Ia Fai Ieova ma Ou Atua

I TAIMI o le Tusi Paia, na olioli ai nisi tagata i se faiā māfana ma Ieova, na latou faapea atu ai, o Ia o lo latou Atua. O se faaaʻoaʻoga, i le Tusi Paia, ua faamatalaina ai Ieova e faapea, “o le Atua o Aperaamo,” o “le Atua o Tavita,” ma “le Atua o Elia.”—Kenese 31:42; 2 Tupu 2:14; 20:5.

Na faapefea ona iai se faiā vavalalata a nei tane ma le Atua? O le ā se mea e tatou te aʻoaʻoina mai iā i latou ina ia mafai ai ona tatou atiina aʻe ma tausisia se faiā malosi ma Lē na Faia i tatou?

O Aperaamo, na “Faatuatua iā Ieova”

O Aperaamo o le uluaʻi tagata lea o loo taʻua i le Tusi Paia, sa faatuatua iā Ieova. O le faatuatua, o le uiga autū lea o Aperaamo na ia maua ai le finagalo malie o le Atua. Sa olioli Aperaamo i se faiā māfana ma Ieova, o lea na faailoa mulimuli ane ai e le Atua o ia iā Mose e faapea, “o le Atua o Aperaamo” ma lona atalii o Isaako, ma Iakopo le atalii o lona atalii.—Kenese 15:6; Esoto 3:6.

Na faapefea ona maua e Aperaamo lenei faatuatua i le Atua? O le mea muamua, ona sa atiina aʻe e Aperaamo lona faatuatua i se faavae mausalī. E lē taumatea sa faatonuina o ia i ala o Ieova e Semu le atalii o Noa, o lē na molimau i galuega faasaoola a le Atua. Talu ai sa molimau vaaitino Semu i le faasaoina o “Noa, lē talaʻi le amiotonu, o lona toʻavalu lea na faaolaina, ina ua au mai le lolo i le lalolagi faalēmataʻu.” (2 Peteru 2:5) Atonu na aʻoaʻo e Aperaamo mai iā Semu e faapea, pe a folafola mai e Ieova se mea, sa mautinoa lava e faataunuuina. Ina ua maua e Aperaamo le folafolaga mai le Atua, na fiafia o ia ma sa faaalia i lona olaga lona mautinoa o le a faataunuuina lea folafolaga.

Sa iai se faavae mausalī na faamalosia ai le faatuatua o Aperaamo e ala i ana galuega. Na tusi Paulo: “O le faatuatua na anaana ai Aperaamo, ina ua valaauina o ia e alu i le mea o le a maua e fai mona fanua, na ia alu foʻi e leʻi iloa po o fea a alu i ai.” (Eperu 11:8) O lona usiusitai, na faateleina le faatuatua o Aperaamo, o lea na tusi faatatau i ai le soo o Iakopo: “E te iloa na galulue faatasi le faatuatua ma ana galuega, o galuega foʻi ua atoatoa ai le faatuatua.”—Iakopo 2:22.

E lē gata i lea, na faatagaina e Ieova ina ia tofotofoina le faatuatua o Aperaamo, ia atili ai ona malosi. Na faapea mai Paulo: “O le faatuatua na fai taulaga ai Aperaamo iā Isaako, ina o tofotofoina o ia.” O le tofotofoina, na faamamāina ma faamalosia ai le faatuatua, ua ‘silisili ai ona aogā i le auro.’—Eperu 11:17; 1 Peteru 1:7.

E ui e leʻi soifua pea Aperaamo e vaai i le faataunuuga o mea uma na folafola mai e le Atua, ae na olioli o ia ina ua vaai i isi o mulimuli i lana faaaʻoaʻoga. O loo taʻuleleia foʻi i le Tusi Paia lana avā o Sara ma isi e toʻatolu o lona aiga; o Isaako, Iakopo, ma Iosefa, ona o lo latou faatuatua mataʻina.—Eperu 11:11, 20-22.

Faatuatua i Aso Nei e Pei o Aperaamo

O le faatuatua, e mo so o se tasi e manaʻo e fai Ieova ma ona Atua. Na tusi Paulo: “A leai foʻi se faatuatua e lē mafai ona fiafia mai [le Atua].” (Eperu 11:6) E faapefea i se auauna a le Atua ona atiina aʻe se faatuatua malosi e pei o Aperaamo?

