E Fesoasoani le Talaʻiga iā i Tatou e Tumau Ai

¹ Ua timaʻi mai le Afioga a le Atua iā i tatou ia tumau, pe ia “tatou taufetuli ma le onosai i le ala tanu o i o tatou luma.” (Epe. 12:1) E pei lava ona manaʻomia ona tumau se tagata tamoʻe ina ia taulau manuia ai i le tauvaga, e tatou te manaʻomia foʻi ona tumau ina ia maua le taui o le ola e faavavau. (Epe. 10:36) E faapefea ona fesoasoani iā i tatou le faiva faa-Kerisiano e tumau ai ma le faamaoni seʻia oo i le iʻuga?—Mata. 24:13.

² Ua Faamalosia Faaleagaga i Tatou: O lo tatou folafolaina atu o folafolaga ofoofogia a le Tusi Paia e uiga i se lalolagi fou amiotonu, e fesoasoani e tausia ai pea le pupula o lo tatou lava faamoemoe. (1 Tesa. 5:8) Pe a tatou auai e lē aunoa i le auaunaga i le fanua, ua tatou maua ai le avanoa e faailoa atu ai upu moni ua tatou aʻoaʻoina mai le Tusi Paia. Ua tatou maua ai le avanoa e tali puipui atu ai i lo tatou faatuatua, lea ua faamalosia ai i tatou faaleagaga.

³ Ina ia aʻoaʻoina lelei isi, e ao ona tatou malamalama lelei i upu moni o le Tusi Paia. E tatau ona tatou faia ni saʻiliʻiliga ma mafaufau loloto i le mataupu. O taumafaiga maumauaʻi o loo tatou faia e faaloloto ai lo tatou iloa, e faamalosia ai lo tatou faatuatua, ma faafouina ai i tatou faaleagaga. (Faata. 2:3-5) O lea, a o tatou taumafai e fesoasoani i isi, ua tatou faamalosia ai i tatou lava.—1 Timo. 4:15, 16.

⁴ O le auai ma le maelega i le faiva o se vaega tāua o le “ofutau atoatoa mai le Atua,” lea e tatou te manaʻomia ina ia malolosi ai e tetee atu faasaga i le Tiapolo ma temoni. (Efe. 6:10-13, 15) O lo tatou pisi i le auaunaga paia e fesoasoani iā i tatou e taulaʻi atu ai pea o tatou mafaufau i mea e ati aʻe ai, ma ʻalofia le faaleagaina i le lalolagi a Satani. (Kolo. 3:2) A o tatou aʻoaʻoina isi i ala o Ieova, ua faaauau ai foʻi ona faamanatu mai iā i tatou le manaʻomia ona tausia o amioga mamā.—1 Pete. 2:12.

⁵ E Aumai e le Atua le Malosi: O le manatu mulimuli, o lo tatou auai i le galuega faaevagelia e aʻoaʻo ai i tatou e faalagolago iā Ieova. (2 Kori. 4:1, 7) Maʻeu le lelei o lenā mea! O lo tatou atiina aʻe o lenā faalagolago i le Atua e faaauupegaina ai i tatou e lē gata ina ia faaiʻuina la tatou faiva, ae e mafai ai foʻi ona tatou faafetaiaʻia so o se tulaga o le olaga e tulaʻi mai. (Fili. 4:11-13) O le mea moni, o le faalagolago atoatoa iā Ieova o le vala autū lea i lo tatou tumau. (Sala. 55:22) O lea, e tele auala e fesoasoani ai le talaʻiga iā i tatou e tumau ai.

Vaega 10—Faia o Suʻesuʻega Faale-Tusi Paia e Agaʻigaʻi i Luma

Aʻoaʻo Tagata Aʻoga i le Faiva i le Fale i le Fale

¹ Pe a manatu toeaina ua agavaa se tagata aʻoga o le Tusi Paia e avea o se tagata talaʻi e leʻi papatisoina, ona amata loa lea ona ia auai ma le faapotopotoga i le galuega talaʻi i le lautele. (Tagaʻi i le tusi, Ua Faamaopoopo Ina ia Faia le Finagalo o Ieova, itu. 79-81.) E faapefea ona tatou fesoasoani i le tagata aʻoga ina ia ausia le sini o le talaʻi mai lea fale i lea fale?

² Sauniuni Faatasi: E tāua tele le sauniuni lelei. Faailoa i le tagata aʻoga taulimaga o loo fautua mai i La Tatou Faiva o le Malo ma le tusi Reasoning, ma fesoasoani iā te ia e filifili se taulimaga faigofie e aogā i tagata o le oganuu a le faapotopotoga. Mai lava i le amataga, ia faalaeiau o ia e faaaogā le Tusi Paia i lana faiva.—2 Timo. 4:2.

³ O le iai o taimi e faataʻitaʻi ai taulimaga, o le a aogā tele i le tagata talaʻi fou. A o faataʻitaʻi e le tagata aʻoga le taulimaga, faaali iā te ia le auala e taulima ai ma le faautauta auala masani e tali mai ai tagata i le oganuu. (Kolo. 4:6) Faamautinoa iā te ia faapea, e lē tau manaʻomia e faifeʻau Kerisiano ona iloa tali i fesili uma e faatulaʻi mai e le tagata o le aiga. O le tulaga masani, e sili atu ona lelei le taulimaina o na fesili e ala i le faapea atu, o le a seʻi fai ni saʻiliʻiliga loloto ona toe foʻi atu lea e talanoa atili le mataupu.—Faata. 15:28.

⁴ Talaʻi Faatasi: O le taimi muamua lava e auai le tagata aʻoga i le faiva mai lea fale i lea fale, ia tuu atu iā te ia e mātau a o e faia le taulimaga lea na lua sauniunia faatasi. Ona tuu atu lea e fai sana vaega. I nisi o tulaga, atonu e sili pe a tuu atu i le tagata talaʻi fou e faia na o se vaega o le taulimaga, e pei o le faitau ma fai se manatu i se mau. Ia manatunatu i uiga ma tomai o le tagata aʻoga. (Fili. 4:5) Ia agalelei ma avatu se faamālō a o faasolosolo ona e aʻoaʻoina o ia i vala eseese o le galuega talaʻi.

⁵ E tāua tele le fesoasoani i le tagata talaʻi fou e faatulaga se faasologa o le auai e lē aunoa i le faiva, ma ia faia i vaiaso uma pe a talafeagai. (Fili. 3:16) Ia fai ni fuafuaga patino e galulue faatasi i le auaunaga, ma faalaeiau o ia e galulue faatasi ma isi e maelega i le faiva. O a latou faaaʻoaʻoga ma auaufaatasiga o le a fesoasoani iā te ia e ati aʻe ai le tomai ma maua ai le olioli i le talaʻiga mai i lea fale i lea fale.