E Manaʻomia Lau Fesoasoani Atu

¹ “E matou te faafetai tele lava mo mea uma ua e faia mo i matou. E telē lava le aogā o au gaoioiga o loo faia iā i matou.” O lenā faaupuga o loo faamatala lelei ai lagona o le lotofaafetai mo a tatou toeaina ma auauna o le faiva. A o faasolosolo ina telē le faalapotopotoga a le Atua, o loo iai se manaʻoga faifai pea mo tane taʻumatuaina e auauna ai i le toetoe lava 100,000 faapotopotoga i le lalolagi aoao. Afai o oe o se uso ua papatisoina, e manaʻomia la lau fesoasoani.

² “Aapa Atu”: E faapefea ona e aapa atu mo faaeaga faaopoopo o le auaunaga? (1 Timo. 3:1, NW) O le mea tāua, o le faataatia o se faaaʻoaʻoga lelei i vala uma o lou soifuaga. (1 Timo. 4:12; Tito 2:6-8; 1 Pete. 5:3) Ia faia se sao atoatoa i le galuega talaʻi, ma fesoasoani i isi e faia faapea. (2 Timo. 4:5) Ia naunau moni mo le lelei o uso talitonu. (Roma 12:13) Ia avea o se tagata aʻoga lelei o le Afioga a le Atua, ma ia ati aʻe le “tomai o le aʻoaʻo atu.” (Tito 1:9, NW; 1 Timo. 4:13) Ia maelega i le tausia o tofiga ua tuuina atu iā te oe e toeaina. (1 Timo. 3:10) Afai o oe o se ulu o se aiga, ia ‘pule lelei i lou lava aiga.’—1 Timo. 3:4, 5, 12.

³ O le galue ai o se auauna po o se toeaina, e aofia ai galuega fitā ma e manaʻomia ai se agaga faataulaga. (1 Timo. 5:17) O lea la, o le aapa atu, ia taulaʻi i le auauna atu i isi. (Mata. 20:25-28; Ioa. 13:3-5, 12-17) Ia mafaufau i le tulaga o Timoteo, ma faataʻitaʻi atu iā te ia. (Fili. 2:20-22) I le pei o ia i lana amio lelei, ia taʻuleleia oe e lau amio lelei. (Galu. 16:1, 2) A o e ati aʻe uiga faaleagaga manaʻomia e taulimaina ai faaeaga faaopoopo, ma faatatau so o se fautuaga e faaleleia atili ai ua e maua, o le a “iloa ai e tagata uma lou alualu i luma.”—1 Timo. 4:15.

⁴ Mātua e, ia Toleni Fanau Laiti e Fesoasoani Atu: E mafai ona aʻoaʻoina fanau e fesoasoani atu, mai lava i o latou uluaʻi tausaga. Toleni i latou e uaʻi atu i sauniga, i talaʻiga, ma ia avea o ni faataʻitaʻiga lelei i le Maota o le Malo ma totonu i le aʻoga. Ia aʻoaʻoina i latou e fai sa latou vaega ma ia fiafia e fesoasoani atu i isi, ma le faia o mea e pei o le fesoasoani i le faamamāina o le Maota o le Malo, fesoasoani atu i ē matutua, ma isi mea. Ia tuu atu i latou ia maua le fiafia i le fesoasoani atu i isi. (Galu. 20:35) O lea toleniga e fesoasoani iā i latou i le avea o ni paeonia, ni auauna o le faiva, ma toeaina mo a taeao.

Vaega 4—Faia o Suʻesuʻega Faale-Tusi Paia e Agaʻigaʻi i Luma

Toleni Tagata Aʻoga ia Sauniuni

¹ O le tagata aʻoga e muaʻi faitau i le lesona, vase tali ma mafaufau i le auala e faamatala ai i ana lava upu, e masani lava ona vave faia se agaʻigaʻi i luma faaleagaga. O lea la, o le taimi lava e faamautū ai le faia e lē aunoa o se suʻesuʻega, ona sauniuni faatasi loa lea ma le tagata aʻoga se lesona ina ia faaali ai le auala e sauniuni ai. O le toʻatele lava o tagata aʻoga, e lelei ona sauniuni faatasi se mataupu atoa po o se lesona atoa.

² Ia Faailoga Tali ma Fai ni Faamaumauga i Autafa o le Palakalafa: Ia faamatala le auala e suʻe ai tali i fesili o loo i ai. Faaali i le tagata aʻoga lau kopi o le lomiga lea e te lua suʻesuʻe ai lea ua faailoga na o upu ma faaupuga autū. A o lua suʻesuʻeina le mataupu, atonu e manaʻo le tagata e mulimuli i lau faaaʻoaʻoga, i le faailoga i lana kopi na o mea o loo manaʻomia e fesoasoani iā te ia e manatua ai le tali. (Luka 6:40) Ona fesili atu lea iā te ia e fai mai lana tali i ni ana lava upu. O le faia faapea e te iloa ai po o le ā le tele o loo ia malamalama ai i le mataupu.

³ O le iloiloina o mau e lē o siiina mai, o se vala tāua o le sauniuniga a le tagata aʻoga. (Galu. 17:11) Fesoasoani i le tagata ia iloa o mau faasino taʻitasi, o loo lagolago ai se manatu i le palakalafa. Faaali iā te ia le auala e fai ai ni nai faamaumauga pupuu i autafa o palakalafa o lana lomiga o loo suʻesuʻeina. Ia faamamafa iā te ia le manatu faapea, o le Tusi Paia o le faavae lea o mea o loo ia aʻoaʻoina. Ia faalaeiau o ia ina ia faaaogā mau faasino i ana tali a o faagasolo le suʻesuʻega.

⁴ Fai se Aotelega ma se Autaluga: A o leʻi amata sauniuniga auʻiliʻili a le tagata aʻoga i le mataupu o le a suʻesuʻeina, e lelei ona ia mauaina se aotelega o le mataupu. Faasino i ai e mafai ona ia fuaina le mataupu i le iloiloina puupuu o le ulutala, tamaʻi ulutala, ma ata o loo iai. Faamatala faapea, a o leʻi faauma lana sauniuniga, e lelei ona faaalu se taimi e toe autalu ai manatu tāua o loo aumai i le lesona, atonu e faaaogā le pusa mo le autaluga pe afai o loo iai. O le toe faia o se autaluga, e tāmau ai manatu o le suʻesuʻega i le mafaufau.

⁵ O le toleniina o le tagata aʻoga ia sauniuni lelei mo lana suʻesuʻega, o le a fesoasoani ai iā te ia e faia ni tali uigā i sauniga a le faapotopotoga. O le a fesoasoani foʻi iā te ia e ati aʻe ai se masaniga o le suʻesuʻe, lea o le a aogā iā te ia pe a māeʻa lana suʻesuʻega faale-Tusi Paia lea o loo faia.