Vaega 8—Faia o Suʻesuʻega Faale-Tusi Paia e Agaʻigaʻi i Luma

Faasino Tagata Aʻoga i le Faalapotopotoga

1. Aiseā e aogā ai le talanoa i se manatu e faatatau i le faalapotopotoga a Ieova i vaiaso taʻitasi i le suʻesuʻega faale-Tusi Paia?

¹ O lo tatou sini i le faia o Suʻesuʻega faale-Tusi Paia e lē gata i le aʻoaʻoina o faamatalaga tau aʻoaʻoga, ae ia fesoasoani foʻi i tagata aʻoga ia avea ma vaega o le faapotopotoga Kerisiano. (Saka. 8:23) E mafai ona fesoasoani iā i tatou le polosiua Molimau a Ieova—O Ai i Latou? O ā o Latou Talitonuga? ina ia faia ai faapea. Ia tuu se kopi i tagata aʻoga fou o le Tusi Paia, ma faalaeiau i latou e faitau i ai. E lē gata i lea, ia faaalu ni nai minute i vaiaso taʻitasi i le suʻesuʻega e talanoaina ai se manatu e faatatau i le faalapotopotoga a Ieova.

2. E faapefea ona e faalaeiau tagata aʻoga o le Tusi Paia e auai i sauniga a le faapotopotoga?

² Sauniga a le Faapotopotoga: O le auala autū lava e talisapaia ai e tagata aʻoga o le Tusi Paia le faalapotopotoga a le Atua, o le aufaatasi lea ma i tatou i sauniga a le faapotopotoga. (1 Kori. 14:24, 25) O lea la, e mafai ona e amata faamasani le tagata aʻoga e ala i le faamatala auauaʻi i ai o sauniga e lima faale-vaiaso. Ia taʻu i ai le matua o le lauga i le lautele o loo sosoo mai. Ia faaali i ai le mataupu o le a talanoaina i le Suʻesuʻega o le Olomatamata ma le Suʻesuʻega Tautusi a le Faapotopotoga. Faamatala le Aʻoga o le Faiva Faatiokarate ma le Sauniga o le Auaunaga. Pe afai e iai sou tofiga i le aʻoga, e te ono faataʻitaʻia i ai. Ia tufa atu manatu tāua na talanoaina i sauniga. Faaaogā ata o loo i a tatou lomiga e fesoasoani ai iā i latou e faaata ai mea o loo faia. Ia valaaulia i latou ina ia auai, mai lava i le uluaʻi suʻesuʻega faale-Tusi Paia.

3. O ā vala o le faalapotopotoga e tatou te ono talanoaina?

³ Pe a lata mai le Faamanatuga, fonotaga, ma le asiasiga a le ovasia o le matagaluega, ia faaalu ni nai minute e faamatala ma ati aʻe ai le naunau mo nei fuafuaga. Ia tali faasolosolo fesili e pei o le: Aiseā ua taʻua ai i tatou o Molimau a Ieova? Aiseā e tatou te taʻua ai nofoaga e fai ai sauniga, o Maota o le Malo? O ā tiute o toeaina ma auauna o le faiva? E faapefea ona faamaopoopo le galuega talaʻi ma oganuu? E faapefea ona saunia a tatou lomiga? E faapefea ona faatupeina le faalapotopotoga? O ā tiutefai o le ofisa o le lālā ma le Vaega Pule i le vaavaaia o le galuega?

4, 5. E faapefea i a tatou ata vitiō ona ati aʻe ai le malamalama ma le loto faafetai mo le faalapotopotoga?

⁴ Ata Vitiō e Aʻoaʻoina Ai: O le isi auala e iloa ai e tagata aʻoga o le Tusi Paia le faalapotopotoga ofoofogia a Ieova, e ala lea i a tatou ata vitiō. O a tatou ata vitiō To the Ends of the Earth, ua faaalia ai la tatou galuega talaʻi i le lalolagi atoa; O le Our Whole Association of Brothers, o loo faaalia ai lo tatou ʻauuso i le lalolagi atoa; ma o le United by Divine Teaching o loo faaalia ai le autasi o loo iai i Molimau a Ieova. O se fafine sa ia mauaina a tatou mekasini ma isi lomiga mo le lima tausaga, sa faagaeetia ma loimata i le ata vitiō Jehovah’s Witnesses—The Organization Behind the Name. Sa ia faatuatuaina Molimau a Ieova sa asiasi ane iā te ia, ae ina ua uma ona matamata i le ata vitiō, na ia lagona ai e ao foʻi ona ia faatuatuaina le faalapotopotoga. Sa amata se suʻesuʻega faale-Tusi Paia ma ia, ma i le vaiaso na sosoo ai, na ia auai loa i sauniga i le Maota o le Malo.

⁵ E ala i le faaalu o ni nai minute i vaiaso taʻitasi ma a tatou tagata aʻoga ma faaaogā lomiga ua saunia, e mafai ai ona faasolosolo ona tatou faasino le tagata aʻoga o le Tusi Paia i le faalapotopotoga e tasi o loo faaaogāina e Ieova.

Le Tala e Fai Atu e Uiga i Mekasini

Le Olomatamata Ape. 1

“Pe na e faafofoga faapea e feteenaʻi le faasaienisi ma le Tusi Paia? [Faatali mo se tali.] O loo iloiloina i lenei mekasini le talafaasolopito o le feteenaʻi o le faasaienisi ma lotu. Peitaʻi, o loo aumaia ai foʻi faamaoniga e faaalia ai e ōgatasi le faasaienisi moni ma le Tusi Paia.” Faaali le itulau e 6-7. Ona faitau lea o le Failauga 1:7.

Ala Mai! Ape.-Iuni

“O le alualu i luma o le tomai o tagata ua lē suia ai le manaʻoga masani o tagata e faia ni faauōga. Ae po ua e mātauina ea suiga ua iai i tagata, ua faigatā ai i aso nei ona ati aʻe ni faauōga māfana? [Faatali mo se tali. Ona faitau lea o le Faataoto 18:24.] O loo talanoaina i lenei mekasini le auala e faia ai uō ma faatumauina ai uō moni.”

Le Olomatamata Ape. 15

“Pe lē moni ea ua anoanoaʻi faamatalaga o loo mafai ona mauaina i aso nei? [Faatali mo se tali.] E ui i lea, e leai ni faamatalaga e sili atu ona tāua i lo faamatalaga o loo taʻua i le mau lenei. [Faitau Ioane 17:3.] O loo faamatalaina i le mekasini lenei le uiga o le faaupuga ‘ola e faavavau’ ma le auala tatou te mauaina ai le poto e taʻitaʻia ai i le ola e faavavau.”

Awake! Ape. 22

“E ui lava e ono sili atu ona lauiloa Iesu Keriso na i lo se isi lava tane na soifua mai, ae toʻatele lava tagata o loo taumānatu po o ai moni lava Iesu. Pe e te silafia ea e oo lava i ona aposetolo sa latou taumānatu po o ai o ia? [Faatali mo se tali. Ona faitau lea o le Mareko 4:41.] O loo iloiloina e le mekasini lenei le mea ua fai mai ai le Tusi Paia e faatatau i le tulaga moni lava o Iesu.”