I le pei o Aperaamo, e tatau ona mausalī le faavae o lo tatou faatuatua. E faia lenā mea e ala i le suʻesuʻe e lē aunoa o le Tusi Paia ma lomiga e faavae i le Tusi Paia. O le faitauina o le Tusi Paia ma mafaufau loloto i ai, e faamautinoa mai ai o le a faataunuuina folafolaga a le Atua. O le a uunaʻia ai i tatou ina ia ola e tusa ma lenā folafolaga mautinoa. Ona atili faamalosia ai lea o lo tatou faatuatua e ala i le usiusitai, lea e aofia ai le faia o se sao i le talaʻiga ma auai i sauniga faa-Kerisiano.—Mataio 24:14; 28:19, 20; Eperu 10:24, 25.

E mautinoa lava o le a tofotofoina lo tatou faatuatua, atonu e ala i teteega, maʻi tigā, le maliu o sē pele, po o se isi lava mea. Ae o le tumau pea ona faamaoni iā Ieova i tofotofoga, e faateleina ai lo tatou faatuatua, ma sili atu ai ona tāua i lo o le auro. E tusa lava pe tatou te ola e vaai i le faataunuuina o folafolaga uma a le Atua pe leai, ae o lo tatou faatuatua o le a tosina vavalalata atu ai i tatou iā Ieova. E lē gata i lea, o a tatou faaaʻoaʻoga lelei o le a uunaʻia ai isi e faataʻitaʻi i lo tatou faatuatua. (Eperu 13:7) O le tulaga lenā na oo iā Lafaele, o lē na mātauina ma faataʻitaʻi i le faatuatua o ona mātua. Ua ia faamatala mai:

“A o ou nofo i lo matou aiga, na faalaeiau ai e o matou mātua le aiga atoa ina ia ala pō ina ia matou faitauina faatasi le Tusi Paia. O le auala lenā na matou faitauina ai le Tusi Paia atoa.” O loo faaauau pea ona faitauina e Lafaele le Tusi Paia i taeao taʻitasi, ma ua avea lea o se amataga lelei mo le aso. Sa masani ona ō faatasi Lafaele ma lona tamā i le talaʻiga i vaiaso taʻitasi. “O le auala lenā na ou iloa ai faia ni toe asiga ma ni suʻesuʻega faale-Tusi Paia.” Ua auauna nei Lafaele o se auauna tauofo i se tasi o ofisa o lālā o Molimau a Ieova i Europa. Maʻeu se taui lelei mo le faatuatua o ona mātua!

Se Tagata na Fiafia i ai le Finagalo o Ieova

O Tavita, na fanau i le tusa ma le 900 tausaga talu ona mavae atu Aperaamo, o se tagata mataʻiina i auauna a Ieova ia e taʻua i le Tusi Paia. E tusa ai ma le filifiliga a Ieova e avea Tavita ma tupu i le lumanaʻi, na faapea mai ai le perofeta o Samuelu: “Ua saʻilia e Ieova se tagata mona e tatau ma lona finagalo.” Sa matuā māfana lava le faiā i le va o Ieova ma Tavita, o lea na fai atu ai mulimuli ane le perofeta o Isaia i le tupu o Esekia e faapea, “o Ieova le Atua o Tavita lou tamā.”—1 Samuelu 13:14; 2 Tupu 20:5; Isaia 38:5.

E ui e fiafia le finagalo o Ieova iā Tavita, ae na iai taimi na pulea ai o ia e ona tuʻinanauga. E faatolu ona ia faia mea sesē matuiā: Na ia faataga le aveina o le atolaau o le feagaiga i se auala lē talafeagai agaʻi atu i Ierusalema; na ia faia le mulilua ma Patesepa ma fafauina le fasiotia o lana tane, o Uria; ma na ia faitauina le nuu o Isaraelu ma Iuta, o se mea e leʻi poloaʻi mai ai Ieova. I nei tulaga taʻitasi, na solia ai e Tavita le Tulafono a le Atua.—2 Samuelu 6:2-10; 11:2-27; 24:1-9.

Ae peitaʻi, ina ua faailoa atu iā Tavita ana agasala, na te leʻi tuuaʻia ai isi. Sa ioe o ia e leʻi fuafuaina lelei le auala na ave ai le Atolaau, ma ia fai mai, “auā na tatou lē saʻiliʻili iā [Ieova] e tusa ma le tulafono.” Ina ua faailoa atu e le perofeta o Natano le mulilua a Tavita, na tali atu Tavita e faapea: “Ua ou agasala lava iā Ieova.” Ina ua iloa e Tavita le valea o lona faitauina o le nuu, na ia taʻutino: “Ua ou matuā agasala lava i le mea ua ou faia.” Na salamō Tavita i ana agasala ma tumau pea ona pipii atu iā Ieova.—1 Nofoaiga a Tupu 15:13; 2 Samuelu 12:13; 24:10.

