⁶ O se Leoleo Mamoe Alofa: E naunau le ovasia o le suʻesuʻega tautusi iā i latou e laʻitiiti se sao e faia i le galuega talaʻi ona o o latou tulaga. E tatau ona ia faailoa atu le fuafuaga mo i latou ua lē o toe mafai ona fai ni mea se tele i le auaunaga i le fanua ona ua matutua i tausaga, ua lē toe mafai ona savavali, po ua faataotolia foʻi i maʻi tigāina po o ni manuʻa, ina ia lipoti atu le 15 minute pe afai e lē mafai ona lipotia se itula atoa i le masina. (O le Komiti o le Auaunaga a le Faapotopotoga e filifilia po o ai e tatau i ai lenei fuafuaga.) E tatau foʻi ona naunau o ia iā i latou ua tofia atu i lana vaega o ē atonu ua lē toe talaʻi, e fesoasoani iā i latou ina ia toe amata ona galulue faatasi ma le faapotopotoga.—Luka 15:4-7.

Le Tala e Fai Atu e Uiga i Mekasini

Le Olomatamata Oke. 1

“O loo taumānatu le toʻatele pe o le a iai ea se taimi e faaiʻuina ai faalavelave uma o loo siʻomia ai i tatou—o taua, solitulafono, ma faiga tau faamataʻu. O le ā sou taofi i ai? [Tuu le avanoa mo se tali.] O loo aumaia e le Tusi Paia se faamautinoaga e faamāfanafanaina ai. [Faitau Salamo 37:10, 11.] E faamatalaina e lenei mekasini le māfuaaga ua lē o faamutaina ai e le Atua i le taimi nei ia faiga amioleaga ma tulaga mafatia ua faapogaia mai ai.”

Ala Mai! Oke.-Tese.

“E toʻatele tagata e manatu i taaloga faitupe o se mea masani e faafiafia ai. O isi ua manatu e faaleagaina ai aiga ma se sosaiete i le tele o vaipanoa. O le lomiga lenei o le Ala Mai! o loo talanoaina ai taaloga faitupe e tusa ai o ni saʻiliʻiliga auʻiliʻili ua lomiaina talu ai nei. Atonu e te naunau foʻi e faitau i le auala e fesootaʻi ai mataupu silisili o le Tusi Paia ma lenei mataupu.” E pei o se faataʻitaʻiga, faitau le 1 Timoteo 6:10.

Le Olomatamata Oke. 15

“E faapefea ona e faamatala atu i tamaiti ma isi tagata le pogai ua tele ai mea leaga ua tutupu i aso nei? [Tuu le avanoa mo se tali.] Ua taliina e le Tusi Paia le fesili, ʻO Ai ua Faapogaia Mea Leaga Uma?’ [Faitau 1 Ioane 5:19.] O le a fesoasoani lenei lomiga o Le Olomatamata e faamalamalama iā te oe po o ai lē o loo leaga ma le auala e tatou te tetee atu ai iā te ia.”

Awake! Oke. 22

“Pe e te manatu e mafai e tatalo a taʻitaʻi lotu po o so o se tasi lava ona aumaia ai le filemu i le lalolagi? [Tuu le avanoa mo se tali.] Ua folafola mai e le Tusi Paia se taimi o le a filemu ai le lalolagi. [Faitau Isaia 9:6, 7.] Pe na e mātauina o le a iai se taʻitaʻi faapitoa o le a ia aumaia le filemu i le lalolagi? O le a faailoa atu e le lomiga lenei o le Awake! po o ai lenā taʻitaʻi ma le auala o le a ia aumaia ai le filemu moni.”