Vaega 7—Faia o Suʻesuʻega Faale-Tusi Paia e Agaʻigaʻi i Luma

Faia o le Tatalo i le Suʻesuʻega

1. (a) Aiseā e talafeagai ai le amata ma faauma le suʻesuʻega i se tatalo? (e) E faapefea ona tatou amata faaaofia le tatalo i se suʻesuʻega faale-Tusi Paia?

¹ Ina ia faia e tagata aʻoga se agaʻigaʻi i luma faaleagaga, e tāua ona maua le faamanuiaga a Ieova. (1 Kori. 3:6) O lea la, e lelei ona amata ma faaiʻu le suʻesuʻega i se tatalo. E mafai ona tatou faia lenā tulaga mai lava i le uluaʻi suʻesuʻega ma tagata e naunau i lotu. Ae peitaʻi, o nisi o tagata aʻoga e manaʻomia ona fuafua lelei po o fea le taimi talafeagai, e amata ai le suʻesuʻega i se tatalo. E te ono faaaogā le Salamo e 25:4, 5 ma le 1 Ioane 5:14 e fesoasoani ai i le tagata aʻoga e iloa le māfuaaga e faia ai le tatalo ma faaaogā foʻi le Ioane 15:16 e faamatala ai le tāua o le tatalo atu iā Ieova e ala iā Iesu Keriso.

2. Afai e ō atu se uso ua papatiso po o se tagata talaʻi foʻi o se tama po o se tamāloa e leʻi papatiso ma se tuafafine i se suʻesuʻega faale-Tusi Paia a se tuafafine, o ai e faia le tatalo?

² O ai e faia le tatalo i se suʻesuʻega faale-Tusi Paia? Afai e ō se uso ua papatisoina ma se tuafafine i se suʻesuʻega a se tuafafine, e tatau ona fai e le uso le tatalo, e ui lava o loo faia e le tuafafine le suʻesuʻega ma lona ulu o loo ufiufitia. (1 Kori. 11:5, 10) I le isi itu, afai e ō se tagata talaʻi o se tama po o se tamāloa e leʻi papatiso ma se tuafafine i se suʻesuʻega, e tatau ona fai e le tuafafine le tatalo. I tulaga faapea, e tatau lava ona fai e le tuafafine se ufiulu a o faia le tatalo faapea foʻi ma le suʻesuʻega.

3. O ā mataupu talafeagai e faaaofia i le tatalo e fai i se suʻesuʻega faale-Tusi Paia?

³ Mea e Aofia ai i le Tatalo: E lē manaʻomia ona umi se tatalo i se suʻesuʻega faale-Tusi Paia, ae e tatau ona patino. E lē gata e saʻili le fesoasoani a le Atua i le suʻesuʻega ma faafetai atu i upu moni ua aʻoaʻoina, e talafeagai foʻi ona avatu le viiga iā Ieova o le Puna o aʻoaʻoga. (Isa. 54:13) E mafai foʻi ona aofia ai faaupuga e atagia ai lo tatou naunau moni i le tagata aʻoga, ma lo tatou loto faafetai i le faalapotopotoga o loo faaaogā e Ieova. (1 Tesa. 1:2, 3; 2:7, 8) O lo tatou tatalo atu mo le faamanuia a Ieova i taumafaiga a le tagata aʻoga ina ia faatatauina mea ua ia aʻoaʻoina, e fesoasoani iā te ia e iloa ai le tāua o le “anaana i le upu.”—Iako. 1:22.

4. O ā aogā e aumaia i le amata ma faaiʻu se suʻesuʻega faale-Tusi Paia i se tatalo?

⁴ E tele aogā o le tatalo i se suʻesuʻega faale-Tusi Paia. E aumai ai faamanuiaga a le Atua. (Luka 11:13) E faamamafa ai le tāua o le suʻesuʻeina o le Afioga a le Atua. A o faalogologo le tagata aʻoga i a tatou tatalo, o loo ia aʻoaʻoina le auala e tatalo ai. (Luka 6:40) E lē gata i lea, o tatalo e sau mai le loto ua tumu i le alofa i le Atua ma le lotofaafetai i ona uiga matalasi, e fesoasoani i le tagata aʻoga e ati aʻe ai lana lava faiā ma Ieova.

Le Tala e Fai Atu e Uiga i Mekasini

Le Olomatamata Mati 1

“Pe e te silafia o le a sili atu ona lelei olaga o tagata pe a latou faatatauina lenei fautuaga? [Faitau le Roma 12:17, 18. Ona faatali lea mo se tali.] E faanoanoa, ona i nisi taimi, e tulaʻi mai ai ni feeseeseaʻiga. Ua faaalia i lenei mekasini le auala ua fesoasoani ai iā i tatou le faatatauina o le fautuaga a le Tusi Paia, ina ia foʻia ai ni feteenaʻiga ma toe faafoʻisia ai le filemu.”

Awake! Mati 8

“Ua faatuputeleina i tausaga taʻitasi le manaʻomia o le malosiaga faalenatura. Pe mafai ona e manatunatu i le mea o le a tupu i se aso pe a leai se malosiaga faalenatura? [Faatali mo se tali.] O loo faamatalaina i lenei mekasini le tulaga agaʻigaʻi i luma ua faia i le atiina aʻe o puna mamā e maua mai ai le malosiaga. Ua faailoa mai ai foʻi, po o ai le Puna o le malosi uma lava.” Faitau le Isaia 40:26.

Le Olomatamata Mati 15

“O loo viiviia e tagata i le lalolagi aʻoaʻoga a Iesu. [Faitau manatu sii o loo i le itulau e 3, palakalafa 1.] Ae pe e te manatu o na aʻoaʻoga, e pei o le faataʻitaʻiga o loo i le mau lenei, o loo aogā pea i aso nei? [Faitau le Mataio 5:21, 22a. Ona faatali lea mo se tali.] O loo talanoaina i le mekasini lenei mea na aʻoaʻoina e Iesu ma le auala tatou te maua ai aogā mai na aʻoaʻoga.”

Ala Mai! Ianu.-Mati

“E toʻatele tagata ua latou iloa le tāua o le aʻoaʻoina o tamaiti mai lava o laiti. Po o e silafia ea le manaʻomia o le faia faapea i aso nei? [Faatali mo se tali. Ona faitau lea o le Faataoto 22:6.] O loo faamatalaina i lenei Ala Mai! mea patino e fai e mātua e fesoasoani ai i a latou fanau e tutupu aʻe ai e avea ma tagata faamaoni ma taulau manuia i le olaga.”