Ua Lata Mai le Aso o Ieova

¹ O loo faanaunau atu Kerisiano i le oo mai o le aso o Ieova, lea o le a ia faaumatia ai lenei faiga o mea ae aumai se lalolagi fou amiotonu. (2 Pete. 3:12, 13) Ona e tatou te lē iloa le taimi tonu o le a oo mai ai lenā aso, e ao la ona tatou tumau i le mataala ma fesoasoani i isi ina ia faia faapea. (Eseki. 33:7-9; Mata. 24:42-44) O le mafaufau loloto i Afioga faavaloaga a le Atua, o le a faamalosia ai lo tatou talitonuga faapea, “o loo latalata mai le aso tele o Ieova.”—Sefa. 1:14.

² Faasologa Mai o Malo Malolosi: E pei ona faamauina i le Faaaliga 17:9-11, na taʻua e le aposetolo o Ioane ‘⁠tupu e toʻafitu,’ o loo faaata mai ai se faasologa o malo malolosi e fitu o le lalolagi. Na taʻua foʻi e Ioane se “[tupu] lona valu,” lea ua fai ma sui o Malo Aufaatasi i le taimi nei. Po o le a tatou faatalitalia ea le aliaʻe mai o isi malo malolosi o le lalolagi? E leai, na taʻua e le valoaga faapea o lenei tupu lona valu “e alu atu foʻi o ia i le malaia,” ma ina ua uma lenā, e leai se isi tupu o le lalolagi na toe taʻua mai. Po o fesoasoani ea lenei valoaga iā te oe e iloa ai po o gafea o loo tatou iai i le faagasologa o taimi?

³ Ua fesoasoani le Tanielu 2:31-45 iā i tatou ia malamalama i le oo mai o le aso o Ieova. I lenā valoaga, o le tupua tele na iloa e Nepukanesa i se miti, o loo fai ma sui o se faasologa o malo malolosi o le lalolagi. O nei malo malolosi ua uma ona taʻitasi ma tulaʻi mai. O gafea la o le faagasologa o le talafaasolopito o loo tatou iai nei? I le vaitaimi na faaata mai e vae o le tupua. Ua faailoa manino mai e le valoaga le mea o le a sosoo mai. O le a faaumatia atoatoa pulega a tagata, ma faaava ai loa le avanoa mo se “malo e lē faaumatia e faavavau.” Po o e mātau mai le faaalia ai i lenei mea le lata tele mai o le aso o Ieova?

⁴ Isi Faamaoniga: Ua tatou molimauina faamaoniga atili o le lata tele mai o le aso o Ieova. Ua tatou vāai i le faataunuuga o mea na valoia e le aposetolo o Paulo e tusa ai ma uiga o tagata i “aso e gata ai.” (2 Timo. 3:1-5) Ma o loo tatou auai i se galuega molimau atu i le lalolagi aoao lea e ao ona fai a o leʻi oo mai le iʻuga. (Mata. 24:14) Tau ina ia faaauau pea ona faailoa atu e la tatou talaʻiga i le lautele, le faanatinati o le faasilasilaga faaagelu: “Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga.”—Faaa. 14:6, 7.

Vaega 9—Faia o Suʻesuʻega Faale-Tusi Paia e Agaʻigaʻi i Luma

Sauniuni Tagata Aʻoga e Molimau Atu Lē Fuafuaina

¹ Ina ua iloa e Aneterea ma Filipo o Iesu o le Mesia lea na folafolaina mai, la te leʻi faatalatū e taʻu atu i isi le tala fiafia. (Ioa. 1:40-45) Ua faapena foʻi i aso nei, a o amata ona faaalia le faatuatua o tagata aʻoga o le Tusi Paia i mea ua latou aʻoaʻoina, ua faagaeetia i latou e tautala atu e faatatau i ia mea. (2 Kori. 4:13) E faapefea ona tatou faalaeiau i latou e molimau atu lē fuafuaina ma sauniuni i latou ia lelei ona fai?

² Fesili i le tagata aʻoga po ua ia talanoa atu i isi e faatatau i mea ua ia aʻoaʻoina mai le Tusi Paia. Atonu o loo iai ni uō ma ni tagata o le aiga e mafai ona ia valaaulia e auai i lana suʻesuʻega. Fesili i ai po o iai nisi o tagata latou te faigaluega, aʻoʻoga, po o isi e masani ai ua faaalia le fiafia i le tala lelei. O le faia faapea e amata ai ona ia molimau atu. Fesoasoani iā te ia ina ia malamalama, e manaʻomia ona faautauta ma ia faaaloalo ma agalelei pe a talanoa atu i isi e faatatau iā Ieova le Atua ma mea o loo ia finagalo i ai.—Kolo. 4:6; 2 Timo. 2:24, 25.

³ Tufa Atu o Latou Talitonuga: E tāua tele ona toleni tagata aʻoga o le Tusi Paia e faaaogā le Afioga a le Atua pe a tufa atu o latou talitonuga. Pe a talanoaina manatu tāua i le suʻesuʻega, ia fesili atu i le tagata aʻoga: “E faapefea ona e faaaogā le Tusi Paia e faamatala ai nei mea moni i lou aiga?” pe faapea atu foʻi “O le ā se mau o le Tusi Paia e te faaaogā e faamaonia ai lenei manatu i se uō?” Mātau le auala e tali mai ai, ma faaali iā te ia le auala e faavae ai lana aʻoaʻo atu i le Tusi Paia. (2 Timo. 2:15) O le faia faapea, o le a e sauniunia ai le tagata aʻoga e molimau atu lē fuafuaina ma, pe a agavaa o le a ia auai i le galuega talaʻi a le faapotopotoga.

⁴ E lelei ona sauniuni le tagata aʻoga o le Tusi Paia mo le fesagaʻia o teteega. (Mata. 10:36; Luka 8:13; 2 Timo. 3:12) Pe a lāgā mai e nisi ni fesili po o le faia o ni faamatalaga e faatatau i Molimau a Ieova, e ono maua ai le avanoa e tagata aʻoga e avatu ai se molimau. O le polosiua Molimau a Ieova—O Ai i Latou? O ā o Latou Talitonuga? e mafai ona saunia ai i latou “e tali atu.” (1 Pete. 3:15) O loo iai ni faamatalaga saʻo e faaaogā e i latou e fou, e fesoasoani ai i uō ma tagata o le aiga o loo tetee ona e alolofa ma manatu mamafa iā i latou, ina ia malamalama i o tatou talitonuga faale-Tusi Paia ma gaoioiga o loo fai.