Pe a Tatou Faia Mea Sesē

E ese le faalaeiau o le faaaʻoaʻoga a Tavita a o tatou taumafai e fai Ieova ma o tatou Atua. Afai sa faia e se tagata na fiafia i ai le finagalo o Ieova na agasala matuiā, aua le loto vaivai, pe afai e iai taimi e tatou te sesē ai pe oo ai foʻi ina faia ni agasala matuiā, e ui lava i a tatou taumafaiga sili. (Failauga 7:20) E faamāfanafanaina ai i tatou i lea mea e faapea, ina ua salamō Tavita, na faamagaloina ana agasala. O le mea lenā na tupu iā Emelē i nai tausaga ua mavae.

O Emelē,a sa auauna o se toeaina i se faapotopotoga a Molimau a Ieova. I se tasi taimi, na ia lolo atu ai i faanaunauga sesē ma faia ai amioga lē mamā. I le taimi muamua, sa taumafai Emelē e nanā le agasala, e pei lava o le tupu o Tavita, ma le faamoemoe o le a lē amanaʻia e Ieova le solitulafono. Ae na tigāina ai le loto fuatiaifo o Emelē, o lea na ia taʻutino ai lana agasala i se uso toeaina, ma faia loa ni gaoioiga e fesoasoani iā Emelē e toe malosi ai faaleagaga mai lana agasala.

Na salamō Emelē mai lana agasala ma pipiimau atu iā Ieova ma le faapotopotoga. Na ia matuā lotofaafetai ona o le fesoasoani na ia maua, o lea i ni nai vaiaso mulimuli ane, na ia tusi atu ai i le ʻautoeaina e faailoa atu lona matuā lotofaafetai moni mo le fesoasoani. Na ia faapea atu: “Na outou fesoasoani moni mai iā te aʻu e taʻumamāina le suafa o Ieova ua faalumaina.” Na mafai ona toe maua le faiā lelei a Emelē ma Ieova, ma i le taimi nei, ua toe tofia ai o ia o se auauna i le faapotopotoga lava lea.

‘Le Tagata e Tusa ma i Tatou’

O Elia, o lē na soifua i se senituri ina ua mavae atu Tavita, o ia o se tasi o perofeta aupito sili i Isaraelu. Sa sili atu lava ona sapasapaia e Elia le tapuaʻiga moni i le vaitaimi na salalau atu ai faiga piʻopiʻo ma amioga lē mamā, ma e leʻi faavaivai o ia i lona tuutoina atu iā Ieova. E lētioa ona taʻua e lē na sosoo ane iā te ia o Elisaia, ia Ieova e faapea, o “le Atua o Elia.”—2 Tupu 2:14.

Ae ui i lea, o Elia e lē o se tagata e aupito sili ona malosi. Na tusi Iakopo e faapea: “O Elia o le tagata ia e tusa ma i tatou.” (Iakopo 5:17) O se faataʻitaʻiga, ina ua uma ona ia faatoʻilaloina i se toʻilalo popo tagata tapuaʻi iā Paala i Isaraelu, na faamataʻu atu ai Iesepela e fasiotia o ia. O le ā lana mea na fai? Na fefe o ia ma sola i le vao. I inā na nofo ai o ia i lalo o le laau o le ratami, ua auē ai Elia: “Ieova e, soia; ia e ave ese loʻu ola, auā e lē sili ona lelei o aʻu i oʻu tamā.” Ua lē toe manaʻo Elia e avea o ia ma perofeta, ae na i lo o lea, na fia oti o ia.—1 Tupu 19:4.

Ae peitaʻi, na malamalama Ieova i faalogona o Elia. Na faamalosia o ia e le Atua ma faamautinoa iā Elia e faapea, o loo iai foʻi isi o loo faamaoni i le tapuaʻiga moni. E lē gata i lea, sa faatuatuaina pea e Ieova Elia ma tuuina atu iā te ia se galuega e fai.—1 Tupu 19:5-18.

O le lotovaivai o Elia, e lē o se faailoga lea o le lē fiafia o Ieova iā te ia. Pe tusa ma le 1,000 tausaga mulimuli ane, ina ua liliuina Iesu Keriso i luga o le mauga a o vaavaai atu ia Peteru, Iakopo, ma Ioane, o ai na filifilia e Ieova e faaali mai i le vaaiga faatasi ma Iesu? O Mose ma Elia. (Mataio 17:1-9) E manino mai, sa finagalo Ieova iā Elia o se perofeta e fai ma faaaʻoaʻo. E ui lava o Elia o se “tagata ia e tusa ma i tatou,” ae na tāua i le Atua lana galuega fitā i le toe faafoʻisia o le tapuaʻiga mamā ma faapaiaina Lona suafa.

