Ia Faaauau Ona Talaʻi
1 Ua tatou iai nei i aso faigatā. O feteenaʻiga i totonu o se atunuu lava ia, taua i le va o lanu, mala faalenatura, ma isi lava mea tutupu e faateʻia ai, ua i so o se mea lava. O lea la, e leai se isi taimi ua sili ona manaʻomia ai e tagata ni tala lelei na i lo le taimi nei. Ae peitaʻi, ua taatele le lē ano i mea faaleagaga. I nisi o vaipanoa, e ono faigatā ai ona maua tagata i o latou aiga ma ua sili atu ona faigatā ona maua tagata e fia faalogo iā i tatou po o i latou foʻi e mananaʻo e suʻesuʻe le Tusi Paia. E ui i lea, e matuā tāua tele lo tatou faaauau ona talaʻia le tala lelei o le Malo o le Atua lea ua faavaeina nei.—Mata. 24:14.
2 Alofa i Tagata: Ua faamamafa e la tatou talaʻiga le alofa o Ieova mo tagata. “Ua lē finagalo ia fano se tasi, a ia oo uma lava i le salamo.” (2 Pete. 3:9; Eseki. 33:11) O lea la, ua filifili Ieova e pei ona taʻua e Iesu, “ia muaʻi talaʻiina foʻi le tala lelei i nuu uma lava e ao ai.” (Mare. 13:10) Ua uunaʻia e le Atua tagata e liliu atu iā te ia ma ʻalofia ai le faaumatiaga o le lalolagi a Satani o loo fotuaʻi mai. (Ioe. 2:28, 29, 32; Sefa. 2:2, 3) Pe tatou te lē lotofaafetai ea iā Ieova i le faasafua mai o lenā avanoa iā i tatou?—1 Timo. 1:12, 13.
3 Ua faaalia i le lipoti i le lalolagi aoao e faapea, i le tausaga faaleauaunaga o le 2004, na faia ai i masina taʻitasi i se fua faatatau ia suʻesuʻega faale-Tusi Paia e 6,085,387 ma i se fua faatatau pe tusa e 5,000 soo fou e papatisoina i vaiaso taʻitasi! O nisi o nei tagata fou tuuina atu na maua, ona o le faamanuia a Ieova i le faaauau pea ma le lē faavaivai o tagata talaʻi na faia ni taumafaiga e talanoa atu ai i tagata uma i oganuu ua tofia i ai i latou. Maʻeu le olioli ua maua mai ai i faapotopotoga, ma maʻeu se faaeaga o le galulue faatasi ma le Atua i lenei galuega faasaoola!—1 Kori. 3:5, 6, 9.
4 Viia le Suafa o le Atua: E tatou te faaauau ona talaʻi ina ia viia Ieova i le lautele ma faapaiaina lona suafa i luma o tagata uma. (Epe. 13:15) Ua faasesēina e Satani “le lalolagi uma” e talitonu faapea e leai se malosi o i le Atua e foʻia ai faafitauli o tagata, ma e lē o ano mai i puapuaga o tagata, po o le faapea foʻi e lē o soifua o ia. (Faaa. 12:9) E ala i la tatou talaʻiga, ua tatou puipuia ai le upu moni e faatatau i lo tatou Tamā mamalu faalelagi. Seʻi o tatou faaauau pea ona viia lona suafa—i le taimi nei e oo i le faavavau.—Sala. 145:1, 2.