Suʻesuʻega e 6—Le Tusi Paia Eleni

Le auala na kopi ai le Tusi Paia Eleni; le teuteuina o le gagana Eleni ma isi gagana e oo mai i le asō; le maufaatuatuaina o tusitusiga faaonapōnei.

NA AʻOAʻOINA atu ma faasalalauina e uluaʻi Kerisiano ‘afioga a Ieova.’ Na latou manatu mamafa i fetalaiga a Iesu a o toeitiiti afio i le lagi: “O le a maua e outou le mana, pe a afio ifo le Agaga Paia i luga iā te outou; e fai foʻi outou ma molimau iā te aʻu i Ierusalema, ma Iutaia uma lava, ma Samaria, e oo lava i le tuluʻiga o le lalolagi.” (Isa. 40:8; Galu. 1:8) E pei ona valoia e Iesu, na maua e uluaʻi soo e 120 le agaga paia lea na faamalosia ai i latou i le Penetekoso 33 T.A. O le aso foʻi lenā na taulamua ai Peteru i le aʻoaʻoina o tagata e ala i le molimau māeʻaeʻa, ma na taliaina ma le fiafia e le toʻatele le feʻau. E pe tusa e 3,000 na faaopoopoina i le faapotopotoga fou Kerisiano ua faatoʻā faavae.—Galu. 2:14-42.

² Na faagaeetia i latou e faatinoina se polokalame tau aʻoaʻoga lea o le a salalau atu i le atu laulau uma. (Kolo. 1:23) Ioe, na sogasogā nei molimau faamaoni a Ieova e savavali mai lea fale i lea fale, mai lea aai i lea aai, mai lea nuu i lea nuu ina ia folafola “le tala lelei i le manuia.” (Roma 10:15) O lenei tala lelei na aofia ai le taulaga a Keriso, le faamoemoe o le toe tū ma le Malo o le Atua. (1 Kori. 15:1-3, 20-22, 50; Iako. 2:5) O le taimi muamua lenā ua molimau atu ai i tagata uma lava e faatatau i mea e lē vaaia. Na fai ma “mea ua faamoemoe i ai, o le mautinoa lea o mea e lē o vaaia,” e faaalia ai le faatuatua o le toʻatele o tagata ua fai Ieova ma o latou Alii Silisili ese e faavae aʻe i le taulaga a Iesu.—Epe. 11:1; Galu. 4:24; 1 Timo. 1:14-17.

³ O nei tane ma fafine Kerisiano, o auauna ua aʻoaʻoina a le Atua. Sa mafai ona latou faitau ma tusitusi. Na aʻoaʻoina i latou i le Tusi Paia Eperu. Na latou malamalama i mea na tutupu i le lalolagi. Na masani foʻi ona latou faimalaga. Na pei i latou o sē akerise ona e ui lava i le tele o toʻatugā, ae e leʻi faalavelavea ai i latou mai le faasalalauina o le tala lelei. (Galu. 2:7-11, 41; Ioe. 2:7-11, 25) I le uluaʻi senituri T.A., na latou talaʻi atu i tagata e faapei o tagata i ona pō nei.

⁴ Ona o i latou o tagata talaʻi o “le upu o le ola,” na faaaogā lelei ai e uluaʻi Kerisiano tusi tāʻai o le Tusi Paia na mafai ona latou mauaina. (Fili. 2:15, 16; 2 Timo. 4:13) Na fesoasoani Ieova i nisi o i latou e pei o Mataio, Mareko, Luka, ma Ioane ina ia faamaumau i lalo “le tala lelei iā Iesu Keriso.” (Mare. 1:1; Mata. 1:1) O isi o i latou e pei o Peteru, Paulo, Ioane, Iakopo, ma Iuta na faaosofia e le agaga paia ina ia tusi a latou tusi. (2 Pete. 3:15, 16) O isi na kopiina nei tusi tāʻai mai le Atua, lea na feaveaʻi i faapotopotoga ua faatoʻateleina. (Kolo. 4:16) Na faia foʻi e “le ʻau aposetolo ma toeaina i Ierusalema” faaiʻuga tau aʻoaʻoga e ala i le agaga o le Atua, ma na faamaumau i lalo nei faaiʻuga ina ia mulimuli i ai. Na auina atu foʻi e lenei vaega pule tusi o faatonuga i faapotopotoga tū mamao ese. (Galu. 5:29-32; 15:2, 6, 22-29; 16:4) Ona o lea, na latou momoli atu a latou tusi i faapotopotoga.

