E Faapefea Ona Molimau Atu i Aiga?

1. Aiseā e manaʻomia ai le faautauta pe a molimau atu i aiga?

¹ Maʻeu se fiafiaga tele o le a tatou maua pe a ulu atu i le lalolagi fou faatasi ma o tatou aiga pele, ma autasi ai ma i latou i le tapuaʻiga iā Ieova! O lea la, o le molimau atu i o tatou aiga, o le a latou iloa ai le auala e tapuaʻi ai iā Ieova ma maua ai le faamoemoe o le ola i le lalolagi fou. Ae peitaʻi, o le molimau atu i aiga i se uiga e faagaeetia ai i latou, e manaʻomia ai le faautauta. Na mātau e se ovasia o le matagaluega e faapea: “E maua iʻuga lelei e i latou e talanoa i ni mataupu e faagaee ai le fia iloa o latou aiga, mai lea taimi i lea taimi.” E faapefea ona tatou faia lea mea?

2. E faapefea i lo tatou naunau moni i o tatou aiga ona fesoasoani iā i tatou e faagaee lo latou fia iloa?

² Ia Faagaee lo Latou Fia Iloa: Ia muaʻi mafaufau lelei i le auala o le a e faagaee ai le fiafia o tagata o lou aiga. (Faata. 15:28) O ā mea o popole ai? O ā ni luʻi o latou fesagaʻia? Atonu e te faaalia iā i latou se mataupu pe taʻua foʻi se mau e iai se mea o loo fiafia faapitoa i ai. Afai e lē o latalata mai le mea e nonofo ai tagata o le tou aiga, atonu e mafai ona e tusi atu se tusi po o le telefoni atu foʻi i ai. Na i lo le soona saputu atu i ai o mea iā i latou, ia lūlū pea fatu o le upu moni, ma faamoemoe iā Ieova o ia e na te faatupuina.—1 Kori. 3:6.

3. E faapefea i le fiafia o tatou aiga iā i tatou ona tatala ai le auala e molimau atu ai?

³ Na faatonu e Iesu se tamāloa lea sa ia tutuli ese ai le tele o temoni: “Alu atu ia oe i lou fale, i lou aiga, ma ia e taʻu atu iā te i latou mea tetele ua faia e le Alii iā te oe, ma lona alofa iā te oe.” (Mare. 5:19) Seʻi manatu i lagona o le aiga o lenei tamāloa na iai! O lea, e ui lava e leʻi oo iā te oe se mea mataʻina faapena, ae atonu o loo naunau ou aiga i au gaoioiga po o gaoioiga a lau fanau. O le taʻua o se lauga na e faia i le Aʻoga Faatiokarate, se tauaofiaga sa e auai atu i ai, o se asiasiga i Peteli, po o se mea mataʻina na e ausia, e ono tatala ai se ala mo oe e tufa atili atu ai iā i latou se mea e faatatau iā Ieova ma lana faalapotopotoga.

4. O ā ni toʻatugā e tatau ona ʻalofia pe a molimau atu i aiga?

⁴ Ia Faautauta: Pe a molimau atu i aiga, ia ʻalofia le soona taʻu atu i ai o mea uma i le taimi e tasi. Na taʻua e se uso le taimi na ia amata ai ona suʻesuʻe le Tusi Paia e faapea: “Sa ou faamatala atu i loʻu tinā le anoanoaʻi o mea ma faamatala e toetoe lava o mea uma na ou aʻoaʻoina mai le Tusi Paia, ma sa masani lava ona oo atu ai i ni finauga, aemaise lava i loʻu tamā.” E tusa lava po ua faaalia e se tagata o le aiga le fiafia i le feʻau o le Tusi Paia, ae ia tali atu i se auala e fiafia ai pea le tagata o le aiga e fia iloa atili. (Faata. 25:7) Ia faaalia pea le faaaloalo, agalelei, ma le onosai, e pei lava ona e faaalia i se tagata ese a o e auai i le faiva.—Kolo. 4:6.

5. O le ā e tatau ona tatou fai i o tatou aiga e lē o tali lelei mai pe a tatou molimau atu iā i latou?

⁵ I se tasi taimi, na manatu ai le aiga o Iesu faapea ua valea. (Mare. 3:21) Ae peitaʻi, mulimuli ane, na avea nisi o i latou ma ē talitonu. (Galu. 1:14) Pe a lē taulau au uluaʻi taumafaiga e tufa atu le upu moni i ou aiga, aua le faavaivai. E mafai ona suia tulaga ma uiga o tagata. Ia faaauau ona vaai i se isi avanoa e tufa atu ai se manatu e uunaʻia ai lo latou fia iloa. Atonu o le a e maua le fiafia i le fesoasoani iā i latou e amata savavali i le ala i le ola e faavavau.—Mata. 7:13, 14.

Le Tala e Fai Atu e Uiga i Mekasini

Le Olomatamata Tese. 1

“O se tasi o uiga e ese ai tagata mai manu, o lo latou tomai lea e iloa ai le saʻo mai le sesē. Ae e faanoanoa lava, ona o loo faia e tagata mea sesē. O le ā sou manatu, aiseā ua ala ai ona faapea? [Faatali mo se tali. Ona faitau lea o le Ieremia 17:9 po o le Faaaliga 12:9.] O loo talanoaina i lenei mekasini auala tatou te maua ai fesoasoani e iloa ai ma faia le mea ua saʻo.”

Awake! Tese. 8

“O le alualu i luma o le tomai o tagata ua lē suia ai le manaʻoga masani o tagata e faia ni faauōga. Ae po ua e mātauina ea suiga ua iai i tagata, ua faigatā ai i aso nei ona ati aʻe ni faauōga māfana? [Faatali mo se tali. Ona faitau lea o le Faataoto 18:24.] O loo talanoaina i lenei mekasini le auala e faia ai uō ma faatumauina ai uō moni.”

Le Olomatamata Tese. 15

“I le taimi lenei o le tausaga, e tele auala e manatua ai e tagata i le lalolagi le taimi na soifua mai ai Iesu. Pe e te silafia o loo faafesootaʻi atu e valoaga o le Tusi Paia le soifua mai o Iesu ma le filemu tumau? [Faatali mo se tali. Ona faitau lea o le Isaia 9:6, 7.] O loo faamatalaina e lenei mekasini le auala o le a faataunuuina ai le filemu.”

Awake! Tese. 22

“Po ua e mātauina ea e foliga mai o loo tuu atu e tagata le faamamafaga i foliga vaaia? [Faatali mo se tali.] O loo faamatalaina e lenei mekasini nisi o lamatiaga o le soona faamamafa o foliga lalelei. O loo faamatilatila mai ai foʻi le tāua o le ituaiga o lalelei lea e sili atu ona tāua.” Faitau le 1 Peteru 3:3, 4.