimālie, o se manumalo lea iā Satani! I le avea ma ʻauuso autasi, e tatou te faapelepele ai i lo tatou avanoa e tatou te ofaga potopoto ai i tauaofiaga itumalo. (Eseki. 36:38) E tatou te mautinoa le toe saunia foʻi ma le agalelei e Ieova o ‘mea ʻai i ona itu aso’ mo i tatou.—Luka 12:42.
[Pusa i le itulau 4]
Faaalia le Lotofaafetai i le Laʻoʻai a Ieova
◼ Uaʻi totoʻa atu
◼ Faamau manatu autū
◼ Toe autalu manatu tāua o le polokalame i afiafi taʻitasi
◼ Faatatau mea ua e aʻoaʻoina