⁵ Ina ia tufatufaina atu le Tusi Paia ma ia faigofie ona faitau, na amata ai ona faaaogā e uluaʻi Kerisiano ia manusikilipi e taʻua o le codex, e suitulaga i tusi tāʻai. O le codex e faapei o tusi i aso nei e faigofie ona suʻe itulau, na i lo tusi tāʻai e alu se taimi o tau suʻe. E lē gata i lea, na mafai e le codex ona tuufaatasia tusi o le Tusi Paia, ae e leʻi mafai ona faia muamua lenā mea ona na tuueseese tusi o tusi tāʻai. O uluaʻi Kerisiano tagata muamua lava na faaaogāina le codex. Atonu o i latou foʻi na muamua lava ona faia le codex. E ui lava na tuai ona faaaogā le codex e tusitala e lē o ni Kerisiano, ae o le tele o tusitusiga a Kerisiano i le senituri lona lua ma le tolu, na faaaogā ai le codex.a

⁶ Le Gagana Koine (Gagana Taatele Eleni). Na faaaogāina le gagana maotua Eleni mai le senituri lona iva T.L.M. e oo i le lona fā T.L.M. O le taimi lenā na faaaogā ai gagana a le ʻau Attica ma Ionia. O le vaitaimi lenā aemaise lava i senituri lona lima ma le fā T.L.M., na taulau ai le toʻatele o tagata Eleni o ē na faatinoina tala, o le ʻaufatusolo, ʻaufailauga, o ē popoto i le talafaasolopito, le ʻaufaifilosofia ma le ʻausaienitisi lea na lauiloa ai Homer, Herodotus, Socrates ma Plato. E amata mai i le pe tusa o le senituri lona fā T.L.M. e oo i le ono T.A., na taʻua lenā vaitaimi o le Koine, po o le gagana taatele Eleni. Na fafau aʻe le tele o lenā gagana e ʻautau a Alesana le Sili o ē na ō mai mai vaega eseese o Eleni. Na eseese le auala na latou tautatala ai i le gagana Eleni ma a o miomiō faatasi, na maua ai le gagana taatele o le Koine lea na tautatala ai le toʻatele. Ina ua manumalo Alesana i Aikupito ma Asia e oo atu i Initia, na salalau atu ai le gagana Koine i na atunuu mamao. Na avea lenā gagana ma gagana taatele a le lalolagi mo le tele o senituri. O le Tusi Paia Septuagint na faaaogā ai le gagana Koine a Alesania i Aikupito i le senituri lona tolu ma le lua T.L.M.

⁷ I ona pō o Iesu ma ona aposetolo, o le gagana Koine na faaaogā e atunuu na pulea e Roma. Ua faamaonia e le Tusi Paia lenā mea. A o faatautau Iesu i le satauro, o le faamatalaga lea na faapipii i luga aʻe o lona ao na tusia i le gagana a tagata Iutaia o le faa-Eperu, ma na tusia foʻi i le gagana a le atunuu o le faa-Roma faapea ma le gagana Eleni, lea na taatele i Ierusalema e pei ona taatele i Roma, Alesania po o Atenai. (Ioa. 19:19, 20; Galu. 6:1) O loo taʻua i le Galuega 9:29 na talaʻia e Paulo le tala lelei i Ierusalema i le ʻau Elenisi. O le taimi lenā na avea ai le gagana Koine o se gagana lelei ma talafeagai auā le fuafuaga matagofie a Ieova ina ia faailoa atu lana Afioga.

