Le Auala e Faaaogā ai Taulimaga Faataʻitaʻi

1. O le ā so tatou manatu i le taulimaga faataʻitaʻi ua saunia?

¹ O taulimaga faataʻitaʻi mo le ofoina o a tatou mekasini ma isi lomiga, o loo aumaia e lē aunoa i La Tatou Faiva o le Malo. A o auai i le talaʻiga, e lē manaʻomia ona tatou toe faia nei taulimaga e pei ona tusia ai. Ua saunia ina ia maua ai se manatu i mea e tatou te ono fai atu ai. O le a sili atu ona aogā pe a tatou faia taulimaga i a tatou lava upu. O le talanoa atu e pei ona masani ai, e fesoasoani e faatoʻafilemu ai le tagata ma faaalia ai le lelei o o tatou loto, ma le mautinoa i le upu moni.—2 Kori. 2:17; 1 Tesa. 1:5.

2. Aiseā e manaʻomia ai ona tatou amanaʻia tū ma aganuu a o sauniuni a tatou taulimaga?

² Ia Fetuunaʻi Lau Taulimaga: E telē se aafiaga o la tatou taulimaga o le tala lelei ona o tū ma aganuu a le atunuu. Pe e mafai ona fai la oulua feiloaʻiga ma le tagata o le aiga ona tataʻi atu lea o lau taulimaga i le faia o se talanoaga, pe e faatalitalia e tagata o le oganuu e fai saʻo atu lau taulimaga? E eseese vaipanoa ma e eseese foʻi tagata. E manaʻomia foʻi le faautauta pe a faaaogā fesili. O fesili e talafeagai i nisi vaipanoa e ono lē lelei i le faafofoga a tagata i le isi vaipanoa. O lea, e ao ona tatou faaaogā le utaga mamao ma fetuunaʻi la tatou taulimaga e tusa ma le mea e taliaina e lea vaipanoa.

3. Aiseā e amanaʻia ai le talaaga ma mafaufauga o tagata tatou te talanoa atu i ai?

³ E manaʻomia ona o tatou iloa le talaaga ma mafaufauga o tagata o la tatou oganuu pe a sauniuni mo le talaʻiga. Mo se faataʻitaʻiga, a e talanoa e faatatau i le Mataio 6:9, 10, atonu e lē tutusa lau talanoa i le tagata e toʻaga i le lotu Katoliko, ma se tagata e lē iloa le tatalo a le Alii. O le utaga mamao e fesoasoani e fetuutuunaʻi ai la tatou taulimaga, ina ia sili atu ai ona logolelei i tagata tatou te feiloaʻi.—1 Kori. 9:20-23.

4. Aiseā e talafeagai ai le lelei o sauniuniga?

⁴ E tusa lava pe tatou te fuafua e faaaogā se taulimaga faataʻitaʻi e pei ona tusia, ae leai lava se mea e tutusa ma sauniuniga lelei. E ao ona tatou faitauina lelei le mataupu lea e tatou te mananaʻo e faaaogā ma suʻe i manatu e faagaee ai le fiafia o le tagata. Ona faaaofia lea i la tatou taulimaga. O le iloa lelei o a tatou lomiga e mafai ona tatou ofo atu ai ma le aasa.

5. Aiseā e tatou te sauniunia ai se isi taulimaga, ma e faapefea ona tatou faia?

⁵ Isi Taulimaga Aogā: Pe e na o taulimaga faataʻitaʻi e mafai ona tatou faaaogāina? E leai. Afai e sili atu ona e fiafia i se isi taulimaga po o se isi mau, ia faaaogā lenā. Aemaise lava i mekasini, ia mataala i avanoa e faamatilatila atu ai isi mataupu e ono fiafia i ai tagata i le oganuu. Pe a faataʻitaʻi taulimaga i le Sauniga o le Auaunaga, ia fuafua e fai ni faataʻitaʻiga e aogā i le oganuu. O le faia faapea e fesoasoani ai i tagata uma lava e tuuina atu le tala lelei i se auala aogā.

Le Tala e Fai Atu e Uiga i Mekasini

Le Olomatamata Ianu. 1

“E tele lotu ua latou aʻoaʻoina faapea e ao i tagata ona alolofa atu i o latou tuaoi. [Faitau le Mataio 22:39.] O le ā sou taofi, aiseā ua aafia ai lotu i le tele o taua ma feteenaʻiga i le lalolagi? [Faatali mo se tali.] O loo iloiloina i Le Olomatamata lenei le fesili, Pe e mafai e lotu ona autasia tagata uma?”

Ala Mai! Ianu.-Mati

“E toʻatele tagata ua latou iloa le tāua o le aʻoaʻoina o tamaiti mai lava o laiti. Po o e silafia ea le manaʻomia o le faia faapea i aso nei? [Faatali mo se tali. Ona faitau lea o le Faataoto 22:6.] O loo faamatalaina i lenei Ala Mai! mea patino e fai e mātua e fesoasoani ai i a latou fanau e tutupu aʻe ai e avea ma tagata faamaoni ma taulau manuia i le olaga.”

Le Olomatamata Ianu. 15

“E moomoo tagata ina ia manuia olaga o o latou aiga, ae e faigatā ona maua se olaga lelei. O le ā sou taofi, pe e mafai ona tatou pulea mea e tutupu i o tatou olaga? [Faatali mo se tali.] O loo iai mau o le Tusi Paia i lenei mekasini, e faaalia ai e mafai ona tatou pulea mea e tutupu i o tatou olaga, ae e faalagolago i filifiliga tatou te faia i le taimi nei.” Faitau le Teuteronome 30:19.

Awake! Ianu. 22

“Tatou te talisapaia pe a malamalama se fomaʻi i o tatou faalogona. Ae o le ā sou taofi, pe e toʻatele ni tagata gasegase e manatu mamafa i faalogona o fomaʻi? [Faatali mo se tali.] E tilofaʻia e lenei mekasini luʻitau e fesagaʻia e fomaʻi, ma le mea o le a tupu i togafitiga faafomaʻi.” Faitau le Isaia 33:24.