Tauiviga ma o Tatou Faalogona

E ono faavaivaia pe faapopoleina auauna a Ieova i aso nei. Maʻeu le faamāfanafanaina pe a iloa o faalogona foʻi na, na oo iā Elia! Maʻeu le faamautinoaina ai e faapea, e pei lava ona malamalama Ieova i faalogona o Elia, e malamalama foʻi o Ia i la tatou tauiviga ma o tatou faalogona.—Salamo 103:14.

Ae i le isi itu, tatou te alolofa i le Atua ma o tatou uso a tagata, ma faanaunau e faia le galuega a Ieova, i le folafola atu o le tala lelei o le Malo. Ae peitaʻi, atonu e tatou te lē fiafia ona o le lē ano mai o tagata i la tatou talaʻiga, pe popole foʻi ona o faamataʻuga mai fili o le tapuaʻiga moni. Ae peitaʻi, e pei lava ona fesoasoani Ieova iā Elia, ina ia faaauau pea, e na te faia faapena i ana auauna i aso nei. Ae peitaʻi, seʻi fai ma faaaʻoaʻoga le tulaga o Herbert ma Gertrud.

Na papatisoina Herbert ma Gertrud o ni Molimau a Ieova i Leipzig, i le vaega na avea muamua ma malo faatemokalasi o Siamani i le 1952. Sa matuā faigatā mo auauna a le Atua i na taimi, talu ai sa faasāina la latou talaʻiga. O ā lagona o Herbert e uiga i le talaʻiga mai lea fale i lea fale?

“Sa matou popole tele i nisi taimi. Pe a matou ō mai lea fale i lea fale, matou te leʻi iloa pe teʻi lava ua ō mai faafuaseʻi leoleo ma puʻea i matou.” O le ā na fesoasoani iā Herbert ma isi e aveesea ai le fefe? “Sa matou matuā suʻesuʻeina le Tusi Paia. O lea na aumai ai e Ieova le malosi iā i matou e faaauau ai pea i le talaʻiga.” E tele ni mea na tutupu iā Herbet i le talaʻiga na matuā faamalosia ai, ma o ni mea malie iā te ia.

Na feiloaʻi Herbert ma se fafine ua fiafia i le Tusi Paia. Ina ua toe asiasi atu Herbert i ni nai aso mulimuli ane, sa iai se tamāloa talavou na faalogologo i le talanoaga. Ina ua mavae ni nai minute, na iloa atu ai e Herbert se mea na matuā tete ai lava o ia. I luga o se nofoa sa tū i le tulimanu o le potu, na ia vaaia ai se pulou leoleo. E manino mai, o le pulou o le tamāloa talavou lea, o se leoleo sa taumafai e puʻe ia Herbert.

Na fai atu le tamāloa, “O oe o se Molimau a Ieova! Faaali mai iā te aʻu lou ID.” Na tuu atu e Herbert lona pepa ID. Sa iai se mea na tupu e leʻi faatalitalia. Na liliu atu le fafine i le leoleo ma lapataʻi atu: “A iai se mea leaga e tupu i le tagata o le Atua lea, e lē toe talia oe i le fale lenei.”

Na faatalitali le leoleo mo sina taimi ma toe tuu atu le pepa ID o Herbert, ma na alu loa o ia. Na iloa ane e Herbert, e uō le leoleo ma le tama teine a le fafine. E manino mai, sa ia manatu e lelei mo ia le faaauau pea o la laʻua uō ma le teine na i lo o le puʻe faapagota o Herbert.

Ia Fai Ieova ma o Tatou Atua

O ā ni mea ua tatou aʻoaʻoina mai nei mea na tutupu? I le pei o Aperaamo, e tatau ona tatou faatuatua atoatoa i folafolaga a Ieova. I le pei o Tavita, e ao ona tatou liliu atu iā Ieova ma le salamō moni pe a tatou faia ni mea sesē. Ae i le pei o Elia, e manaʻomia ona tatou faalagolago atu iā Ieova mo le malosi i taimi o popolega. O le faia faapea, e fai ai Ieova ma o tatou Atua i le taimi nei e oo i le faavavau, auā o Ieova o le “Atua soifua, o ia o le Faaola o tagata uma, aemaise lava o ē ua faatuatua.”—1 Timoteo 4:10.

[Faamatalaga pito i lalo]

[Ata i le itulau 25]

O galuega o le usiusitai, na faamalosia ai le faatuatua o Aperaamo

[Ata i le itulau 26]

I le pei o Tavita, e ao ona tatou salamō pe a tatou agasala

[Ata i le itulau 28]

E pei ona malamalama Ieova i faalogona o Elia, e faapena foʻi ona malamalama o ia i o tatou faalogona