LE AUALA NA MAUA AI LE TUSI PAIA ELENI E OO MAI I LE ASŌ

⁸ I le suʻesuʻega e ono, na taʻua ai na faasao e Ieova lana upu moni i le Tusi Paia Eperu. Ae faapefea tusi a aposetolo ma isi soo o Iesu Keriso? Pe na lelei ona faasaoina na tusi e pei o le Tusi Paia Eperu? Ioe, na lelei ona faasaoina e pei ona faamaonia e se iloiloga o le tele o manusikulipi ua faasaoina o le gagana Eleni ma isi gagana. E pei ona taʻua, e 27 tusi ua faamaonia o le Tusi Paia Eleni. Ia tomānatu i le auala na faasao ai nei uluaʻi tusi Eleni e 27 e oo mai i aso nei.

⁹ Uluaʻi Manusikulipi Eleni. O tusi e 27 o le Tusi Paia Eleni na tusia i le gagana Eleni na taatele i lenā taimi. Peitaʻi ane, e foliga mai na tusia muamua le tusi o Mataio i le gagana Eperu mo tagata Iutaia. O le faamatalaga lenā a Ierome, o sē na faaliliuina le Tusi Paia i le senituri lona fā, ma na ia taʻua e faapea na faaliliuina i le faa-Eleni. Atonu o Mataio na faia lenei galuega faaliliu ona o ia o se aolafoga mo le malo o Roma, e lē taumatea la na malamalama o ia i le gagana Eperu, Latina ma le Eleni.—Mare. 2:14-17.

¹⁰ O isi tusitala o le Feagaiga Fou o Mareko, Luka, Ioane, Paulo, Peteru, Iakopo, ma Iuta na tusia a latou tusi i le gagana taatele o le Koine, lea na malamalama ai le ʻau Kerisiano ma le toʻatele o isi tagata o le uluaʻi senituri. Na tusia e Ioane le tusi mulimuli pe tusa o le 98 T.A. Ua lē o toe iai nei uluaʻi manusikulipi e 27 i le gagana Koine. Peitaʻi ane, ua tatou mauaina le anoanoaʻi o kopi o uluaʻi manusikulipi o le Tusi Paia Eleni.

¹¹ E Silia i le 13,000 Manusikulipi. E anoanoaʻi kopi o manusikulipi o tusi uma e 27 o loo maua i aso nei. O nisi o nei manusikulipi o loo iai se vaega tele o le Tusi Paia, a o isi manusikulipi ua na o ni nai vaega o le Tusi Paia. E tusa ai ma se tasi aofaʻiga, e silia i le 5,000 manusikulipi i le gagana tuai Eleni. E lē gata i lea, e silia i le 8,000 manusikulipi i isi gagana—a tuufaatasi e silia i le 13,000 manusikulipi. Na faia nei kopi i le senituri lona lua T.A. e oo i le senituri lona 16 T.A., ma ua fesoasoani ina ia malamalama ai i uluaʻi tusitusiga. O le manusikulipi aupito i tuai, o se vaega o le manusikulipi paʻulaau o le tusi o Ioane e taʻua o le numera P^{5 2} o loo i le Faletusi a John Rylands i Manchester i Egelani, lea na tusia i le senituri lona lua, atonu pe tusa o le 125 T.A.b O lea la, na faia lenei kopi pe tusa e 25 tausaga mai le taimi na tusia ai le uluaʻi manusikulipi. Pe a fua atu i tusitusiga a le toʻatele o tusitala lauiloa, e itiiti manusikulipi o loo iai ma o kopi o na uluaʻi manusikulipi na faia i le tele o senituri mulimuli ane ai. Tatou te talisapaia ai le tele o faamaoniga e fesoasoani iā i tatou e maua ai ni tusi ua faamaonia o le Tusi Paia Eleni.

