Vaega 6—Faia o Suʻesuʻega Faale-Tusi Paia e Agaʻigaʻi i Luma

Pe a Lāgā e le Tagata Suʻesuʻe se Fesili

¹ Pe a oo loa ina solosolo lelei se suʻesuʻega faale-Tusi Paia, o le a sili ona lelei le talanoa faasolosolo o aʻoaʻoga o le Tusi Paia na i lo o le osooso solo. E fesoasoani lenei mea i le tagata suʻesuʻe ina iloa lelei le faavae o le poto saʻo, ma agaʻigaʻi ai i luma faaleagaga. (Kolo. 1:9, 10) Ae e masani lava ona fesili le tagata suʻesuʻe i ni mataupu eseese a o faagasolo le suʻesuʻega. E faapefea la ona taulimaina nei fesili?

² Ia Faautauta: O fesili e lāgā e faatatau i le mataupu lea e talanoaina, e mafai ona taliina i le taimi lenā. Ae afai o se fesili e faatatau i se isi mataupu o i le lomiga lava lea e suʻesuʻe, e mafai ona faasino i ai le mataupu lea o le a taliina ai lenā fesili. Ae afai e salaese le fesili mai le mataupu lea e faia ai le suʻesuʻega, pe manaʻomia foʻi ona faia i ai ni saʻiliʻiliga loloto ina ia avatu ai se tali lelei, atonu e lelei pe a talanoa i ai pe a uma le suʻesuʻega, ia po o se isi taimi. Ua iloa e nisi le lelei pe a tusia i lalo le fesili ina ia faaalia ai i le tagata suʻesuʻe, o loo e manatu mamafa i lana fesili, ae ia aua neʻi faalavelave i le suʻesuʻega.

³ E tele aʻoaʻoga a le Tusi Paia o loo faamatala puupuu i a tatou lomiga autū o loo faia ai suʻesuʻega. Ae faapefea pe afai e faafaigatā ona talia e le tagata suʻesuʻe se aʻoaʻoga pe taofi mau pea foʻi i se talitonuga sesē? Atonu e lelei pe a talanoa i nisi lomiga na o loo faamatala māeʻaeʻa mai ai aʻoaʻoga faale-Tusi Paia e uiga i lenā mataupu. Afai e tumau pea ona lē talitonu le tagata suʻesuʻe, ona faataatia lea o le mataupu mo se isi taimi, ae faaauau lana suʻesuʻega e pei ona masani ai. (Ioa. 16:12) A o faasolo ina faateleina lona malamalama i aʻoaʻoga a le Tusi Paia ma agaʻigaʻi i luma faaleagaga, o le a oo ina malamalama lelei ai o ia i na aʻoaʻoga.

⁴ Ia Lotomaulalo: Afai e te lē o mautinoa le tali i se fesili, aua e te tali atu i ou lava manatu. (2 Timo. 2:15; 1 Pete. 4:11) Fai i ai o le a e alu e saʻiliʻili i le mataupu ona e toe foʻi mai lea ma se tali. O se avanoa lelei foʻi lea e te aʻoaʻo ai le tagata suʻesuʻe i le auala e faia ai saʻiliʻiliga loloto. Ia faasolosolo lelei ona faasino i ai le auala e faaaogā ai lomiga eseese, ia ua saunia e le faalapotopotoga a Ieova. O le faia faapea, atonu o le a iʻu ai ina mafai ona ia taliina ana lava fesili.—Galu. 17:11.

Fesoasoani Atili iā i Latou

¹ A o tatou talaʻiina atu le tala lelei, e masani lava ona tatou feiloaʻi ma tagata e lē nonofo i la tatou oganuu pe ese foʻi se gagana e tautala ai, e aofia ai le gagana e faaaogā ai tāga. Atonu ua siitia i se isi vaipanoa i latou e masani ona tatou asiasi i ai. E faapefea ona tatou fuafua ina ia molimau atili i na tagata? E ala i le pepa, Please Follow Up (S-43).

² E sili atu ona faalogo lelei mai tagata i le tala lelei pe a avatu i la latou lava gagana. (Galu. 22:1, 2) O lea la, i le tele o tulaga, pe a tatou feiloaʻi ma se tagata e tautala i se isi gagana, e tatau ona tatou faatumuina le pepa lenei, e tusa lava pe e lē fiafia le tagata i le feʻau o le Malo. E tāua lenei mea pe a e feiloaʻi i se tagata e tautala i le faa-Peretania. Ua iai nei ni vaega faa-Peretania i Amerika Samoa ma Samoa e vaavaaia tagata e tautatala i le gagana Peretania.

³ Faatumuina o le Pepa: Ia taumafai e iloa le suafa o le tagata, lona tuatusi, ma le numera o lana telefoni. Ia faailoa le tele o le fiafia na faaalia, le taimi e mafai ona maua ai le tagata, le lomiga na tuu ai pe na talosagaina foʻi, ma le gagana e malamalama lelei i ai. Pe a uma ona faatumu le pepa, ona ave loa lea i le failautusi o le faapotopotoga, o ia lenā na te avatua i le faapotopotoga po o le vaega e mafai ona fesoasoani i na tagata.

⁴ Auina Atu o le Pepa: Afai e lē iloa e le failautusi po o lē fea faapotopotoga po o le vaega e ave i ai le pepa, pe e lē o iā te ia foʻi le tuatusi e ave i ai, e mafai ona telefoni atu i le ofisa i Samoa ina ia maua mai ai faamatalaga o loo ia manaʻomia.

⁵ I le taimi lava e maua ai e se faapotopotoga po o se vaega le pepa, Please Follow Up, ua uma ona faatumuina, ua tatau loa ona faia se fuafuaga e asiasi vave atu i lea tagata. Afai e faia ma le filigā mea uma e manaʻomia, e mafai ona tatou mautinoa o le a tatala e Ieova loto o i latou, “ua saunia i le ola e faavavau.”—Galu. 13:48.