¹² Manusikulipi Paʻulaau. E pei o uluaʻi kopi o le Tusi Paia o le Septuagint, na tusia manusikulipi muamua o le Tusi Paia Eleni i paʻulaau, ma na faaaogā paʻulaau mo manusikulipi o le Tusi Paia, seʻia oo mai pe tusa o le senituri lona fā T.A. E foliga mai na faaaogā foʻi e tusitala o le Tusi Paia, paʻulaau mo tusi na auina atu i faapotopotoga Kerisiano.

¹³ E anoanoaʻi tusitusiga paʻulaau na maua i Faiyūm i Aikupito. I le faaiʻuga o le senituri lona 19, na maua ai ni manusikulipi o le Tusi Paia na faia i paʻulaau. O se tasi o manusikulipi aupito i tāua na maua i ona pō nei, na faailoa atu i tagata i le 1931. Na iai i lea manusikulipi ni vaega o tusi tāʻai e 11, e aofia ai vaega o tusi eseese e 8 o le Tusi Paia Eperu ma tusi e 15 o le Tusi Paia Eleni o loo tusia uma i le gagana Eleni. O nei manusikulipi na tusia i le senituri lona lua e oo i le fā T.A. O le tele o vaega o le Tusi Paia Eleni lea na maua, o loo teuina i le faletusi o Chester Beatty ma e taʻua o le P^{4 5} , P^{4 6} , ma le P^{4 7} . O le faaumi o le “P” o le “Papyrus” po o paʻulaau.

¹⁴ O se isi manusikulipi mataʻina na faia i Geneva i Suiselani mai le 1956 i le 1961. E taʻua lenei manusikulipi o le Bodmer, e aofia ai tusi tuai o Evagelia e lua (P^{6 6} ma le P^{7 5} ) lea na tusia i le amataga o le senituri lona tolu T.A. I le siata i le itulau e 20, o loo lisi mai ai nisi o manusikulipi iloga o le Tusi Paia Eperu ma le Eleni na tusia i paʻulaau. I le itu taumatau o le siata, o loo iai mau i le New World Translation of the Holy Scriptures lea ua faamaonia e nei manusikulipi paʻulaau, ma e iloa lenei mea i faamatalaga pito i lalo o nei mau.

¹⁵ O le mauaina o nei manusikulipi paʻulaau ua faamaonia ai ua leva ona māeʻa le lisi o tusi ua faamaonia o le Tusi Paia. E lua manusikulipi o loo aofia i manusikulipi paʻulaau a Chester Beatty—o le tasi o manusikulipi o loo tuufaatasia ai vaega o tusi o Evagelia e fā ma le Galuega (P^{4 5} ), a o le isi manusikulipi o loo tuufaatasia ai tusi e 9 a Paulo mai ana tusi e 14 (P^{4 6} )—e faaalia ai na māeʻa ona tuufaatasia le Tusi Paia Eleni a o leʻi leva ona maliliu le ʻauaposetolo. Ona e umi se taimi ona salalau atu lea o nei manusikulipi i Aikupito, e foliga mai na tuufaatasia nei tusitusiga paia i le senituri lona lua. O lea la, e mautinoa lava e oo ane i le faaiʻuga o le senituri lona lua, ua māeʻa le lisi o tusi o le Tusi Paia Eleni ma faapea ona māeʻa ai le lisi o tusi o le Tusi Paia atoa.  

¹⁶ Manusikulipi Paʻumanu. E pei ona tatou iloa mai le suʻesuʻega e lima, na amata ona faaaogā paʻumanu anagatā lea e masani ona fai mai i paʻu o tamaʻi povi, mamoe po o oti, e fai ai manusikulipi e suitulaga i paʻulaau, e amata mai i le pe tusa o le senituri lona fā T.A. Na tusia i paʻumanu nisi o manusikulipi tāua o le Tusi Paia o loo iai i aso nei. O loo lisi mai i le itulau e 21 nisi o manusikulipi mataʻina e fai i paʻumanu o le Tusi Paia Eleni ma le Tusi Paia Eperu. O manusikulipi o le Tusi Paia Eleni na tusia i mataʻitusi lapopoʻa. O loo lipotia e le New Bible Dictionary e 274 manusikulipi faapena o le Tusi Paia Eleni, ma na tusia i le senituri lona fā T.A. e oo i le senituri lona sefulu T.A. Ae e silia i le 5,000 manusikulipi tusilima i mataʻitusi laiti.c Na tusia uma nei manusikulipi i paʻumanu e amata mai i le senituri lona iva T.A. seʻia oo ina faaaogā masini lomitusi. Ona ua leva ona iai ma e saʻo faamatalaga o loo iai, sa tele ina faaaogā e le komiti na faaliliuina le New World Bible manusikulipi mataʻitusi lapopoʻa e fai ai a latou faaliliuga mai tusitusiga Eleni. O loo faaalia lenei mea i le siata “Nisi o Manusikulipi Iloga na Fai i Paʻumanu.”

VAITAIMI O LE FAALELEIGA O KOPI O LE TUSI PAIA

¹⁷ Tusitusiga a Eramasi. Mai le 476 T.A. e oo i le 1,000 T.A., a o taatele le gagana Latina ma o loo pule malosi le lotu Katoliko Roma i Europa i Sisifo, na paʻū maulalo ai le tulaga tau aʻoaʻoga. Peitaʻi, ina ua faia masini lomitusi i Europa i le senituri lona 15 ma toe fuataʻi le lotu Katoliko i le amataga o le senituri lona 16, na maua ai e tagata le saʻolotoga ma toe uaʻi atu i le gagana Eleni. O le vaitaimi lenā o le sogasogā i aʻoaʻoga, na tusia ai e le alii poto lauiloa mai Holani o Eramasi, lana kopi autū o le “Feagaiga Fou.” (Na saunia lenei tusi faavae Eleni e ala i le faatusatusa lelei o manusikulipi ma faaaogā upu ua malilie i ai le toʻatele o tagata. E masani ona iai faamatalaga i le pito i lalo i le eseesega o nisi o manusikulipi.) Na lomia lenei uluaʻi tusi i Basel i Suisilani i le 1516, ma o le tausaga na sosoo ai na amata ai ona toe fuataʻi le lotu Katoliko i Siamani. E tele ni mea sesē i le uluaʻi tusi, ae na toe faaleleia mulimuli ane i tusi na maua i le 1519, 1522, 1527, ma le 1535. E itiiti lava manusikulipi tusilima tuai na maua e Eramasi mo le tuufaatasia ma le sauniunia o lana tusi faavae.

¹⁸ O tusitusiga Eleni ua toe faaleleia a Eramasi, na faavae aʻe ai faaliliuga a isi gagana a Europa i Sisifo. O lenei mea ua mafai ai ona maua ni faaliliuga e sili atu ona lelei na i lo lomiga na faaliliuina muamua mai le Tusi Paia Latina o le Vulgate. O le tagata muamua na faaaogā tusitusiga a Eramasi o Matini Luteru mai Siamani, ma na māeʻa lana faaliliuga faa-Siamani o le Tusi Paia Eleni i le 1522. E ui i sauāga ogaoga, ae na faaliliuina e Viliamu Tiniteli mai Egelani lana faaliliuga faa-Peretania e faavae aʻe i tusitusiga a Eramasi, ma na māeʻa lana faaliliuga a o faaaunuua i Europa i le 1525. Na faaliliu e Antonio Brucioli mai Italia tusitusiga a Eramasi i le gagana Italia i le 1530. Ona ua maua tusitusiga Eleni a Eramasi, ua amata ai ona toe iloilo tusitusiga. O le iloiloina o tusitusiga, o le auala lea e toe faaleleia ma toe faafoʻisia ai uluaʻi tusitusiga o le Tusi Paia.

¹⁹ Vaevaeina i Mataupu ma Fuaiupu. Na lauiloa Robert Estienne, po o Setefano o se alii lomitusi ma se faatonu i tusi i le senituri lona 16 i Pale. Ona o ia o se faatonu i tusi, na ia iloa ai aogā o le metotia o le vaevae o tusi i mataupu ma fuaiupu ina ia faafaigofie ai le suʻeina o mau. O lea na ia faaaogā ai lenei metotia i lana faaliliuga Eleni ma Latina o le Feagaiga Fou i le 1551. Na muaʻi vaevaeina fuaiupu o le Tusi Paia Eperu a le ʻau Masoreta, peitaʻi ane, o le Tusi Paia Falani a Setefano i le 1553 o loo maua ai le uluaʻi vaevaega o le Tusi Paia atoa, e pei ona iai i aso nei. Na faia foʻi i Tusi Paia Peretania lea na mafai ai ona iai faasino mau o le Tusi Paia e pei o le tusi a Alexander Cruden i le 1737, ma tusi faasino mau e lua mo le Tusi Paia Peretania o le Authorized Version—o le tusi a Robert Young lea na muaʻi lomia i Edinburgh i le 1873, ma James Strong lea na lomia i Niu Ioka i le 1894.

²⁰ Tusitusiga ua Maua. Na saunia foʻi e Setefano lomiga Eleni o le “Feagaiga Fou.” Na tele ina faavae aʻe i tusitusiga a Eramasi ma na faasaʻoina e tusa ai o le Complutensian Polyglott o le 1522 ma manusikulipi tusilima e 15 o senituri na muamua atu. O le lomiga lona tolu o tusitusiga Eleni a Setefano i le 1550 na taʻua o “tusitusiga ua maua” (o le faa-Latina Textus Receptus) o lea na faavae aʻe ai isi Tusi Paia Peretania o le senituri lona 16, ma le King James Version o le 1611.

²¹ Tusitusiga Eleni ua Toe Faaleleia. Na faia mulimuli ane e tagata popoto o le gagana Eleni tusitusiga e sili atu ona lelei. O se tasi o tusitusiga mataʻina na faia e J. J. Griesbach, lea na ia faaaogāina le faitau afe o manusikulipi Eleni na maua i le faaiʻuga o le senituri lona 18. Na lomia i le 1796-1806 le lomiga aupito i lelei a Griesbach o le Tusi Paia Eleni atoa. O lana kopi autū na faavae aʻe ai le faaliliuga faa-Peretania a Sharpe i le 1840 ma tusitusiga Eleni i le The Emphatic Diaglott, lea na lomia atoa i le 1864. O isi faaliliuga mataʻina na faia e Konstantin von Tischendorf (1872) ma Hermann von Soden (1910). O le faaliliuga a Hermann na faavae aʻe ai le Tusi Paia Peretania a Moffatt i le 1913.

²² Tusitusiga a Westcott ma Hort. Na lomia e le iunivesite o Cambridge le tusi faavae Eleni a alii popoto o B. F. Westcott ma F. J. A. Hort i le 1881, lea ua taliaina e le toʻatele o tagata. Na iloiloina e le British Revision Committee le tusi Eleni a Westcott ma Hort lea na toe teuteu ai le “Feagaiga Fou” i le 1881. O lenā tusi na faavae ai Tusi Paia Eleni a lomiga Peretania nei: o le New World Translation, The Emphasised Bible, o le American Standard Version, An American Translation (Smith-Goodspeed), ma le Revised Standard Version. Na faaaogā foʻi e le faaliliuga mulimuli le lomiga a Nestle.

²³ O le lomiga Eleni a Nestle (lomiga lona 18 i le 1948) na faaaogā e le komiti faaliliu o le New World ina ia fai ai faatusatusaga. Na faaaogā foʻi e le komiti lomiga a alii popoto o le lotu Katoliko o José M. Bover (1943) ma Augustinus Merk (1948). O le lomiga a le United Bible Societies o le 1975 ma le Nestle-Aland i le 1979 na faaaogā e faafou ai faamatalaga pito i lalo o le Tusi Paia lapoʻa o le 1984.d

²⁴ Faaliliuga Anamua Mai le Gagana Eleni. E lē gata o manusikulipi Eleni, ae o loo iai foʻi i aso nei le tele o faaliliuga o isi gagana o manusikulipi o le Tusi Paia Eleni. E silia i le 50 manusikulipi (po o vaega o manusikulipi) o le Tusi Paia Latina ma le faitau afe o manusikulipi o le faaliliuga Latina a Ierome o le Vulgate. Na faaaofia nei lomiga e le komiti faaliliu o le New World, faapea foʻi ma faaliliuga a le ʻau Copt, Aminia, ma Syriac.e

²⁵ Na faaliliuina le Tusi Paia Eleni i le gagana Eperu e amata mai le senituri lona 14. O ni faaliliuga faaosonaunau talu ai o nisi o nei faaliliuga, ua toe faafoʻisia ai le suafa o le Atua i le Feagaiga Fou. O loo tele ina taʻua e le New World Translation nei lomiga Eperu i lalo o le mataʻitusi o le “J.” Mo nisi faamatalaga, tagaʻi i le faatomuaga o le New World Translation of the Holy Scriptures—With References, itulau e 9-10, ma le faaopoopoga 1D, “The Divine Name in the Christian Greek Scriptures.”

ESEESEGA O MANUSIKULIPI

²⁶ E tele eseesega o loo iai i manusikulipi e silia i le 13,000 o le Tusi Paia Eleni. O loo faaalia lenā mea i manusikulipi Eleni e 5,000. E ao ona tatou malamalama, o kopi taʻitasi na fai mai i uluaʻi manusikulipi, e tofu manusikulipi ma mea sesē na faia e le tagata tusiupu. A o auina atu nei uluaʻi manusikulipi i isi vaipanoa, na faaauau ona kopiina nei mea sesē i isi manusikulipi. O le auala lenā na faia ai kopi o manusikulipi. Po o lona uiga la, e tatau ona faapopoleina i tatou i le tele o mea sesē na faia e le ʻautusiupu? Pe e faaalia ai le lē faamaoni o le auala na kopi ai? E matuā leai lava!

²⁷ Na tusi F. J. A. Hort, o lē na fesoasoani i le lolomiina o tusitusiga a Westcott ma Hort: “Talu ai e tau leai ni suiga o upu i le Feagaiga Fou, e lē mafai ona faitioina, ae e manaʻomia ona faaliliuina i isi gagana. . . . O upu ua faitioina e isi, e matuā itiiti lava ma e lē tāua foʻi.”f

²⁸ Iloiloina o le Moni Aʻiaʻi o Kopi. O le ā se iʻuga o iloiloga o le moni aʻiaʻi o tusitusiga, aemaise ua faitau senituri o faia kopi? O loo iai le faitau afe o manusikulipi e faatusatusa, ma ua maua foʻi manusikulipi tuai o le Tusi Paia lea e iai tusitusiga Eleni o le 125 T.A., e lē mamao mai le tausaga na maliu ai le aposetolo o Ioane pe tusa o le 100 T.A. Ua matuā faamaonia e nei manusikulipi, o loo iai se tusi faavae Eleni maufaatuatuaina ua faaleleia. Ia mātau le taofi o lē na avea muamua ma faatonusili o le British Museum o Sir Frederic Kenyon:

²⁹ “Ona e lē tele ni tausaga e va ai le taimi na tusia ai uluaʻi tusitusiga o le Feagaiga Fou ma kopi tuai o loo iai, o lea la, tatou te mautinoa e saʻo kopi o loo iā i tatou. E mafai ona faapea atu ua faamautūina le moni aʻiaʻi o tusi o le Feagaiga Fou. Peitaʻi, e eseese le moni o le faaliliuga ma le talitonuina o faamatalaga o loo iai.”g

³⁰ O loo iai se faamatalaga a Hort i le palakalafa e 27 e faatatau i le manatu mulimuli o “le talitonuina o faamatalaga o loo iai.” O le galuega a ē faaleleia tusitusiga o le faaleleia lea o manatu o loo iai, ma e anoanoaʻi manatu ua latou faaleleia. O le pogai lea ua iai se manatu e faapea, o tusitusiga Eleni a Westcott ma Hort lea ua toe faaleleia, o se manusikilipi e sili ona lelei. O lea la, ona o loo faavae aʻe le Tusi Paia Eleni a le New World Translation i lenei tusitusiga Eleni sili ona lelei, ua mafai ona maua e le ʻaufaitau “afioga a le Alii” o Ieova ona ua matuā lelei ona faasaoina mo i tatou i manusikulipi Eleni.—1 Pete. 1:24, 25.

³¹ O loo taʻua foʻi e Frederic Kenyon i lana tusi Our Bible and the Ancient Manuscripts, 1962, i le itulau e 249: “E tatau ona tatou lotomalilie e iloa e faapea, ua matuā lagolagoina le moni o le Feagaiga Fou e tusitusiga ua maua i aso nei, lea ua matuā faaitiiti ai le eseesega o uluaʻi tusitusiga ma uluaʻi manusikulipi, ma o eseesega o loo iai e lē aafia ai aʻoaʻoga faavae o le faatuatuaga Kerisiano.” E pei ona faaalia i le siata o “Lomiga sa Faavae ai le New World Translation—Le Tusi Paia Eleni” i le itulau e 17, sa faaaogā tusitusiga talafeagai ina ia saunia ai se faaliliuga saʻo i le gagana Peretania. O loo lagolagoina e faamatalaga tāua pito i lalo, nei faaliliuga faamaoni. A o faia la latou faaliliuga lelei, na faaaogā e le komiti faaliliu o le New World, faaiʻuga aupito i lelei o suʻesuʻega a tagata popoto o le Tusi Paia i le faasologa o tausaga. Ioe, tatou te mautinoa o le Tusi Paia Eleni lea ua tatou mauaina, o loo iai “matua o upu e ola ai” lea na tusia e soo o Iesu Keriso e ala i le agaga paia. Ioe, seʻi o tatou taofimau i nei upu tāua i le faatuatua ma le alofa!—2 Timo. 1:13.

³² O lenei mataupu ma le mataupu e lima, na iloilo ai manusikulipi ma tusitusiga o le Tusi Paia. Aiseā e iloilo totoʻa ai na manusikulipi ma tusitusiga? Ina ia faaalia ai e faapea, o le Tusi Paia Eperu ma le Eleni e tutusa lelei ma uluaʻi tusitusiga na tusia e tane faamaoni i aso anamua, e ala i le agaga paia o Ieova. O na uluaʻi tusitusiga e mai le Atua. Ae e leʻi faaosofia e le agaga o le Atua tagata na kopiina na tusitusiga, e ui o se galuega lelei na latou faia. (Sala. 45:1; 2 Pete. 1:20, 21; 3:16) O lea la, e tatau ona iloilo lelei le tele o kopi o nei manusikulipi ina ia manino lelei i upu moni e pei ona muaʻi aumaia e Ieova. Ioe, e ave le viiga iā Ieova mo le meaalofa matagofie o le Tusi Paia, faapea foʻi le feʻau e faafouina ai o le Malo!

[Faaopoopoga i lalo]